Adami Evalu Guutimut naalanngipput

Ullut ilaanni Evap kisimiinnerani pulateriaarsuup oqaluutilerpaa. Aperivoq: ‘Ilumoorpa Guutip orpinnik tamanik neriffigeq­qunngikkaasi?’ Eva akivoq: ‘Orpiit tamaasa neriffigisin­naavagut, ataasiinnarli naamik. Taanna neriffigigaluarutsigu toqussaagut.’ Pulateriaarsuk oqarpoq: ‘Toqussan­ngilasi. Nerigussi Guutisut ilerumaarpusi.’ Tamanna ilumoorpa? Naamik, salluuvoq. Evalli upperaa. Naatitaq isigingaaramiuk nererusulerpaa. Nerivaa Adamimullu tunniullugu. Adamip nalunngilaa Guutimut naalanngikkunik toqusus­saallutik. Taamaattorli naatitaq nerivaa.

Unnulermat Jehovap Adami Evalu oqaluuppai. Aperai sooq naalanngis­simanersut. Evap pulateriaarsuk pisuutippaa Adamillu Eva pisuutillugu. Adami Evalu naalanngimmata Jehovap naatsiivimmiit anisippai. Iseqqin­nginnias­sammata inngilit panarlu ikumasoq kaavittulior­tillugu isaariaanut inissippai.

Jehova oqarpoq Evamut salluliorsimasoq aamma pillarneqassasoq. Evamut oqaluttoq pulateriaarsuunngilaq. Jehovammi pulateriaarsuit pinngor­tikkamigit oqalussin­naanngor­tinnikuunngilai. Inngiliuna ajortoq, Saatanimik Diaavulumik taaneqartoq, pulateriaarsummik oqalutsitilersoq. Taamaaliorpoq Eva salloqqit­tarniarlugu. Siunissami Jehovap Saatani peersik­kumaarpaa inunnut salloqit­taaqqis­sinnaajun­naarsillugu.