’Pinngortitat tamarmik anersaameqatigiipput‘ — Suut pissutaappat?
ANGUTIP siulliup arnallu siulliup Guuti tunuppaat. „Kiffaanngissuserli“ kissaatigisartik angugamikku, ajornartorsiutit namminneq anigorniartariaqalerpaat. Paasinasuarpaalli pisinnaanertik naammanngeqisoq. Misilittagakinnerat ilisimasakinnerallu ajornartorsiutinik kinguneqarput.
Tamanna pissutigalugu amerlaqisugut nakerisarsiorneqartarpugut naapertuilluanngitsumillu pineqartarluta. Tamanna pissutigalugu tamatta inuttut naammalluinnanngissuseqarnermut inussiaavugut, tamannalu pissutigalugu napparsimasarpugut, pissusissaanngitsumik timikkut isummakkullu anniartarpugut, aliasunnermillu qullilisarluta. Imaluunniit, Bibelimi allassimasut oqaatigissagaanni, tamanna pissutigalugu ’pinngortitat tamarmik suli tamassa anersaameqatigiillutillu erloqeqatigiipput’. — Rûmamiut 8:22.
Inuit kiffaajunnaarniarnertik siulleq naggataatigut kiffannguutigaat. Kiffanngornermik kingunipilui ukiuni 6000-inngortuni anigorniarsarivaat. Iluatsitsisimappalli?
Naalakkersuinikkut kiffaajunnaarniarneq
Inuit naalakkersueriaatsit assigiinngitsut tamaasa ooqattaarlugit misilissimavaat. Naalakkersuisut naqisimatitsisut imaluunniit naapertuilluanngitsut, imaluunniit innuttaasut tunngaviunerusumik pisariaqartitaannik pissaqartitsinngitsoortut, soraarsinneqartarput allaallu nakuusernikkut pissaanneerutinneqartarlutik — amerlasuutigulli pitsaanerusumik kinguneqarsimasutut oqaatigineqarsinnaanngillat.
Aviisiliortoq Lance Morrow naalakkersuinikkut mumisitsinerit pillugit oqarsimavoq: „Silamiut oqaluttuarisaaneranni pissutsinik nutaanngortitsiniarusuttut takorloornerinnaasumilli angussaanngitsumillu anguniagaqartut amerlavallaat naalakkersuisunngoriaramik naalakkersuisutut soraarsitamittut kisermaassitigisutut toqutsisartigisutullu ilersimapput — tassaallutik neriulluarlutik pingaartitaminnik ingasaassillutik ilungersuuteqartut misilittagaqarnermut ajugaaneri.“
Naalakkersuisut naammalluinnanngitsut naalakkersuisunik pissuseqataannik taarserneqarnissaat piviusumik kiffaajunnaarsitsinavianngilaq. Taamaammat, kunngi silatooq Salomon Guutip sunniineratigut isumassarsisitaalluni allassimavoq: ’Inuk inoqamminut pissaaneqartarallartillugu perlussiornartumik.’ (akugdlîssup oĸausê 8:9) Nalunanngilaq ’pinngortitat tamarmik anersaameqatigiittuassasut erloqeqatigiittuassallutillu’ naalakkersuisut naammalluinnartut naammalluinnanngitsumik naalakkersugaanermit aniguisitsinissaasa tungaanut.
Inuiaqatigiissutsikkut ammillu qalipaataatigut immikkoortinneqarunnaarniarneq
Ammip qalipaataatigut inuiaqatigiissutsikkullu immikkoortitsinerit akerlerilluinnarpaat Bibelimi ajoqersuutit ilumoortut makku: ’Guutip inooqatigiissorpassuit tamaasa aammit [inummit] ataatsimit naggueqartippai,’ aamma: ’Guuti nakerisarsiorneq ajorpoq, kisianni inuiaqatigiinni tamani kinaluunniit mianerinnitsini iluarnermillu sulisoq nuannaraa.’ (apustilit suliait 17:26; 10:34, 35, NW) Inuilli immikkoortitaanngitsutut pineqarfiannik ujarlersut, inuiaqatigiinni kristumiuunerartuni allaat, nassaarineq ajorpaat.
Tamatumunnga assersuutissatut naggueqatigiit qernertumik amillit taasigit. Kristumiunik imminnut taasut ilaat oqarput qernertumik ameqalernerup pissutigigaa Guutip Kana’animik kinguaavinillu perloqqusinera, perloqqusaagamillu allanut kiffanngortitaasut. Taamaanngilarli. Qernertumik amillit Kana’an pinagu kisiannili Kusj immaqalu Put nagguigaat, taakkualu arlaannaalluunniit perloqqusaanngillat. — 1 Môrsase 9:24, 25; 10:6.
Taamaakkaluartoq qernertumik amillit inuit atugarisaasigut aningaasatigullu naqisimaneqartarput, naggueqatigisaminnit allaat. Kiffaajunnaarsitaanissartik erinigaat. Kisiannili kiffaajunnaarniarlutik tiguaaneri akerliliinerminnillu takutitsillutik ingerlaaqatigiinneri ilaatiguinnaq iluatsitsisarput. Uummatit pissusiviisigut allanngortissinnaasimannginnamikkik, ammip qalipaataatigut immikkoortitsinerit, upperisarsiornikkut ilisimasakinneq inoqammillu asanninnikinneq peersissinnaasimanngilaat.
Taamaammat, ’pinngortitat tamarmik anersaameqatigiittuassapput erloqeqatigiittuassallutillu’ ammip qalipaataatigut immikkoortitsinerit Guutip Kristusikkut naalagaaffiatigut nungusarneqarnissaasa tungaannut.
Arnat kiffaajunnaarniarnerat
Ukiut hundredillit ingerlanerisigut arnat atornerlunneqartarput inuttullu nikanarnerusutut isigineqarlutik. Pinngortitsisualli tamatumunnga pisuunngilaq. Taassuma arnaq pinngortikkamiuk siunertarinngilaa angummit atoqatissaannartut isigineqarnissaa. Angutillu arnamik angutaaserfiginninnissaa siunertarineqanngilaq. Angutip nuliarimmani, angummut ’ikiortissaavoq, tapigassaalluni’, ’uiniussappullu ataaseq’. — 1 Môrsase 1:26-28; 2:18-24.
Guutip asannittumik oqartussaaneranut Evap atajumajunnaarnera kiffaajunnaarneranik kinguneqanngilaq, kisianni sukannersumik naqisimatitaaneranik kinguneqarpoq. Taamaakkumaartoq siumut nalunngereeramiuk, Guuti siulittuilluni oqarpoq: ’Kajungerisallu uinniissaaq, taannalu ilinnut naalagaassaaq.’ (1 Môrsase 3:16) Arnat ilarpassuisa angutit naammalluinnanngitsut naalagaavallaarnerat erloqissutigeqaat, arnallu angutinut naligiissitaanissaat anguniarlugu suleqatigiit arlallit aqqutigalugit angutit naalagaavallaarnerat taamaatitinniarsarivaat.
Arnalli angutinut naligiissitaaniarnerannik pingaartitsillutik suleqatigiit, naak allannguutinik pitsannguutissaasunik atortuulersitsisinnaasimagaluartut, iluatsinngitsoorsimapput oqimaaqatigiissumik kiffaajunnaarsitsinissamut Guutip neriorsuutigisaanut akerliusumik anguniagaqaramik. ’Pinngortitat tamarmik anersaameqatigiittuassapput erloqeqatigiittuassallutillu,’ aatsaalli Guutip naalagaaffiatigut angutit tamarmik ilinniartinneqarpata ’nuliatik asasariaqaraat soorlu timitik’ ’arnallu utoqqaat anaanatut ileqqullugit, arnallu inuusuttut qatanngutitut ileqqullugit tamatigut minguillutik’ pissutsit erloqinartut atuukkunnaassapput. — Evfisumiut 5:28; 1 Timûtiuse 5:2.
Apeqqulli pingaarutilik alla sammisariaqarparput, tassa: Ullumikkut kiffaajunnaarniarlutik suleqatigiit kristumiut qanoq isumaqarfigissavaat?
[Qupp. 4-mi issuagaq]
Naalakkersuisut naammalluinnanngitsut naalakkersuisunik naammalluinnanngitsunik allanik taarserneqarnissaat piviusumik kiffaajunnaarsitsiniarnermut aaqqiissutissaanavianngilaq
[Qupp. 5-mi issuagaq]
Akiuunnani akerliussutsimik takutitsinerit, tiguaanerit akerliliinerminnillu takutitsillutik ingerlaaqatigiit uummatinik allanngortitsineq ajorput
[Qupp. 5-mi issuagaq]
Arnat angutinut naligiissitaaniarnerannik pingaartitsillutik suleqatigiit iluatsinngitsoorput oqimaaqatigiissumik kiffaajunnaarsitsinissamut Guutip neriorsuutigisaanut akerliusumik anguniagaqaramik