Inuiaat tupinnartuliornikkut ajorunnaarsitaanissaat qanillivoq
’TAAMAALISUMIK takunngisaannarpugut.’ Angutip tumartorsimasup Jesusimit tupinnartuliornikkut ajorunnaarsitaaneranik takunnittut taama oqarsimapput. (Mákorse 2:12) Jesusip aamma tappiitsut, tusilartut nukillaarsimasullu ajorunnaarsittarsimavai, malinnittaalu aamma taamaaliortarsimapput. Suna pissaaneqaatigalugu Jesus taamaaliortarsimava? Upperneq taamaaliortarnerani qanoq pingaaruteqartigaa? Ukiunilu hundredelinni siullerni pisimasut tamakku ullumikkut tupinnartuliornikkut ajorunnaarsitsisarnerit eqqarsaatigalugit sumik takutitsippat? — Matîuse 15:30, 31.
’Uppernerpit annaappaatit’
Ullumikkut uppernikkut ajorunnaarsitsiniartartut Jesusip arnamut ukiuni 12-ini aaqartuarsimasumut ajorunnaarumalluni imminut orniguttumut oqaasii uku issuarajuppaat: ’Uppernerpit annaappaatit.’ (Lúkarse 8:43-48) Jesusip taama oqarnera ima paasisariaqarpa arnap uppernera ajorunnaarneranut aalajangiisuusoq? Ullumikkut ’uppernikkut ajorunnaarsitsisarnerit’ eqqarsaatigalugit taamaappa?
Biibilimi oqaluttuarineqartut misissoqqissaarutsigik paasissavarput Jesusip ajoqersugaasalu amerlanertigut piumasarisanngikkaat nappaatillit ajorunnaarsinneqartinnatik uppernertik nassuerutigissagaat. Arnap qulaani eqqaaneqartup Jesus ornippaa oqaaseqarnanilu tunuanit atisaa attorlugu, ’tassanngaannarlu aanaarnera kipivoq’. Ilaanni aamma Jesusip imminik tigusarinnikkiartortut ilaat ajorunnaarsissimavaa. Allaat angut kinaanerminik ilisimasaqanngivissoq ajorunnaarsissimavaa. — Lúkarse 22:50, 51; Juánase 5:5-9, 13; 9:24-34.
Taavami upperneq qanoq pingaaruteqarpa? Ilaanni Jesus ajoqersugaalu Tyrusip Sidonillu eqqaaniitillugit arnap Fønikiamiup ornippai imalu suaarluni: ’Naalagaq, Davidip ernera, naakkiginnga; paniga anersaapiluup naalliutsingaarpaa.’ Takorlooriaruk qanoq isumatsassimatigisoq oqarami: ’Naalagaq, ikiunnga!’ Misiginneqataalluni Jesusip akivaa: ’Arnaq uumaa, uppersutsit angeqaaq; piumasannik pineqarit.’ ’Taamaalisorlu pania ajorunnaarpoq.’ (Matîuse 15:21-28) Uppertoqarnera nalunanngilaq, kisianni kia uppernera pineqarpa? Malugiuk anaanaasup uppernera, meeqqap napparsimasup uppernera pinnagu, Jesusip nersoraa. Suna upperigamiuk? Jesus ’Naalakkamik, Davidip erneranik’ taagamiuk arnap ammasumik upperinerarpaa Jesus tassaasoq Messias neriorsuutigisaq. Tamanna tassaaginnanngilaq Guutimut imaluunniit ajorunnaarsitsisup pissaaneranut uppernermik nassuerut. Jesus oqarami: ’Uppernerpit annaappaatit’, isumaqarpoq Messiasiunerminik upperinninngitsuugunik nappaatillit ajorunnaarsinneqarumallutik aggersimanavianngikkaluartut.
Allassimaffiit tamakkua takutippaat Jesusip ajorunnaarsitsisarsimaneri ullumikkut pisartunit pisimanerarneqartartunillu allaanerulluinnartuusut. Takunnittut akornanni misigissutsinik ingasattunik takutitsisoqartarsimanngilaq — soorlu nillianermik, erinnersaarnermik, kappialanermik, ilisimajunnaarnermik assigisaannillu — Jesusilu ingasattuliortarsimanngilaq. Aamma Jesusip ajoqutillit uppernikinnerarlugit tunisinikinnerarlugilluunniit ajorunnaarsinngitsoorsimanngisaannarpai.
Guutip pissaaneratigut ajorunnaarsitsinerit
Jesus ajoqersukkallu qanoq ilillutik ajorunnaarsitsisinnaasarsimappat? ’Jehovap pissaanera taassumaniittoq katsorsaassutaavoq.’ (Lúkarse 5:17) Ilaanni ajorunnaartoqareersoq Lúkarse 9:43 naapertorlugu ’tamarmik Guutip angingaassusia annilaarutigaat’. Naleqqulluartumik Jesus ajorunnaarsitsisartutut isiginiarneqarumanngilaq. Ilaanni angut inngilipilunnit erloqisitaasoq ajorunnaarsikkamiuk oqarfigaa: ’Illunnut angerlarit ilannut, oqaluttuullugillu qanoq atsigisumik Jehovap pisimagaatit nallittorsimallutillu.’ — Mákorse 5:19.
Jesus apustilillu Guutip pissaaneratigut ajorunnaarsitsisarsimammata paasinarpoq ajorunnaarsinneqartup uppissuseqarnera tamatigut apeqqutaanngitsoq. Ajorunnaarsitsiniartorli upperluartariaqarpoq. Taamaattumik ilaanni Jesusip malinnitsimi inngilipiluk immikkut pissaanilik anisinneq sapermassuk Jesusip paasitippai suna pissutaasoq: ’Uppinngissusersi pissutigalugu.’ — Matîuse 17:20.
Tupinnartuliornikkut ajorunnaarsitsinerit siunertaat
Naak Jesus nunami kiffartornermini ajorunnaarsitsisarsimagaluartoq kiffartornerata ajorunnaarsitsineq pingaarnertut siunertarisimanngilaa. Tupinnartuliornikkut ajorunnaarsitsisarneri — akeqanngitsumik pisarsimasut — suliassaanit pingaarnerpaamit, ’iivangkiiliumik naalagaaffimmik oqaluussissutiginninnermit’, salliutinneqanngisaannarput. (Matiuse 9:35) Oqaluttuarineqarpoq ilaanni inuit ’ilassillugit Guutip naalagaaffianik oqaluffigigai katsorsariaqartullu katsorsarlugit’. (Lúkarse 9:11) Iivangkiiliuni Jesus arlaleriarluni ’ajoqersuisoq’-mik taaneqartarpoq ’katsorsaasoq’-milli taaneqanngisaannarluni.
Sunali pillugu Jesus tupinnartuliornikkut ajorunnaarsitsisarsimava? Pingaartumik takutinniaramiuk tassaalluni Messias neriorsuutigisaasoq. Johannes Kuisisup naapertuilluanngitsumik parnaarussaagami qulakkeerusussimavaa Guutip imminut suliareqqusaa ilumut naammassisimanerlugu. Taamaattumik ajoqersukkani Jesusimukartippai apereqqullugu: ’Illit taannaavit tikiuttussaq, allamilluunniit utaqqissanerpugut?’ Jesusip Johannesip ajoqersugaanut akissutaa malugeriaruk: ’Johannes oqarfigiartorsiuk tusakkassinnik takusassinnillu: Tappiitsut tappissipput, tusiattut pisupput, pupissut pupeerupput, tusilartut tusarput, toqusut makipput piitsullu iivangkiiliumik oqaluffigineqarput.’ — Matîuse 11:2-5.
Aap, Jesus ajorunnaarsitsiinnarani aamma allanik iivangkiiliuni oqaluttuarineqartunik tupinnartuliortarsimammat uppernarsarneqarpoq tassaasoq ’tikiuttussaq’, Messias neriorsuutigisaq. ’Allamik utaqqisaqarnissatsinnut’ pissutissaqanngilaq.
Ullumikkut tupinnartuliornikkut katsorsaasoqartarpa?
Ullumikkut Guutip pissaanini takutinniarlugu ajorunnaarsitsisarnissaa ilimagissavarput? Naamik. Jesusip Guutip pissaaneratigut tupinnartuliortarsimagami qularnaatsumik takutissimavaa Messiasiulluni Guutip neriorsuutaa naapertorlugu tikiuttussaq. Jesusip tupinnartuliorneri Biibilimi allassimasut kialuunniit atuarsinnaavai. Guuti pissaanini takutinniarlugu kinguaariinnut tamanut inuusimasunut tupinnartuliortariaqanngilaq.
Soqutiginarpoq ajorunnaarsitsinerit tupinnartuliornerillu upperineqarnerat killeqarsimammat. Allaat Jesusip tupinnartuliornerinik takunnittut ilaasa upperiumanngilaat Ataataminit qilammiusumit tapersersorneqartoq. ’Naak isigitillugit taama amerlatigisunik nalunaaqqutiliortoq upperfiginngilaat.’ (Juánase 12:37) Taamaattumik tupinnartuliorsinnaanerit assigiinngitsut — siulittuineq, oqaatsinik allanertanik oqalunneq, ajorunnaarsitsineq assigisaallu — Guutip ukiuni hundredelinni siullerni ilagiit kristumiut ilagiissaanniittut ilaannut tunniussimasai eqqaareerlugit apustili Paulus isumassarsisitaalluni allassimavoq: ’Pruffiitisulluunniit oqaluttarnerit atorunnaassapput, oqaatsilluunniit allanertat soraassapput, ilisarsinerluunniit atorunnaassavoq, ilisarsinivut ilaannaammata pruffiitisullu oqaluttarnivut ilaannaammata; kisianni tamarmiusoq nalliuppat ilaannaasut atorunnaassapput.’ — 1 Korintumiut 12:28-31; 13:8-10.
Soorunami Guutimut upperneq pilluarnitsinnut pingaaruteqartorujussuuvoq. Kisianni uppernerput katsorsarneqarnissamik neriorsuutinik eqqunngitsunik tunngaveqartikkutsigu pakatsiinnassaagut. Aammattaaq naggatissap nalaa eqqarsaatigalugu Jesus ima mianersoqqusisimavoq: ’Kristusioqqusersut pruffiitioqqusersullu saqqummerumaarput, angisuunillu nalunaaqqutiliorlutik tupinnartuliorumaarput, qinikkat allaat tammartissagaluarlugit ajornanngippat.’ (Matiuse 24:24) Ilinniarsimanani katsorsaaniartarnerit salloqittaanerillu saniatigut aamma inngilipiluit pissaanerannut takussutissaqarumaarpoq. Taamaattumik tupigusuutigissanngilarput pisimasut nassuiarneqarsinnaanngitsut tusaamagutsigik, tamakkulu Guutimut uppernermut ilumoortumut tunngaviusinnaanngillat.
Ullumikkut Jesusitut ajorunnaarsitsisoqarneq ajormat uagut ajornerusumik pineqarnerpugut? Naamerluinnaq. Jesusimit ajorunnaarsinneqarsimasut napparsimaqqilersinnaasimapput. Tamarmik utoqqalillutillu toqusimapput. Ajorunnaarsinneqarsimanertik sivikitsuinnarmik iluaqutigisimavaat. Taamaattoq Jesusip tupinnartuliornikkut ajorunnaarsitsisarsimaneri ataavartumik siunertaqarput siunissami pilluaqqussutissanut siulittuutaagamik.
Guutip oqaasia Biibili misissoqqissaareerlugu Alexandrep Beneditallu siuliani eqqaaneqartut ullutsinni uppernikkut ajorunnaarsitsiniartarnerit anersaarsiornikkullu katsorsaaniartarnerit isumalluarfigiunnaarsimavaat. Upperaalli tupinnartuliornikkut ajorunnaarsitsineq taamaallaat itsaq inuusunut atuuttussaanngitsoq. Sooq? Silarsuaq tamakkerlugu allat millionilikkuutaat assigalugit Guutip naalagaaffiata ataani ajorunnaarsitsisarnissat neriuutigigamikkik. — Matîuse 6:10.
Nappaatit toqulu peqarunnaassapput
Soorlu takoreeripput Jesusip kiffartornerani ajoqutillit ajorunnaarsinnissaat tupinnartuliallu allat pingaarnerpaasimanngillat. Akerlianik Guutip naalagaaffianik nutaarsiassamik nuannersumik oqaluussissutiginninneq Jesusip suliamini pingaarnerpaatissimavaa. (Matîuse 9:35; Lúkarse 4:43; 8:1) Naalagaaffik tamanna ikiortigalugu Guutip inuiaat tupinnartuliornikkut ajorunnaarsissavai ajortillu naammalluinnanngissutsillu inuiannut ajoqusiisimaneri tamaasa suujunnaarsillugit. Qanoq ililluni aamma qaqugu taamaaliussava?
Siunissaq ungasissoq eqqarsaatigalugu Jesus Kristusip apustilini Johannes siulittuutaasumik ima takorruuisissimavaa: ’Maanna annaassut pissaanerlu naalagaaffillu Guutitta pigilerpai, piginnaanerlu tanitaata pigilerpaa.’ (sarĸúmersitat 12:10) Takussutissat takutippaat 1914-imiit Guutimut akerarsuaq Satan qilammit nunarsuup eqqaanut igitaasimasoq, Naalagaaffillu maanna piviusuullunilu sulissuteqartoq! Jesus Naalagaaffimmi Messiasikkoortumi kunngitut ivertinneqarsimavoq maannalu nunarsuarmi allanngornersuaqartitsinissamut piareersimalluni.
Qanittumi Jesusip naalagaafiata qilammiusup inuiaqatigiit nutaat naapertuilluartut, ’nunassamik nutaamik’ taaneqartut, naalakkersulissavai. (2 Pîtruse 3:13) Taamanikkussaq pissutsit qanoq ittuussappat? Pisussat nuanningaartut ima siulittuutigineqarput: ’Qilak nutaaq nunalu nutaaq takuakka; qilak siulleq nunalu siulleq peermata, imarlu peqarunnaarluni . . . qulliillu tamaasa isaannit [Guutip] allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:1, 4.
Takorloorsinnaaviuk inuiannik tupinnartuliornikkut ajorunnaarsitsinerup tamatuma piviusunngornissaa? „Nunatsinni ima oqartoqassanngilaq: ’Napparsimavunga!’ Inuit tassani najugaqartut ajortiminnik isumakkeerfigineqarput.“ Aap, Guutip uppernikkut ajorunnaarsitsiniartartut sapigaat piviusunngortissavaa. „[Jehovap] toqu nungutissavaa piujunnaarsivillugu. Guutillu [Jehovaasup] isit tamaasa qullingiarumaarpai.“ — Jesaja 25:8; 33:24. (wE 1/7 97)
[Qupp. 7-imi assiliartaq]
Guutip naalagaaffiata ataani inuit tupinnartuliornikkut ajorunnaarsinneqarumaarput