Uppernikkut ajorunnaarsitsisarneq Guutiminngaanneersuua?
Angut ukiuni 38-ni napparsimasimavoq. ’Ajorunnaarumagaluarpit?’ Jesusip aperaa. Illit angut taannaagaluaruit angerasuassanngikkaluarpit? Tassami Jesusip angut taanna ima oqarfigaa: ’Makillutit innanngaviit tiguuk angalaarlutillu.’ Taava qanoq pisoqarpa? ’Taavaannarlu’ inuk taanna ajorunnaarpoq, innanngavinilu tigullugu angalaarpoq.’ — Juánase 5:5-9.
Ajorunnaarsitsineq tamanna Guutiminngaanneersoq Jesusip nunami kiffartornermi nalaani ajorunnaarsitsinerpassuisa ilaannaraat. (Matîuse 11:4, 5) Ullumikkut uppernikkut ajorunnaarsitsisartut suli Guuti taamatut suliaqartarnerarpaat, taamatullu oqarnerat inunnit tuusintilinnit ajorunnaarsinneqarsimanerartunit uppernarsarneqartarpoq.
Assigiinngissutit annertuut
Bibelimik misissuinerup qulaarpaa ajorunnaarsitsisimanerit Bibelimi eqqartorneqartut aammalu ullumikkut uppernikkut ajorunnaarsitsisarnerit assigiinngissuteqartorujussuusut. Assersuutigalugu Jesus ajoqersugaalu ajorunnaarsitsissagaangamik akileqqunngisaannarput. ’Akeqartinnagu pigassiuk akeqartinnaguttaaq tunniussiuk,’ Jesus oqarpoq. (Matîuse 10:8) Matumuuna Elisap maligassiaa malippaat, tassa angutip Na’amanimik atillip taassumannga pupissuujunnaarsinneqareerlunilu tunissuteqarfiginiaraluarmani tigujumanngimmagu. (2 kúngit 5:1, 14-16) Tassa uppernikkut ajorunnaarsitsisartut suliaminnut akilersittarnerat Bibelip unnersuussutaanut naapertuutinngilaq.
Aammattaaq maluginiarnartuuvoq Bibelip pilerfiata nalaani ajorunnaarsitsisarsimanerit tassuuguinnaq imaluunniit piffissap annikitsuinnaap ingerlanerinnaani pisarsimammata. Apustili Peterip ’angut arnami timaata iluanit allaat niuluttoq’ takugamiuk oqarfigaa: ’Jesus Kristusip Nazaretimiup aqqani nikuigit pisullutillu.’ Oqaluttuaq ima nangippoq: ’Tassanngaannarlu niuluttup isigai singernerilu nakussatsipput, pissipporlu nikorfalluni angalallunilu.’ (apustilit suliait 3:1-8) apustilit suliáinik agdlagkat 5:15, 16-imi aamma 14:8-10-mi tamatumunnga assingusut allat atuarneqarsinnaapput.
Ullumikkulli uppernikkut ajorunnaarsitsisarnerit ullut arlallit, sapaatit-akunneri arlallit allaammi qaammatit arlallit ingerlaneranni pisarput! Aammattaaq maluginiarnartuuvoq uppernikkut ajorunnaarsitsisartut makkunannga nappaatillit ajorunnaarsinniarnerusarmatigit: tappiitsut, tusilartut nukillaarsimasullu — tassa nappaatit isumakkut nappaateqarnermik pissuteqarsinnaasartut. Pilattaasartoq Paul Brand ima maluginiagaqarsimavoq: „Timimikkut amigaateqarlutik ajuutillit pineqaraangata, soorlu nioqanngitsut, iseqanngitsut imaluunniit nujaqanngitsut — tupinnartuliornerit qaqutigoorput.“ Jesusilli ’inuit nappaataat suulluunniit ajuutaallu suulluunniit katsorsarpai’, ilaatigut ’ajuutit amigaataasut’ soorlu assak toqungasoq. — Matîuse 9:35; Mákorse 3:3-5.
’Uppissuseqanngilatit!’
Ajoraluartumik napparsimasorparujussuit eqeersaalluni ataatsimiinnerit najuuffigereersimallugit angerlaraangamik ataatsimiittunukanngikkallarnermissulli napparsimatigisarput. Uppernikkut ajorunnaarsitsisartut taamatut iluatsitsinngitsoornitik nassuiarniartarpaat oqarlutik napparsimasut uppissuseqannginnerat tamatumunnga pissutaasartoq. Tamannali peqquserluttuliornertut nipeqarpoq. Dr. William Nolen ima oqarsimavoq: „Nakorsat nalinginnaasut pisarnerannut akerliusumik uppernikkut ajorunnaarsitsisartut suliaminnik iluatsitsinngitsooraangamik namminneq akisussaaffigiumanngisaannarpaat. Nassuerutigisariaqarpara uangattaaq napparsimasumik ajorunnaarsissinnaanngisannik naammattuugaqaruma utoqqatsissummik tamatuminnga atuisinnaanissannut periarfissaqarusukkaluarama.“
Kisianni Guutip pruffiitiisa arlaannaalluunniit, Jesus nammineq imaluunniit ajoqersugai utoqqatsissummik tamatuminnga, tassa napparsimasut uppissuseqannginnerarlugit, imminnut illersornianngisaannarsimapput. Immaqa uppissuseqannginnerup inuit ajorunnaarsinneqarusullutik sassartut amerlassusiat killilersimaartaraluarpaat, kisianni Jesusimukartut tamatigorluinnaq ajorunnaarsilluinnarneqartarput! — Mákorse 6:5, 6.
Ilaatigut allaat inuit qularnanngitsumik uppernermik amigaateqartut ajorunnaarsinneqartarput. Assersuutigalugu Na’amanip, Syriamiut sakkutuuinut siulersortaasup, Elisap peqqusineratut pupissuunerminit ajorunnaarsinneqarnissani upperivallaarsimanngikkaluarpaa. Ajorunnaarsinneqareerami aatsaat ima nassuerpoq: ’Ata, nalujunnaalerpunga nunami tamarsuarmi Guuteqanngitsoq, Israelimi kisianni.’ (2 kúngit 5: 11-13, 15) Taamaattumik uppernikkut ajorunnaarsitsisartut utoqqatsissutipalaavat atorsinnaanngilaq.
Ajorunnaarsitsisinnaaneq atorunnaarsinneqarpoq
Kisianni kristumiut siulliit akornanni tupinnartuliornikkut ajorunnaarsitsisinnaassuseqarneq nalinginnaannginnerpa? (1 Korintumiut 12:9) Aap, kisianni taamanikkut tupinnartuliortarsimanerit immikkut ittumik peqquteqarput. Ukiuni 1500-nit amerlanerusuni Israelikkut toqqakkamisut Guutip innuttarisimavai; kisianni ukiuni hundredelinni siullerni, ukiunik naatsorsuisarnitta aallartinnerata kingornagut, Israel uppernermik amigaateqarnini pissutigalugu Guutimut innuttaajunnaarpoq kristumiullu ilagiivinik pilerserlaanik taarserneqarluni. Kristumiut siulliit taakku uppernermikkut nakussatsissinnaaqqullugit aammalu Jehova Guutip taakkununnga ilaginninnera silarsuarmit tamarmit takuneqarsinnaaqqullugu pisarnermit annerusumik ikiorneqarnissartik pisariaqartissimavaat.
Taamaattumik ilagiit kristumiut pilerserlaat tupinnartuliorsinnaassusermik pipput, ilaatigut ajorunnaarsitsisinnaassusermik. Tunissutit tamakku uppinngitsunut ’nalunaaqqutitut’ atorput, aammalu kristumiut uppernerata nakussatsinnissaannut ikiuutaapput. (1 Korintumiut 14:22) Maannakkulli, ukiut 2000-ingajaat kingorna, kristumiussuseq nutaajunnaarsimavoq. (Naleqqiuguk Korintumiunut agdlagkat sujugdlît 13:9-13.) Bibeli tamarmi ukiorpassuarni atuarneqarsinnaasimavoq aammalu millionilippassuanngorluni siaruarsimalluni. Taamaalillutillu kristumiut ilumoortut ajornanngitsumik taassuma qanoq oqarnera uppinngitsunut innersuussutigisinnaavaat. Tupinnartuliakkut takutitsisinnaaneq pisariaqarunnaarsimavoq.
Aammattaaq Paulusip paasitippaa pissaanerit tupinnartut tunissutaasut tamakku ’atorunnaassasut’. (1 Korintumiut 13:8) Tunissutit tamakku taamaallaat Kristus Jesusip apustiliinit imaluunniit taakku najuukkaangata ingerlateqqinneqartarsimapput. (apustilit suliait 8: 18-20; 10: 44-46; 19:6) Apustilit toqunerisa kingorna tupinnartuliorsinnaanerit atorunnaarput.
Cyclopedia of Biblical, Theological, and Ecclesiastical Literature-mi McClintockimit Strongimillu suliarineqarsimasumi (atuagaq VI, qupperneq 320) maluginiarneqarpoq „qularnanngilluinnartoq ukiuni hundredelinni siullerni apustilit toqoreernerisa kingorna kristumiut siulliit tupinnartuliortarsimanerannut tunngasunik tusagassaqanngingajavissimammat imaluunniit tusagassaqanngivissimalluni“.
Mianersornissamut peqqut
Jesus Kristusip mianersoqqussutigaa piffissaq takkukkumaartoq amerlasuut taassumunnga oqarfissaat: ’Naalagaq, Naalagaq, atikkut pruffiitisut oqalunnginnerpugut? Atikkut anersaapilunnik anisitsinnginnerpugut? Atikkut qassiinik killinnartuliunnginnerpugut?’ Taamaakkaluartorli Jesusip ima oqarfigissavai: ’Ilisarinngisaannarpassi; qimassinga, iluaatsuliorumatuususiaa.’ (Matîuse 7:22, 23) ’Killinnartuliat’ uppernikkut ajorunnaarsitsisartut suliarisimasaat iluatsissimasorinartut Guutip anersaavanit ikiorneqarluni suliaanngikkunik taava qanoq nassuiarneqarsinnaappat?
Ilaatigut paasinarsisarpoq toqqaannartumik peqquserluttuliornerusut. Aviisip The Herald-ip Zimbabwemeersup ilaatigut allaaserai inuit pingasut uppernikkut ajorunnaarsitsisartup tusaamasaasup ajorunnaarsissimaneragai. Aviisip qulaarpaa tamanna peqquserluttuliornerusimasoq: „Meeqqat ilaat suli tusaasinnaananilu oqalussinnaanngilaq; alla tusilartuunngisaannarsimavoq oqajuitsuusimanngisaannarlunilu; aamma arnaq tusilartoq suli tusaasinnaanngilaq.“
Ilaannikkut paasinarsisarpoq uppernikkut ajorunnaarsitsisartut nakorsaatit salloqittaataasut napparsimasumit upperineqarnermikkut sunniussorineqartartut atortaraat. Allatigut — ingammik ajorunnaarnissaata tungaanut sivisugaangat — paasinarsisarpoq timip pissusissamisoortumik ajorunnaariartuaarsinnaanera akuleruttartoq. Atuakkami Science and the Paranormal-imi dr. William Nolen oqarpoq „[nakorsanut nalinginnaasunut] nakorsiartartut 80 procentiisa missaat nappaatinik aalajangersimasumik sivisussuseqarajuttunik — tassa nappaatinik immini ajorunnaariartuaartartunik — nappaateqartartut“. Taamaattumik uppernikkut ajorunnaarsitsisartumut ajornanngivissumik ataqqinaatissanngortarpoq ajorunnaariartuaarneq sivisuumik ingerlasimagaangat.
Aammattaaq Bibelimi mianersoqqussutigineqarpoq inunnut salloqittaaniarnermini ’Satan nammineq qaamasup inngiliatut pissuseqartuusaartarmat’. (2 Korintumiut 11:14) Tásalûníkamiunut agdlagkat áipait 2:9, 10-mi Paulus aammattaaq ima nassuiaateqarpoq: ’Issumalu tikiunnissaa piumaarpoq Satanip sunniineragut nalinginnarnik killinnartulianik [„tupinnartuliat suulluunniit“, Jerusalem- Bibeli] nalunaaqqutinillu tupinnartulianillu sallunernik nalinginnarnillu iluaatsulianik salloqittaataasunik, tammartussani taamaalissalluni.’ Taamaattumik mianersorit! Uppernikkut ajorunnaarsitsisarneq anersaapiluit nukinginut attuumassuteqarajuttarpoq! ’Anersaapilunnut ilagiissuteqaqqunngilassi,’ Paulus mianersoqqusivoq. ’Jehovap ermusianit anersaapiluillu ermusiannit imersinnaanngilasi.’ — 1 Korintumiut 10: 20, 21.
Kristumiu napparsimagaangat
Napparsimagaanni qularnanngitsumik tupinnartuliornikkut ajorunnaarsinneqarnissaq ornigeqqajaanarsinnaasarpoq. Apustili Paulusip suleqataa Epafroditus napparsimalersimavoq toqungajavilluni. (Filípimiut 2: 25-27) Paulusip ingiaqatigisartagaa Timoteus aammattaaq ’ajukuluttarsimavoq’. (1 Timûtiuse 5:23) Kisianni angutit taakkua arlaannaalluunniit Paulusip tupinnartuliornikkut ajorunnaarsinngilaa. Aammalu Paulus nammineq nakorsarneqarnissaminik pisariaqartitsigaangami qularnanngitsumik Lukasimit, ’nakorsaasumit asanartumit’, angalaqatigisaminit, ikiorneqartarpoq. — Kulorsamiut 4:14.
Aammattaaq ullumikkut kristumiu napparsimasoq nakorsamut piginnaassusilimmut ornigussinnaavoq, taamaalillunilu ajorunnaarsitseriaatsinik anersaapilunnut tunngassuteqartunik misileraanissani pinngitsoorlugu imaluunniit ullumikkut nunarpassuarni nalinginnaaqisumut, tassa ilinniarsimanani ajorunnaarsitsiniartartunut, saaffiginninnissaraluani pinngitsoorlugu. Aammattaaq Guutimut qinusinnaavoq, tupinnartuliornikkut ajorunnaarsinneqarnissani pinnagu, kisianni nappaatiminik katsorsaaniarnerminut ilisimassuteqarteqqulluni. (Jâko 1:5) Aammattaaq Jehova qinnuigisinnaavaa „napparsimalluni nallavi“mmini nakussatseqqulluni. — Tussiaat 41:4.
Miserratigisariaqanngilaq nikallornarsinnaasarmat nakorsaatitigut ilisimatuussutsip nappaatit aalajangersimasut ajorunnaarsissinnaanngikkaangagit. Kisianni kristumiuluunniit napparsimagaangami ’sorliit iluarnersut misilittartariaqarpai’, aammalu timikkut peqqinnissani isumakuluutiginermik anersaakkut soqutigisani puiornaveersaassallugit. (Filípimiut 1:10) Neriuutigisani tuppallersaatigisinnaavaa, Guutip naalagaaffiata ataani inuunissaminik, ’inuisalu ilaannik oqartoqassanngilaq: „Ajulerpunga.’’’ — Isaia 33:24; 65: 17-19.
Silarsuassamik nutaassamik iluarsuseqarfiusumik neriugisaq tamanna uppernikkut ajorunnaarsitsisartut neriorsuutaannit imaqanngitsunit erlinnarnerungaarpoq. Assersuutitut taariartigu Peter, angut tappiitsoq Ghanami Akumadanimi najugaqartoq. Tappiitsuunerminik ajorunnaarsinneqarnissani neriuutigalugu ilagiinnut uppernikkut ajorunnaarsitsinermik suliaqartartunut assigiinngitsunut ukiut 26-t ingerlaneranni ilaasortaasarsimavoq. Kisianni uppernikkut ajorunnaarsitsisartut arlaannaataluunniit isai uisissinnaasimanngilai. Taava ilagiinnut taama ittunut suli ilaasortaatillugu ullut ilaanni Jehovap Nalunaajaasuinit pulaarneqarpoq.
Nalunaajaasut Bibeli tunngavigalugu angut oqaluttuuppaat Guutip naalagaaffiata aqutsinerata ataani nappaatit tamarmik ajorunnaarsinneqarluinnarumaartut. Tamatuma Peterip isumaata ’isai uisippai’. Bibelip sallusuissutaanut nuanningaartunut pingaartitsingaarluni allamik atorfeqarani Guutip naalagaaffianik oqaluussissutiginnittutut aallartippoq, maannalu ukiuni pingasunit sinneqartuni suliaq tamanna ingerlassimavaa! Piffissaq Esajasip siulittuutaata eqquutiviffissaa qilanaareqaa: ’Taava uisitaassapput tappiitsut isaat, tusilartullu siutaat ammarneqarumaarput.’ — Isaia 35:5, 6.
Guutip oqaasia ikiortigalugu inuit tuusintilippassuit allat taassumatut kukkullutik uppernikkut ajorunnaarsitsisartunut upperinninnerminnit inussiaajunnaarsinneqarsimapput. (wD 1/12 87)
[Qupp. 5-mi assiliartaq]
Uppernikkut ajorunnaarsitsisartut timimikkut amigaatillit qaqutiguinnaq ajorunnaarsissinnaasarpaat
[Qupp. 7-mi assiliartat]
Kristumiu napparsimasoq nappaatiminik qasusuilluni atuisinnaaqqulluni nakussatseqqulluni qinuvoq. Silarsuaq nutaassaq qilanaarivaa, tassami ’inuisa ilaannik oqartoqassanngilaq: „Ajulerpunga“.’