Tupeq guutisiorfik

Moorsisi qaqqami Siinaajimiitillugu Jehovap immikkut ittumik tupilioqquaa Israalikkut Jehovamik guutisiorfigisin­naasaannik. Tupeq guutisiorfik taanna sumiiffimmiit sumiiffimmut angalagaangamik nassarsin­naasussaavaat.

Jehova oqarpoq: ‘Inuit tupiliornermi iluaqutaasin­naasunik tunisinis­saannik kajumis­saakkit.’ Israalikkut kuultinik, sølvinik, kanngussanik, ujaqqanik erlinnartunik pinnersaatinillu tunissuteqarput. Aamma savaasat meqquinik, annoraaminernik, uumasut amiinik allarpas­suarnillu tunissuteqarput. Tunisiumatungaarmata kiisa Moorsisip naggataatigut oqarfigai: ‘Tunissutigineqartut naammaqaat! Tunnius­saqaqqit­tariaqan­ngilasi.’

Angutit arnallu pikkoris­sorpassuit tupermik guutisiorfimmik sanaqataapput. Jehovap ilisimas­susermik tunillugit sulisin­naanngortippai. Ilaat qissipput, annoraaminernik ikaartiteripput allapalaaril­lutilluunniit. Allat ujaqqanik erlinnartunik, kuultinik qisunnillu suliaqarput.

Inuit tupeq guutisiorfik Jehovap oqarsimaneratorluinnaq sanavaat. Kusanartumik saaguliorput tupeq marlunnik immikkoor­tortaqaler­niassammat, Illernartumik Illernar­nerpaamillu. Illernar­nerpaamiippoq isumaqatigiissummut illerfiusaq qisummik akaciemik kuultimillu sanaaq. Illernar­tumiipput qullilerfik kuultiusoq, nerriviusaq pilliivillu tipigis­saatinik ikumatitsivik. Silarlermiipput eqqiartarfik kanngussammik sanaaq pilliivillu angisooq. Isumaqatigiissummut illerfiusaq Israalikkunnut Jehovamut naalannis­saminnut neriorsuuteqarsimanerminnut eqqaasitsis­sutaassaaq. Isumaqatigiissut imaluunniit angeruseq sunaanersoq nalunngiliuk? Neriorsuineruvoq immikkut ittoq.

Jehovap Aaronni ernerilu tupermi guutisiorfimmi palasissatut toqqarpai. Tupeq isumagisassavaat Jehovamullu pilliuteqar­tassallutik. Aaronni, palasiunerusoq, kisimi Illernar­nerpaamut isersin­naatitaavoq. Ukiumut ataasiarluni taamaaliortarpoq nammineq ajortuliani aamma ilaquttami ajortuliaat Israalikkullu inuiattut ajortuliaat pillugit pilliuteqar­niarluni.

Israalikkut Egyptenimiit aniguisitaareernermik kingorna ukioq ataaseq qaangiummat tupeq guutisiorfik naammassivoq. Maanna Jehovamik guutisiorfis­saqalerput.

Jehovap takutippaa tupeq guutisiorfik nuannaralugu qulaanilu nuiaqalersillugu. Nuiaq toqqup qulaaniigin­naraangat Israalikkut najugarisamin­niiginnartarput. Nuiarli qangattaraangat tupeq guutisiorfik poortoriarlugu aallarnis­saminnut piareersartarput nuiarlu malittarlugu.