Tupeq pallorfiginninnermi atugaq

ILLULIAQ una sunaasoq nalunngiliuk? Tupiuvoq immikkut ittoq Jehovamik pallorfiginninnermi atugassaq. Illernartuummik taagorneqarpoq. Inuit inerpaat ukioq ataaseq Egyptenimit aallarnermik kingornagut. Sananeqarnissaa kia isumassarsiarigaa nalunngiliuk?

Jehovap isumassarsiaraa. Moses Sinajip qaqqaaniitillugu Jehovap nassuiaassimavaa qanoq sananeqarnissaanik. Oqarsimavoq sananeqassasoq isateruminartunngorlugu. Taamaalilluni immikkoortortai ataasiakkaat allamut angallanneqarsinnaassapput, taavalu katiterneqaqqittarlutik. Israelikkut puilasuitsumi nuttarnerminni tupeq nassataraat.

Ineeqqamut toqqup isuaniittumut qiviaruit illerfik takusinnaassavat. Taanna taagorneqarpoq angerutsip illerfianik. Marlunnik kuultiusunik inngiliusartaqarpoq, imaluunniit keerupiusartaqarpoq, isuini illuttut ittunik. Guutip inatsisit qulit ujaqqanut allaffissianut allaqqippai, Mosesip siulliit sequmisimmagit. Ujaqqallu marluk taakku angerutsip illerfianiitinneqarput. Aamma qummuattaqarpoq mannanik imalimmik. Mannat suusut eqqaamaviuk?

Mosesip angajua Aron Jehovap qinerpaa palasiuninngortillugu. Taassuma inuit Jehovamik pallorfiginninnermi siulersorpai. Ernerilu palasiupput.

Toqqup initaa annerusoq qiviaruk. Ineeqqamit marloriaammik anneruvoq. Illerfik karsitut ittoq pujoortoq takusinnaaviuk? Taanna pilliiviuvoq palasit tipigissaatilliisarfiat. Qullilerfeqarporlu arfineq-marlunnik qullitalimmik. Inimiittullu pingajoraat nerriviusaq. Timiusat aqqaneq-marluk qaavaniittarput.

Illernartuutip silarliani puugutaasarsuaqarpoq imermik imalimmik. Taanna palasit asaffigisarpaat. Pilliivissuaqarporlu. Tassani uumasut toqungasut Jehovamut pilliutitut ikikkagaasarput. Tupeq tammaarfiup qeqqaniippoq, kaajallallugulu Israelikkut tuperni najugaqarput.