Uppernikkut ajorunnaarsitsisarneq sooq taama kajungernartigaa?

Oqaluffik nipilersuutinik guitarinik, qarlortaatinik, tumerparpaanik, qilaataasanik puugutaarsarsuarnillu saviminernit sianaalasuinnarnik akisuavoq. Angutit, arnat meeqqallu silaarutaasaqqasutut qitillutillu erinarsorput. Taamatut pisoqarnera ajorunnaarsitsinissanut naleqquppoq.

Uppernikkut ajorunnaarsitsisartup, qaqortumik qullunnertuumik atortup, iloqiak paarngorluni ingerlasoq assamminik patippaa. Taava tullinnguuppoq angut tappiitsoq taartunik isarualersimasoq. „Tupinnartuliaavoq!“ isiginnaartut nilliapput nukillaaqqasimasoq pisulermat tappiitsuusimasorlu isigisinnaalermat . . .

Pisut taama ittut Afrikami oqaluffippassuarni uppernikkut ajorunnaarsitsisarfiusuni nalinginnaaqaat. Uppernikkullu ajorunnaarsitsisartut, Guutimut qinunermikkut uppernikkullu ajornartorsiutinik sunilluunniit aaqqiisinnaanerartut, Afrikami nunanilu allani malinnitserpassuaqalersimapput. Inuit ilaat uppernikkut ajorunnaarsitsisunukartarput aningaasatigut ajornartorsiornertik pillugu. Aammalu meeraqannginneq Afrikami inuiaqatigiinnit kanngunartutut isigineqartarmat, uppernikkut ajorunnaarsitsisartut inunnit ornigarneqartarput meeqqiorsinnaassuseqalernissartik neriuutigalugu.

Kisianni uppernikkut ajorunnaarsitsisartunit nappaatillit pingaarnerusumik sammineqarnerupput. Naak nunani tamani niuerniarfinni nakorsaaterparujussuit nassaassaagaluartut aammalu nappaatillit katsorsarsinnaajumallugit nakorsaasiornikkut suliniartoqarsimagaluaqisoq, taamaattoq inuk nappaatinut aaqqiissutaasinnaasumik suli nassaaqqajanngilaq. Napparsimasut ilaasa ajorunnaarsinneqarumagaluarlutik aningaasarpassuit atorsimavaat, iluatsitsinatilli. Taamaattumik tupinnanngilaq inuit ilarpassuisa neriuutaarulluinnarnerminni uppernikkut ajorunnaarsitsisartut ornittarmatigik.

Inuit ilaat namminneq isumaqarput uppernikkut ajorunnaarsinneqarsimallutik, aammalu isumaqarlutik taamatut ajorunnaarsitsisarneq kristumiussutsimut ilumoortumut akerliunngitsoq. Uppernikkullu ajorunnaarsitsisartut oqartarmata ajorunnaarsitsisarnitik Jesusip aqqani suliarisarlugit, taamaattumik malinnittaat tassaagajupput upperisarsioqatigiinni akuerisaasuni ilaasortaasut aammalu ilagiinnut uppernikkut ajorunnaarsitsisarfiusunut ilaasortaasut. Guutimulli pallorfiginnittup ilumoortup uppernikkut ajorunnaarsitsisartoq siunersiortariaqarpaa? (Juánase 4:23) Aammalu uppernikkut ajorunnaarsitsisartumit suliarineqartartut taama ittut ilumut Guuti- minngaanneersuuppat? (wD 1/12 87)