Silarsuarmi atuakkat siammarsimanerpaartaat
„Biibili tassaavoq inuiaat oqaluttuarisaaneranni atuakkat atuarneqarnerpaartaat. . . . Atuakkat allat tamarmik siammarsimanerpaartaat. Biibili aamma atuakkanit allanit oqaatsinut amerlanerpaanut nutserneqartarsimavoq.“ — „The World Book Encyclopedia.“1
ATUAKKAT amerlasuutigut inuttut issinnaapput. Takkukkunik, immaqa nuannarineqarlutik, taavalu — atuakkiat malunnaateqarnerusut ilaannaat eqqarsaatigissanngikkaanni — pisoqalisarput puiorneqarlutillu. Atuagaateqarfiit atuagarpassuarnut pisoqalisimasunut, atuarneqartanngitsunut taamaattumillu ’toqungasunut’ iliveqarfittut igajupput.
Biibilili allaat atuakkanut malunnaateqarnerusunut naleqqiutissagaanni immikkorluinnaq ittuuvoq. Naak ukiut 3500-it matuma siorna allanneqalersimagaluarluni suli uummaarilluarpoq. Nunarsuarmi atuakkat siammarsimanerpaartaraat.a Ukiut tamaasa biibilit 60 millionit sinnerlugit naqiterneqarlutillu siammartinneqartarput. Ukiup 1455-ip missaani maskinamik naqiterivimmik, tyskip Johannes Gutenbergip sanasimasaanik, naqiterneqaqqaarpoq. Taamanerniilli biibilit imaluunniit Biibilip atuagartaasa ilaat 4 milliardit missaat naqiterneqarsimapput. Atuakkanik allanik, upperisarsiornermut allamulluunniit tunngasunik, taama siammarsimatigisoqanngilaq.
Biibili aamma oqaluttuarisaanermi atuakkanit allanit tamanit nutserneqarnerpaasimavoq. Biibili tamaat imaluunniit ilaannaa oqaatsinut 2100-nit amerlanerusunut nutserneqarsimavoq.b Inuit nunarsuarmiut 90 procentiisa Biibili namminneq oqaatsiminni pisinnaavaat.2 Taamaalilluni atuakkap tamatuma nunat killeqarfii nagguigisakkullu avissaarutaasut qaangersimavai.
Immaqa kisitsisit tamakkua pissutigiinnarlugit Biibilimik misissuerusulernavianngilatit. Kisianni Biibilip siammarsimanera oqaatsinullu taama amerlatigisunut nutserneqarsimanera tupinnaqaat, tamatumalu takutippaa Biibili nunarsuarmi tamarmi pingaartinneqartoq. Soorunami inuiaat oqaluttuarisaaneranni atuakkat siammarsimanerpaartaat nutserneqarsimanerpaartaallu misissussallugu asuliinnaanavianngilaq.
[Quppernerup ataani ilanngussat]
a Atuakkat siammarsimanerpaartaata tullia tassaasorineqarpoq atuagaarannguaq aappaluttoq Citater fra Formand Mao Tsetung, 800 millionit missaanni tunineqarlunilu agguaanneqarsimasoq.
b Oqaatsit qassiunerannik paasissutissat Biibilimik Naqiterisitsisarfiit Kattuffiat-neersunik tunngaveqarput.
[Qupp. 6-mi assiliartaq]
Biibili latinerisooq Gutenbergimit naqiterneqartoq, atuakkat naqiterneqartut siullersaat