Silarsuup qaamasua maliguk
’Uannik malinnittup . . . qaammaqqut inuunartoq pigissavaa.’ — JUÁNASE 8:12.
1. Qaamaneq qanoq pingaaruteqartigaa?
QAAMANEQANNGITSUUPPAT qanoq iliussagaluarnerpugut? Takorlooriaruk qanoq issagaluartoq ullut tamaasa iteraanni taartoq, ullullu sinnerani qaammanngivilluni. Takorlooriaruk silarsuaq qalipaateqanngitsoq, qaamaneqanngippammi qalipaateqarnavianngimmat. Ilumummi qaamaneq ima pingaaruteqarluinnartigaaq qaamaneqanngitsuuppat inuusinnaanaviarata! Sooq? Qaamaneq iluaqutigalugu naasut, fotosyntesemik taaneqartartoq aqqutigalugu, karrinik naatitanillu nerisarisartakkatsinnik inerititaqartarmata. Oqaannarsinnaanngilagut naasoqanngitsuuppat uumasunik neriinnartassagaluarluta, tassami uumasut nerisartakkavut naasunik uumasunilluunniit naasortortunik nerisaqartuummata. Tassa imaappoq inuusinnaassagutta qaamaneq pinngitsoorsinnaanngilluinnarparput.
2. Qaamanerit sakkortuut suut nassaassaappat, tamakkualu Jehova pillugu sumik paasitippaatigut?
2 Seqinermit, ulloriaasumit, qaamaneqartinneqarpugut. Naak seqineq qaamanermik annertuumik tunisisaraluarluni ulloriaavoq anginngitsoq. Ulloriarpassuaqarpoq seqinermit annerungaartunik. Ulloriaqatigiippassuillu nunarsuatta ilaaffigisai, ataatsimut Qilaap Sillianik taaneqartartut, hundrede milliardit sinnerlugit amerlassuseqarput. Sulilu tupinnarneruvoq silaannarsuarmi milliardilippassuarnik taamaattunik ulloriaqatigiippassuaqarmat. Ulloriarpassuit kakkaak! Kakkaallu qaamaneq taakkunaneersoq angimmat! Eqqarsaatigigaanni tamakkorpassuit tamaasa Jehovap pinngortitarigai taava takorloorneqapajaarsinnaassaaq Jehova, qaamarnup tamarmi pilerfia, qanoq angilluinnaqqissaartigisoq. Soorlu Jesaja 40:26-mi allassimasoq: „Qilaap tungaanut qiviaritsi, takussagissilu: Kia ullorissat pinngortippai? [Jehovap] kisittarpai sakkutoorpassuartut sorsukkiartortitassamisut, tamaasa immikkut atiisigut taasarlugit. Silatungaarlunilu pissaaneqangaarami ataasiinnarmilluunniit minitaqarsimanngilaq.“
Qaamaneq allatut ittoq
3. Anersaakkut qaamaneq Jehovameersoq qanoq pingaaruteqartigaa?
3 Jehova aamma qaamarnermut allatut ittumut pilerfiuvoq. Qaamaneq tamanna ikiortigalugu anersaakkut takusaqarsinnaavugut, anersaakkut qaammarsarneqarluta. Taamatut „qaammarsaaneq“ oqaatsinik ujarlerfissiat ilaanni tassaanerarneqarpoq „ilisimasassanik tunioraaneq; ilinniartitsineq; anersaakkut paasisimasaqalersitsineq“. Oqaaserlu „qaammarsagaaneq“ tassaanerarneqarpoq ’ilisimasaqanngissutsimit tammartajaarnermillu aniguisitaaneq’. Guutip oqaasiani, Biibilimi, allassimasunik eqqorluartumik paasisaqarnitsigut Jehovamit anersaakkut qaammarsarneqarpugut. Taamaalilluta paasisinnaavarput Guuti kinaasoq sunillu siunertaqartoq. Paulus allassimavoq: ’Guutimmi ima oqartup: „Qaamasoq taartumit akisulerli,“ uummatitsinnut akisutsippaa, Guutip naalannassusia Kristusip taattuaniittoq qaamangaartumik ilisarineqaqqullugu.’ (2 Korintumiut 4:6) Aap, Guutip oqaasiani sallusuissutip ilisimasaqanngissutsimit tammartajaarnermillu aniguisippaatigut. Soorlumi Jesus oqarsimasoq: ’Sallusuissut ilisarissavarsi, sallusuissutillu inussiaajunnaarsissavaasi.’ — Juánase 8:32.
4, 5. Jehovamit ilisimassut qanoq ililluni inuunitsinnut qaammaqqutaava?
4 Jehova, anersaakkut qaammarsaanerup tamatuma pilerfia, ’tamanik nalusaqanngilaq’. (Job 37:16) Aamma Tussiaat 119:105-imi Guuti pillugu ima allassimasoqarpoq: „Oqaatsisit naneruaraakka isikkannut, qaammaqqutigalugillu aqqutinni.“ Taassuma alloriarnissarput tulliuttoq kisiat pinnagu, aammali inuunitsinni ingerlavissarput tamaat anersaakkut qaammarsarsinnaavaa. Takorloorsinnaaviuk qanoq issagaluartoq unnuakkut qaqqami aqqusinikkut sangujoraartukkut biilimi aqqusernulluunniit sinaani qaammaqquteqanngivilluni ingerlassalluni. Anersaakkut qaamaneq Guutimeersoq biilip qulliata sakkortuup qarmarnanut assersuunneqarsinnaavoq. Qaamarnata aqqut qaammarsarpaa ingerlavissarput takulluarsinnaaqqullugu.
5 Siulittuummi Jesaja, kapitali 2-mi, versini 2-5-imiittumi oqaatigineqarpoq nalitsinni inuit inuiannit tamaneersut anersaakkut qaammarsarneqarusuttut Guutimit katersorneqassasut, pallorfiginninnermik ilumoortumik ilisimasaqalersinnaaqqullugit tamatuminngalu malinnissinnaaqqullugit. Versi 3-mi allassimavoq: „Aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.“ Versi 5-imi inuit sallusuissutikkut ingerlarusuttut ima kajumissaarneqarput: ’Qaagitsi, ingerlasa Jehovap qaamasuani!’
6. Jehovamit qaamarnup naggataatigut sumut ingerlatikkumaarpaatigut?
6 Tassa taamaalilluni Jehova qaamanerit assigiinngitsut marluk inuunissatsinnut pisariaqarluinnartut — timikkut qaamarnup anersaakkullu qaamarnup — pilerfigaat. Timikkut qaamaneq ukiuni 70-80-ini inuunissatsinnut iluaqutigisarparput. Anersaakkulli qaamarnup nunarsuarmi paratiisiusumi naassaanngitsumik inuunermut ingerlatissinnaavaatigut. Soorlu Jesus Guutimut qinunermini oqarsimasoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ — Juánase 17:3.
Silarsuaq anersaakkut taarsiortoq
7. Sooq ullumikkut anersaakkut qaamaneq aatsaat taama pisariaqartilersimatigaarput?
7 Anersaakkut qaamaneq tamanna ullumikkut aatsaat taama pisariaqartilersimatigaarput. Biibilimi siulittuutit Matîuse kapitali 24-miittut aamma Timûtiusimut agdlagkat áipait kapitali 3-miittut ersersippaat pissutsit aaqqissuussaanerata matuma naggatissaata nalliulluinnalernerani inuusugut. Allassimaffinni taakkunani allanilu nalitsinni pisut ajortorpassuit siulittuutigineqarsimapput, erseqqissarneqarporlu ’ullussani kingullerni’ inuusugut. Siulittuutit tamakkua eqquunnerattut 1900-kkut ingerlaneranni ajunaarnerpassuit pisarsimapput. Pinerlunneq nakuusernerlu sumi tamaani amiilaarnaannartumik ingasatsikkiartorsimapput. Sorsunnerit inuit hundrede millioninit amerlanerusut inuunerannik ukiuni hundredelinni makkunani akeqarsimapput. Nappaatit, soorlu AIDS siooragisaaqisoq, inunnik millionilikkuutaanik eqquisimapput. USA-ginnarmi inuit 160.000-init amerlanerusut AIDS-imik toqussuteqareersimapput. (The New York Daily News, 20. novemberi 1991) Ilaqutariittut inuuneq nakkaakkiartorsimavoq kinguaassiuutitigullu ileqqorissaarneq itsarpaluttutut isigineqalersimalluni.
8. Inuiaat maannakkut pissutsit qanoq ittut atorpaat, sunalu pissutaava?
8 FN-ip generalsekretærerisimasaa, Javier Pérez de Cuéllar, ima oqarsimavoq: „Silarsuarmi pissutsit ingasalluinnartumik ersersitsipput piitsuussutsip inuiaqatigiit avissaartiterai.“ Aamma oqarsimavoq ’ullumikkut inuit milliardinit amerlanerusut piitsuulluinnarlutik inuusut, tamannalu nukinnut akerleriinnernik nakuusernertalinnik pilersitsisartunut sukasaataasartoq’. ’Naalliuutit tamakku’, oqarpoq, ’naalakkersuisut iliuuserisinnaasaannit killinneqarsinnaanngilluinnarput’. Peqatigiiffimmi sunniuteqarluartumi siulittaasoq ima isummersimavoq: „Inuiaqatigiit ajornartorsiutiviat tassaavoq aqunneqarsinnaajunnaarsimanerat.“ Siunnersuutip Tussiaat 146:3-miittup naleqqulluarnera ersarippoq: „Tunaareqinasigit naalagaanertat, inuit annaassisinnaanngitsut.“
9. Kina inuiaat taartumik matoorsimaneqarnerannut pisuunerpaava, sunniineranillu tamatumannga kia aniguisissinnaavaatigut?
9 Jesaja, kapitali 60-imi, versimilu 2-mi siulittuutigineqarsimasutorluinnaq ullumikkut pissutsit ipput: „Takuat, matoorsimapput nunarsuaq taartumik, inuiaallu qaasuitsumik.“ Nunarsuup inuisa amerlanerpaartaat taarsiornermik ajornerungaartumik matuneqarsimapput, anersaakkut qaamanermut Jehovameersumut ilassinnikkumannginnamik. Anersaakkullu taarsiornermut tamatumunnga Satan Diaavulu inngilipiluilu, qaamanermut Guutimeersumut akeraanerpaat, pisuupput. Taakku tassaanerarneqarput ’taarsuup matuma pissaanilissui’. (Evfisumiut 6:12) Korintumiunut agdlagkat áipait 4:4-mi oqaatigineqarpoq Diaavulu tassaasoq ’silap matuma guutia’ aammalu ’uppinngitsut isumaat tappiillisikkai Kristusip tassa Guutip assingata naalannassusianik iivangkiiliup qaamangaarnera inunnut qaamaqqunagu’. Naalakkersuisut nunamiusut kikkulluunniit silarsuaq Satanip sunniineranit aniguisissinnaanngilaat. Guutip kisimi aniguisissinnaavaa.
„Qaamasorsuaq“
10. Ullutsinni inuiannik qaammarsaanissaq Esajasip qanoq siulittuutigisimavaa?
10 Inuit amerlanerpaartaat taggarissumik matuneqarsimapput, kisianni Guutip oqaasiani, Jesaja, kapitali 60, versini 2-mi 3-milu ima siulittuuteqarpoq: „Illilli [Jehovap] nuiffigaatit, naalannassusialu takkuppoq qulikkut. Inuiaat ingerlaarumaarput qaamanerpit tungaanut.“ Tamanna Jesaja, kapitali 2-mi siulittuummut naapertuuppoq, tassani ersersinneqarami Jehovamik pallorfiginninneq ilumoortoq qaammarsagaasoq ullussani kingullerni tunngavilerneqarumaartoq, soorlu versini 2-mi 3-milu ima allassimasoq: „Tassunga inuiaat ornigutissapput, inuiaqatigiippassuillu tassunga ingerlaartut oqassapput: ’Qaa, majuarta [Jehovap] qaqqaanut,’“ „Jehovap qaqqaa“ tassa taassuminnga pallorfiginninneq ilumoortoq qutsissisitaq. Tassa naak silarsuaq Satanimit naalagaaffigineqaraluartoq qaamaneq Guutimeersoq inuit akornanni siaruarterneqarpoq, amerlasuullu taartumit aniguisitaasimapput.
11. Jehovap qaamarnanik qaammaqqusersuisussat pingaarnerpaartaat kinaassava, Simeonillu qanoq ililluni taanna tikkuarsimavaa?
11 Jesaja 9:2-mi siulittuutigineqarpoq Guuti silarsuarmut aallartitsiumaartoq qaamarnermik imminermineersumik qaammaqqusersuisussamik. Ima allassimavoq: „Inuiaat taarsiorlutik angalaartut qaamasorsuaq takussavaat; qaamasup qinngorfigissavai taarsiorfimmi najugaqartut.“ „Qaamasorsuaq“ taanna tassa Jehovap, qaamarnup Guutiata, oqaaseqartitaa Jesus Kristus. Jesus ima oqarsimavoq: ’Uanga silamiunut qaammaqqutaavunga; uannik malinnittoq taarsiussanngilaq, qaammaqqulli inuunartoq pigissavaa.’ (Juánase 8:12) Tamanna Jesus meeraaraagallarmalli ilisimaneqalereersimavoq. Lúkarse 2:25-mi eqqartorneqarpoq angut Simeonimik atilik ’iluartuullunilu Guutimik mianerinnittoq’ aammalu ’anersaamit illernartumit qulangerneqarsimasoq’. Simeonip meeraaraq Jesus takugamiuk Guutimut qinulluni ima oqarsimavoq: ’Isima takummassuk annaassutigisat, inuiaqatigiit tamarmik kiinaasa saanni piareersakkat, qaammaqqut Guutimik nalusunut qaammarsaatissaq.’ — Lúkarse 2:30-32.
12. Qanga qanorlu ililluni Jesus ’qaammaqqutitut Guutimik nalusunut qaammarsaatissatut’ ilersimava?
12 Jesus kuisinnermi kingunitsianngua inuiannut qaammarsaalerpoq. Matîuse 4:12-16-imi oqaatigineqarpoq tamanna oqaatsit Jesaja 9:1, 2-miittut, ’qaamanersuup’ tamaanngaanniit pinissaanik inunnillu anersaakkut taarmiusunik qaammarsaalernissaanik eqqartuisut, eqquunnerigaat. Matîuse 4:17-imi ima allassimavoq: ’Taamanernit aallarnerluni Jesus oqaluussisalerpoq oqarluni: „Allamik isumataaritsi, qilammiup naalagaaffia qanillimmat.“’ Guutip naalagaaffia pillugu nutaarsiassap nuannersup oqaluussissutigineratigut Jesusip inuit allat Guutip siunertai pillugit anersaakkut qaammarsimavai. Taamaalilluni ’inuussut aserujuissullu iivangkiiliukkut qaamasumut pisissimavai’. — 2 Timûtiuse 1:10.
13. Jesus imminut qanoq eqqartorsimava, sunalu pissutigalugu nalorninani taamaaliorluarsinnaasimava?
13 Jesusip qaamaneq Guutimeersoq aalajaalluni maleqqissaarsimavaa. Ima oqarsimavoq: ’Qaammaqqutaallunga silarsuarmut pivunga, uannut uppertoq taartumiittuaqqunagu. . . . Isumannimmi oqalunngilanga, Ataatalli aallartitsisima inappaanga qanoq oqassasunga qanorlu oqalussasunga. Inassutaalu naassaanngitsumik inuussutaasoq ilisimavara.’ — Juánase 12:44-50.
’Inuussut taassumaniippoq’
14. Juánase 1:1, 2-mi Jesus qanoq ilisaritinneqarpa?
14 Aap, Jehovap ernini nunamut aallartissimavaa qaamasooqqullugu inunnik inuunermut naassaanngitsumut siulersuisussaq. Juánase 1:1-16-imi taamaannera malugeriaruk. Versi 1, 2-mi ima allassimavoq: ’Pileqqaarneranni Oqaaseq ippoq, Oqaaserlu Guutimiippoq, Oqaaserlu guutiuvoq. Taanna pileqqaarneranni Guutimiippoq.’ Jesus inuttut nunami inuunngikkallarami qilammi inuusoq Johannesip ’Oqaaseq’-mik taavaa. Tamatumuuna erserpoq pinngortitat sianissusillit allat pinngortinneqareerneranni Jehova Guutip oqaaseqartittagaatut Jesus atorfeqarsimasoq. Johannes oqarmat: ’Pileqqaarneranni oqaaseq ippoq,’ isumaqarpoq Oqaaseq tassaasoq Jehovap pinngortitaasa siullersaat, tassa ’Guutip pinngortitaasa aallaqqaataat’. (sarĸúmersitat 3:14) Oqaaseq Guutip pinngortitaani siullersaanini pissutigalugu ’guutitut’, tassa pissaanilittut, taaneqarnissaminut qinngaqqunnanngilaq. Jesaja 9:6-imi siulittuutigineqarpoq Jesus taaneqarumaartoq „Guuti Pissarsuaq“-mik, Guuti ajugaqanngitsumik taaneqarnani.
15. Juánase 1:3-5-imi Jesus pillugu sumik paasitinneqarpugut?
15 Juánase 1:3-mi ima allassimavoq: ’Suut tamarmik taassumuuna pinngorput; taassumuuna pinngitsumik pinngortut ataatsimilluunniit pinngortoqanngillat.’ Aamma Kulorsamiunut agdlagkat 1:16-imi ima allassimavoq: ’Taassumuuna suut tamarmik pinngortitaapput qilammiittullu nunamiittullu.’ Juánase 1:4-mi allassimavoq ’inuussut taassumaniittoq, inuussullu inuit qaammaqqutigigaat’. Tassa paasivarput Guutip ernituaa, Oqaaseq, ikiortigalugu suut uumassuseqartut tamarmik pinngortinneqarsimasut. Aamma Guutip ernini taanna ikiortigalugu inuit ajortillit toqujartortut inuunermik naassaanngitsumik angusisinnaalernissaat ajornarunnaarsissimavaa. Qularutissaanngilluinnarpoq pissarsuaq Jesaja 9:2-mi ’qaamanersuartut’ eqqaaneqartoq tassaasoq Jesus. Juánase 1:5-imi allassimavoq: „Qaammaqqullu taartumut qaamavoq, taartumillu artorsartinneqanngilaq“ (NV). Qaamaneq ilumuussutsimut naapertuilluassutsimullu assersuutaavoq, taartorli tammarnermut naapertuilluanngissutsimullu assersuutaalluni. Taamaalilluni Johannesip ersersippaa taartoq qaamanermut ajugaanavianngitsoq.
16. Johannes Kuisisup qanoq ililluni Jesusip suliaata siunertavia eqqartorsimavaa?
16 Versi 6-imiit 9-mut ima allassimavoq: ’Inuk Johannesimik atilik [tassa Johannes Kuisisoq] Guutip aallartitaraa. Taanna tikiuppoq nalunaajaassalluni, qaammaqqut nalunaajaassutigissallugu, tamaasa taassumuuna uppeqqullugit. Taanna [Johannes] qaammaqqutaanngilaq, kisianni qaammaqqut [Jesus] nalunaajaassutigissallugu. Tassa qaammaqqut piviusoq inunnik tamanik qaammarsaasoq silarsuarmut pilersoq.’ Johannesip Messias takkuttussaq tikkuussissutigisimavaa ajoqersukkanilu Jesusimut siulersorsimallugit. Taamaalillutik inuit tamarmik qaammaqqummik ilassinninnissaminnut periarfissaqalerput. Tassa Jesus nunamut pisimavoq juutiinnaanngitsut inuilli tamarmik — pisuut piitsullu, qanorluunniit amimikkut qalipaateqaraluarunik — iluaqutissaannut.
17. Juánase 1:10, 11-mi juutit Jesusip nalaani inuusimasut anersaakkut pissuseqarnerat qanoq ersersinneqarpa?
17 Versini 10-mi 11-milu nangilluni ima allassimavoq: ’Silarsuarmiippoq taanna, silarsuarlu taassumuuna pinngorpoq, silamiulli ilisarinngilaat. Pigisaminut pigaluarpoq, pigisaasali ilassinngilaat.’ Jesus nunamut pinngikkallarami qilammiinnermini inuiannik pinngortitseqataasutut akuersugaasimavoq, nunamiileramili nammineq innuttami, juutit, amerlanersaannit ajattugaalluni. Juutit kissaatigisimanngilaat ajussusertik ilumoortuusaassusertillu qulaarneqassasut. Taartoq qaamasumit piumanerusimavaat.
18. Juánase 1:12, 13-imi qanoq ersersinneqarpa inuit ilaat Guutimut ernerulerumaartut immikkullu ittumik kingornussiumaartut?
18 Versi 12-mi 13-imilu Johannes ima nangippoq: ’Ilassisinili tamaasa Guutimut qitornarisinnaanngortippai, tassa aterminut uppertut, erniusimasut aammit pinnatik, uinngup piumasaanit pinnatik, angutip piumasaanit pinnatik, Guutimilli.’ Versini taakkunani erserpoq Jesusip ajoqersugai aallaqqaataani tassaasimanngitsut Guutip erneri. Jesus nunamut pinngikkallarmat inuit Guutimut erniulernissaat imaluunniit qilammi inuunissamik neriugisaqalernissaat ajornarsimavoq. Kristusilli utertitsissutitut pilliutaa iluaqutigalugu inuit tamatumunnga uppernermik ersersitsisut ernitut akuerineqarsinnaalersimapput Guutillu qilammi naalagaaffiani Kristusimut kunngioqataanissaminnik neriugisaqarsinnaalerlutik.
19. Juánase 1:14 naapertorlugu, sooq Jesus Guutip qarmarnata asserluinnaanik qarmaqqusersuisussatut piukkunnarnerpaasimava?
19 Versi 14-imi allassimavoq: ’Oqaaserlu uininngorpoq akornatsinniilerlunilu, takuarpullu naalannassusia soorlu ernituap ataataminit naalannassuserisaa, saammaannermik sallusuissummillu ilumioqangaartoq.’ Jesus nunamiikkallarami Guutip naalannassusiata asserluinnaanik naalannassuseqarsimavoq Guutip ernituata kisimi pigisinnaasaanik. Taamaattumik taanna Guutip siunertaanik inunnut saqqummersitsinissamut piukkunnarnerpaasimavoq.
20. Juánase 1:15 naapertorlugu, Johannes Kuisisup qanoq ililluni Jesus nalunaajaassutigisimavaa?
20 Versi 15-imi Johannes ima nangippoq: ’Johannesip [Kuisisup] nalunaajaassutigaa torlulalluni oqarluni: „Taannaavoq oqaatigisara, kingunikkut pissasoq siuninniittoq, uannimmi siulliuvoq.“’ Johannes Kuisisoq qaammatit arfinillit Jesusip inuttut erniunera sioqqullugu inunngorsimavoq. Jesusili Johannesip suliaanit annertuneroqisunik suliaqarsimagami Johannesimit sutigut tamatigut siuarsimanerulersimavoq. Johannesip miserratiginngilaa Jesus imminerminit siulliulluni piusimasoq, tassami Jesus inuttut nunami inunngunngikkallarami qilammi inuusimammat.
Jehovamit tunissutit
21. Juánase 1:16-imi allassimagami ’saammaanneq saammaannermik tapertillugu’ pigipput, qanoq paasisariaqarpa?
21 Juánase 1:16-imi ima allassimavoq: ’Taassumalu peqangaarneranit tamatta pissarsivugut, saammaanneq saammaannermik tapertillugu.’ Naak inuit tamarmik ajorti Adamimit kingornussimasartik pissutigalugu ajortiliullutik inunngorsimagaluartut Jehovap siunertaraa aaqqissuussaanerup ajortup matuma suujunnaarsinneqarnissaa, inuit millionilikkuutaat silarsuarmut nutaamut aniguisinnaanissaat, toqusut makinnissaat kiisalu inuit nunarsuarmi paratiisinngortinneqarsimasumi naassaanngitsumik inuusinnaaleqqullugit ajortip toqullu peerneqarnissaat. Tamakku tamarmik tassaapput ’saammaanneq saammaannermik tapilik’, ajunngisaarneq inuit ajortillit pisassarinngisaraluat, Kristus aqqutigalugu Jehovamit tunissutit.
22. (a) Guutip tunissutaa annerpaaq sumik periarfissaqartitsiva? (b) Biibilip atuagartaasa kingullersaanni sumut kajumissaarneqarpugut?
22 Tunissut tamakkuninnga tamanik pisinnaalersitsisoq sunaava? Jesus akivoq: ’Silamiut [inuiaat] Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Tassa, anersaakkut qaammarsarneqarusukkaanni inuunerlu naassaanngitsoq angorusukkaanni Guuti erneralu ’inuunermut siulersuisuusoq’ pillugit eqqortumik paasisaqartariaqarpoq. (apustilit suliait 3:15) Taamaattumik Biibilip atuagartaasa kingullersaanni sallusuissummik inuunermillu asannittut tamarmik ima kajumissaarneqarput: ’„Aggerna!“ Imerusuttorlu aggerli; piumasullu imeq inuunartoq akeqanngitsumik piliuk.’ — sarĸúmersitat 22:17.
23. Inuit savatut ittut qaamasumut pigunik qanoq iliussappat?
23 Inuit maniguuttut, savatut ittut, silarsuup qaamanermut piinnaratik aamma malissavaat: ’Savat malittarpaat, nipaa [sallusuissutaasoq] ilisarigamikku.’ (Juánase 10:4) Aap, nuannaarlutik ’tumai atuassavaat’ nalunnginnamikku taamaaliorneq inuunermik naassaanngitsumik nassataqarumaartoq. — 1 Pîtruse 2:21. (wD 1/4 93)
Qanoq akissavit?
□ Qaamanerit assigiinngitsut marluk suut Jehovamit pippat?
□ Sooq anersaakkut qaamaneq ullumikkut taama pisariaqartilersimatigaarput?
□ Jesus qanoq ililluni ’qaamasorsuua’?
□ Juánase kapitali 1-imi Jesus pillugu sumik paasitinneqarpugut?
□ Silarsuup qaamasuanik malinnittut sumik tunineqarumaarpat?
[Qupp. 12-mi assiliartaq]
Simeonip Jesus taasimavaa ’qaammaqqut Guutimik nalusunut qaammarsaatissaq’