Bibelimik atuarnermi pingaarnersat: Opâtia 1-21

Guutip mianersoqqussutai ilinnut pingaaruteqarput

„ILISSINNIK attuisup uanga isima tappiutaa attorsimassavaa.“ (Saggaria 2:8, NV; v. 12 kal. ator.) Oqaatsit eqqasuumminartut tamakku tamanut mianersoqqussutaapput: Innuttaminik inuiaat qanoq iliorfiginninneri Jehovap nakkutigisarpai. Kisianni mianersoqqussut Guutimeersoq tamanna inuiaqatigiit soqutiginngivillugu Guutip innuttaanik ajoqusiigaluarunik qanoq iliorfigineqassappat? Allakkani Hebræerisuuni allakkat naannersaat, Opâtiap agdlagai, akissummik imaqarput.

Edomip ajunaarnissaa

Kinaluunniit Jehovap eqqartuussutaanit eqqorneqanngitsoorsinnaanngilaq. Obadiasip siulittuutaagut, ukiup 607-ip u.n.a.s. missaani oqaluutigineqartukkut, Edomikkut, naak ’ullorissat akornanni’ isumannaatsumik inissisimaffeqaraluarlutik, nunaminnit anisinneqarumaarnissaat siulittuutigineqarsimavoq. Bibelimi allakkamik tamatuminnga allattup nammineerluni inuunera naak oqaluttuarineqanngikkaluartoq, atermi isumaa, „Jehovap kiffaa“, malillugu inuuvoq. Qanoq ililluni? Piuneerussaanissamik eqqartuunneqarnissaq tusarliukkamiuk. Edom piuneerunneqaruni ikinngutiminit angerfigeqatigisimasaminit piiaaffigineqarluinnarumaarpoq. Ilisimatoortai pissarsuartaalu allaat annassanngillat. — Versit 1-9.

Innuttaminik nakuuserfiginnissimasut Guutip ajunaartikkumaarpai. Edomikkut ajunaarnissaannut suut pissutaappat? Qatanngutiminnut, Jakobip ernerinut, nakuusertuliortarsimaneri. Edomikkut Esau siuaasarigamikku Israelikkut eqqarleraat. Taamaakkaluartorli eqqarliminnik piiaaffiginnittutut, Jerusalemip piuneerunneratigut ajortumeersunik nuannaarutiginnipiluttutut, allaallu Israelikkunnik annassimasunik akeraannut tunniussisuusutut unnerluutigineqarput. Taamaaliornermikkut Edomikkut eqqartuunneqarnissartik allanngortitassaajunnaarsippaat. — Versit 10-16.

Jakobikkut makititaaqqissapput

Jehovap neriorsuutai uppernartuujuaannarput. Obadiasip nalaani Jehovap innuttani neriorsoqqissaarpai nunavitsik, allaat annertusisimasoq, nunagileqqikkumaaraat. Israelikkut avissimajunnaassapput. Jakobikkut, naggueqatigiit marluk naalagaaffiata Judap, Josefikkullu, naggueqatigiit qulit naalagaaffiata avannaaniittup, Edomimik nungutitsinissartik, innerup karriiarnikunik nungutitsinera assigalugu, aammalu Edomikkut nunagigaluanni najugaqalernissartik, katititaaqqissutigissavaat. Naggasiutigalugu Obadias qiimmannarnerusumik nalunaarpoq Israelikkut nunaminnut utertitaasut ataasiussuseqarlutik Guutertik pallorfigilerumaaraat, taassumalu taakku innuttarissagai. Aap, Jehovap kunngiussuseq pigissavaa. — Versit 17-21.

Ullutsinni ilinniagassaq: Mianersoqqussutinik sumiginnaaneq kingunipiloqartarpoq. Obadiasip Edomikkunnut mianersoqqussutaa saqqumiinnartoq Guutimut assortuisut ullumikkut inuusut siutaanni akisuasariaqarpoq: Jehovamik innuttaanillu assortuisut naassaanngilluinnartumik piiarneqassapput.

Bibelimik atuarnermi pingaarnersat: Jûna 1:1–4:11

AJUNAARNISSAMIK nalaanneqatsaaligit! Naakkinninneq ilassiuk! Qanoq ilillugu? Ukiut 2800-t sinnerlugit matuma siornagut pisimasuimmik oqaluttuap — Jûnap agdlagai-ni allanneqarsimasup — pingaartortaanik ilinniutiginninnikkut. Pruffiitip Jonasip Galilæameersup allagai tamakku 844-p u.n.a.s. missaani allanneqarsimapput anersaakkullu siuneqarsutsimik ulikkaarlutik.

Jonasip suliassani qimarratigaa

Jehova kiffartuunneqarnermini tapersersuinissaanik isumalluarfigisariaqarparput. Jehovamit ikiorneqarnissaminik isumalluarnissaminut taarsiullugu, Guutip imminut suliassarititaa Jonasip qimarratigaa. Aap, Jonasimut suliassarititaq oqitsuunngilaq. Ajunaarnersuaq Guutip Ninevemiunut kanngunangaartumik ajortuliortartunut nalliutsitassaa sioorasaarutigisussaavaa. Taarsiulluguli Jonas killup tungaanut aallarpoq umiarsuarmut ilaalluni Tarsisiliarluni, maanna Spaniaasumut. Aqqutaani anorersuartorsuanngormat umiarsuup inuisalu ajunaarnissaat ilimanarsivoq. Jonas pisuunerminik nalunaarpoq, umiartortut immamut igippaat, imarlu manissivoq. Aalisagarsuup Jonas iivaa. — 1:1–2:1.

Qinnutiminnik Guutip tusarnissaa kiffaasa qularutigissanngilaat. Aalisakkap iluaniilluni Jonasip Jehova torlulaffigaa ikioqqulluni, qinunikkut Guuti qutsavigaa immami ajunaarsimannginnerminik, neriorsuillunilu neriorsuutini eqqortikkumaarlugit. Kingusinnerusukkut nunamut meriaaritinneqarpoq. — 2:1-10.

Jonas Ninevemukarpoq

Jehovamit suliassarititaasoq suliarinngitsoornaveeruk. Pisimasoq tamanna ilinniutigisimagunarlugu, pruffiiti siornatigut piumanngissimagaluartoq illoqarfissuarmi maanna oqaluussilerpoq. Mianersoqqussut paasiuminarlunilu sukannersoq Jonasip tusarliuppaa: ’Ullut 40-t qaangiuppata Nineve mumissaaq.’ Tupinnaannartumik pisoqarmat Ninevemiut allamik isumataarput, ajunaarnissaraluartillu pinngitsoorpaat. — 3:1-10.

Guutip naakkinninnera inuit killilersinnaanngilaat. Nineve aserorneqanngimmat Jonas kamalerpoq. Naasorli atorlugu Jehovap Jonas ilinniartippaa nammineq iluarisani naapertorlugu naakkinnittarnissaminik. — 4:1-11.

Ullutsinni ilinniagassaq: Guutip siulittuutaasa iliuuseqarfiginerisigut ajunaarnissaraluaq pinngitsoorneqarsinnaavoq! Ninevemiut malinniakkit. Jesus Kristus, pruffiitiusoq Jonasimit annerusoq, maniguullutit naalaguk. — Lúkarse 11:32. (wD 15/4 89)

[Qupp. 20-mi ungalusaq]

ALLASSIMAFFIIT PILLUGIT OQAASEQAATIT

○ Opâtia versi 7 — Bibelip allanneqarfiata nalaani ’nereqatigiinneq’ ikinngutigiinnissamik angerfigeqatigiinneruvoq. Tamatuma piumaartussanit ila allaanerussusia! Babylonimiut, Edomikkut ’angerfigeqataat’, Edomikkunnik piuneerutitsiumaartussaapput. Nebukadnezarip nalaani Jerusalemip piuneerunneqarnerata kingornagut Edomikkut Judamit tiguakkat ilaannik Babylonimiunit pissaqartinneqarput. Kingusinnerusukkulli Babylonip kunngiata, Nabonidip, Edomikkut niuernermut tunngasutigut angusaqarusussusiat inaarutaasumik akornuserpaa.

○ Versi 10 — Edom ’isuanut allaat piiagaasussanngorpoq’ inuiaqatigiinnik qatanngutigisaminik, ’Judap kinguaanik’, uumissuingaarnini naakkittaatsumillu pissusissamik asannissuseqannginnini pissutigalugit. (Versi 12) Inuiaqatigiit piiagaanerat tamanna tassaassaaq Edomikkut naalagaaffiata, naalakkersuisui ilanngullugit, inuilu nunamik immikkut ittumik nunaqartut ilanngullugit nunarsuarmit piuneerunneqarnerat. Ullumikkut inuiaat arlaannaalluunniit Edomikkuusutut taaneqarsinnaanngillat; ’peqanngitsutut ilersimapput.’ — Versi 16.

[Qupp. 21-mi ungalusaq]

ALLASSIMAFFIIT PILLUGIT OQAASEQAATIT

○ Jûna 2:1 — Angisuumik niaqoqarami angisuumillu iggiaqarami arfeq kigutilissuaq inummik iisisinnaavoq. Naak Immami Akullersuarmi arferit qaqutigoortumik takuneqartaraluartut, qanga Joppemi umiatsiarsuarnik arfanniuteqartarpoq. Aalisagaq Immami Akullersuarmi umiarsuarnik malinnittartutut umiarsuarmillu iginneqartunik tamanik nerisartutut ilisimaneqartoq tassaavoq eqalussuarujussuaq qaqortoq. Taannattaaq inummik iisisinnaavoq. ’Imarmiorsuaq,’ immaqa ullumikkut ilisimatuunit ilisimaneqanngitsoq, Guutip Jonasimut iliuuseqarnermini atorsimavaa.

○ 2:2, 3 — ’Imarmiorsuup ilua’ taalliorfissaqqinngivippoq. Kingusinnerusukkulli Jonasip misigisimasani allassimavai. Oqaatsit Tussiaatit-ni allassimasunut assingusut atorlugit uummammi ilorlianiittut anippai. — Naleqqiukkit 2:3 Tussiaat 120:1-imut Tuss 130:1-imullu; Jûna 2:6 Tussiaat 69:2-imut.

○ 3:3 — Ninevep angissusia ingasaallugu taaneqanngilaq. Illoqarfik kaajallallugu qarmarsuit naak 13 kilometeriinnarmik silissuseqaraluartut, qarmarsuit avataanniittuttaaq illoqarfimmut naatsorsuunneqarsimannguatsiarmata, illoqarfik tamarmi kaajallallugu 40 kilometerimik silissuseqarsimasinnaalluarpoq.

○ 3:10 — Oqaaseq ’peqqissimissutigaa’ hebræerisoorlugu isumaqarpoq „iliuuserineqareersimasoq (imaluunniit iliuuseriumaagaq) pillugu allamik isumaqalerneq“. Taamaammat inuit ajortuliortut peqqusersuillutik allamik isumataarpata pillarnissaraluat Jehovap ’peqqissimissutigisinnaava’.