Teokratii qanimut attavigiuk
„[Jehova] eqqartuussisigaarput, [Jehova] naalakkersortigaarput, [Jehova] kunngigaarput.“ — JESAJA 33:22.
1. Sooq inuit amerlanersaasa pitsaasumik naalakkersuisoqarnissaa soqutigisarpaat?
PITSAASUMIK naalakkersuisoqarnissaq inuup kialuunniit soqutigisaraa, tamanna eqqissinermik atugarissaarnermillu nassataqartarmat. Biibilimi ima allassimasoqarpoq: „Kunngip nunani eqqissisimaffiutittarpaa naapertuilluarnikkut.“ (Ussatit 29:4) Illua’tungaatigulli naalakkersuinerlunneq naapertuilluanngissutsimik, peqquserlunnernik naqisimanninnermillu kinguneqartarpoq. ’Inupiluusoq naalakkersuisunngoraangat inuit anersaaruluttarput.’ (Ussatit 29:2) Oqaluttuarisaanerup ingerlanerani inuit naalakkersueriaatsinik assigiinngitsorpassuarnik misileraasarsimapput, ajoraluartumillu amerlasuutigut naalakkersuisut naqisimanninnerat pissutigalugu inuit ’anersaaruluttarsimapput’. (Nalunaajaasup oqaasii 8:9) Inunnut ataavartumik nalerisimaarutaasumik qaquguluunniit naalakkersuisoqalersinnaassava?
2. Sooq oqaaseq „teokratii“ itsaq Israelimi naalakkersuinermut atussallugu tulluartuua?
2 Oqaluttuarisaanermik ilisimatuup Josefusip naalakkersuineq asseqanngitsoq eqqartorpaa ima allakkami: „Inuiaat ilaasa naalagaaffimmi pissaaneq qutsinnerpaaq kunnginut kaasarinullu tunniuttarpaat, ilaasa inunnut ikittuinnaallutik naalakkersuisunut allallu inuppassuullutik naalakkersuisunut. Inatsisiliortuttali [Mosesip] naalakkersueriaatsit tamakku arlaannaalluunniit iluarinngilaa, inatsisinili tunngaviusut — oqaatsimik nutaaliamik atuissagaanni — ’teokratiimik’ taaneqarsinnaasumik tunngavilerpai, kisimi oqartussaassuseq tamaat Guutip assaanut pisillugu.“ (Against Apion, II, 164-165) Munksgaard Fremmedordbog naapertorlugu „teokratii“ tassaavoq „Guutip naalakkersuinera, naalakkersueriaaseq Guutip siuttutut qutsinnerpaatut isigineqarfigisaa“. Oqaaseq teokratii Biibilimi atorneqanngilaq, itsarli Israelikkut naalakkersorneqarnerannut atussallugu tulluartuuvoq. Israelikkut nunamiumik kunngeqaraluarlutik iluamik oqaatigalugu Jehovamit naalakkersorneqarput. Israelimi pruffiiti Esajas ima oqarsimavoq: „[Jehova] eqqartuussisigaarput, [Jehova] naalakkersortigaarput, [Jehova] kunngigaarput.“ — Jesaja 33:22.
Teokratii piviusoq sunaava?
3, 4. (a) Teokratii piviusoq sunaava? (b) Teokratiip qanittukkut inuiaat tamaasa qanoq pilluaqqusaatissavai?
3 Josefusip oqaatsimik atueqqaarnerata kingorna inuiaat ilarpassui teokratii tunngavigalugu naalakkersorneqartutut oqaatigineqartarsimapput. Tamakkua ilaat akaarinninngitsuullutillu, ingasaassiniartuullutillu peqqarniitsumik naqisimannittuusarsimapput. Ilumut teokratii tunngavigalugu aqunneqarsimappat? Josefusip oqaatsimik isumaqartitsinera naapertussagaanni, naamik. Ajornartorsiut tassaavoq oqaatsip „teokratii“-p isumaata ilaneqarsimanera. Oqaaseq tamanna World Book Encyclopedia-mi nassuiarneqarpoq tassaanerarneqarluni „naalakkersueriaaseq naalagaaffik palasimit ataatsimit palasinilluunniit arlalinnit aqunneqarluni, palasit inuiaqatigiinni upperisarsiornermilu oqartussaassuseqarlutik“. Teokratiili piviusoq tassaanngilaq palasit naalakkersuinerat. Tassaavorli Guutip naalakkersuinera, nunarsuarmik qilammillu Pinngortitsisup, Jehova Guutip, naalakkersuinera.
4 Ungasinngitsukkut nunarsuaq tamarmi teokratii tunngavigalugu aqunneqalissaaq, tamannalu annertuumik pilluaqqusaanerussaaq! ’Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ (sarĸúmersitat 21:3, 4) Palasit naalakkersuisut, inuit naammalluinnanngitsut, pissutsinik taama pitsaatigisunik pilersitsisinnaanngillat. Guutip naalakkersuinerata kisimi tamanna sapinngilaa. Taamaattumik kristumiut ilumoortut politikkikkut iliuuseqarnikkut teokratii atuutitinniarsarineq ajorpaat. Guutip imminut piffissanngorpat namminerlu periaatsini atorlugu nunarsuaq tamakkerlugu teokratiimik atuutilersitsinissaa naammagittarlutik utaqqivaat. — Daniel 2:44.
5. Ullumikkut teokratii piviusoq sumi atuuppa, tamannalu pillugu suut apeqqutigineqarsinnaappat?
5 Ullumikkulli teokratii ilumoortoq atuutilereerpoq. Sumi? Namminneq kajumissutsiminnik Guutip naalakkersuineranut naalatsigitittut suleqatigiillutillu taassuma piumasaatut iliortut akornanni. Inuit aalajaatsut taakkua nunarsuaq tamakkerlugu anersaakkut ’inuiattut’ anersaakkut ’nunami’ katersuussimapput. Inuiaat taakku tassaapput ’Israelip Guutip pigisaata’ sinneri taakkualu suleqataat kristumiuusut 5 millioninit amerlanerusut. (Jesaja 66:8; Galâsiamiut 6:16) Taakkua Jesus Kristusimut, Jehova Guutip qilammi kunnginngortitaanut, ’naassaanngilluinnartumik kunngiusumut’, naalatsigitipput. (1 Timûtiuse 1:17; sarĸúmersitat 11:15) Peqatigiit aaqqissuussaasut taakkua qanoq ilillutik teokratii tunngavigalugu aqunneqarpat? Silarsuarmi naalakkersuisut oqartussaassusiannik qanoq isiginnippat? Teokratiillu najoqqutassiai anersaakkut inuianni taakkunani oqartussaassuseqartitaasunit qanoq ilillutik atortinneqarpat?
Peqatigiit aaqqissuussaasut teokratiimik aqunneqartut
6. Inuit peqatigiit takussaasut qanoq ilillutik Guutimit aqunneqarsinnaappat?
6 Inuit peqatigiit aaqqissuussaasut qanoq ilillutik Jehovamit, takussaanani qilammiittumit, aqunneqarsinnaappat? (Tussiaat 103:19) Tamanna ajornanngilaq taakkununnga ilaasut unnersuussut isumassarsiarititaasoq manna malimmassuk: „[Jehova] tunaariuk uummatikkut iluunngarlutit, namminerlu silaqassutsit tatigeqinagu.“ (Ussatit 2:6; 3:5) ’Kristusip inatsisaanik’ maleruaanermikkut Biibilimilu najoqqutassianik isumassarsiarititaasunik ulluinnarni inuunerminni atuinermikkut Guutimit aqunneqartipput. (Galâsiamiut 6:2; 1 Korintumiut 9:21; 2 Timûtiuse 3:16; takuuk Matîuse 5:22, 28, 39; 6:24, 33; 7:12, 21) Taamaaliussagaanni Biibilimik atuaqqissaartariaqarpoq. (Tussiaat 1:1-3) Itsaq Beroamiut ’isumagissut’ assigalugit inunnik malinninngillat, ilinniakkatilli Biibilimut naapertuunnersut qulakkeerniartuartarlugit. (apustilit suliait 17:10, 11; Tussiaat 119:33-36) Tussiaasiortutut ima qinusarput: „Siuneqassusermik ilisimassusermillu tuninnga, peqqussutitit tatigigakkit.“ — Tussiaat 119:66.
7. Teokratiip iluani qullersaqarnermut qanoq ittumik najoqqutassaqarpa?
7 Peqatigiiffimmi sumiluunniit oqartussaasoqartariaqartarpoq siuttoqartariaqarlunilu. Aamma Jehovap nalunaajaasuisa akornanni taamaappoq, oqartussaanermullu najoqqutassaq apustili Paulusip saqqummiussimasaa manna maleruarpaat: ’Angutip kialuunniit Kristus niaqoraa, arnallu angut niaqoraa, Kristusillu Guuti niaqoraa.’ (1 Korintumiut 11:3) Tamanna naapertorlugu angutit eqqortunik piukkunnaatillit kisimik ilagiinni utoqqaanertatut kiffartorsinnaapput. Jesus — ’angutip kialuunniit niaqua’ — maanna qilammiikkaluartoq qatanngutaasa tanitaasut, qilammi taassuminnga naalakkersueqataalernissaminnik neriugisaqartut, ’amiakkui’ suli nunarsuarmiipput. (sarĸúmersitat 12:17; 20:6) Taakkua ataatsimut tassaapput ’kiffaq ilumoorlunilu silatooq’. Kristumiut Jesusimut naalatsigitipput, taamaattumillu ’kiffap’ taassuma siulersuineranut ilassinninnermikkut Jesusip ’niaquanut’, Jehovamut, naalatsigitillutik. (Matîuse 24:45-47; 25:40) Taamaalilluni teokratii torersumik atuutitinneqarpoq. ’Guuti ularussinermut Guutiunngimmat, eqqissinermulli.’ — 1 Korintumiut 14:33.
8. Teokratiimi najoqqutassiat kristumiut utoqqaanertaasa qanoq tapersersugaraat?
8 Kristumiut utoqqaanertaasut teokratiip najoqqutassiaanik tapersersuisuupput, nalunnginnamikku killilimmik oqartussaassuseqartitaanerminnik qanoq atuinerminnut Jehovamut akisussaassuseqarlutik. (Eprîarit 13:17) Aalajangiiniarnerminni Guutip ilisimassusia, namminneq ilisimassusertik pinnagu, tunaartarisarpaat. Taamaaliornermikkut Jesus malippaat. Taanna inunni inuusimasuni silatunerpaavoq. (Matîuse 12:42) Taamaakkaluartorli juutinut oqarsimavoq: ’Erneq isumaminik iliorsinnaanngilaq, kisianni Ataataq taamaaliortoq takuguniuk.’ (Juánase 5:19) Aamma utoqqaanertat kunngi Daviditut isumaqarput. Taanna teokratiip iluani annertuumik oqartussaassuseqarsimavoq. Taamaakkaluartorli nammineq aqqutini pinnagu Jehovap aqqutaata malinnissaa kissaatigisimavaa. Taanna ima qinusimavoq: „Aqqutigeqqusannik ajoqersunnga, [Jehova], ingerlatinnga aqqutikkut navianaatsukkut.“ — Tussiaat 27:11.
9. Teokratiip iluani neriugisat assigiinngitsut immikkullu pisinnaatitaaffiit assigiinngitsut eqqarsaatigalugit kristumiut tunniulluinnarsimasut qanoq isiginnittaaseqarpat?
9 Angutit piukkunnaatillit kisimik ilagiinni oqartussaassuseqartitaanerat imaluunniit inuit ilaat nunarsuarmi inuunissamik neriugisaqartut ilaasa qilammi inuunissaminnik neriugisaqarnerat naapertuilluartuunersoq inuit ilaannit apeqquserneqarsimavoq. (Tussiaat 37:29; Filípimiut 3:20) Kristumiulli tunniulluinnarsimasut nalunngilaat tamakkua Guutip oqaasianik tunngaveqartut — teokratiimik tunngaveqartut. Apeqqusiisartut tassaanerusarput Biibilimi najoqqutassianik akuerinnikkumanngitsut. Kristumiut nalunngilaat annannissaq eqqarsaatigalugu angutit arnallu Jehovap isaani naligiittut. (Galâsiamiut 3:28) Qilammi nunamilu kisimi oqartussaasumik pallorfiginnissinnaatitaaneq kristumiut ilumoortut immikkut pisinnaatitaaffittut annerpaatut isigaat, Jehovallu sumiluunniit inissisimaffeqartikkaluarpatik nuannaarlutik akuersisarput. (Tussiaat 31:24; 84:11; 1 Korintumiut 12:12, 13, 18) Qilammimi nunarsuarmiluunniit paratiisiusumi naassaanngitsumik inuunissamik neriugisaqaraluarunilluunniit nuanningaartumik siunissaqarput.
10. (a) Isuma pitsaasoq suna Jonathanip ersersissimavaa? (b) Ullumikkut kristumiut qanoq ilillutik Jonathanitut isummertarpaat?
10 Tamatumuunakkuttaaq Jehovap nalunaajaasuisa Jonathan, kunngi Saulip ernera Guutimik mianerinnittoq, assigaat. Qularnanngitsumik Jonathan kunngiunissaminut piukkunnaateqarluaraluarpoq. Saulilli ilumuunngitsuliornera pillugu Jehovap David Israelimi kunngissatut qinerpaa. Tamanna Jonathanip ajuallaatigaa? Naamik. Davidimut ikinngutaallualerpoq allaallu Saulip saassussiniarneranut sernissorlugu. (1 Samuel 18:1; 20:1-42) Taamatuttaaq nunarsuarmi inuunissaminnik neriugisallit qilammi inuunissaminnik neriugisalinnut sinnganngillat. Kristumiullu ilumoortut ilagiinni teokratii tunngavigalugu oqartussaassusilinnut sinnganngillat. Akerlianilli ’suliaat pillugu ataqqingaarlugillu asavaat’ anersaakkut qatanngutimik angutit arnallu iluaqutissaannut annertuumik suliaqarmata. — 1 Tásalûníkamiut 5:12, 13.
Silamiut naalakkersuisuinik teokratii tunngavigalugu isiginninneq
11. Kristumiut teokratiimik naalakkersuinermut naalatsigitittut silamiut naalakkersuisuinik qanoq isiginnippat?
11 Jehovap nalunaajaasui teokratii tunngavigalugu, tassa Guutimit, aqunneqarunik taava nunaminni naalakkersuisuinik qanoq isiginnippat? Jesus oqarsimavoq malitsini ’silarsuup inuisa ilagissanngikkaat’. (Juánase 17:16) Kristumiulli ’kaasarimut’, naalakkersuisunut silamiunut, akiitsoqarnertik nalunngilaat. Jesusimi oqarsimavoq ’kaasari tunissagaat kaasarip pissaanik, Guutilu Guutip pissaanik’. (Matîuse 22:21) Biibili naapertussagaanni inuit naalakkersuisui Guutimit ivertitaapput. Taakkua atuunnerat Jehovap, oqartussaassutsit tamarmik Pilerfiata, akueraa, naatsorsuutigaalu inunnut naalakkersukkaminnut ajunngitsumik iliussasut. Taamaalioraangamik tassaasarput ’Guutip kiffai’. Kristumiut nunami najukkaminni naalakkersuisunut naalatsigitittussaapput ’tarnimik nalunngissusiat pissutigalugu’. (Rûmamiut 13:1-7) Naalakkersuisulli Guutip inatsisaanut akerliusumik peqqussuteqarpata soorunami kristumiut ’Guuti inunnit naalannerussavaat’. — apustilit suliait 5:29.
12. Kristumiut oqartussaasunit qinugineqaraangamik kikkut maligassiaat malittarpaat?
12 Taavami kristumiut ilumoortut naalakkersuinikkut oqartussaasunit qinugineqalerunik qanoq iliussappat? Taamatut pisoqartillugu kristumiut siulliit annertuumik qinugineqarnerminni nikallujuittuaannarsimasut maligassiaat malinniassavaat. (apustilit suliait 8:1; 13:50) Kristumiut siulliit uppernikkut misilinneqarnertik pakasartissutiginngilaat, taamatummi pisoqarnissaa Jesusip ilimasaarutigereersimavaa. (Matîuse 5:10-12; Mákorse 4:17) Qinuginnitsiminnulli akiniaaniartarsimanngillat; tatineqarnerminnilu uppernikkut sanngiillisarsimanngillat. Jesusilli maligassiaa malissimavaat: ’Taanna oqagaagami oqarninngilaq, anniarami sioorasaarinngilaq, eqqartuussilluartumulli peqquaa.’ (1 Pîtruse 2:21-23) Aap, kristumiunut najoqqutassiat Satanip ajortisaarinerinut ajugaasimapput. — Rûmamiut 12:21.
13. Jehovap nalunaajaasui qinugineqarnerminnut eqqunngitsumillu unnerluutigineqarnerminnut qanoq qisuariartarsimappat?
13 Ullumikkuuttaaq taamaappoq. Ukiuni hundredelinni makkunani Jehovap nalunaajaasui naalakkersuisunit qunusiarinnittunit assut erloqisitaasarsimapput — Jesusip siulittuisimanerartorluinnaq. (Matîuse 24:9, 13) Nunat ilaanni naalakkersuisut kristumiunut peqqusersuitsunut taakkununnga akeqqersimaartilerniarlugit inuit ilaat salluliuutinik siammarterisarsimapput. Taamatulli ’unnerluutigineqartaraluarlutik’ nalunaajaasut ileqqorissaarnermikkut Guutip kiffaasut pitsaasumik imminnut avammut takutittarsimapput. (2 Korintumiut 6:4, 8) Ajornanngikkaangat pineqarnertik oqartussaasunut eqqartuussisunullu saqqummiuttarpaat pinngitsuunertik uppernarsarniarlugu. Periarfissaasinnaasut suugaluartulluunniit atorlugit nutaarsiassaq nuannersoq tamanut ammasumik illersorniartarpaat. (Filípimiut 1:7) Inatsisinulli naapertuuttumik iliuuserisinnaasatik tamaasa iliuuserereeraangamikkik sinneri tamaasa Jehovap assaanut ilisarpaat. (Tussiaat 5:9-13; Ussatit 20:22) Kristumiut siulliit assigalugit pisariaqaraangat naapertuilluassuseq pillugu naalliunnissartik ersissutigineq ajorpaat. — 1 Pîtruse 3:14-17; 4:12-14, 16.
Guutip ataqqinaatissaa salliutiguk
14, 15. (a) Teokratiip najoqqutassiaanik tapersersuisut suna pingaarnerpaatippaat? (b) Pisumi sumi Salomon maniguunnikkut maligassiuilluarpa?
14 Jesusip ajoqersukkani qinunissaannik ilinniartikkamigit eqqaasaa siulleq tassaavoq Jehovap aqqata illernarsisinneqarnissaa. (Matîuse 6:9) Tamanna naapertorlugu teokratiip ataani inuusut namminneq ataqqinaatissartik pinnagu Guutip ataqqinaatissaa ujartortarpaat. (Tussiaat 29:1, 2) Biibilimi oqaluttuarineqarpoq ukiuni hundredelinni siullerni tamanna inuit ilaasa Jesusimik malinninnissaminnut akimmiffigisimagaat ’inunni naalannarsinissaq annerutikkamikku’, tassa inunnit nersorneqarnissartik nuannarinerugamikku. (Juánase 12:42, 43) Namminermit Jehova pingaarnerutissagaanni maniguunneq pisariaqarpoq.
15 Tassuunakkut Salomon maligassiuilluarsimavoq. Naalaffissuup alutornangaartup sanasimasami atoqqaarfissiorneqarnerani taassuma oqaasii Nebukadnezarip sanaartorsimasani pillugit oqaasiinut naleqqiuteriartigik. Nebukadnezar pingaakujoqaluni ima oqarsimavoq: „Ilumut tassa Babylon angingaaqisoq uanga pissaanikkut artorsajuitsukkut kunngimut najugassiara uanga ataqqinaatissannik!“ (Daniel 4:30) Akerlianilli Salomonip makitajuilluni naammassisani suunnginnerarsimavai oqarluni: „Kisiannimi Guuti nunarsuarmi najugaqarnerami? Naagga, qilaat tamarmik ilinnut najugarisassatut mikivallaareermata illu manna sanaara suli mikiginerujussuussavat.“ (2 Israelikkut 6:14, 15, 18; Tussiaat 127:1) Salomon imminut qutsissisinnianngilaq. Nalunngilaa Jehovamut kiffaannaalluni, imalu allappoq: „Makitassutsip kanngusunneq kingunerisarpaa, qanilaartulli ilisimassut pigaat.“ — Ussatit 11:2.
16. Utoqqaanertat imminnut nersornaatissinniannginnermikkut qanoq ilillutik ilagiinnut pilluaqqussutaalersimappat?
16 Taamatuttaaq kristumiut utoqqaanertaasut imminnut pinnatik Jehova qutsissisittarpaat. Peterip unnersuussutaa manna maleruarpaat: ’Kiffartuussisoqaraangat Guutip nakussatsitsinera missiliorlugu pili, Jesus Kristus pillugu tamatigut Guuti naalannarseqqullugu.’ (1 Pîtruse 4:11) Apustili Paulusip ’ilagiinnik paarsisuuneq’ atorfittut nuimasutut pinnagu ’suliatut kusanartutut’ eqqaasimavaa. (1 Timûtiuse 3:1, NV) Utoqqaanertat kiffartortussatut, naalakkersuisussatuunngitsoq, toqqarneqartarput. Guutip savaataanut ilinniartitsisuullutillu paarsisuusussaapput. (apustilit suliait 20:28; Jâko 3:1) Utoqqaanertat maniguuttut imminullu pilliutigeriaannaasut ilagiinnut pilluaqqussutaalluinnartarput. (1 Pîtruse 5:2, 3) Angutinngooq ’taamatut ittut ataqqissavavut’, Jehovalu qutsavigisarlugu utoqqaanertanik piukkunnartunik ’ullussani kingullerni’ makkunani teokratiimik atuutititsisussanik taama amerlatigisunik tunisimammatigut. — Filípimiut 2:29; 2 Timûtiuse 3:1.
’Guuti malitsigu’
17. Teokratiip ataaniittut sutigut Guuti ilaartariaqarpaat?
17 Apustili Paulus ima kajumissaarisimavoq: ’Guuti qitornatut asanartutut malinniarsiuk,’ imaluunniit ilaarniarsiuk. (Evfisumiut 5:1) Teokratiimut naalatsigitittut inuttut naammalluinnanngitsutut sapinngisartik tamaat Guuti ilaarniartarpaat. Jehova pillugu Biibilimi ilaatigut ima allassimasoqarpoq: „Qaarsuuvoq [Jehova], assuarnaatsuupput suliai, naapertuilluartuupput aqqutigisai tamarmik. Guutiuvoq aalajaatsoq, peqqusersuitsoq; iluartuuvoq naapertuilluartuullunilu.“ (5 Moses 32:3, 4) Kristumiut tamakkunatigut Guuti ilaassagunikku aalajaattariaqarput, unneqqarissuusariaqarlutik oqimaaqatigiissumillu naapertuilluassuseqartariaqarlutik. (Mika 6:8; 1 Tásalûníkamiut 3:6; 1 Juánase 3:7) Silarsuarmi akueriinnagaasorpassuit kristumiut ingalassimaniartarpaat, soorlu kanngunartuliorneq piumatussuserlu. (Evfisumiut 5:5) Jehovap kiffai inuit najoqqutassiaat pinnagit Guutip najoqqutassiaanik maleruaasuummata Guutip peqatigiissortai ataatsitut isigalugit teokratii tunngavigalugu aqunneqarput, minguitsuullutik peqqissuullutillu.
18. Guutip pissusia pingaarneq sunaava, kristumiullu qanoq ilillutik pissuseq tamanna ersersissinnaavaat?
18 Jehova Guutip pissusiisa pingaarnersaat tassaavoq asanninneq. ’Guuti asassutaavoq,’ apustili Johannes taama allassimavoq. (1 Juánase 4:8) Teokratii tassaagami Guutip aqutsinera, tassaavoq asanninneq tunngavigalugu aqutsineq. Jesus ima oqarsimavoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Peqatigiit aaqqissuussaasut teokratii tunngavigalugu siulersorneqartut ulluni kingullerni ajornakusoortuni makkunani asanninnermik annertuumik ersersitsisarsimapput. Afrikami naggueqatigiit assigiinngitsut toqoraanneranni Jehovap nalunaajaasui naggueqatigiinnut sorlernulluunniit ilaagaluartunut tamanut asanninnermik ersersitsisarsimapput. Jugoslaviaasimasumi Jehovap nalunaajaasui sumiikkaluartulluunniit ikioqatigiittarsimapput, uffa upperisarsioqatigiit allat naggueqatigiinnik nungusaanernik taaneqartumut peqataasut. Inuttut ataasiakkaatut Jehovap nalunaajaasuisa Paulusip unnersuussutaa manna maleruarniarpaat: ’Ajuallatsitsinerit narrannerillu kamannerillu nillianerillu mitallernerillu tamarmik ilissinnit peerlit iluaatsuliornerillu tamaasa ilanngullugit. Ajunngitsumilli iliorfigeqatigiigitsi isumassuigajullusilu isumakkeerfigeqatigiillusilu, soorlu Guutip isumakkeerfigigaasi Kristusimi.’ — Evfisumiut 4:31, 32.
19. Teokratiimut naalatsigitittut ullumikkut siunissamilu qanoq pilluaqqusaassappat?
19 Teokratiimut naalatsigitittut assut pilluaqqusaapput. Guutimik kristumioqatiminnillu eqqisseqateqarput. (Eprîarit 12:14; Jâko 3:17) Inuunerat siunertaqarpoq. (Nalunaajaasup oqaasii 12:13) Anersaakkut toqqissisimapput siunissamullu qularnaatsumik neriugisaqarlutik. (Tussiaat 59:10) Pissutsinik inuiaat tamarmik teokratii tunngavigalugu naalakkersorneqalerpata atuuttussanik qilanaartuuserneqartarput. Taamanikkussaq Biibilimi ima allaaserineqarpoq: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ (Jesaja 11:9) Ilumut nuannerunaq! Qanortoq tamatta maannakkut teokratiimut qanimut attaveqartuaannarnitsigut paratiisissamiilernissarput qulakkeertigu. (wE 1/9 98)
□ Teokratii piviusoq sunaava ullumikkullu sumi atuuppa?
□ Teokratiimut naalatsigitinneq ulluinarni inuunermi qanoq ersersinneqarsinnaava?
□ Teokratiip ataaniittut tamarmik nammineq ataqqineqarnissartik pinnagu Guutilli ataqqineqarnissaa qanoq ilillutik ujartortarpaat?
□ Guutip pissusii suut teokratiimik tapersersuisut ilaartarpaat?
[Atuaqqissaarnermi apeqqutit]
[Qupp. 18-mi assiliartaq]
Salomonip nammineq pinnani Guutilli ataqqinartinneqarnissaa pingaarnerutissimavaa