Jesusip inuunera ajoqersuineralu

Samariamiorpassuit uppertunngortut

AJOQERSUKKAT nerisassanik nassarlutik Sykarimit uteramik, Jesus suli Jakobip puilasuliaata eqqaaniittoq tikippaat. Samariamiumilli arnamik maanna oqaloqateqarpoq. Ajoqersukkat tikiummata arnaq imertaatini qimaannarlugu illoqarfimmut uterpoq.

Jesusip oqaluttuarisai soqutigisorujussuuai, illoqarfimmilu inunnut ima oqaluppoq: „Inuk takujartorsiuk. Taassuma qanoq iliorninnik tamanik taasiffigaanga.“ Alapernaannerulersinniarlugit aperai: „Kristusiunnginnerluni?“ Apeqqutaalu kissaatigisaatut sunniuteqarpoq — inuit tusagartik uppernarsiniarlugu illoqarfimmit aniapput.

Taamaalinerani ajoqersugaasa Jesus nerisassanik illoqarfimmit aggiussimasaminnit nereqqullugu kajumissaarpaat. Akivorli: „Neqissamik ilisimanngisassinnik nerisassaqarpunga.“

„Nerisassamik pajunneqarnerami?“ ajoqersugai imminnut apersuupput. Jesus nassuiaavoq: „Neqissara tassa aallartitsisima peqqusaa malillugu suliareqqusaalu naammassillugu. Ima oqartarinnginnerpisi: ’Qaammatit sisamat naappata katersuiffik nalliutissaaq’?“ Katersuiffilli anersaakkut ittoq unnersuussutigiitigalugu nangippoq: ’Maannangaaq katersuisoq akissarsisararaaq inerittunik inuunermut naassaanngitsumut qimatulilluni.’

Arnap Samariamiup nalunaajaanerata sunniunneri annertuut immaqa Jesusip takusinnaalereersimavai — amerlasuut imminut uppertunngorumaartut arnap nalunaajaanerata kingunerisaanik. Inuit Sykarimeersut puilasuliap eqqaanut pigamik, Jesus uninngaqquaat oqaluttuuteqqullutillu. Piumasaat akueraa ullunilu marlunni uninngalluni.

Samariamiut Jesus tusarnaarpaat, sulilu amerlanerusut uppertunngorput. Taavalu arnamut oqarput: „Oqaatsisit uppernitsinnut pissutigiunnaarpavut, namminerli tusaratsigu nalujunnaarlugulu ilumut una silamiut annaassisigigaat.“ Arnaq Samariamiu uagutsinnut maligassiuilluarpoq qanoq Kristus pillugu nalunaajaasinnaasugut inuit alapernaasilersinnerisigut taamaalillutillu namminneq misissuilersillugit!

Eqqaamajuk katersuiffik, qularnanngitsumik karrinik suaasiassanik katersuineq Palæstinami upernaakkut pisartoq, qaammatit sisamat sioqqullugit tamanna pisimammat. Tassa novemberip decemberilluunniit missaanni. Tassa imaappoq Jesusip ajoqersugaasalu Judæami ajoqersuillutillu kuisisarnerminnut qaammatit arfineq-pingasut atoreersimagaat. Massakkullu Galilæamut, nunagisaminnut, uterlutik aallarput. Suup pisussap taavani utaqqivai? Johannes 4:27-42. (wD 15/1 86)

◆ Arnap Samariamiup suna oqaluussissutigaa, tamannalu qanoq kinguneqarpa?

◆ Jesusip nerisassaa katersuinerlu sukkut imminnut atassuteqarpat?

◆ Ukiumi 30-mi poorskip kingorna Jesus qanoq sivisutigisumik Judæami sulisimanersoq qanoq ililluta paasisinnaavarput?