Nuannaarnerup Paratiisiani inuup nuannaarutigiumaagassai
’Guutillu pilluaqquai oqarfigalugit: „Kinguaassisarlusi amerliartoritsi nuna tamakkerlugu, naalatsigitillugulu ilissinnut; naalagaagitsilu aalisakkanut immamiittunut, timmissanullu qilaap ataaniittunut, uumasunullu tamanut nunami aalasunut.“’ — 1 Môrsase 1:28.
1, 2. Inuit iluaqutissaannut Jehovap suna sulissutigaa, sunillu Adam suliassippaa?
’GUUTI asassutaavoq,’ Bibelimi taama allassimasoqarpoq. Asannittumik namminissarsiunngitsumillu inunnik soqutiginnittuuvoq, nunamilu nuannaarnerup paratiisiani inuunermik peqqissumik pilluarnartumillu angusinissaannut piareersaajuartuulluni. (1 Juánase 4:16; naleqqiuguk Tussiaat 16:11.) Inuk siulleq, Adam naammalluinnartoq, eqqissinartumik inuuvoq aammalu soqutiginartumik nuannersumillu suliaqarluni. Edenip naatsiiviata alianaatsup sanarfinissaanik Pinngortitsisup suliassissimavaa, Bibelimilu oqaluttuami ersersinneqarpoq aamma allamik, immikkut ittumik pisariusumillu, suliassinneqarsimasoq:
2 ’Massa Guutip Jehovap issumit piliarigamigit narsap nersutai tamaasa, timmissallu tamaasa qilaap ataaniittut, inummut aappai, takujumalluni qanoq taajumaarai; massa uumasut [tarniusut, NV] nalinginnaat inuup qanoq taagunigit tassa atissaat. Inuullu atsersorpai nersutaatit tamaasa, timmissallu qilaap ataaniittut, narsallu nersutai tamaasa.’ — 1 Môrsase 2:19, 20.
3. Sooq Adam uumasullu imminnut ersiginngillat?
3 Inuup hestimut taaguusiuppaa sus, ussimmut sjōr, savamut sæh, savaasamut ‛ez, timmissamut ‛ōf, tuimut jōnahʹ, paavuumut tukkīʹ, liivimut ’arjehʹ imaluunniit ’arīʹ, nannumut dov, aapakaamut qōf, qimmimut kæʹlæv, pulateriaarsummut nachasjʹ, ilaallu ilanngullugit.a Kuussuarmut Edenimit kuuttumukarami aalisakkat takulerpai. Taakkununnga taaguusiuppaa daghahʹ. Naak sakkoqanngikkaluarluni Adamip uumasut ersiginngilai, uumasullu taanna ersiginngilaat — nalunngilaat inuk imminnit qutsinnerusoq imminnillu qutsinnerusumik inooriaaseqartoq. Taakku Guutip pinngortitarai, inuunermik tunisimavai, taakkuninngalu ajoqusiinissaminik imaluunniit toqutsinissaminik inuk kissaateqanngilaq.
4. Adamip uumasunik timmissanillu taaguusersuineranut tunngatillugu suna ilimagisariaqarpa, suliarlu tamanna sooq soqutiginarsimassava?
4 Oqaluttuami eqqorluartumik taaneqanngilaq qanoq sivisutigisumik inuup nersutaatit, narsap nersutai timmissallu qilaap ataaniittut qimerloorsimanerai. Suut tamarmik Guutip siulersuineratigut nakkutilliineratigullu pipput. Qularnanngitsumik Adamip uumasut assigiinngitsut ataasiakkaarlugit qimerlooqataarsimassavai pissusii inooriaasiilu maluginiartarlugit, naleqqulluartumik atsersorsinnaajumallugit. Piffissaq sivisoqisoq tamatumunnga atorsimassavaa. Adamimut soqutiginarsimassaqaaq nunami uumasut pissusii assigiinngiiaartorpassuit ilikkarlugit, uumasullu assigiinngitsut immikkoortissinnaajumallugit pinngortitat uumasut tamaasa immikkut naleqquttumik atsersornissaannut sianissutsikkut oqaatsikkullu piginnaaneqarnissaq pisariaqarsimassaaq.
5-7. (a) Qularnanngitsumik suut apeqqutaalerpat? (b) Pinngortitsinermik oqaluttuami Môrsasip agdlagai sujugdlît 1:1-25-miittumi qanoq akissuteqartoqarpa?
5 Pinngortitalli uumasut tamakku tamarmik qanoq tulleriinnilimmik pinngortinneqarpat? Uumasut nunamiuttat timmissanit siulliullutik pinngortinneqarpat, imaluunniit paarlattuanik, inullu pinngortitanit atsinnerusunit tamakkunannga siulliulluni imaluunnit kingulliulluni pinngortinneqarpa? Qanoq ililluni Guutip uumassusilippassuarnut assigiinngitsunut nuna piareersarpaa, timmissat timmiffigisinnaasaattut silaannaq pinngortillugu, imeq imigassatut naasullu nerisassatut, qaammaqqullu anneq ullukkut qaamasussatut qaammaqqullu minneq unnuamik alianaallisaasussatut? Aammalu sooq silaannaq taama atoruminartigalunilu kialaartigaa, allaat inuk atisaqanngilluinnarluni sinissinnaallunilu sulisinnaallunilu sumi tamaani angalaarsinnaalluni?
6 Adam eqqoriaasaqattaaginnartussatut pineqanngilaq. Qanoq ivinneranik ilisimannittumit paasisaqarusussusia sianisuumik akissutissarsisinneqartariaqarpoq. Guutip erneratut ilisimaatsuusutut ajattorneqanngilaq, silassorissusiali qutsissoq qularnanngitsumik akuersaarneqarpoq pinngortitsinermik oqaluttuamik, Môrsasip agdlagai sujugdlît 1:1-25-mi issuarneqartumik, tunineqarneragut.
7 Suut tamarmik qanoq ilillutik pinngortinneqarsimanerannik oqaluttuaq pissanganartoq tamanna tusaramiuk Adam qularnanngitsumik qujamasussimassaqaaq. Tamatumani sorpassuit nassuiarneqarput. Oqaluttuap oqaasertaasigut paasisinnaasimassavaa ullut pinngortitsiffiusut sisamaat, inuup ullua sivikinneroqisoq nalunaaquttap-akunnerinik 24-nik sivisussuseqartoq nalunaaqutserniarlugu Guutip qaammaqqutinik angisuunik marlunnik qilammi ersersitsisalerfia, sioqqullugu piffissat sivisuut pingasut sivisoqatigiiusut, Guutip piffissamik naatsorsuisaatsi naapertorlugu ullunik taasimasai, ingerlareersimasut. Nunamiut ulluat sivikinnerusoq tamanna qaammaqqutip annerup killingusaamut tarrinneraniit kingumut tarreqqinneranut sivisussuseqarpoq. Aammattaaq Adamip paasilerpaa pinngortinneqarnini sioqqullugu ukiorpassuit ingerlareersimasut, qularnanngitsumillu ukiunik inuuffigisaminik kisitsinasualerpoq. Qaammaqqut anneq qilammiittoq ikiortigalugu taamaaliorsinnaavoq. Guutilli pinngortitsitsinermini ullui tannerusut eqqarsaatigalugit inuup siulliup paasivaa Guutip nunami pinngortitsinermini ulluisa arfernanni inuulluni. Ullup arfernata, uumasut nunamiut kingornalu inuup pinngortinneqarfigisaata, naaneranik tusarsimanngilaq. Maanna paasivaa qanoq naasut, uumasut imarmiut, timmissat uumasullu nunamiuttat qanoq tulleriinnilimmik pinngortinneqarsimasut. Adamilli, kisimi Edenimiilluni, inuk nunami paratiisiusumiittoq pillugu Guutip asannittumik siunertarisaa suli tamakkerlugu ilisimanngilaa.
Arnaq siulleq pinngortinneqartoq
8, 9. (a) Angutip naammalluinnartup uumasut sortaasigut qimerloorpai, imminullu pilluni qanoq isummerpa? (b) Sooq naleqquppa angutip naammalluinnartup aappassaminik Guuti qinnuiginngimmagu? (c) Arnap siulliup pinngortinneqarnera Bibelimi qanoq oqaluttuarineqarpa?
8 Qaratsani qimerluuisinnaassutsilu naammalluinnartut atorlugit inuup siulliup soorunami malugaa uumasut angutiviaallutillu arnaviaasut, pissuseqatigiikkuutaarlutillu kinguaassiortuusut. Inulli eqqarsaatigalugu taamaanngilaq. Immaqa taamaattumik eqqarsalerpoq inoqateqarluni nuannissagaluartoq, uumasulli akornanni assiminik nassaassaqanngilaq, aapakaalluunniit akornanni naami. Taava Adam isummerpoq asseqarani, taamaakkaluarpammi Guutip imminut aggiussimassagaluarmagu. Uumasunit tamakkuninnga tamanit allaanerusumik inuk pinngortinneqarsimavoq, allaanerusussaallunilu. Pilersaalinngilaq nammineerluni qanoq iliuuseqarniarluni ittuujuillunilu Guuti, Pinngortitsisoq, assiminik qinnuiginiarlugu. Suliassap Guutip assaaniitiinnarnissaa inummut naammalluinnartumut iluarlunilu eqqortuliorneruvoq, kinguninnguagummi paasilerpaa pissutsit atukkani Guutip arajutsisimanngikkai aalajangersimasumillu siunertaqartoq. Ima oqaluttuarineqarpoq:
9 ’Kisianni inuk ikiortissarsinngilaq najortissaminik. Taava Guutip Jehovap inuk siningaartippaa, sinitsillugulu tulimaasa arlaat tiguaa, inaa milillugu uinimmik. Guutillu Jehovap arnaliaraa tulimaaq inummit tigusani, taassumunngalu aappaa. Taava inuk oqarpoq: „[Kiisami, NV] tamassa saaneq saanerma ilaa, uinillu uinimma ilaa; angutip aappaanik taaneqassavoq una, angummit tigusaagami.“ Tamanna pillugu angutip angunnilu arnilu qimassavai, nuliilu attavigalugu, uiniussappullu ataaseq. Tamarmillu tamaqanngillat, Adamilu nulialu, kanngusunnatillu.’ — 1 Môrsase 2:20-25.
10. Arnaq naammalluinnartoq imminut aggiunneqarmat angut naammalluinnartoq qanoq qisuariarpa, oqaasiisigullu suna paasineqarsinnaava?
10 Arnaq naammalluinnartoq imminut ikiortissaallunilu naammaataasussaq aggiunneqarmat Adamip oqaasii nalerisimaarpaloqaat: ’Kiisami tamassa saaneq saanerma ilaa, uinillu uinimma ilaa.’ Arnap taassuma inuttut naammaataasup pinnersup pinnginnerani utaqqingaatsiarsimasutut oqaasii nipeqarsinnaapput. Adamip nuliaminut taaguusiuppaa „Arnaq“ (’isjsjahʹ, isumavia: „angut-arnaasoq“), ’angummit tigusaagami’. (1 Môrsase 2:23; atuaqqissaarutip New World Translation-ip quppernerup ataani nassuiaasiussaa.) Timmissat qilaap ataaniittut imaluunniit uumasut nunamiuttat atsersoqqullugit Guutip imminut aggiussimasai timikkut qanitarisutut Adamip misigisimanngilai. Uinia taakkunannga allaanerulluinnarpoq. Arnarli taanna taassumatut ittuuvoq. Tulimaasa ilaannik sanaavoq, aavalu aavata assigaa. (Takuuk Matîuse 19:4-6.) Maanna Guutip pruffiitiatut pruffiitiuffigisassaqalerpoq, pinngortitsinermik oqaluttuamik nuannersumik oqaluttuarfissaqalerluni.
11-13. (a) Adam nuliartaarmat suut apeqqutaalersimassappat? (b) Aappariinnik siullernik Guutip suna siunertaraa? (c) Inuit naammalluinnartut suut inuussutissarisussaavaat?
11 Inuulli Pinngortitsisaata Adam nuliassaanik tunigamiuk suna siunertaraa? Ikiortissaqarnissaa, naammaatissaqarnissaa, kiserliunnginniassagami assiminik ikinngutissaqarnissaa piinnarlugu nuliassaanik tunivaa? Aappariinnerannik qanoq ililluni Guutip pilluaqqusineranik oqaluttuami tamanna paasineqarsinnaavoq:
12 ’Guutilu oqarpoq: „Inuliorta assililluta, uatsitut ittussanik, naalagaassasunik aalisakkanut immamiittunut, timmissanullu qilaap ataaniittunut, nersutaatinullu, nunamullu tamarsuarmut, paarmortunullu tamanut nunami aalasunut.“ Guutillu inuk pinngortippaa imminik assililluni, Guuti assilillugu pinngortippaa; angullu arnarlu pinngortippai. Guutillu pilluaqquai oqarfigalugit: „Kinguaassisarlusi amerliartoritsi nuna tamakkerlugu, naalatsigitillugulu ilissinnut; naalagaagitsilu aalisakkanut immamiittunut, timmisanullu qilaap ataanittunut, uumasunullu tamanut nunami aalasunut.“’
13 ’Guutilu oqarpoq: „Takuasi ilissinnut tunniuppakka naatsiiat kingunissallit tamaasa nunami tamarsuarmi, orpiillu tamaasa kingunissalinnik paarmallit, taakku nerisassarisigik. Nunallu nersutaanut tamanut timmissanullu qilaap ataaniittunut tamanut nunamilu aalasunut tamanut [tarnitut uumasunut, NV] tunniuppakka naasut tungujortui, nerisassareqqullugit.“ Taamalu ilivoq.’ — 1 Môrsase 1:26-30.
Inuit siulliit siunissami atugassaat
14. Inuit naammalluinnartut Guutimit pilluaqqusaallutik qanoq ittumik siunissaqassappat, sunalu siumut takusinnaasimassavaat?
14 Takorlooriaruk Guutimit oqaluunneqarneq, qanoq iliornissamik oqaluttuunneqarneq pilluaqquneqarnerlu, angummut naammalluinnartumut nulianullu naammalluinnartumut qanoq nuannertigisimassasoq. Guutimit pilluaqqusaareersimagamik inuunerat siunertaqanngitsuunavianngilaq, qinnuigineqarnertilli naapertorlugu iliorsinnaassallutik. Siunissami atugassaat nuannerunarluinnartuupput! Katerngaat angerlarsimaffimminni, Edenip naatsiivianiillutik, Guutip piumasaanut naalakkunik qanoq ingerlanissartik qularnanngitsumik eqqarsaatigisimassavaat. Siunissaq ungasissoq takorlooraangamikku ’Edenimi, kangia-tungaani, naatsiivik’ kisiaanngitsoq takusinnaasarpaat, nunarsuarli tamaat angutinik arnanillu nuannaartunik ulikkaartoq takusinnaasarpaat. (1 Môrsase 2:8) Tipaatsuutigisimassavaat eqqarsaatigalugu tamaasa qitornarigitik, tamaasa kinguaarigitik. Tamarmik naammalluinnartuupput, isumakkut timikkullu innarluuteqaratik, soraajuitsumik inuusuttuussuseqarlutik, peqqilluinnarlutik inuunermillu nuannaarutiginnilluinnarlutik; naammalluinnartumik asaqatigiipput, siuaasatillu siulliit ilagalugit Pinngortitsisiminnik, Ataataminnik qilammiusumik, pallorfiginninnerminni ataasiussuseqarlutik. Taama ittunik ilaqutaqalernissartik eqqarsaatigalugu Adamip Evallu uummataat nuannaarsimassaqaat.
15, 16. (a) Sooq inunnut naammattunik inuussutissaqassava? (b) Ilaqutariissuit pilluartut alliartuinnartillutik Edenip avataani sumik suliaqassappat?
15 Soorlu aallaqqaataani Edenip naatsiiviani naammattunik inuussutissaqarsimasoq, taamatuttaaq nunarsuaq tamakkerlugu ilaqutaariiusunut tamanut naammattunik inuussutissaqassaaq. Guutip inuit isumassorpai naasunik naatsiiassalinnik orpinnillu naatitaqartartunik peqqinnartunik inuussutissalernerisigut. — Naleqqiuguk Tussiaat 104:24.
16 Ilaqutariit pilluartut alliartortillutik naatsiivik Edenip avataanut ilaartussavaat, Guutimmi oqaasiani oqaatigineqarmat Edenip naatsiiviata avataa suli sanarfineqarsimanngitsoq. Tassa Edenip naatsiiviatut paarilluagaasutut sanarfineqartigisimanngilaq. Taamaattumik-una Pinngortitsisup inuit oqarfigigai amerliartortillutik nunarsuarmut ’naalatsigitissasut’. — 1 Môrsase 1:28.
17. Inunnut amerliartuinnartunut sooq naammattunik inuussutissaqassava, naatsiivillu alliartuinnarmat naggataatigut qanoq pisoqassava?
17 Naasorissaasut nakkutilliisullu naatsiivimmik annertusisitsiartortillugit nunarsuup inerititai inunnut amerliartortunut naammattut naatinneqartassapput. Naggataagut nunarsuaq tamakkerluni naatsiivissuanngussaaq, nunalu tamarmi paratiisiusoq inunnit naassaanngitsumik najugarineqalissaaq. Taamaaliguni qilammit isigalugu kusanassaqaaq, Pinngortitsisorlu qilammiusoq oqarsinnaalissaaq ajunngeqisoq. — Naleqqiuguk Jûpe 38:7.
18. Sooq Edenip nunarsuaq tamakkerlugu naatsiivia eqqissiviilliorfiussanngila?
18 Edenip naatsiiviatut, inuit siulliit najugarisimasaattut, nunarsuaq tamarmi eqqissinarluinnartuussaaq. Uumasunut nunamiuttanut timmissanullu qilaap ataaniittunut, Adamip taaguusersorniarlugit qimerloorsimasaanut, ersiornissamut pissutissaqassanngilaq. Inuit naammalluinnartut nunarsuarmi tamarmi paratiiusumi najugaqartut siuaasatik siulliit nunamiusut assigalugit immap aalisagaanut, timmissanut qilaap ataaniittunut sunullu uumasunut nunami sumi tamaani aalasunut tamanut, allaallu uumasunut nujuartanut, naalagaassapput. Inunnit, ’Guuti assilillugu’ pinngortitaasunit, naalagaaffigineqarnertik sianissutsimikkut malugisimallugu uumasut tamakku, atsinnerusutut pinngortitaasimasut, inunnut eqqissisimasumik attaveqassapput. Uumasullu naalagaaffiginerisigut naalagaat nunamiusut, naammalluinnarlutuullutillu asannittuusut, uumasut akornanni eqqissinartumik atuutsitsissapput. Inuit Guutimut assingusut taakku eqqissinartumik sunniinerat siaruaatissaaq atsinnerusumillu pinngortitanut sernissuutaassalluni. Tamanillu pingaarnerusumik, inuit naammalluinnartut Guutimik, imminnut pilluaqqussutiminik arsaarinninngisaannartussamik, eqqisseqateqassapput. — Naleqqiuguk Isaia 11:9.
Guuti pinngortitsinerminit qasuersaarpoq
19. (a) Guutip siunertaanut tunngatillugu inuit siulliit suna paasisimassavaat? (b) Piffissaq pillugu Guuti qanoq paasissutissiiva?
19 Guutip siunertaa naammassineqareerpat nunarsuup qanoq isikkoqarnissaa aappariit siulliit takorlooraangamikku paasisarpaat Guutip imminnut suliassiissutaanik naammassinninniarnissaminnut piffissaq annertooq atortariaqassallugu. Piffissaq qanoq sivisutigisoq? Tamanna Pinngortitsisaata Ataataatalu qilammiusup nalunngilaa. Paasitippai ullut pinngortitsiffiusut tulleriiaartut ilaata aamma ataatsip naaggatissani nallersimagaa, aammalu ’unnummi’, piffissami Guutip ullunik pinngortitsiffimminik kisitseriaasia naapertorlugu ullup nutaap aallartiffiani, ittut. Ulloq tamanna pilluaqqunartussaasimavoq, tassa Guutip siunertaanut minguillunilu naapertuilluartumut atortussaasimalluni. Tamanna inuup naammalluinnartup, Guutip pruffiitiata, malugaa. Oqaluttuaq isumassarsiaritaasoq imaappoq:
20. ’Ullut arfineq-aappaat’ Bibelimi qanoq oqaatigineqarpa?
20 ’Guutillu isigigamigit piliani tamaasa, takuai ajunngingaartut. Taava unnunngorpoq ullaanngorlunilu, ullut arfernat. Inerput taava qilallu nunalu perpassuilu tamarmik. Ullut arfineq-aappaanni Guutip inersimagai suliani piliarisani, ullut arfineq-aappaanni sulissaarluni suliaminik tamanik piliarisaminik. Guutillu pilluaqquaa ullut arfineq-aappaat, immikkoortillugulu, sulissaarfigigamiuk suliaminik tamanik, Guuti suliorluni pinngortitsigami. Tamassa qilaallu nunallu pinngornerat pinngortitaagamik, taamani Guutip Jehovap nunalu qilallu piliarimmagit.’ — 1 Môrsase 1:31–2:4.
21. (a) Bibelimi oqaatigineqarpa ulloq qasuersaarfik naasoq aammalu Guuti oqartoq ajunngilluinnartoq? Nassuiaruk. (b) Taava suut apeqqutaalerpat?
21 Oqaluttuami taaneqanngilaq ulloq qasuersaarfik naasimasoq, Guutip takugaa ajunngilluinnartoq aammalu unnullunilu ullaanngortoq, ullut arfineq-aappaat. Ullut pinngortitsiffiusut arfinillit siulliit assiginagit ulloq tamanna suli ajunngitsutut nalunaarutigineqanngilaq, suli naannginnami. Pissutsillu ullumikkutut itsillugit Jehova Guutip ulloq tamanna ajunngitsutut taasinnaanerpaa? Manna tikillugu ulloq Guutip qasuersaarfia eqqissinartuusimava? Siunissaq nuannerunangaartoq inuit siulliit Paratiisimi katinnerminni siumut qiviarsinnaasaat sumut pisimava? Ilanngutassiami tulliuttumi pissutsit qanoq ingerlasimanerat eqqartussavarput. (wD 1/8 89)
[Quppernerup ataani ilanngussaq]
a Aqqit tamakku Môrsasip agdlagai sujugdlît hebræerisut allanneqarneranni atuakkanilu allani Allakkat Hebræer- isuut-niittuni nassaassaapput.
Qanoq akissavit?
□ Naatsiivimmik nakkutiginninnissaata saniatigut Guutip Adam sumik suliassippaa?
□ Môrsasip agdlagai sujugdlît 1:1-25-mi suna oqaluttuarineqarpa?
□ Arnaq nunamiu siulleq qanoq pinngortinneqarpa, ullormilu katiffimminni Adam qanoq oqarpa?
□ Inuit siulliit suna qilanaarisinnaasimavaat?
□ Qanoq ililluni Guutip ersersippaa ullut pinngortitsiffiusut ilaata aamma ataatsip naggatissani nallersimagaa?