Jehova naalakkersuivoq — teokratii aqqutigalugu
„Jehova naassaanngitsumik kunngiuvoq.” — TUSSIAAT 146:10.
1, 2. (a) Sooq inuit naalakkersuinikkut ilungersorneri iluatsiffiunngisaannarsimappat? (b) Naalakkersueriaaseq suna kisimi iluatsitsisinnaava?
NIMRODIP nalaaniilli inuit naalakkersueriaatsit assigiinngitsut atorlugit inuiaqatigiinnik aqutsiniartarsimapput. Kisermaassilluni naakkittaatsumik naalakkersuisoqartarsimavoq, kunngeqarfeqartarsimalluni, inuit ikittuinnannguit kisermaassillutik naalakkersuisarsimallutik demokratiilu tunngavigalugu naalakkersueriaaserpassuit atorlugit naalakkersuisoqartarsimalluni. Tamakku tamaasa Jehovap akuerusimavai. Taamaattorli Guuti oqartussaassutsip tamarmi aallaavigimmani naalakkersuisut assigiinngitsut . . . (Rûm. 13:1) Taamaakkarluartorli inuit naalakkersuinikkut ilungersorneri tamarmik iluatsittarsimannganngillat. Inuit naalakkersuinerata arlaannaalluunniit inuiaqatigiinnik ataavartunik, aalajaatsunik naapertuilluartunillu pilersitsisimanngilaq. ’Inuit ilaat inoqatiminnut ajoqutaasumik pissaaneqarpallaaleqqajaajuarsimapput.’ — Nalunaajaasup oqaasii 8:9.
2 Tamanna tupaallaatigisariaqarparput? Soorunami naamik! Inuit naammalluinnanngitsut inoqatiminnik naalakkersuisussatut pinngortitaanngillat. „Nalunngilara inuup ingerlavissi aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ (Jeremia 10:23) Taamaattuminguna inuiaat oqaluttuarisaaneranni tamarmi naalakkersueriaaseq ataasiinnaq iluatsitsilluinnarsimasoq. Suna? Teokratii Jehova Guutimit ingerlanneqartoq. Griikerit oqaasii Biibilimi atorneqartut [kraʹtos] aamma [the·osʹ] isumaqarput „naalakkersuineq“ aamma „Guuti“. Naalakkersuinermik allamik Jehovap Guutip nammineq naalakkersuineranit pitsaanerusoqarsinnaanerpa?
3. Teokratii itsaq qanoq ililluni nunarsuarmi atuuttarsimava?
3 Edenimi Adamikkut Evallu Jehovamut pikitsitsinissaata tungaanut teokratii atuussimavoq. (1 Moses 3:1-6, 23) Abrahamip nalaani illoqarfimmi Salemimi. Melkizedekip palasiullunilu kunngiuffigisaani teokratiip atuunnera malunnarsimavoq. (1 Moses 14:18-20; Eprîarit 7:1-3) Inuiaqatigiinnulli teokratii Jehova Guutimit ingerlanneqartoq siullermeerluni atuutilersinneqarsimavoq Sinajip inoqajuitsuani ukiut hundredellit 16-issaanni u.n.s. Qanoq ililluni? Teokratiimillu naalakkersuineq qanoq ililluni ingerlasarpa?
Teokratii atuutilerpoq
4. Jehovap qanoq ililluni inuiaat Israelikkut teokratiimut atasut pilersissimavai?
4 Ukioq 1513 u.n.s. Jehovap Israelikkut Egyptenimi inussiaanerannit aniguisippai Faraollu sakkutuui nalersuisut suujunnaarsillugit. Taava Israelikkut Sinajip Qaqqaanut ingerlappai. Qaqqap ataani tammaarsimatillugit Guutip Moses aqqutigalugu ima oqarfigai: „Nammineq takusimavarsi Egyptenimiut qanoq iliorfigigikka, qanorlu nattorallup suluiniitillusilusooq ingerlakkissi uannut pisillusi. Oqaatsikka naalalluarussigit angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi.“ Israelikkut ima akipput: „[Jehovap] oqaasii tamaasa malillugit iliorumavugut.“ (2 Moses 19:4, 5, 8) Angeruseq pilersinneqarpoq, inuiaqatigiillu Israelikkut teokratiimik aqunneqartut pilersinneqarput. — 5 Moses 26:18, 19.
5. Qanoq ililluni oqartoqarsinnaava Jehova Israelimi naalakkersuisimasoq?
5 Qanoq iillutik Israelikkut Jehovamit, inuit isaannut takussaanngitsumit, naalakkersorneqarpat? (2 Moses 33:20) Inuiaqatigiinni inatsisit palasinillu Jehovap aaqqissuussai aqqutigalugit. Inatsisnik maleruaasut Guutillu aaqqissuussai naapertorlugit pallorfiginnittut Teokratiimik Aaqqissuussiorsuarmut, Jehovamut, kiffartorput. Aamma palasit Urim aamma Thummim, ajornartorsiorfinni Jehova Guutip najoqqutassarititai pigaat. (2 Moses 28:29, 30) Kiisalu utoqqaanertat piginnaassuseqarluartut Jehovap teokratiimik aqutsinermini sinniisutut atorpai, taakkulu inatsisinik atortitsinermik nakkutilliisuupput. Angut taakku qanoq iliortarsimanerat qimerloorutsigu paasisinnaanerulissavarput inuit qanoq ilillutik Guutip naalakkersuineranut naalatsitigitittussaasut.
Teokratiip ataani oqartussaassuneq
6. Sooq teokratiip ataani oqartussaaffinnik tigummisaqarneq inunnut unamminiarnartuusimava, akisussaaffimmullu tamatumunnga angutit qanoq ittut pisariaqartinneqarsimappat?
6 Israelimi oqartussaassuseqartut annertuumik immikkut pisinnaatitaaffeqarsimapput, oqimaaqatigiissaariniarnerli taakkununnga unamminiarnartuusimavoq. Sianigisussaasimavaat Jehova aqqata illernarsisinneqarnissaa tunullinngortillugu imminnut pingaartippallaalinnginnissartik. Oqaatsit isumassarsiarititaasut, tassa „inuup ingerlavissi nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu“, ilumut Israelikkunnut eqquussimapput soorlulu inuiaat sinnerinut taamaattoq. Utoqqaanertat Israelip teokratiimik aqutaanera eqqaamajuaraangassuk namminnerlu piumasartik pinnagu Jehovap piumasaa salliutikkaangassuk Israelikkut ingerlalluartarsimapput. Mosesip sakia, Jetro, Israelikkut akornanni qinersereerluni inuttut qanoq ittuusariaqarnerat oqaatigilluarpaa, tassa ’pikkorissuussasut, Guutimik mianerinnittut, tatiginartut iluanaarniapilunnermullu akerliulluinnartut’. — 2 Moses 18:21.
7. Jehova Guutimit oqartussaassuseqartitaasutut Moses sukkut maligassaalluartuusimava?
7 Israelimi annertuumik oqartussaassuseqartitaasoq siulleq tassaavoq Moses. Teokratiip ataani oqartussaassuseqartitaasutut maligassaalluartuusimavoq. Inuttut sanngiissutsit takkuttaraluartut Mosesip tamatigut Jehova tunaartarisarsimavaa. Apeqqutinik nassuiarneqareersimanngitsunik takkuttoqaraangat Jehovamit unnersuunneqarnissani ujartortarpaa. (Naleqqiuguk 4 Moses 15:32-36.) Qutsissumik inissisimaffeqarnermi nammineq ataqqinaatissamisut atornissaa qanoq ililluni ussernartorsiorfiginaveersaarpaa? Inuiaat millionilikkuutaat siulersuisuuffigigaluarlugit ’inuusimavoq anneruniajuitsoq, nunarsuarmi inunnit tamanit anneruniajuinnerpaasoq’. (4 Moses 12:3) Inuttut qaffannissaminik anguniagaqanngilaq Guutilli naalannrsisinneqarnissaa salliutittuaannarlugu. (2 Moses 32:7-14) Aamma uppernermigut nukittuujusimavoq. Inuiannut siulersuisunngunngikkallarnermini pissusia eqqartorlugu apustilip Paulusip ima oqaatigisimavaa: ’Takussaanngitsoq isigalugulusooq iperarnaveersaarpaa.’ (Eprîarit 11:27) Aap, Mosesip eqqaamajuaannarsimavaa inuiannut Naalakkersuisuik tassaasoq Jehova. (Tussiaat 90:1, 2) Tassa uagutsinnut ullumikkut maligassaalluartoq!
8. Jehovap Josua qanoq peqqusimavaa, soorlu tamanna malugisariaqartuua?
8 Mosesip kisimiilluni Israelimi nakkutigisassai ingasappallaalermata Jehovap anersaani utoqqaanertanut 70-inut, inuiaqatigiinni eqqartuussinermut Mosesip ikiortissaanut, kuivaa. (4 Moses 11:16-25) Ukiuni tulliuttuni illoqarfiit tamarmik immikkut utoqqaanertartaqartussaasimapput. (Naleqqiuguk 5 Moses 19:12; 22:15-18; 25:7-9.) Moses toqummat Jehova Josua inuiaqatigiinnut siulersuisunngortippaa. Takorloorsinnaavarput immikkut pisinnaatitaaffimmini tamatumani Josua suliassaqartarsimassaqisoq. Taamaattorli Jehovap oqarfigaa ataaseq sumiginnassanngikkaa: ’Inatsisit tamakkua allassimaffiat qanernit nigussanngilaq, eqqarsaatigissavalli ullukkullu unnuakkullu, tassani allassimasut tamaasa maleruaqqissaaqqullugit.’ (Jôrsuap agdlagai 1:8) Malugiuk naak Josua ukiuni 40-nit amerlanerusuni kiffartoreersimagaluarluni Inatsisinik atuartarnissani pisariaqartittuarsimagaa. Aamma uagut qanorluunniit sivisutigisumik kiffartorsimagaluarutta qanorluunniillu amerlatigisunik pisinnaatitaaffeqaraluarutta Biibilimik atuaqqissaartarnissarput Jehovallu inatsisaanik najoqqutassiaanillu eqqaasittuartarnissarput pisariaqartipparput. — Tussiaat 119:111, 112.
9. Eqqartuussisoqarnerup nalaani Israelimi qanoq pisoaqarsimav?
9 Josua eqqartuussinernik tulleriiaaginnarnik suliassaqartarsimavoq. Ajoraluartumik Israelikkut ’Jehovap iluarinngisaanik iliuleraluttuinnarsimapput’. (Eqqartuussisut 2:11) Eqqartuussisoqarnerup nalaa pillugu ima allassimasoqarpoq: „Tamatuma nalaani Israelikkut kungeqanngillat. Angutit tamarmik namminneq iluarisaminnik iliuinnartarput.“ (Eqqartuussisut 21:25) Inooriaaseq pallorfiginneriaaserlu eqqarsaatigalugit tamarmik immikkut iluarisaminnik aalajangiisarsimapput, oqaluttuarisaanerullu takutippaa Israelikkut ilarpassui ajortumik aalajangiisarsimasut. Guutipilussiulersimapput ajortorujussuarmillu pinerluuteqartarlutik. (Eqqartuussisut 19:25-30) Taamaakkaluartorli ilaat uppernermikkut maligassaasimapput. — Eprîarit 11:32-38.
10. Samuelip nalaani Israelimi naalakkersuineq qanoq allanngorujussuarpa, sunalu tamatumunnga pissutaava?
10 Eqqartuussisup kingulliup, Samuelip, inuunerata nalaani Israelikkut naalakkersorneqarnikkut ajornartorsiorput. Inuiannit saniliminnit akeraasunit, tamarmik kunngeqartunit, sunnerneqarlutik Israelikkut isumaqalerput kunngeqartariaqarlutik. Puiorpaat Kunngeqareerlutik, naalakkersorneqarnertik teokratiikkut ingerlasoq. Jehovap Samuel oqarfigisimavaa: „Illit pinnatit uanga narrugaannga kunngigiumananga.“ (1 Samuel 8:7) Tassuuna takuneqarsinnaavoq qanoq ajornanngitsigisumik anersaakkut isikkiveerussinnaasugut silarsuarmillu avatangiisitsinnit sunnerneqarsinnaasugut. — Naleqqiuguk 1 Korintumiut 2:14-16.
11. (a) Naalakkersorneqarnikkut allanngorneqaraluartoq qanoq ililluni oqartoqarsinnaava Israel kunnginit aqunneqartoq teokratii tunngavigalugu naalakkersorneqarnera ingerlaannartoq? (b) Israelip kunngiinut Jehova qanoq peqqusiva, sunalu siunertaralugu?
11 Taamaakkaluartoq Jehovap Israelikkut piumasaat akueraa kunngiilu siulliit, Saul Davidilu, toqqarlugit. Taamaalilluni Israel teokratii tunngavigalugu Jehovamit aqunneqaannarpoq. Taamaattumik kunngiisa tamanna eqqaamasariaqarpaat, tamarmik immikkut Inatsisit kopiivinik pigisaqartariaqarput ullullu tamaasa atuartarlugit, ’ilikkaqqullugu [Jehova] Guuti mianerissagamikku peqqussutit ileqqoreqqusallu inatsisini taakkunani ataqqissallugit maleruassallugillu, makitasaarluni nunaqqatini anneruniarfigissannginnamigit’. (5 Moses 17:19, 20) Aap, Jehovap kissaatigaa teokratiimik ingerlatsinermini oqartussaatitani makitasaassanngitsut iliuusiilu Inatsisiminut naapertuutissasut.
12. Kunngi David uppernermigut qanoq maligassaasimava?
12 Kunngi David Jehovamut assut uppissuseqarsimavoq, Jehovalu angerusiliorpoq taanna kunnginut kinguaariikkuutaanut atajuartussanut siuaasaassasoq. (2 Samuel 7:16; 1 Kunngit 9:5; Tussiaat 89:29) Davidip maniguulluni Jehovamut naalatsigitinnera maligassaalluarpoq. Ima oqarsimavoq: „[Jehova], pissaassutsit kunngip tipaatsuutigaa, qiimmattangaarpoq ikiuinerit pillugu.“ (Tussiaat 21:2) Naak David uinikkut sanngiissuseq pissutigalugu ilaannikkut kukkuluttortaraluarluni naalakkersuisut nammineq pissaassutsi pinnagu Jehovap pissaassusia tunaartarisarsimavaa.
Iliuutsit ileqqullugu teokrateerpalaanngitsut
13, 14. Davidip kingoraartai qanoq teokrateerpalaanngitsumik iliuuseqarsimappat?
13 Israelimi siuttuusarsimasut tamakkeratik Mosesitut Daviditullu issimapput. Ilarpassui teokratiikkut aaqqissuussanut ataqqinninnginnermik sakkortuumik ersersitsisimapput, Israelimi pallorfiginninnermik ilumuunngitsumik akuersaaginnartuullutik. Allaat naalakkersuisut aalajaatsut ilaat teokrateerpalaanngitsumik iliuuseqartarsimapput. Ajortorujussuarmik iliuuseqarsimasutut assersuutissaavoq Salomon, assut ilisimatullunilu pigissaarsimasoq. (1 Kunngit 5:5, 9) Jehovap inatsisai sumiginnarlugit amerlasuunik nuliartaartorsimavoq israelimilu guutipilussiorneq akuerisimallugu. Qularnanngitsumik ukiut Salomonip naalakkersuiffii kingulliit ajornartorsiorfiusimapput. — 1 Moses 17:14-17; 1 Kunngit 11:1-8; 12:4.
14 Salomonip Rehabeam qinnuigineqarsimagaluarpoq innuttami atugaannik oqilisitsissasoq. Saamasumilli iliuuseqarnani . . . — naggueqatigiilli 12-sut ilaat qulit annaallugit. (2 Israelikkut 10:4-17) Naggueqatigiit qulit avissaartut kunngeqarfianni kunngiusoq siulleq tassaavoq Jeroboam. Kunngeqarfimmi inuiaqatigiinnut illuatungiliuttunut ilannguteqqinngisaannarnissaa ilungersuutigingaaramiuk nersussuaaqqamik pallorfiginninneq atuutilersippaa. Immaqa tamanna torrallaalluni politikkikkut siuariarnertut isikkoqarsinnaagaluarpoq, teokratiimilli sumiginnaaneruvoq peqqarniitsoq. (1 Kunngit 12:26-30) Kingorna aalajaalluni sivisuumik kiffartoreerluni naggataatigut kunngip Asap tusaamanerlugaalissutigisaminik pingaarniarluni akuersaarivoq. Pruffiiti Jehovap unnersuussutaanik nassarluni imminukartoq ajortumik pivaa. (2 Israelikkut 16:7-11) Aap, allaat misilittagartoorsuit ilaannikkut unnersuunneqartariaqallertarput.
Teokratiip atorunnaarnera
15. Jesus nunamiikkallarmat juutit siuttui teokratiip ataani akisussaassuseqartitaasuugaluit qanoq kukkuluttorsimappat?
15 Jesus Kristusip nunamiinnerata nalaani Israel teokratii tunngavigalugu suli siulersorneqarsimavoq. Alianaraluartumilli utoqqaanertat akisussaaffeqartut ilarpassui anersaakkut pingaartitsisuusimanngillat. Qanilaarsuseq Mosesip ersersissimasaatut ittoq ineriartortinngitsoorsimavaat. Anersaakkut ajortunngorsimanerat Jesusip tikkuarsimavaa ima oqarami: ’Allakkanik ilisimasut farisiiarillu Mosesip issiaviani issiasaraat. Taamaattumik ilissinnut maleruaqqusaat tamaasa maleruarsigik taamaaliorlusi, suliaalli malissanngilasi. Oqaraluarlutimmi taamaaliortarinngillat.’ — Matîuse 23:2, 3.
16. Ukiuni hundredelinni siullerni juutit siuttui teokratiimut ataqqinninnginnermik qanoq ersersitsisimappat?
16 Jesus Pontius Pilatusimukaakkamikku juutit siuttuisa teokratiimut naalaysigitinneq qanoq nigorsimatigalugu takutissimavaat. Pilatusip Jesus killisiorpaa paasillugulu pisuussuteqanngitsuusoq. Jesus juutit saavannut sassarteriarlugu Pilatus oqarsimavoq: ’Takussagissi kunngersi.’ Jesusip toqutaanissaa juutit nilliallutik piumasarilermassuk Pilatus oqarsimavoq: ’Kunngersi qisummut kikiattussanerpara?’ Palasiunerit akisimavaat: ’Allamik kunngeqanngilagut, kaasari kisiat kunngigaarput.’ (Juánase 19:14, 15 NV) Kaasari kunngitut akueraat, Jesu, ’Jehovap aqqani tikiuttoq’, pinnagu. — Matîuse 21:9, NV.
17. Sooq uinikkut Israelikkut inuiaajunnaarsimappat teokratiimik aqunneqartut?
17 Jesusimik ilassinnikkumannginnermikkut juutit teokratii ilassiumanngilaat, taannami siunissami teokratiimik aaqqissuussami qullersaasussaavoq. Jesus tassaavoq kunngip Davidip kinguaava naassaanngitsumik naalakkersuisussaq. (Jesaja 9:6, 7; Lúkarse 1:33; 3:23, 31) Taamaattumik uinikkut Israelikkut tassaajunnaarput inuiaat Guutip qinigai. — Rûmamiut 9:31-33.
Teokratii nutaaq
18. Teokratii nutaaq suna ukiuni hundredelinni siullerni pilersinneqarsimava?
18 Guutilli Israelikkunnik uiniusunik tunuartitsinera nunarsuarmi teokratiip taamaatinneranik kinguneqanngilaq. Jesus Kristus aqqutigalugu teokratiimik nutaamik pilersitsivoq. Tamanna tassaavoq ilagiit kristumiut tanitat, tassaasut inuiaqatigiit nutaarluinnaat. (1 Pîtruse 2:9) Taakku apustilip Paulusip taasimavai ’Israelimik Guutip pigisaanik’, qularnanngitsumik ’immikkut naggueqatigiissunik immikkullu oqaasilinnit immikkullu inuiaasunit inuiaqatigiinnillu tamanit’ pisunik ilaasortallit. (Galâsiamiut 6:16; sarĸúmersitat 5:9, 10) Inuit naalakkersuisuinut naalatsigitiitialutik teokratiimut nutaamik tamatumunnga ilaasortaasut Guutimit naalakkersorneqarput. (1 Pîtruse 2:13, 14, 17) Teokratiip nutaap pilersinneqarnerata kingunitsianngua uinikkut Israelip siuttuisa ajoqersukkat ilaat Jesusip peqqussutaanut naalakkunnaarsinniarsarigaluarpaat. Qanoq qisuariarpat? ’Guuti inunnit naalattariaqarneruarput.’ (apustilit suliait 5:29) Ilumut isuma teokratiimik tunngavilik!
19. Qanoq ililluni oqartoqarsinnaava ukiuni hundredelinni siullerni ilagiit kristumiut teokratii tunngavigalugu aqunneqartut?
19 Teokratiili nutaaq qanoq ingerlava? App, kunngeqarpoq, tassa Jesus Kristus, Teokratiimik Aaqqissuisorsuarmut, Jehova Guutimut, sinniisaasoq. (Kulorsamiut 1:13) Naak kunngi qilammiittoq takussaanngikkaluartoq naalakkersuinera naalatsiinut piviusuuvoq, oqaasiilu taakkua inuunerminni atorpaat. Takussaasumik nakkutilliineq eqqarsaatigalugu utoqqaanertat anersaakkut piginnaassuseqartut ivertinneqarsimapput. Jerusalemimi angutit taamaattut siulersuisoqatigiittut suliaqartitaasimapput. Siulersuisoqatigiinnut taakkununnga ilaasut ilaat tassaasimapput utoqqaanertat angalasartut soorlu Paulus, Timoteus Titusilu. Ilagiillu tamarmik immikkut angutinik utoqqarnit, imaluunniit utoqqaanertanit, nakkutigineqartarsimapput. (Títuse 1:5) Ajornartorsiutinik aaqqikkuminaatsunik takkuttoqaraangat utoqqaanertat siulersuisoqatigiinnik imaluunniit taakkua ilaannik, soorlu Paulusimik, siunersiuisarsimapput. (Naleqqiuguk apustilit suliait 15:2; 1 Korintumiut 7:1; 8:1; 12:1.) Kiisalu ilagiinnut ilaasortaasut tamarmik immikkut teokratiip atatiinnarneqarnissaanut ilasaasuusarsimapput. Tamarmik immikkut Allakkani najoqqutassanik inuunerminni atuinissaminnut Jehovamut akisussaasimapput. — Rûmamiut 14:4, 12.
20. Apustilit toqunerisa kingorna teokratii qanoq oqaatigineqarsinnaava?
20 Paulus mianersoqqusisimavoq apustilit toqoreerneranni tunussineqalerumaartoq, taamatorluinnarlu pisoqarsimavoq. (Tásalûníkamiut 2:3) Ukiut ingerlaneranni kristumiuunerartut millionilinngorsimapput kingornalu hundredelikkuutaanik millionilinngorsimallutik. Ilagiinnik assigiinngitsunik ineriartortitsisimapput, ilaat . . . Ilagiilli tamakku ileqqui upperusaalluunniit Jehovap naalakkersuineranut naapertuutinngillat. Ingerlaasii teokratiisimik tunngaveqanngillat!
21, 22. (a) Naggatissap nalaani Jehovap qanoq ililluni teokratii aaqqissuuteqqissimavaa? (b) Apeqqutit teokratiimut tunngasuut suut tulliani akineqassappat?
21 Pissutsit aaqqissuussaanerata matuma naggatissaata nalaani kristumiut ilumoortut kristumiunit ilumuunngitsunit avissaartiterneqartariaqalersimapput. (Matîuse 13:37-43) Tamanna ukiumi teokratiip oqaluttuarisaanerani pingaarutilimmi, 1919-imi, aallartippoq. Taamani siulittuut pingaarutilik Jesaja 66:8-mi allassimasoq eqquuppoq: „Kina taamaattumik tusarsimava, kina taamaattumik takusaqarsimava? Nuna ullormi ataasiinnarmi pinngortitaasimanerpa, inuiaat tassuuguinnaq pilersitaasarnerpat?“ Apeqqutit tamakku akisuasumik angerneqarput! 1919-mi ilagiit kristumiut tassaaleqqipput „inuiaat“ immikkoortut. „Nuna“ teokratii tunngavigalugu ingerlasoq ullormi ataasiinnarmilusooq pilersinneqarpoq! Naggatissaq qanilliartortillugu inuiaat nutaat taakku aaqqissugaanerat sapinngisamik ukiuni hundredelinni siullernisut ilersikkiartuaarneqarpoq. (Jesaja 60:17) Teokratiili tunngaviglugu ingerlanneqartuaannarsimavoq. Iluutsikkut upperutsikkullu inatsisit najoqqutassiallu isumassarsiarititaasut Allakkaniittut najoqqtuariuarsimavai. — Tussiaat 45:17; 72:1, 2.
22 Teokratiimut tamatumunnga illit atavit? Tamatuma ataani akisussaaffeqarfeqarpit? Taamaappat taava nalunngiliuk teokrateerpalaartumik iliorneq qanoq isumaqartoq? Nalunngiliuk suut ingalassimasariaqartut? Apeqqutit tamakku ilanngutassiami tulliuttumi sammineqssapput. (wE 15/1 94)
Nassuiarsinnaaviuk?
□ Teokratii sunaava?
□ Israel qanoq ililluni teokratiimik siulersorneqarsimava?
□ Israelip teokratii tunngavigalugu aqunneqarneranik kunngit eqqaasinniarlugit Jehova qanoq aaqqissuussisimava?
□ Ilagiit kristumiut qanoq ilillutik teokratiimik aqunneqartuusimappat, qanorlu aaqqissuussaasimappat?
□ Teokratiimik aaqqissuussaaneq suna nalitsinni pilersinneqarsimava?
[Qupp. 10-mi assiliartaq]
Pontius Pilatusip saavaniillutik juutit siuttuisa kaasari Jehovap teokratiikkut kunngiutitaanit piumanerunerarpaat