IMMIKKOORTOQ 1
Pinngortitsisup inuit paratiisimik tunivai
Guutip avataarsua pinngortippaa nunarsuarmilu uumassuseqalersitsilluni; angut arnarlu naammalluinnartut pinngortippai, naatsiivimmut alianaatsumut inissillugit naalatassaannillu peqqussuteqarfigalugit
AALLARNIUTIT allanneqarsimasut tamarmik ilisimaneqarnerpaartaattut taaneqarsimapput. “Pileqqaarneranni Guutip qilak nunalu pinngortippai.” (1 Mosesi 1:1) Oqaaseqatigiit paasiuminartut pingaartorsiorpaluttullu taakku atorlugit Biibilimi uagutsinnut ilisaritinneqarpoq kinaassusilik Allakkani Illernartuni pingaarnerpaajusoq — Guuti ajugaqanngitsoq, Jehova. Biibilip versiani siullermi ersersinneqarpoq Guuti tassaasoq avataarsuanik isorartoqisumik nunarsuarmillu inuuffigisatsinnik Pinngortitsisoq. Versini tulliuttuni nassuiarneqarpoq piffissani sivisoorujussuakkuutaartuni, assersuutaasumik ullutut taaneqartuni, Guutip nunarsuaq inuuffigisassatsitut piareersaleraa silarsuarmi tupinnartut tamaasa pinngortillugit.
Guutip nunarsuarmi pinngortitaa pingaarnerpaaq tassaavoq inuk. Taanna Guuti assilillugu pinngortitaavoq — taassuma pissusiinik, soorlu asanninneranik ilisimassusianillu, ersersitsisinnaasoq. Guutip inuk issumit pinngortippaa. Adamimik atserpaa inissillugulu paratiisimut — Naatsiivimmut Edenimut. Guutip nammineq naatsiivik taanna naatsiiviliaraa, kusanartunik inerititaqarluartartunillu orpilersorlugu.
Guutip nalunngilaa inuup aappaqarnini iluaqutigissagaa. Adamip najungasuisa ilaat atorlugu Guutip arnaq pinngortippaa angummullu nulianngortillugu, kingusinnerusukkullu taanna Evamik atserneqarpoq. Adami qiimmatsalluni taalliortorpalaartumik ima oqarpoq: “Tamanna tassa saaneq saanerma ilaa uinillu uinimma ilaa.” Guuti ima nassuiaavoq: “Tamanna pillugu angutip ataatani anaananilu qimallugit nuliani attavigissavaa, uiniulissappullu ataaseq.” — 1 Mosesi 2:22-24; 3:20.
Guutip Adami Evalu marlunnik peqqussuteqarfigai. Siullermik, peqquai nunarsuaq naggorissassagaat paaqqutarissagaallu, piffissallu ingerlanerani kinguaaminnik ulikkaassagaat. Aappassaanik, peqquai naatsiiverujussuup orpiisa ilaat ataasiinnaq, “orpik ajunngitsumillu ajortumillu ilisimalersitsisoq”, neriffigissanngikkaat. (1 Mosesi 2:17) Naalanngikkunik toqussapput. Taakkuninnga peqqussuteqarnermigut Guutip angut arnarlu periarfissippai imminik Naalakkersuisutut akuerinninnissaannut. Aamma naalannerat asanninnerannut qujamasunnerannullu ersiutaassaaq. Asannittumik naalakkersuineranik akuerinninnissaminnut pissutissaqarluarput. Inuit naammalluinnartut taakku ajoquteqanngillat. Biibilimi ima allassimavoq: ‘Guutip pinngortitani tamaasa isigai, takuaalu ajunngingaartut.’ — 1 Mosesi 1:31.
— Tunngavigineqartut: 1 Mosesi kapitalit 1-2.