Guutip ajunngissusia kajungeraajuk?
QANEQISUMIK ikinnguteqarpit? Taamaappat, eqqarsaatigisimaviuk sooq taanna kajungerigalugu? Isikkua pissutigalugu? Soqutigisaqaqatigiikkassi? Imaluunniit pissuserisai pissutaappat, soorlu inussiarnernera ilisimassusialu? Immaqaluunniit ajunngissusiata ikinngutigiinnersi nakussatsissimavaa? Taamaappat immissinnut attaveqarnersi erlinnartuuvoq. Ullumikkummi ajunngissuseq piviusoq qaqutiguinnaq naapitassaavoq, inuit amerlanersaat ’ajunngitsunik uumissuisuummata.’ — 2 Timûtiuse 3:3.
Kristumiuugaanni inuunermi attaveqarneq pingaarnerpaaq tassaanngilaq inummut allamut attaveqalersinnaaneq, kisianni tassaavoq Guutimut attaveqalersinnaaneq. Eqqarsaatigisimaviuk Guutip pissusii sorliit ilinnut kajungernarnerusut?
Guutip pissusii pingaarneri
Guutip pissusii misinnangaartut amerlasuut Bibelimi allaatigineqarput. Amerlanertigut asanninnera, naapertuilluassusia, ilisimassusia ajugaqanngissusialu pingaartinneqartarput. (5 Môrsase 32:4; Jûpe 12:13; Tussiaat 147:5; 1 Juánase 4:8) Pissutsit sisamat taakkua ilaat sorleq uatsinnut kajungernarnerusutut tikkuassagutsigu immaqa Guutip asanninnera taassagaluarparput. Aammali pissuseqarpoq asanninneranut qanittumik, tassa ajunngissusia asseqanngitsoq, Bibelimik allattut sukumerlugu allaatigisaat. Ajunngissusiatalu tamatumarpiaap inuit Pinngortitsisuminnut pitsaasumik iluaqutissiuisumillu attaveqalersissinnaavai.
Ukiut hundredellit 600-ssaata naalerneranni ukiunik naatsorsuisarnitta aallartinnerata siornagut pruffiiti Zakarias oqarpoq: „Ata ajunngissusia angingaarmat, ata takorannissusia angingaarmat!“ (Saggaria 9:17, NV) Zakariasip taama oqaaseqarnera ukiorpassuarnik sioqqullugu Esajasip tamatumunnga assingusumik Guuti unnersiutigisimavaa: ’Jehovap isumassuineri eqqartorniassavakka, . . . ajunngitsuliarpassuilu israelikkunnut.’ — Isaia 63:7.
Ukiut 300-t tamatuma siorna Davidittaaq Guutip ajunngissusia alutornangaartumik allaatigisimavaa. Misigisimasani tunngavigalugit taanna allassinnaasimavoq, inuuninimi tamaat ajunngissuseq tamanna iluaqutigisimagamiuk. Guutip David ajunngitsuliorfigisorujussuusimavaa, ingammik Batsebamut taassumalu uianut Uriasimut atatillugu sualuttumik ajortulioreernerata kingorna, Guutip naakkinnittuliorfigigamiuk. (2 Samuel 12:9, 13) Tussiaat 31:20-mi David pingaartitsilluni qujavoq: „Ila angingaarmat avaaginnissutsit [ajunngissutsit], ilinnik mianerinnittunut toqqortat.“
Angutitut uppertutut taakkunatut itsaq inuusimasutut Guutip ajunngissusia pingaartitsigaajuk? Taamaalioruit ’eqqissineq Guutip pia sianinernit tamanit annerungaartoq’ misigissavat, sukkulluunniillu Guutip piumasaanik iliornissannut kajumississutigissallugu. (Filípimiut 4:7) Guutip ajunngissusiata misinnangaassusia maanna naatsumik misissoriartigu. Taamaaliornerput Ataatatsinnik asannittumik qilammiusumik pingaartitsinerulissutigissavarput. (wD 1/12 89)