Perluit qulingat

Moorsisip Faaruu neriorsorpaa uteqqin­ngisaan­nassalluni. Ingerlan­nginnerminili Faaruu oqarfigaa: ‘Unnuaqeqqanut Egyptenimiut angajul­liliaat tamarmik, Faaruup erneraniit inussiaataasa ernerinut allaat, toqorassapput.’

Jehovap Israalikkut oqarfigai immikkut ittumik nereqatigiissasut. Oqarpoq: ‘Savaaraq savaasaararluunniit angutiviaq ataatsimik ukiulik toqussavarsi illussilu matuata sinaa aavanik tanillugu. Neqaa siassavarsi nerillugulu seernarsaateqan­ngitsumik iffiaq-qaqortulerlugu. Aallarnis­sassinnut piareersimanias­sagassi aloquteqaan­narlusilu angalanis­sassinnut atisalersorsimassaasi. Unnuaru aniguisis­savassi.’ Qanoq pissangatigisimas­sanersut takorloorsin­naaviuk?

Unnuaqeqqanut Jehovap inngiliata Egyptenimi illut tamaasa aqqusaarpai. Illuni matup sinaatigut taninneqarsiman­ngitsuni angujulliliat toqupput. Illulli aammik taninneqarsimasut inngilip qaangiin­nartarpai. Egyptenimiut ilaqutariit tamarmik, pisuut piitsullu, meeqqamik annaasaqarput. Israalikkulli ataasin­nguamil­luunniit annaasaqan­ngillat.

Faaruup ernera allaat toquvoq. Faaruu naammatsippoq. Moorsisimut Aaronnimullu oqarpoq: ‘Aallarniaritsi! Qimalluta Guutersi guutisiorfigiar­torsiuk. Uumasuutisi tigoriarlugit aallarniaritsi!’

Qaammatip imissinerata qaammatiginnerani Israalikkut Egyptenimiit, ilaqutariik­kuutaarlutik naggueqatigiik­kuutaarlutillu, aallarput. Israalikkut angutitaat 600.000-upput saniatigullu arnarpassuit meerarpassuillu ilaallutik. Aamma inuppassuit assigiin­ngitsut Jehova guutisiorfigerusullugu aallaqataapput. Kiisami Israalikkut aniguisitaapput!

Jehovap qanoq aniguisis­simagaatik eqqaamanias­sagamikku ukiut tamaasa immikkut ittumik nereqatigiillutik unnukkorsior­tassapput. Nalliut­torsiorneq taanna poorskimik qaangiif­fimmilluunniit taaneqartarpoq.