Arnaq puilasuliami

JESUS Samariami puilasuliami unikkallarpoq. Ajoqersugai illoqarfimmukarput nerisassanik pisiniarlutik. Arnaq Jesusip maani oqaloqatigisaa imertariartorpoq. Jesus oqarpoq: ’Immisilaannga.’

Arnaq tupigusoqaaq. Suna pillugu? Jesus juutiummat namminerli Samariamiuugami. Juutillu amerlanersaasa Samariamiut nuannarinngilaat. Oqaloqatigiumanagilluunniit! Jesusilli inuit qanoq-ittuugaluartulluunniit nuannarai. Taava oqarpoq: ’Ilinnut immiseqqusoq kinaasoq ilisimagaluarukku, taava illit nammineq taassuminnga immiseqqussagaluarputit, taavalu taassuma imermik inuunartumik tunissagaluarpaatit.’

’Puilasoq itisoorsuuvoq,’ arnaq oqarpoq, ’illilli imertaateqanngilatit. Sumimmi taava imermik inuunartumik pissavit?’

’Imermik puilasumit uumannga pisumik imeraluaruit imerusuleqqissaatit,’ Jesus nassuiaavoq. ’Imerli uanga tunniukkumasara inuit naassaanngitsumik inuuneqaatigisinnaavaat.’

’Imermik taamaattumik tuninnga, Naalagaq!’ arnaq oqarpoq. ’Imerusuleqqeqqunanga, maangalu imertariartoqqeqqunanga.’

Arnaq isumaqarpoq Jesusip imiinnaq eqqartoraa. Kisianni Guuti naalagaaffialu pillugit sallusuissut oqaluuseraa. Sallusuissut tamanna imertut inuunartutut ippoq. Inuit tamanna naassaanngitsumik inuuneqaatigisinnaavaat.

Taava Jesusip arnaq oqarfigaa: ’Uiit aagallaak maangalu uterlutit.’

’Ueqanngilanga,’ akivoq.

’Eqqortumik oqarputit,’ Jesus oqarpoq. ’Tallimanilli ueqarsimavutit, maannalu inooqatigisat uiginngilat.’

Arnaq tupigusuppoq, tamannami ilumoormat. Jesusip qanoq ililluni nalunngilaa? Nalunngilaa Guutip aallartitarimmani neriorsuutigineqartoq, Guutillu ilisimatittarmani. Taava Jesusip ajoqersugai uterput, tupigusuutigalugulu arnaq Samariamiu oqaloqatigimmagu.

Tamanna sumik ilinniarfigisinnaavarput? Takutippaa Jesusip inuit naggueqatigiinnit sunilluunniit pisut inussiarnisaarfigisarai. Uaguttaaq taamaaliortariaqarpugut. Isumaqassanngilagut inuit naggueqatigiinnit allanit pisut ajortuusut. Inuit tamaasa sallusuissummik inuunissamut naassaanngitsumut aqqutaasumik Jesusip tusaqquai. Uaguttaaq inuit sallusuissummik ilinniartinnissaat kissaatigisariaqarparput.