Uuliap qaqqaani

UANI Jesus Uuliap qaqqaaniippoq. Angutit sisamat ilagisai apustiligai. Tassaapput qatanngutigiit Andreas Peterilu, aammalu qatanngutigiit Jakob Johannesilu. Ikani ungasinnerusumi Guutip naalaffia Jerusalemimiittoq takusinnaavat.

Siutituuaraq qimusserfigalugu Jesusip Jerusalemimut iserneraniit ullut marluk qaangiupput. Marlunngorneruvoq. Ullup ilaa siusinnerusukkut Jesus naalaffimmiissimavoq. Tassani palasit Jesus toqukkumallugu tigunissaanut periarfissarsiorsimagaluarput. Taamaaliornissarli qunugaat inuinnaat Jesus nuannarimmassuk.

’Pulateriaarsuit pulateriaarsuillu piaraat ukorsii!’ Jesusip upperisarsiornikkut pisortat taama oqarfigisimavai. Taava Jesus oqarsimavoq Guutip pillarumaarai ajortorpassuarnik iliorsimanerat pillugu. Tamatuma kingorna Jesus Uuliap qaqqaanut majuarpoq, taavalu apustilit sisamat taakkua apersulerpaat. Jesusimut suut apeqqutigigaat nalunngiliuk?

Apustilit siunissami pisussat apersuutigaat. Nalunngilaat Jesusip nunami ajussuseq tamaat taamaatitikkumaaraa. Paasiumavaalli qaqugu tamanna pissasoq. Jesus qaqugu kunngitut naalagaassalluni tikiuteqqissava?

Jesusip nalunngilaa tikiuteqqikkuni ajoqersukkami nunamiittut takusinnaassanngikkaanni. Taamaappoq qilammiissagami taakkualu takusinnaassanngilaat. Taamaattumik Jesusip qilammi kunngitut naalakkersuileruni nunami pisussanik apustilini oqaluttuuppai. Pisussat suut ilagaat?

Jesus oqarpoq annertoorsuarnik sorsunneqassasoq, inuppassuit napparsimassasut kaassasullu, amerlasuunik pinerluttuliorneqassasoq nunalu annertuumik sajuttassasoq. Jesus oqarportaaq Guutip naalagaaffianik nutarsiassaq nuannersoq nunarsuarmi tamarmi oqaluussissutigineqassasoq. Uagut nalitsinni tamakku pisartut takusimavavut? Ilaana! Taamaattumik qularinngilarput Jesus maanna qilammi naalakkersuisoq. Ungasinngitsukkut nunami ajussuseq tamaat taamaatitikkumaarpaa.