Egyptenimi kunngi ajortoq

ANGUTIT ukua inunnik pinngitsaaliillutik sulisitsipput. Takuuk angut sulisut ilaannik iperartuisoq! Sulisut tassa Jakobip kinguaavi, Israelikkunnik taagorneqartut. Pinngitsaaliillutik sulisitsisut Egyptenimiuupput. Israelikkut Egyptenimiunut inussianngorsimapput. Tamanna qanoq pisimava?

Ukiorpassuit Jakobip ilaqutarpassui Egyptenimi eqqissisimallutik inuupput. Josefip, Egyptenimi Faraomut kunngiusumut tulliulluni pingaarnerpaasup, isumassorsimavai. Taavali Josef toquvoq. Farao nutaaq Israelikkunnik nuannarisaqanngitsoq Egyptenimi kunnginngorpoq.

Taamaattumik Faraop ajortup taassuma Israelikkut inussianngortippai. Angutillu misigittaatsut naakkittaatsullu taakkununnga nakkutilliisunngortippai. Israelikkut pinngitsaalillugit sulerulutsippaat Faraomut illorpassuaqarfiliortillugit. Israelikkulli amerliartortuarput. Kingorna Israelikkut amerlavallaalernissaat pissaaneqarpallaalernissaallu Egyptenimiut aarleqqutigilerpaat.

Farao qanoq iliortoq nalunngiliuk? Arnat Israelikkut arnartaannut ernisussiortuusut oqaluffigai, oqarluni: ’Nukappiaqqat inunngortut tamaasa toquttassavasi.’ Ernisussiortulli arnaapput ajunngitsut, naalungiarsuillu toqukkumanngilaat.

Taava Faraop innuttani tamaasa imaattumik naalakkerpai: ’Israelikkut naalungiarsuit nukappiaqqat tamaasa toqorarsigik. Naalungiarsuit niviarsiaqqat kisiisa inuutillugit.’ Naalakkiutaata peqqarniissusia, ilaa? Naalungiarsuit nukappiaqqat ilaat ataaseq qanoq annaanneqartoq takoriartigu.