Guutip ajunngissusia — asseqanngilaq

GUUTI ajunngitsuuvoq! Qanoq akulikitsigisumik oqaaseqaat tamanna tusartannginnerparput, namminerluunniit taama oqartarluta? Eqqarsaatigisimaviulli Guutip ajunngissusia ilinnut qanoq pingaaruteqartigisoq? Tamanna eqqarsaatigeqqissaarutsigu Guuti pallorfigisarput pingaartinnerulissavarput.

Siullermilli ajunngissuseq sunaanersoq paasisariaqarparput. Ajunngissuseq soorunami tassaavoq ajunngissuseq pissuseralugu ajortuunanilu. Tamannaannaanngilarli. Pissuseq tamanna qanoq- iliuuseqartuuvoq. Inuk ajunngitsoq ajunngitsuliortarpoq. Guutillu ajunngitsup uagut ima ajunngitsuliorfigisartigimmatigut, taanna kajungerinngitsoorsinnaanngilarput.

Guutip ajunngissusiata angissusia neriorsuummit Sinajip puilasuitsuani kiffaminut ilumoortumut Mosesimut Guutip tunniussimasaanit takuneqarsinnaavoq, oqarami: ’Ajunngissusera tamaat kiinnavit saagut sarsoqqujumaarpara.’ Jehovap neriorsuut tamanna eqqortippaa, namminerlu aqqi atorlugu ima nangippoq: ’Jehova, Jehova Guuti nallittuisoq saammaasoq, kamajuitsoq isumassuingaartoq ilumuungaartorlu, isumassuinermik aalajangiisoq tuusintilinnut, ajortulianillu pinerlunnernillu ajortuliaatsinillu isumakkiisoq, pinngitsuutitsinanili.’ — 2 Môrsase 33:19; 34:6, 7.

Guutip ajunngissusia naakkinnissutsimik saammaassutsimik aammalu tunniusimassutsimik unneqqarissumik ilumuussutsimillu ilaqarpoq. Ajunngissusia aammattaaq ’kamajuissusiagut,’ tassa kamaginnittuuneragut ersertarpoq. Imaanngilaq ataataasutut maleruutiavallaartutut meeqqami naalanngissusianik killeqanngitsumik akuerinnittuusutut ittoq. Ajortuliortut uerisimasut ’pinngitsuutinngilluinnartarpai.’ Guutip ajunngitsup ajussutsip akornuserneqarani ingerlajuaannarnissaa akuerisinnaanngilaa.

Guutip naammangaartumik ajunngissusia

Maanna Guutip ajunngissutsiminik ersersitsissutigisimasaasa ilaat misissoriartigik. Aallaqqaataaniilli nunarsuaq pinngortikkamiuk inuit ajunngitsuliorfigai. Nunarsuaq pisariaqavissuinnarnik pilersunngilaa. Aap, inuuneq piviusumik nuannaarutaaqqullugu sunik tamanik naammanngaartunik pilersuisimavoq. Nerisassat imeruersaatissallu assigiinngitsorpassuit pinngortissimavai. Uumasut timmisallu alutornangaartorpassuit assigiinngitsut pinngortissimavai, naasullu avatangiisinik kusanarsaataallutillu qalipaatigissaartitsisut pinngortissimavai. Aammattaaq pinngortitarsuarmi takusassarpassuit takoranneqisut pinngortissimavai. Seqernup tarrinnera kusanaqisoq imaluunniit nuisat alutornangaartumik ilusillit isigisaraangatsigik Guutip ajunngissusianut ersiutaasarput!

Guutip ajunngingaassusia aamma erserpoq angut arnarlu pinngortikkamigit. Adam Evalu naammalluinnartumik peqqisumillu timeqalersippai Edenillu naatsiviani inissillugit. Taavalu pissanganartumik suliassippai imaannaanngilluinnartumik: ’Kinguaassisarlusi amerliartoritsi nuna tamakkerlugu, naalatsigitillugulu ilissinnut.’ Tassa inuit kinguaassarpassuatik ilagalugit nunami paratiisiusumi naassaanngitsumik inuunissamik siunissalerpai. (1 Môrsase 1:26-28; 2:7-9) Tamanna tassaavoq inunnut siullernut katittunut Guutip tunissutaa angingaartoq!

Naallu Adam Evalu pikititsigaluarmata, Guutip qimalluinnanngilai. Taamanikkut toqumik pillarsimagaluarunigit Guuti naapertuilluassusiinnarmik iliuuseqarsimassagaluarpoq. Kisianni inuit maanna ajortuliortunngortut ajunngitsuliorfigai. Inuugallarnissaannik qitornaqalernissaannillu periarfissippai. — 1 Môrsase 5:1-5.

Taamanikkumiit Guutip inuiaat ajortuliortut ajunngitsuliorfigiuaannarpai. Soorlu kunngi Davidip oqaatigigaa: „Tamanut ajunngisaartarpoq [Jehova], naakkinnissusialu atuuppoq pinngortitaanut tamanut.“ (Tussiaat 145:9) Amigaateqanngitsumik inuit pisariaqartitaat tamaasa pilersortarpai, maani Nunarsuarmi, Guutip pigisaani inuuneq ingerlajuarsinnaaqqullugu. Nalimini juutit Jesusip oqarfigai: ’Ataatassi qilammiusup . . . seqerni ajortunut ajunngitsunullu nueqqusarpaa, sialleqqusisarlunilu iluartunut iluaatsunullu.’ (Mattæus 5:45) Piitsuussuseq kaannerlu ullumikkut atuuttut Guutip inunnik isumasuinngitsoorneranik pissuteqanngillat. Akerlianilli inuit ajortunngorsimanerannik, naakkittaassusiannik atorsinnaanngissusiannillu pissuteqarpoq.

Guutip aamma inuit nunarsuup ujaraanik aatsitassalinnik assigiinngitsorpassuarnik atuinerat akueraa, silarsuullu avataaniittullu angissusiannik suullu tamarmik qanoq suliarineqarsimanerannik ilaatigut ilisimasaqartippai. Jehovap ilumut inuit ajunngitsuliorfigisarpai, naak amerlasuut pingaakujullutik oqaraluartut Guuteqanngitsoq allallu ajunngissusia atornerlullugu namminissarsiuutigigaat — allaat inoqatitik naqisimallugit. — Tussiaat 14:1.

Guutip uppertunut ajunngissusia

Naak Guutip inuit kikkulluunniit ajunngitsuliorfigisarai, taamaattoq uppertunut iliorfiginninnera nuannarinangaarneroqaaq. Adamikkut pikititsinerata kingorna ’kinguaassap’ ajortip kingunipiluinik tamanik nungutitsiartuaartussap takkunnissaa Guutip siulittuutigaa. (1 Môrsase 3:15) Adamip kinguaavisa ikittuunngitsut naak naammalluinnanngikkaluartut ilumoorlutik Guuti pallorfigisimavaat, siulittuutillu tamatuma siulliup siunissamik ajunnginnerusumik neriuuteqalersippai. Pallorfiginnittut ilumoortut taakkua ilaat, Abraham, allaat ’Jehovap ikinngutaanik’ taaneqarpoq. — Jâko 2:23, NV.

Guutip Abraham neriorsorpaa kinguaavi inuiassuanngorumaartut taakkualu ilaasa Kana’anip nunaa kingornussariumaaraat. Siulittuutip tamatuma eqquunneratut israelikkut kingusinnerusukkut inuiaqatigiittut aaqqissuunneqarput. (1 Môrsase 17:3-8; 2 Môrsase 19:6) Guutip inuiaqatigiinngorlaat taakku Ægyptenimi inussiaanerannit aniguisinnerisigut puilassuitsumiinnerannilu sernissornerisigut ajunngitsuliorfigai. Inatsisinik palasinillu aaqqiissuussaanermik tunivai, naggataatigullu nunamik naggorissumik Kana’animik kingornussitippai.

Ukiut ingerlaneranni Israel kunngeqarfiulerpoq, kunngillu pingajuat, tassa Salomon, Jehovap Jerusalemimi naalaffilioqquaa nunarsuarmi tamarmi taassuminnga pallorfiginninnermik qitiusussamik. Naalaffik inermat alutornaqisumik atoqqaartinneqarluni nalliuttorsiutigineqarpoq nuannaarfiullunilu. Oqaluttuarineqarpoq tamatuma kingorna israelikkut ’kunngi pilluaqqugaat tupiminnullu aallartut tipaatsullutik kajumillutillu ajunngitsoq tamaat pillugu, Jehovap innuttaminut naammasissaa’. (1 kúngit 8:66) Allatiguttaaq Jehovap imminnut ajunngitsuliornersui pissutigalugit israelikkut uummatiminnik qujamasuttorujussuusarput.

Ajoraluartumilli tamatiguinnaanngitsoq Guutimik ilumoortutuamik pallorfiginninnermik pisinnaatitaaffitsik pingaartittarpaat. Naggataatigut inuiaqatigiittut ilumuunngitsunngorput, ukiumilu 607-imi u.n.a.s. Babylonimit tigusaanerat Jehovap ilaginnarpaa. Soorlu Jehovap Moses oqarfigisimagaa ajunngissutsini pissutigalugu ’pinngitsuutitsinaviarani’. — 2 Môrsase 34:7.

Ukiut 70-it qaanngiunneranni israelikkut sinneri ilumoortut nunaannut Guutip utertippai. Suup taamaaliortippaa? Ajunngissusiata. Jeremias siulittuilluni israelikkut Babylonimit uternissaat ima oqaatigaa: ’Aggerumaarput qiimmattarlutik Zionip kinginnerani qerleraatilerlutillu Jehovap ajunngitsuutaanut [ajunngissusianut].’ Nangillunilu: ’„Innuttama ajunngitsuutiga [ajunngissusera] qaarsillaatigissavaat,“ oqarpoq Jehova.’ — Jerimia 31:12, 14.

Jesus nunamut pigami paasinarsivoq taannaasoq ’kinguassaq’ Edenimi siulittuutigineqarsimasoq. (1 Môrsase 3:15) Bibelimi allassimavoq: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Jesusip toquagut utertitsissut inuit ajortimit utertinneqaatigisinnaasaat naammalluinnartunnguutigisinnaasaallu pilersinneqarpoq. Taamalillutik Adamip ajortuliornerata kingunipilui ajugaaffigineqaleriartussapput. Soorlu Paulusip Romamiut allaffigigai: ’Soorlu inuup ataatsip naalanngineragut amerlasuut ajortilinngortut, taamattaaq ataatsip naalanneragut amerlasuut iluartunngussapput.’ (Rûmamiut 5:19) Qujanartumik Guutip ajunngissusia iluatsillugu inuit naapertuilluartumik periaaseqartut inuuneq naassaanngitsoq maanna neriugisinnaavaat. Abrahamitut allaat Guutimut ikinngutaalersinnaapput.

Ullumikkuttaaq Guutip pallorfigisini ajunngitsuliorfigisarpai. Bibeli aqqutigalugu unnersuuppai qanoq ilillutik ajornartorsiutitik anigorsinnaagaat. (Tussiaat 119:105) Anersaamik illernartumik killeqanngitsumik tuninissaannik neqeroorfigai, tamatumalu Guutip najoqqutassiai naapertuilluartut malillugit inuusinnaanissaannut ikiussavai. Aammattaaq siunertani saqqummersippai kristumiut ilumoortut aaqqissuussaanermik nutaamik naapertuilluartumik silarsuup matuma pisoqqap peerneqarnissaata kingorna pilersitaajumaartumik qilanaarisaqarsinnaaqqullugit. (ússatit 4:18; 2 Pîtruse 3:13) Kristumiut tamakku tamarmik pinissaat tatigilluarpaat, Guutip ajunngissutsimigut oqaatsini uniujuitsut saqqummersissimammagit. (2 Timûtiuse 3:16)

Guutip ajunngissusia eqqarsaatigigaangatsigu ilumut taassumunnga kajungissutigisarparput. Aammali una apeqqutaalerpoq:

Qanoq annertutigisumik Guutip ajunngissusia iluaqutiginiarnerparput?

Kinaagaluaruilluunniit, maannangaaq Guutip ajunngissusia malugisarpat. Anersaartorputit, nerisarputit, imertarputit, inuuneq nuannaarutigisarpat — tamakku tamarmik Guutimit tunissutaapput. Guutilli ajunngissusia tamakkiisumik iluaqutiginiarpiuk? Puioqinagu Guutip Adamikkunnut ajunngissusia ajortulioreerneranni killilerneqarmat. Taamatuttaaq uatsinnut tunisiumatuunini killilissavaa, ajunngissusia ajunngitsumik qisuariarfiginngikkutsigu. Qanoq taamaaliorsinnaavugut?

Tussiaasiortoq qinuvoq: „Siuneqassusermik ilisimassusermillu tuninnga, peqqussutitit tatigigakkit.“ (Tussiaat 119:66) Uaguttaaq tamanna qinnutigisariaqarparput. Guuti ajunngitsuummat taassumatut ajunngitsunngorniartariaqarpugut. Paulus ima kajumissaarivoq: ’Taamaattumik Guuti qitornatut asanartutut malinniarsiuk.’ — Evfisumiut 5:1.

Taamaaliorsinnaavugut ingammik Bibeli atuaqqissaarlugu paasiniarlugu ajunngissuseq suunersoq. Taava pissutsip tamatuma pissuserilerniarnerani ikioqqulluta Guuti qinnuigisinnaavarput. Ajunngissuseq tassaavoq anersaap inerititaasa ilaat ’asanninneq, tipaatsunneq, eqqissineq, kamaginninneq, avaaginninneq, . . . upperneq, saamaneq, imminullu naalakkersorsinnaaneq’ ilanngullugit. (Galâsiamiut 5:22, 23, NV) Pissutsit tamakku pissuserilerniarsinnaavavut Guutip anersaavanik tatiginninnitsigut, Bibelip Gutimit isumassarsiarititaasup atuaqqissaartarneratigut, taassumunnga qinusarnitsigut kiisalu kristumiut taamatut isumaqartut naapeqatigisarnerisigut. — Tussiaat 1:1-3; 1 Tásalûníkamiut 5:17; Eprîarit 10:24, 25.

Bibelimi aamma allassimavoq: „Eqqartortuassavaat ajunngingaarsutsit, erinalersuutigalugulu iluarsutsit.“ (Tussiaat 145:7) Guutip ajunngissutsiminik allanut oqaluttuarinninnissarput naatsorsuutigaa. Ataatarput qilammiusoq piumasatsinnik oqaluuserisariaqarparput.

Aammalu Guutip ajunngissusia atornerlunnaveersaartariaqarparput. Ilumoorpoq Guuti ajortulianik isumakkiisuusoq. Kunngi Davidip iluarisaasumik akissutisinissani ilimagaa ima qinugami: „Eqqaanaveerigit inuusunninni ajortuliakka unioqqutitsisarnikkalu, eqqaanianngalu unneqarillutillu ajunngitsuugavit, [Jehova].“ (Tussiaat 25:7) Tassa imaappa ajortuliortarsinnaasugut Guutip isumakkeerfiginninnissaa qularutiginngivillugu? Naamerluinnaq. Eqqaamajuk Guutip ajunngissusia aamma ajortuliortunut uerisimasunut ’pinngitsuutitsisanngimmat’.

Guutip ajunngissusia iluaqutigiuk

Guutip ajunngissusia misigilluaraangatsigu uummatitsinnit kajungerfigilersarparput. Apustili Paulusip oqaaqqissaarutaata pitsaasup malinnissaanik kajumissaarneqarpugut: ’Qaamasup qitornaasut saqigitsi. Qaamasulli inerititai tassa ajunngitsuliat suulluunniit iluarnerlu ilumoornerlu.’ — Evfisumiut 5:8, 9.

Ullut tamaviisa Guutip uatsinnut asanittumik isumassuinera malugisarparput. Pissutsini artornarnerpaani allaat nalunngilarput asasini qimattanngikkai. Aap, isumakkut eqqissineq misinnartoq tussiaasiortup ima allaaserisaa misigisarparput: „Ajunngissutsip unneqqarissutsillu malittarissavaannga inuunera tamaat, [Jehovallu] illuani ineqassaanga ullut tamaasa.“ — Tussiaat 23:6. (wD 1/12 89)