Teokratiip ataani savanik paarsisut savaatillu
„[Jehova] eqqartuussisigaarput, [Jehova] naalakkersortigaarput, [Jehova] kunngigaarput, taassuma annatsikkumavaatigut.“ — JESAJA 33:22.
1. Sooq oqartoqarsinnaava ukiuni hundredelinni siullerni kristumiut aamma ullumikkut kristumiut teokratiimik aqunneqartut?
TEOKRATII isumaqarpoq Guutip naalakkersuinera. Guutip naalakkersuinerata ataaniikkutta Jehovap oqartussaassusia akuerisariaqarparput inuunitsinnilu aalajangigassani annertuuni annikitsunilu taassuma ilitsersuussutai unnersuussutaalu maleruartariaqarlugit. Ukiuni hundredelinni siullerni ilagiit teokratiimut atalluinnartuusimapput. Kristumiut ilumoorlutik ima oqarsinnaasarsimapput: „[Jehova] eqqartuussisigaarput, [Jehova] naalakkersortigaarput, [Jehova] kunngigaarput.“ (Jesaja 33:22) Taamatuttaaq ullumikkut Jehova Guutip peqatigiissortai, tanitanik sinneruttunik aallaaveqartut, teokratiimut atalluinnartuupput.
Qanoq ililluta ullumikkut teokratiimik aqunneqarpugut?
2. Jehovap naalakkersuineranut Jehovap Nalunaajaasui ilaatigut qanoq ilillutik naalatsigitippat?
2 Sooq oqarsinnaavugut Jehovap nunarsuarmi peqatigiissortai teokratiimik aqunneqartuusut? Peqatigiissortaanut ilaasut Jehovap naalakkersuineranut naalatsigitilluinnartuummata. Jesus Kristusillu, Jehovap kunnginngortissimasaata, siulersuineranik malinnittuupput. Assersuutigalugu, naggatissap nalaani Teokratiimik Aaqqissuussisorsuup Jesus ima peqqusimavaa: ’Killuutersorit killuutinnik katersuilerlutillu, katersuiffissaq nalliummat.’ (sarĸúmersitat 14:15) Jesus naalalluni nunarsuarmi katersuilerpoq. Suliami tamatumani kristumiut Kunngertik tapersersorpaat nutaarsiassamik nuannersumik suliniarluarlutik oqaluussissutiginninnermikkut ajoqersuganngortitsiortornermikkullu. (Matîuse 28:19, 20; Mákorse 13:10; apustilit suliait 1:8) Taamaaliornerminni aamma Jehovamut, Teokratiimik Aaqqissuussisorsuarmut, suleqataapput. — 1 Korintumiut 3:9.
3. Kristumiut ileqqussanut atatillugu qanoq ilillutik teokratiimut naalatsigitippat?
3 Aamma inooriaatsimikkut kristumiut Guutip naalakkersuineranut naalatsigitipput. Jesus ima oqarsimavoq: ’Sallusuissummik ileqqulik qaamasumut pisaraaq suliani saqqummeqqullugit, Guutimi suliarisaammata.’ (Juánase 3:21) Ileqqussatigut najoqqutassat ullumikkut oqqassutigineqartaqaat, kristumiulli akornanni oqqannerit taamaattut inissaqanngillat. Jehovap ileqqorlunertut isigisai ileqqorlunnertut isigaat, nappaatitullu tunillannartutut itillugit ingalassimaniartarpaat! Aamma ilaquttaminnik isumassuilluarniartuupput, angajoqqaaminnut naalattuullutik oqartussaasunullu qulliunerusunut naalattuullutik. (Evfisumiut 5:3-5, 22-33; 6:1-4; 1 Timûtiuse 5:8; Títuse 3:1) Taamaakkamik teokratii naapertorlugu iliortarput, Guutip piumasaa malillugu.
4. Adam, Eva Saulilu qanoq kukkusumik isumaqarsimappat, kristumiullu allaanerusumik isumaqarnertik qanoq ersersippaat?
4 Adamip Evallu paratiisi annaasimavaat suna eqqortuusoq sunalu eqqunngitsuusoq namminneq aalajangissallugu kissaatigigamikku. Jesus tamatuma akerlerluinnaanik kissaateqarsimavoq. Oqarsimavoq: ’Piumasara pinnagu aallartitsisima piumasaa piniarpara.’ (Juánase 5:30, NV; Lúkarse 22:42; Rûmamiut 12:2; Eprîarit 10:7) Saulip, Israelip kunngeqqaavata, Jehova naalassimagaluarpaa — ilaannakortumilli. Tamanna pillugu iluarisaajunnaarpoq. Samuelip ima oqarfigisimavaa: „Naalanneq pilliutinit pitsaanernit pingaarnerungaarpoq, [Jehovamullu] naalaarneq pingaarneruvoq savat angutivissat tunnuannit.“ (1 Samuel 15:22) Jehovap piumasaanik ilaatiguinnaq iliortarneq teokratiimut naapertuuttumik iliornerunerpa, soorlu aalajangersimasumik oqaluussisaraluarluni imaluunniit ataatsimeeqataasaraluarluni kisianni ileqqussatigut allatigulluunniit eqqunngitsumut nakkaannartaraanni? Soorunami naamik! ’Kajumilluta Guutip piumasaatut’ iliornissarput ilungersuutigaarput. (Evfisumiut 6:6, NV; 1 Pîtruse 4:1, 2) Uagut Saul ilaarnagu Guutip naalakkersuineranut tamakkiisumik naalatsigitippugut.
Teokratii ullumikkut
5, 6. Ullumikkut Jehovap qanoq ililluni inuiaat iliuuseqarfigisarpai, aaqqissuussamullu tamatumunnga suleqataaneq qanoq kinguneqartarpa?
5 Itsaq Jehova naalakkersuillunilu sallusuissutinik qulaarisarsimavoq inuit ataasiakkaat, soorlu pruffiitit, kunngit apustilillu, aqqutigalugit. Ullumikkut taamatut periaaseqanngilaq; isumassarsisinneqartartunik pruffiiteqaranilu apustileqanngilaq. Jesus oqarsimavoq kunngitut najuunnermini malinnitsini aalajaatsut, ataatsimut „inussiaq aalajaallunilu silatooq“-mik taaneqartut, ilisaritikkumaarlugit taakkulu pigisaminut tamanut paarsisunngortikkumaarlugit. (Matîuse 24:45-47, NV; Jesaja 43:10) 1919-imi inussiaqatigiit taakku kinaassusersineqarput tassaasut kristumiut tanitaasut sinneri. Taamanimiilli taakku, Jehovap Nalunaajaasuisa siulersuisoqatigiivinit sinniisaaffigineqartut, nunarsuarmi teokratiimut qitiulersimapput. Siulersuisoqatigiit nunarsuarmi tamarmi sinniisoqarput, immikkoortortaqarfiit ataatsimiititaannik, nakkutilliisunik angalasartunik ilagiinnilu utoqqaanertanik.
6 Guutip peqatigiissortaanik teokratiimut atasunik suleqatiginninneq teokratiimut naalatsigitinnermut ilaavoq pingaartorujussuaq. Suleqatiginninneq taama ittoq nunarsuaq tamakkerlugu ’qatanngutigiit tamarmik’ ataasiussusiannut ajunngitsumillu ingerlanissaannut iluaqutaasarpoq. (1 Pîtruse 2:17) Kiisalu Jehovamut, ’Guutimut ularussinermut Guutiunngitsumut, eqqissinermullu’ Guutiusumut, nuannaarutaasarpoq. — 1 Korintumiut 14:33.
Teokratiip iluani utoqqaanertat
7. Sooq oqartoqarsinnaava kristumiut utoqqaanertat teokratii tunngavigalugu toqqagaasut?
7 Utoqqaanertat toqqakkat tamarmik, oqartussaaffimmik sumilluunniit tigumiaqaraluartut, nakkutilliisutut, imaluunniit utoqqaanertatut, kiffartortut piginnaanerisariaqagaannik Biibilimi allattorsimasunik eqqortitsipput. (1 Timûtiuse 3:1-7; Títuse 1:5-9) Aammalu Paulusip Efesusimi utoqqaanertanut oqaaserisai utoqqaanertanut tamanut tunngapput: ’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi, Guutip ilagiissai . . . paareqqullugit.’ (apustilit suliait 20:28) Aap, utoqqaanertat anersaamit illernartumit, Jehova Guutimeersumit, toqqarneqarsimapput. (Juánase 14:26) Toqqarneqarnerat teokratiimik tunngaveqarpoq. Guutillu savaatai paarisussaavaat. Savaatit Jehovap pigai, utoqqaanertat piginngilaat. Tamanna teokratiimik tunngaveqarpoq.
8. Ullumikkut utoqqaanertat akisussaaffii nalinginnaasut suuppat?
8 Apustilip Paulusip Efesusimiunut allakkamini utoqqaanertat akisussaaffii nalinginnaasut eqqartorpai oqarluni: ’Ilaallu taassuma apustilinngortippai, ilaat pruffiitinngortippai, ilaat iivangkiiliulersaartunngortippai, ilaat paarsisunngortippai ajoqersuisunngortillugillu, iluartut naammattunngoqqullugit, kiffartuutissaq suliareqqullugu, Kristusip timaa ineriartorteqqullugu.’ (Evfisumiut 4:11, 12) ’Kristusip timaata’ ineriartorlualernerani apustilit pruffiitillu peerutereersimapput. (Naleqqiuguk 1 Korintumiut 13:8.) Utoqqaanertalli iivangkiiliulersaarlutik, savaatinik paarsillutik ajoqersuillutillu ulapittuarsinnarput. — 2 Timûtiuse 4:2; Títuse 1:9.
9. Guutip piumasaa ilagiinni atuutitinniarlugu utoqqaanertat qanoq iliortariaqarpat?
9 Teokratii tassaammat Guutip naalakkersuinera utoqqaanertat suliniarluartut Guutip piumasaa nalunngilluartariaqarpaat. Josua peqquneqarsimavoq Inatsisit ullut tamaasa atuartassagai. Aamma utoqqaanertat aalajangersimasumik Allakkanik atuaqqissaarlutillu siunersiuisarnissartik aammalu atuagassianik Biibililersaarutaasunik inussiamit aalajaallunilu silatuumit saqqummersinneqartartunik ilisimannilluinnarnissartik pisariaqartippaat. (2 Timûtiuse 3:14, 15) Tamakkununnga ilaapput atuagassiat Napasuliaq Alapernaarsuiffik aamma Iteritsi! naqitikkallu allat Biibilimi najoqqutassiat qanoq ilillutik assigiinngitsutigut atorneqarsinnaanerannik takutitsisut.a Naak Napasuliaq Alapernaarsuiffiup naqitigaataani unnersuussutit ilisimalluarnissaat maleruarnissaallu pingaaruteqaraluartoq taamaattoq aamma Allakkani tunngavii utoqqaanertap ilisimalluartariaqarpai. Taamaappat Allakkani unnersuussutit paasinnilluni misiginneqataassuseqarlunilu atorsinnaassavai. — Naleqqiuguk Mika 6:8.
Kristumiorpalaarluni kiffartorneq
10. Isuma ajortoq suna utoqqaanertat akiortariaqarpaat, qanorlu ilillutik?
10 Ukiup 55-ip u.n.k. missaani apustilip Paulusip ilagiinnut Korinthimiittunut allakkani siulliit allassimavai. Ajornartorsiutit sammisaasa ilaat angutit aalajangersimasut ilagiinni nuimarusussusiannut attuumassuteqarpoq. Ima allassimavoq: ’Qaarsillareerpusi, pisuunngoreerpusi, uagut ilaginata kunngiuvusi; kunngioqqunaraluaqaasimi uaguttaaq ilissinnut kunngioqataaqqulluta.’ (1 Korintumiut 4:8) Ukiuni hundredelinni siullerni u.n.k. kristumiut tamarmik qilammi Jesusimut kunngioqataallutillu palasioqataalernissartik neriugisarisimavaat. (sarĸúmersitat 20:4, 6) Qularnanngitsumilli Korinthimiut ilaasa puiorsimavaat nunami kristumiut teokratiianni kunngeqanngitsoq. Silarsuarmi matumani kunngitut pissusilersornatik kristumiut savaatinik paarsisut maniguunnermik, pissutsimik Jehovap iluarisaanik, ineriartortitsiniarput. — Tussiaat 138:6; Lúkarse 22:25-27.
11. (a) Kikkut maniguunnermik maligassaalluartuuppat? (b) Utoqqaanertat kristumiullu tamarmik qanoq imminnut isigisariaqarpat?
11 Maniguunneq sanngiinnerua? Naamerluinnaq! Jehova nammineq maniguuttutut eqqaaneqarpoq. (tugsiaut 18:36) Israelimi kunngit sorsukkiartorlutik sakkutuunik siulersuisarsimapput Jehovallu ataani inuiannik naalakkersuisarsimallutik. Taamaattorli tamarmik ’makitasaarlutik nunaqqatiminnik anneruniarfiginnilinnginnissartik’ sianigisussaasimavaat. (5 Moses 17:20) Jesus toqusunit makititaasimasoq maanna qilammi Kunngiuvoq. Nunamiikkallaramili ajoqersukkami isigaat allaat asattarsimavai. Kakkaak maniguussimammat! Apustilimilu taamatut maniguuttuusariaqarnerat ersersinniarlugu oqarsimavoq: ’Uanga taava isikkasi uffarakkit, naak naalagaralungalu ajoqersortigigissinga, taamattaaq ilissi isikkassinnik uffaqatigiissaasi.’ (Juánase 13:14; Filípimiut 2:5-8) Naalannaat nersornaallu tamarmi Jehovamut, inummuunngitsoq, tuttariaqarpoq. (sarĸúmersitat 4:11) Kristumiut tamarmik, utoqqaanertaagaluarunik utoqqaanertaanngikkaluarunilluunniit, Jesusip oqaasii uku tunngavigalugit imminnut eqqarsaatigisariaqarput: ’Kiffaavugut atunngitsut, uatsinnut suliarisariaqartut suliaraavut.’ (Lúkarse 17:10) Isummat tamatuma akerlerisai tamarmik teokratiimik tunngeqanngillat.
12. Sooq kristumiut utoqqaanertat asanninnermik ineriartortitsinissaat pingaaruteqarluinnarpa?
12 Maniguunnerup saniatigut utoqqaanertat kristumiut asanninnermik ineriartortitsipput. Apustilip Johannesip asanninnerup pingaaruteqassusia ersersippaa ima oqarami: ’Asanninngitsup Guuti ilisarinngilaa; Guuti asassutaammat.’ (1 Juánase 4:8) Inuit asanninngitsut teokratiimut atanngillat. Jehova naluaat. Guutip Ernera pillugu Biibilimi ima allassimavoq: ’Soorlu ilani silarsuarmiittut asagai, taamaalluni naggatissamut allaat asavai.’ (Juánase 13:1) Angutit aqqanillit kristumiut ilagiivinut siulersuisoqatigiinnut ilaasussat Jesusip ima oqarfigisimavai: ’Inassutiga tassa asaqatigiissasusi, soorlu uanga asagissi.’ (Juánase 15:12) Asanninneq kristumiussutsip ilumoortup ilisarnaatigaa. Erloqissuteqartut, aliasuttut anersaakkullu inussiaataasut kiffaanngissutsimik maqaasisaqartut asanninneq tamanna kajungerisarpaat. (Jesaja 61:1, 2; Juánase 13:35) Asanninnermik taamaattumik ersersitsinikkut utoqqaanertat maligassaasariaqarput.
13. Naak ullumikkut ajornartorsiutit aaqqikkuminaassinnaasaraluartut utoqqaanertat qanoq iliortarunik naammassisaqarluarsinnaappat?
13 Ullumikkut utoqqaanertat ajornartorsiutinik aaqqikkuminaatsunik aaqqiiniarnermi ikiortiserineqakulasarput. Aappariittut ajornartorsiutit aaqqikkuminaatsuusinnaapput. Inuusuttut ajornartorsiuteqarput inersimasut aaqqikkuminaatsissinnaasaannik. Misigissutsikkut anniaatit paasiuminaassinnaasarput. Utoqqaanertaq tamakkuninnga suliassaqalersoq immaqa nalornisinnaavoq qanoq iliussanerluni. Qinusarnikkulli Jehovap ilisimassusia tunaariguniuk, Biibili paasissutissallu inussiamit aalajaallunilu silatuumeersut misissoqissaartarunigit kiisalu maniguulluni asannillunilu savaatinik sullissiguni qularutigissanngilaa pissutsini ajornakusoornerpaaniluunniit ajunngitsumik naammassisaqassalluni.
14, 15. Jehovap innuttaminik utoqqaanertarpassuarnik pitsaasunik pilluaqqusisimaneranut suut takussutissaappat?
14 Jehovap peqatigiissortani ’inunnik tunissutaasunik’ pilluaqqungaarsimavai. (Evfisumiut 4:8) Napasuliaq Alapernaarsuiffik nuannaajallannaqisunik allagarsiuartarpoq utoqqaanertat maniguuttut Guutip savaataanik naakkinnittumik paarsisut asanninnermik ersersitsisarnerannut uppernarsaasunik. Soorlu ilagiinni utoqqaanertat ilaat ima allassimavoq: „Angalalluni nakkutilliisup tikeraarneranik aatsaat taama uannut sunniuteqartigisumik ilagiinnilu taama oqallisaatigisumik allamik eqqaamasaqanngilanga. Nakkutilliisup ikiorpaanga paasitillunga qatanngutinik sullissinermi isumalluartumik isumaqarnissaq qanoq pingaaruteqartigisoq, nersualaarinissaq puiornagu.“
15 Qatanngut arnaq nakorsamit suliaritikkiartorluni ungasissumut angalasariaqarsimasoq ima allappoq: „Napparsimmavimmi angerlarsimaffimmit ungaseqisumi unnueqqaartussaalluni eqqissisimanani utoqqaanertamit pulaarneqarluni eqqissiallannaqaaq! Taassuma qatanngutillu allat piffissami sivisuumi najortarpaannga. Allaat silamiut nappaatip atukkama suuneranik ilisimannittut nalunngilaat aniguisimanavianngikkaluartunga qatanngutinit asannittunit imminnullu pilliutigeriaannaasunit tuppallersarneqartarnangalu, isumassorneqarnangalu qinnunneqartarsimanngitsuuguma.“ Qatanngut arnaq alla ima allappoq: „Ullumikkut suli inuuvunga utoqqaanertaqatigiit isumatsarujussuartarnermut akiuunninni naammagittarlutik unnersuuttarsimammannga. . . . Ilaanni qatanngut ataaseq nulialu qanoq oqarfigissallunga nalornerpasipput. . . . Killitsissutiginerpaasarali tassa atukkakka paaseqqissaanngikkaluarlugit asannillutik uannik isumassuinerat.“
16. Peterip utoqqaanertat qanoq kajumissaarpai?
16 Aap, utoqqaanertarpassuit apustilip Peterip oqaassutaanik maleruaapput: ’Guutip savaatai ilissinniittut paarisigik, misissuisuullusi pinngitsaalinermit pinnasi [piumassutsissinnilli, NV], assuarnartumik akissarsiniarnasi kajumillusili, paarisassanulluunniit naalagaaniartutut pinnasi savaatinulli maligassanngorlusi.’ (1 Pîtruse 5:1-3) Utoqqaanertat teokratiimut atasut taamaattut ila pilluaqqusaasaqaat!
Savaatit teokratiip iluani
17. Pissutsinik ilagiinnut ilaasortaasut tamarmik ineriartortittariaqagaannik taasaqarit.
17 Teokratiili utoqqaanertaannarnik sanaajunngilaq. Savanik paarsisut teokratiimut atasuussappata aamma savaatit taamaattariaqarput. Sutigut? Najoqqutassat savanik paarsisut najoqqutarisaat aamma savaatit atortariaqarpaat. Kristumiut tamarmik, utoqqaanertaannaanngitsut, Jehovamit pilluaqqusaassagunik maniguuttuusariaqarput. (Jâko 4:6) Tamatta asanninnermik ineriartortitsisariaqarpugut asannissuseqanngikkutta Jehovamut pilliutivut taassumunnga iluarinartuunavianngimmata. (1 Korintumiut 13:1-3) Tamattalu, utoqqaanertaannaanngitsut, ’Jehovap piumasaanik ilisarsisorsuanngortariaqarpugut tamanik ilisimalersilluta anersaallu piinik sianilersilluta’. — Kulorsamiut 1:9.
18. (a) Sallusuissummik qarsupittumiinnaq ilisimasaqarneq sooq naammanngila? (b) Qanoq ililluta tamatta ilisimassummik eqqorluartumik immersinnaavugut?
18 Inuusuttut utoqqaallu tamarmik Satanip silarsuaani inuunerminni aalajaattuaannarniarsarinerminni ajornakusoortunik aalajangigassaqalertuartarput. Silarsuup atisatigut, nipilersukkatigut, isiginnaagassiatigut atuagassiatigullu pilerinartui ilaasa anersaakkut uloriartorsiussutigilertarpaat. Sallusuissummik qarsupittumiinnaq ilisimanninneq oqimaaqatigiissumik ingerlassutaasinnaanngilaq. Aalajaattuaannassagutta ilisimasaqarnermik eqqortumik immertariaqarpugut. Immikkoortitsisinnaassuseq ilisimassuserlu taamaallaat Guutip oqaasiani pissarsiarisinnaasavut pisariaqarpavut. (Ussatit 2:1-5) Tamanna isumaqarpoq atuaqqissaarneq ileqquliuttariaqaripput, ilinniakkavut eqqarsaatigeqqissaartarlugit iliuutsitsigullu atortarlugit. (Tussiaat 1:1-3; sarĸúmersitat 1:3) Paulus utoqqaanertanuinnaanngitsoq kristumiunulli tamanut oqaluppoq ima allakkami: ’Inersimasut nerisassamik mattusuumik pisariaqarput, tassa misigisaqartarnermit sungiusagaasunik sianissusillit ajunngitsorlu ajortorlu immikkoorsusiisigut ilisarisinnaallugit.’ — Eprîarit 5:14.
Savaatinik paarsisut savaatillu suleqatigiipput
19, 20. Utoqqaanertanik suleqatiginninnissaq pillugu tamatta qanoq kajumissaarneqarpugut, sooq?
19 Kiisalu oqartoqarsinnaavoq utoqqaanertanik suleqatiginnittut anersaamik teokrateerpalaartumik piviusumik ersersitsisartut. Paulus Timoteusimut ima allassimavoq: ’Ilagiit utoqqaanertaat paarsilluartut marloriakkamik ataqqineqarlit, pingaartumillu oqaatsimik ajoqersuummillu suliaqartut.’ (1 Timûtiuse 5:17; 1 Pîtruse 5:5, 6) Utoqqaanertaaneq immikkut pisinnaatitaaffiuvoq nuannersoq, utoqqaanertalli amerlanersaat ilaqutariinnut ittuupput silamiutut ullut tamaasa suliffeqartut pilersugassaminnillu nuliaqarlutillu meeraqartut. Naak kiffartornertik nuannaarutigigaluaraat, taammaattoq taakkununnga oqinnerussaaq ilagiit tapersersuippata, isornartorsiuivallaartuunatik piumasaqarpallaartuunatillu. — Eprîarit 13:17.
20 Apustili Paulus ima oqarsimavoq: ’Siulersortisi Guutip oqaasianik ilissinnut oqaluttut eqqaaniarsigik; inuuneratalu naggataa misissorlugu uppersusiatigut malissigik.’ (Eprîarit 13:7) Paulusip qatanngutini kajumissaanngilai utoqqaanertat maleqqullugit. (1 Korintumiut 1:12) Inunnik malinninneq teokrateerpalaanngilaq. Ilumulli silatusaarneruvoq utoqqaanertat teokratiimut atasut iivangkiiliulersaarnermik ulapputeqartut, tamatigut ataatsimiinnernut peqataasartut kiisalu maniguullutik asannillutillu ilagiinnik sullissisartut upperneq ersersitaat malinniassallugu.
Uppernermut uppernarsaat
21. Kristumiut qanoq Mosesip uppissusiatut uppernermik sakkortuumik ersersitsisarpat?
21 Inuiaat oqaluttuarisaaneranni piffissat ajornerpaartaanni matumani peqatigiissortat teokratiimik aqunneqartut piunerat Teokratiimik Aaqqissuussisorsuup pissaaneqassusianut ilumut takussutissaalluinnarpoq. (Jesaja 2:2-5) Aamma kristumiut 5 millioningajaat angutit, arnat meeqqallu ulluinnarni ajornartorsiutinik sorsugassaqaraluarlutik Jehova Naalakkersuisoralugu puiuinngisaannartut uppissusiannut takussutissaavoq. Soorlu Mosesip upperluartup ’takussaanngitsoq isigalugulusooq iperarnaveersaarsimagaa’, ullumikkuttaaq kristumiut taama sakkortutigisumik uppissuseqarput. (Eprîarit 11:27) Teokratiip iluani inuunertik immikkut pisinnaatitaaffigaat, ullullu tamaasa Jehova tamanna pillugu qutsavigisarpaat. (Tussiaat 100:4, 5) Jehovap annaassisinnaassusia misigiitigalugu nuannaarput ima nalunaarsinnaagamik: „[Jehova] eqqartuussisigaarput, [Jehova] naalakkersortigaarput, [Jehova] kunngigaarput, taassuma annatsikkumavaatigut.“ — Jesaja 33:22. (wD 15/1 94)
[Quppernerup ataani ilanngussaq]
a Atuagassianut taama ittunut ilaavoq atuagaq „Giv agt på jer selv og på hele hjorden“, Biibilip unnersuussutaanik imaqartoq ilagiinnilu nakkutilliisunut, imaluunniit utoqqaanertanut, tunngatitaasoq.
Biibili qanoq takutitsiva?
□ Kristumiut teokratiimut sukkut naalatsigitippat?
□ Teokratii ullumikkut qanoq aaqqissuussaava?
□ Akisussaaffitik naammassiumallugit utoqqaanertat qanoq iliuuseqartariaqarpat?
□ Utoqqaanertat kristumiutut pissutsinik sunik ineriartortitsillutillu ersersitsinissaat pingaartorujussuua?
□ Teokratiip iluani savaatit savaatinillu paarsisut qanoq imminnut attaveqatigiittariaqarpat?
[Qupp. 16-mi assiliartaq]
Adamip Evallu Paratiisi annaasimavaat suna eqqortuusoq sunalu eqqunngitsuusoq namminneq aalajangerusukkamikku
[Qupp. 18-mi assiliartaq]
Utoqqaanertaq maniguuttumik asannittumillu savaatinik sullissisaruni tamatigut ajunngitsumik naammassisaqartassaaq