Imaq aappalaartoq ikaaraat

PISOQ takoriaruk! Moses qeqarpoq ajaappissanilu Immamut Aappalaartumut isatsillugu. Ikaaqatai annassimasut Israelikkuupput. Faraoli sakkutoorpassuilu tamarmik Immami Aappalaartumi ipipput. Tamanna qanoq pisoq tusariassagit.

Soorlu atuareeripput, Faraop Israelikkut Egyptenimit aallarnissaannik akuerisimavai Guuti perluit qulingannik Egyptenimiunut nalliutitsereermat. Israelikkut angutit 600.000-it missaat aallarput, arnarpassuit meerarpassuillu saniatigut. Aamma inuppassuit, Jehovamut uppertunngortut, Israelikkut ilagalugit aallarput. Tamarmik savaatitik savaasaatitillu nersutaatitillu nassarpaat.

Israelikkut aallannginnerminni Egyptenimiunut atisanik pigisanillu kuultiusunik siilviusunillu qinusimapput. Egyptenimiut annilaangasimapput perluit kingullersaat atugartik pissutigalugu. Taamaattumik Israelikkut qinnutigisaannik tamanik tunisimavaat.

Ullut arlaqanngitsut qaangiummata Imaq Aappalaartoq anguaat. Tassani qasuersaarput. Taamaalinerani Farao innuttaalu peqqissimilerput Israelikkut aallartissimagamikkik. ’Sooruna inussiaativut aallartikkivut!’ oqarput.

Tassa Faraop isummani allanngorteqqippaa. Tuaviorluni qamutini sakkutoorpassuanilu piareersartippai. Taava Israelikkut malersulerpai qamutit sorsuutit pitsaanerpaat 600-t, Egyptenimiullu qamutaat allat ilanngullugit, ingiallortigalugit.

Israelikkut Faraop sakkutoorpassuisalu malersoraatik takuleramikku annilaaqaat. Qimaaffissaqanngillat. Imaq Aappalaartoq illua tungaaniippoq, Egyptenimiullu illua tungaanit aggerput. Jehovalli nuiaq innuttami Egyptenimiullu akornannut pisippaa. Taava Egyptenimiut Israelikkut takusinnaajunnaarpaat saassussinnaajunnaarlugillu.

Taava Jehovap Moses oqarfigaa ajaappissani Immamut Aappalaartumut isatseqqullugu. Taamaaliormat Jehovap assarnersorsuanngortippaa. Imaq avissaarpoq, imarlu illugiinni tamani iiganngorluni.

Taava Israelikkut immap qeqqagut panertukkut ingerlalerput. Nalunaaquttap-akunneri arlallit atortariaqarput inuit millionillit uumasuutitik ilanngullugit imaq ikaarlugu akianut annallutik apuunnissaannut. Kiisami Egyptenimiut Israelikkut takoqqissinnaalerpaat. Inussiat aniguilerput! Taava immamut aterasuarput malersorlugit.

Taamaalioriarmata qamutaasa assakaasui Guutip katatsippai ingerlasinnaajunnaarsillugit. Egyptenimiut annilaartorujussuupput torlulallutillu: ’Jehova Israelikkut illersorlugit sorsuppoq uatsinnut. Qimaasa!’ Inortuippulli.

Taava Jehovap Moses oqarfigaa ajaappissani Immamut Aappalaartumut isatseqqullugu, soorlu assilissami takugit. Mosesilu taamaalioriarmat imaq iikkatut ittoq uterialerpoq Egyptenimiullu qamutaallu matullugit. Sakkutoorpassuit tamarmik Israelikkut malersorlugit immamut atersimapput. Egyptenimiumik ataatsimilluunniit annattoqanngilaq.

Guutip innuttai tamarmik annakkamik pilluaqaat! Angutit Jehova qujaniummik erinarsorfigaat: ’Jehova inornartumik ajugaavoq. Hiistit qimussertuilu immamut naluppai.’ Mosesip aleqaata Mirjamip qilaatini tiguaa, arnallu tamarmik malippaat qilaammik tigusillutik. Nuannaaqalutillu qititsillutik erinarsuut angutit erinarsuutigisaat atorpaat: ’Jehova inornartumik ajugaavoq. Hiistit qimussertuilu immamut naluppai.’