’Qaamasorsi qaamali’
1 Silarsuaq avatangiiserput ileqqussatigut anersaakkut taartumiippoq. Sallusuissutip qaamanerata ’taartup piinik inerititaqanngitsunik suliaqartut’ qulaarpai, naakkiuffissat toqunartut ingalassimaneqarsinnaaqqullugit. Taamaattumik apustili Paulusip kristumiut ima kajumissaarpai: ’Qaamasup qitornaasut saqigitsi.’ — Evf. 5:8, 11.
2 ’Qaamasup inerititai’ silarsuup tarrajuttup akerlerluinnaraa. (Evf. 5:9) Qaamasup inerititaanik inerititaqassagutta kristumiutut inuunitsinni maligassiuilluartariaqarpugut, inuttut Jesusip akuerisaatut. Aammattaaq sallusuissummut uummammik tamakkiisumik, ilumoornermik qiimmatsannermillu pissuseqartariaqarpugut. Pissutsit taakku ulluinnarni kiffartornitsinnilu ersertariaqarput.
3 Sukkulluunniit qaamasut qaamali: Jesus ajoqersukkaminut oqarpoq: ’Qaamasorsi qaamali inunnut.’ (Matîuse 5:16) Jesusip malinnittaattut qaamaneq Jehovameersoq Guutip naalagaaffia siunertaalu pillugit oqaluussilluta qaamatittariaqarparput. Sallusuissut pillugu inuit angerlarsimaffiini, suliffeqarfinni, atuarfinni, nalunngisatsinnut sumiluunniillu periarfissaqartilluta oqaluussigaangatta anersaakkut qaamaneq qaamatittarparput. — Fil. 2:15.
4 Jesusip eqqaavaa ilaasa qaamaneq uumigiumaaraat. (Juá. 3:20) Taamaattumik ’Kristusip tassa Guutip assingata naalannassusianik iivangkiiliup qaamangaarnera’ amerlanersaat qaamatinngikkaluaraat nikallussutiginngilarput. (2 Kor. 4:4) Jehovap inuit uummataat misissuiffigisarpai kissaatiginngilaalu innuttami akornanni ilumuunngitsuliortoqassasoq.
5 Jehovap aqqutigeqqusaasigut ingerlagutta anersaakkullu qaamasuanik pigisaqalerluta allanut qaammaqqutaasinnaassaagut. Inooriaasitsigut takusinnaagunikku ’qaammaqqut inuunartoq pigigipput’ pisariaqartunik allannguinissaminnut kajumississutigilissavaat namminnerlu qaammaqqutaalerlutik. — Juá. 8:12.
6 Qaamasorput qaamatikkutsigu Pinngortitsisorput unnersiutigissavarput inuillu ilumoorusuttut ilisarsinissaannik inuunermillu naassaanngitsumik neriugisaqalernissaannik ikiorlugit. (1 Pîtruse 2:12) Taamaattumik qaamasumik pigisaqartugut allat anersaakkut taartumiittut qaamasup pigisaanik suliaqalernissaannik ikiorlugit aqqutissiuutsigit.