”Qaamasorsi qaamali”
1. Pisinnaatitaaffik suna allanut ingerlatseqqissinnaavarput?
1 Qaalerneraniit seqernup tarrinneranut qaamaneq alianaatsoq Jehova Guutimut unnersiutaavoq. Qaamanerli Jiisusip ajoqersukkaminut pigeqqusaa allaavoq, tassa ’qaammaqqut inuuneqartitsisoq’. (Joh 8:12) Anersaakkut qaammarsagaasimaneq immikkut pisinnaatitaaffiuvoq akisussaaffimmik angisuumik nassataqartoq. Jiisusi ima ajoqersuivoq: ”Qaamasorsi qaamali inunnut”, taakkununnga iluaqutaasussatut. (Matt 5:16) Ullumikkut anersaakkut taarsiorfioqisumi qaammarsaasoqartariaqarpoq, tamannalu aatsaat taama pisariaqarnerulersimavoq! Qanoq Kristusi assigalugu qaamasorput qaamatissinnaavarput?
2. Anersaakkut qaammarngup oqaluussiffigineqarnerata pingaaruteqassusia Jiisusip qanoq takutippaa?
2 Oqaluussinikkut: Jiisusip qaamaneq sallusuissummeersoq ilisimaneqalersinniarlugu sumiluunniit inoqarfiusuni, inuit angerlarsimaffiini, naapittarfinni qaqqanilu piffissani, nukini pigisanilu atortarpai. Anersaakkut ilumoortumik qaammarsagaajuarnissap naleqartuaannarnera ilisimavaa. (Joh 12:46) Amerlanerpaat angusinnaajumallugit ‘silarsuarmut qaamasuunissaannut’ Jiisusip ajoqersukkani piareersarpai. (Matt 5:14) Anersaakkut sallusuissutsip oqaluussiffigineratigut tullerminullu ajunngitsuliornermikkut qaamasortik qaamatittarpaat.
3. Qanoq sallusuissutsip qaammarnganut ilumoortumik pingaartitsinermik ersersitsisinnaavugut?
3 Guutip innuttaasa ’qaamasup qitornaasut inuunertik’ akisussaaffittut pimooruppaat, aamma sumiluunniit inoqarfiusuni oqaluussisarlutik. (Ef 5:8) Biibilimik imaluunniit biibililersaarutinik allanik suliffimmi atuarfimmiluunniit unillatsiarnerni allanik takuneqarsinnaasuni atuartarneq Biibili pillugu oqaloqatiginninnissamut ammaassisinnaavoq. Taamaaliornikkut qatanngut arnaq inuusuttoq Biibilimik atuaqqissaaqateqalersimavoq atuaqatiminullu aqqaneq-marluusunut atuakkanik tunisisimalluni!
4. Sooq pissuserissaarneq qaammaqqutitsinnut ilaava?
4 Ajunngitsuliornikkut: Ulluinnarni pissusilersornitsigut aamma qaamasorput qaamatittarparput. (Ef 5:9) Suliffimmi, atuarfimmi sumiiffinnilu inoqarfiusuni kristumiutut pissusilersorneq allanik maluginiarneqartartoq Biibilip sallusuissutaanik oqaloqateqarnissamut periarfissiisinnaavoq. (1 Petr 2:12) Assersuutigalu, nukappiaqqap tallimanik ukiullip naalattuunera pissutaalluni angajoqqaavi ilinniartitsisuata sianerfigisimavai. Oqarpoq: “Meeqqamik ileqqorissaarnissamik taama paasisimasaqartigisumik takunngisaannarpunga!” Aap, oqaluussinerput pissuserissaarnerpullu inunnik ‘qaammaqqummut inuuneqalersitsisumut’ kajungilersitsisarpoq Guutitsinnillu unnersiutiginnilersitsisarluni.