Uagutsinnit qutsinnerusoqarpoq

ISUMAQATIGISSAGUNARPARMA ilinnit uannillu qutsinnerusoqarlunilu, annerusoqarlunilu nukittunerusoqarmat. Kisianni aamma allatigut uagutsinnit qutsinnerusoqarlunilu, annerusoqarlunilu nukittunerusoqarpoq, tassa uagutsinnit pissaaneqarnerullutillu pingaaruteqarnerusut. Soorlu kinaasinnaava? — Aap, Jehova Guuti. Ernerami Ajoqersuisorsuaq? — Aamma uagutsinnit qutsinneruvoq.

Jiisusip Guuti qilammeeqatiginikuuaa. Anersaatut pinngortitaavoq, tassa inngilitut. Guuti allanik inngilinik pinngortitsiva? — Aap, anersaanik millionilippassuarnik pinngortitsisimavoq. Aamma taakku uagutsinnit qutsinnerullutillu nukittunerupput. — Tussiaat 104:4, 1900; Danieli 7:10.

Inngilip Mariamut pulaartup atia eqqaamaviuk? — Gabrielimik ateqarpoq. Taassuma Maria oqaluttuuppaa Guutip erneranut anaananngortussaasoq. Guutip qilammiit inuunera Mariamut nuuppaa maani nunarsuarmi inoorlaatut inunngorniassammat. — Lukasi 1:26, 27.

Tupinnartuliaq tamanna upperaajuk? Upperaajuk Jiisusip qilammi Guutimissimanera? — Jiisusi nammineq oqarpoq qilammiinnikuulluni. Qanoq nalunngissinnaagamiuk? Nukappiaraagallarmat Mariap Gabrieli qanoq oqarsimanersoq oqaluttuuttarsimassavaa. Aamma Josefip oqaluttuuttarsimassavaa Guuti ataatavigigaa.

Jiisusi kuisimmat Guuti qilammiit ima oqarpoq: “Tassa ernera.” (Matthæusi 3:17) Toqunissaminut aqaguttoq Jiisusip Guuti ima qinnuigaa: “Ataataq, maanna ilinni naalannarsisinnga, naalannassusermik silarsuaq pinngunngikkallarmalli uanga ilinni pigisannik.” (Johannesi 17:5) Tassani Jiisusi Jehova Guutimut qinuvoq qilammut uteqqikkusulluni. Ajornannginnami? — Aap, taamaallaalli Guutip anersaanngorteqqippagu ersinngitsoq, tassa inngilinngorteqqippagu.

Maanna pingaarutilimmik aperissavakkit. Ilimagaajuk inngilit tamarmik ajunngitsuusut? — Taamanikkut tamarmik ajunngitsuusimapput. Jehovammi inngilit tamaasa pinngortippai, taassumanngaanneersullu suut tamarmik ajunngitsuupput. Kisiannili inngilit ilaat ajortunngorpoq. Qanoq ililluni taamaalisinnaagami?

Tamanna paasiniarlugu Jehovap Adamimik Evamillu, tassa inunnik siullernik, pinngortitsisimaneranut utissaagut. Ilaat oqartarput tamanna oqaluttuaq takorluuinerinnaasoq. Kisianni Ajoqersuisorsuup nalunngilaa pisimasuusoq.

Guutip Adami Evalu pinngortikkamigit naatsiivimmut Edenimik taaneqartumut inissippai. Naatsiiviuvorlu kusanartoq angisoorujussuaq, Paratiisimik taaneqartartoq. Amerlasuunik meerartaarsimasinnaagaluarput ernutartaartorlutillu, naassaanngitsumillu Paratiisimi inuusinnaagaluarlutik. Ataatsimilli pingaarutilimmik ilinniaqqaagassaqarput. Siornatigut oqaluuserereerparput, takoriartiguli suli eqqaamasinnaanerlugu.

Jehovap Adami Evalu oqarfigai orpiit naatsiivimmiittut paarnaat nererusutatik tamaasa neriffigisinnaagaat. Kisiannili orpik ataaseq neriffigeqqunngilaa. Guutip oqarfigai neriffigigaluarunikku susoqassanersoq: “Toqussaatit!” (1 Mosesi 2:17) Sunaana Adamip Evallu ilinniagassarigaat? —

Naalattuunissaq ilinniagassaraat. Inuuginnarumagaanni Jehovamut Guutimut naalannissaq pingaaruteqarpoq! Naammanngilaq Adami Evalu oqaannassagunik Guuti naalanniarlugu. Aap, iliuutsimikkut takutittariaqarpaat. Guuti naalakkunikku takutissavaat asallugu taassumanngalu siulersorneqarusullutik. Taamaaliorunik Paratiisimi naassaanngitsumik inuusinnaassapput. Orpimmimmi neriffigineqaqqusaanngitsumit nerigunik taava suna ersersissavaat? —

Ersersissavaat Guutip tunissutai qujamasuutiginngikkitik. Illiusuuguit Jehovamut naalassimassagaluarpit? — Adami Evalu aallaqqaataani taamaapput. Evali qutsinnerusumit usserneqarpoq. Taassuma Eva Guutimut naalanngitsippaa. Qanoq pisoqarami? —

Biibilimi allaqqavoq pulateriaarsuup Eva oqaluukkaa. Pulateriaarsuk soorunami oqalussinnaanngilaq. Susoqartorliuna? — Inngilimuna pulateriaarsuk oqalutsittuusaaraa, uffa nammineq oqalulluni. Inngiliuna ajortunik eqqarsaateqartalersimasoq. Adami Evalu imminut kiffartortikkusukkamigit naalakkersorusullugillu. Guuti inissisimaffianik arsaarusuppaa.

Inngilip ajortup Eva eqqunngitsumik eqqarsalersippaa. Pulateriaarsuk aqqutigalugu oqarfigaa: ‘Guutimuna salloqittaraasi. Orpik neriffigigaluarussiuk toqunavianngilasi. Silatuneruliinnassaasi — Guutitut silatutigilissaasi!’ Illit taamatut oqaluutsissimasuuguit upperisimassagaluarpiuk? —

Eva Guutip tigoqqunngisaanik tigusaqarusulerpoq. Orpiup neriffigeqqusaanngitsup paarnaanik nerivoq. Aamma Adami tamussertippaa. Adamip nammineq pulateriaarsuup oqaasii upperinngilai. Evamilli ilaginnikkusunnera Guutimik asanninneranit anneruvoq. Taavalu paarnamik tamusserpoq. — 1 Mosesi 3:1-6; 1 Timotheusi 2:14.

Taavami susoqarpa? — Adami Evalu naammalluinnartuujunnaarput, utoqqalillutillu toqupput. Naammalluinnartuunngimmatalu meeraat tamarmik naammalluinnartuunngillat, utoqqalillutillu toqupput. Guutip oqaaserisai ilumoorput. Inuuginnarusukkutta taassumunnga naalattariaqarpugut. (Romamiut 5:12) Biibilimi allaqqavoq inngili Evamut sallusoq Saatani Diaavulumik ateqartoq. Inngilit allat taassumatut ajortunngorsimasut anersaapilunnik taaneqartarput. — Jaaku 2:19; Saqqummersitat 12:9.

Takusinnaaviuk qanoq ililluni Guutip inngili ajunngitsoq pinngortissimasaa ajortunngortoq? — Ajortunik eqqarsaateqartalerami. Tamanit annerpaajorusukkami. Nalunngilaa Guutip Adami Evalu oqarfigigai meeqqiussasut, taassumalu kissaatigigaa taakku tamarmik imminik pallorfiginnissasut. Diaavulup kissaatigaa kikkut tamarmik Jehovamut naalannginnissaat. Taamaattumik ajortunik eqqarsartinniarsarisarpaatigut. — Jaaku 1:13-15.

Diaavulu oqarsimavoq kialuunniit Jehova iluamik asanngikkaa. Oqarpoq illit uangalu Guuti asanngikkipput Guutillu oqaasii malikkusunngikkivut. Oqarpoq taamaallaat ingerlalluaraangatta Jehovamut naalattartugut. Diaavulu ilumoorpa? Taamaappugut? —

Ajoqersuisorsuup Diaavulu sallutuumik taavaa! Jiisusip Jehova naalattarpaa, taamaalillunilu takutippaa Jehova asallugu. Aamma naalattarpoq imaanngitsoq aatsaat ajornanngikkaangat. Naalattuaannarpoq, inuilluunniit allat naalannissaq ilungersunarsisikkaluaraangassuk. Jehovamut aalajaappoq toqunissi tikillugu. Taamaattumik Jehovap uummarteqqippaa naassaanngitsumik inuuniassammat.

Kina uagutsinnut akeraanerpaasoraajuk? — Aap, Saatani Diaavulu. Takuneqarsinnaava? — Naamik, takuneqarsinnaanngilaq. Nalunngilarpulli piusoq, uagutsinniillu nukittunerusoq. Diaavulumilli qutsinnerusoqarpa? — Aap, Jehova Guuti qutsinneruvoq. Taamaattumik illersorsinnaavaatigut.