Navianartoq nigorsimajuk

INUIT ikittuinnaat navianartunut umiartortunit mianersornerupput. Umiartortut sila, sarfaq umiarsuullu sinerissamut ungasissusia alapernaarsortuartarpaat. Anorip sarfallu umiarsuaq nunap tungaanut tissukaatileraangassuk ikkarlissanngippat naviartorsiulissanngippallu suleruloortariaqartarpoq.

Taama pisoqartillugu umiarsuaq sineriammit nigorsimatinniartariaqarpoq, ingammik tingerlaateqarani tissukaannarpat. Umiartornermut atuakkami nassuiaatigineqarsimavoq ’sissamut qanittuararsuarmiittilluni tipisarnimita pakasarneqarneq umiartortup misigisinnaasaasa ajornerpaartarigunarpaat’. Qanoq siunnersuuteqarpa? ’Taamatut ajornartorsiulinnginnissaq tamatigut isumagisaruk.’ Sioqqanut qingartaqqiussimasunut qaarsumulluunniit ikkarlinnaveersaarnissaq isumannaannerpaaq tassa sinerissamit ungasingaatsiartumiinnissaq.

Kristumiut navianartut uppernerminnut umiiartitsisinnaasut mianersorfigisariaqarpaat. (1 Timûtiuse 1:19) Ullumikkut pissutsit sammivimmut ataatsimut ingerlaniarnermut ajornakusoortitsipput. Soorlu umiatsiaq anorimit sarfamillu ornitassarinngisaminut tissukaatitissinnaasoq, taamatut kristumiu tunniulluinnarsimasoq inuunermi anguniakkaminit nigortinneqarsinnaavoq. Taamaappoq uinitta ajortillip nutsuttuartarmatigut silarsuullu anersaavata anorersuartut ililluni tingitaatilluta uppitinniartuarmatigut.

Angut navianartumi inuusimasoq

Immamut anersaakkut navianartumut avalattoornissaq ila ajornanngimmat!

Immap Uumaatsup eqqaani pisimasoq eqqarsaatigeriaruk. Tassani Lot eqqarsaatigaarput. Taanna Sodomami najugaqassalluni aalajangerami annertuunik ajornartorsiutissaqalerlunilu aliasuutissaqalersimavoq. Savaatiminnik paarsisutik saqitsaatereersullu Abraham Lotilu aalajangersimapput immikkut najugaqalissallutik. Soorlu paasitinneqartugut Lot Jordanimi najugaqalersimavoq, tamaanilu tupini nappaatitersimallugit. Kingorna Sodomami najugaqalerniarluni aalajangersimavoq, naak Sodomamiut inooriaasiat nuannarinngikkaluarlugu. — 1 Moses 13:5-13; 2 Pîtruse 2:8.

Sooq Lot illoqarfimmi kanngunartuliorfioqisumi tassani Jehovamut ajortuliorfiusumi allaallu inunnik avatiminnik najugaqartunik kappialalersitsisunik inulimmi najugaqaannarpa? Sodoma siumukarfiulluartuuvoq, qularnanngitsumillu Lotip nuliata illoqarfiup atortutigut iluaqutissartai iluarusuutigeqai. (Hesekiel 16:49, 50) Immaqalu allaat Lotip Sodomami aningaasarsiorluarneq ussernartorsiorfigaa. Sunaluunniit tamaani najugaqarnerminut pissutigigaluarpagu tamaanngaanniit qimagutipallattariaqarsimagaluarpoq. Aatsaat Jehovap inngiliata ilungersorluni qinnuigilermani Lotip ilaquttani ilagalugit illoqarfik qimappaa.

Mosesimik allakkani siullerni tamanna ima oqaluttuarineqarpoq: „Qaalermat inngilit Lot tuavisaarpaat oqarlutik: ’Nuliat panitillu marluk ilaliullugit qimaaniarit, illoqarfiup inuisa ajortuliaat pillugit piiagaaqqunasi.’“ Allaat taamatut ilungersortumik mianersoqquneqareeraluarluni ’Lot piumaataarsimavoq’. Naggataatigulli inngilit ’Lot nulialu paniilu tasissiullugit illoqarfiup avataanukaassimavaat’. — 1 Moses 19:15, 16.

Illoqarfiup avataanut pissukkamikkik inngilit Lot ilaqutaalu ima ilitsersuuppaat: „Tamaviat qimaaniaritsi, kingumut qiviarniaqinasi uninnasilu Jordanip qooruani sumiluunniit. Qaqqanut annanniarniaritsi nungutitaaqqunasi.“ (1 Moses 19:17) Allaat taamaalinerani Lot tamanna qimannagu illoqarfimmut qanittumiittumut Soarimukarnissaminut akuerineqarnissaminik qinnuteqarpoq. (1 Moses 19:18-22) Tassa Lot navianartumit sapinngisamik ungasissumut qimagunnissaminut nangaasimavoq.

Soarip tungaanut ingerlatillutik Lotip nulia Sodomap tungaanut kingumut qiviarpoq, qularnanngitsumik qimatani sakimmeralugit. Inngilit peqqussutaat sumiginnaramiuk inuunini annaavaa. Lot — naapertuilluarniartuusoq — panini marluk ilagalugit illoqarfiup aserorneqarnerani aniguipput. Navianartumulli qanittumi inuuniarluni aalajangersimanini annaasaqaatigingaarpaa! — 1 Moses 19:18-26; 2 Pîtruse 2:7.

Navianartut uiartikkit

Lotip misigisaasa nuanniitsut ersersippaat navianartoq eqqaasiorutsigu uninngavigigutsiguluunniit qanoq pisoqarsinnaasoq. Ilisimassuseqarutta paasisariaqarparput umiartortutut pikkorissutut imminut navianartorsiortinnianngisaannartariaqartugut. Immat navianartullit suut uiartertariaqarpavut? Kristumiut ilaat imminnut tammartissimapput niuernikkut ulapippallaalersimagamik, silamiunik ikinngusersorsimagamik, imaluunniit angutaagunik arnamik arnaagunillu angummik ajuutiginnilersimagamik massa katinnissaminnut kiffaanngissuseqaratik.

Navianartumut nigorsimaneq silatusaarneruvoq. Assersuutigalugu niuernikkut isumaqatigiissutip isumalluarnartup anersaakkut navianaatai sianigaavut? Qatanngutit ilaat suliffimminnit tiguartilluinnarsimapput — ilaquttatik, peqqissusertik pisussaaffitillu teokratiimut tunngasut pilliutigalugit. Ilaannikkut inuulluataarnarnerusumik inooriaaseqalernissamik ilimasaarutit imaluunniit niuernikkut piginnaassutsinik misileraanikkut unamminiarnartut ussernartorsiorfigineqarsinnaapput. Ilaat oqartarput pissutigisartik tassaavoq qatanngutinut allanut suliffissaqartitsinissartik imaluunniit nunarsuaq tamakkerlugu oqaluussinermut annerusumik tunissuteqarsinnaalernissartik. Immaqa isumaqartarput niuernertik ajunngitsumik ingerlalerpat Naalagaaffiup soqutigisaanik aallussinerusinnaalissallutik.

Sunilli nakkarfissaqarpa? Aningaasaqarnikkut nalorninartorsiorneq aammalu ’periarfissat nalaatsornerillu’ pisuullutik niuernerit allaat piareersarluagaanerpaat ’kinngutinneqarsinnaapput’. (Nalunaajaasup oqaasii 9:11) Akiitsorpassuaqarneq annikilliuutaalersinnaallunilu anersaakkut sanngiillisitsisinnaavoq. Niuernerlu ingerlalluaraluarpalluunniit qularnanngitsumik piffissarujussuaq tamatumunnga atortariaqassaaq allatullu ajornartumik silamiut assut ilagisariaqartassallugit.

Spaniami utoqqaanertaq kristumiu aningaasatigut ajornartorsiornermi nalaani sillimmasiisarfimmit ussernartorsiornartumik neqeroorfigineqarsimavoq. Naak sillimmasiisarfimmut namminersuullugu aallartitaanissaq aningaasarsiorluarfigissagaluarlugu neqeroorut piumanngilaa. „Aalajangernera tamanna oqitsuunngilaq,“ nassuiaavoq. „Siullermik nuannarinngilara qatanngutikka aningaasarsiutigissallugit — toqqaannanngikkaluamilluunniit. Namminersornissaq kajungernartikkaluaqaara, kisianni assut angalasariaqartassaanga assullu sulisariaqartassallunga. Pinngitsoornanga ilaquttakka ilagiillu tunullinngortittussaassavakka. Ajornerpaarli tassa neqeroorut tamanna ilassigaluarukku inuunera aqussinnaajunnaassavara.“

Kristumiup kialuunniit inuunerminik aqutsisinnaajunnaarnissani akueriinnarumassanngilaa. Tamatuma qanoq ajortigisumik kinguneqarsinnaanera Jesusip ersersissimavaa angut kingorna inuulluataarsinnaalerumalluni pisuussutinik annertusiartuinnartunik katersuisoq assersuusiarigamiuk. Angut taanna naammattunik katersuisimalluni isumaqaleruttorluni toquvoq. ’Taamaattarput pequutinik imminnut katersuiniartut, Guutimili pisuunatik,’ Jesus mianersoqqusilluni oqarsimavoq. — Lúkarse 12:16-21; naleqqiuguk Jâko 4:13-17.

Aamma silamiunik ilaqarpallaarnissarput sianigisariaqarparput, soorlu sanilitsinnik, atuaqatitsinnik, suleqatitsinnik niueqatitsinnilluunniit. Immaqa eqqarsarpugut: ’Jehovap nalunaajaasui ataqqivai, ajunngitsumik inuuvoq ilaannikkullu sallusuissut pillugu oqaloqatigineqarnissani ajorineq ajorlugu.’ Misilittakkalli takutippaat silamiut uppeqatitsinnit ilagerusunneruleriartuaarsinnaagivut. Silamiunik ikinnguteqarneq qanoq navianaateqarami?

Piffissap ilungersornassusia sumiginnariartuaarsinnaavarput imaluunniit timikkut ittut anersaakkut ittunit pingaarnerutilersinnaallugit. Immaqalu allaat ikinngutitsinnit silamiunit ataqqineqarnerput annaajumanagu silarsuarmit akuerineqarnissarput pingaartikkiartuaalersinnaavarput. (Naleqqiuguk Pîtrusip agdlagai sujugdlît 4:3-7.) Tussiaasiortup Davidip inuit Jehovamik asannittut ilagerusunnerusarsimavai. „Aqqit tusarliutissavara qatanngutinnut, katisimasuni erinalimmik unnersiutigissavakkit.“ (Tussiaat 22:23) Davidip maligassiaa malillugu anersakkut ineriartortitsisinnaasunik ikinngusersorutta illersuutigissavarput.

Navianaatilik alla tassaavoq katinnissamut kiffaanngissuseqarani angutaagaanni arnamut arnaagaannilu angummut kissalaarfiginninneq. Navianartoq pilersarpoq ajuutiginartumut, oqaloqatigilluartakkamut allaallu immaqa quiagisaqaqatigalugulu isumaqatigisamut, ajuutiginnileraanni. Immaqa ilagissallugu nuannarinarpoq imalu eqqarsarnarluni: ’Killissara nalunngilara. Ikinngutigiiginnarpugut.’ Misigissutsilli ikinneqareeraangamik qamikkuminaassisaqaat.

Maryp, qatanngutip arnap katissimasup, Michael ilagissallugu nuannareqaa.b Angut taanna qatanngutaagaluarpoq nuannarinartoq, ikinngutitaarnissanili ajornakusoortillugu. Soqutigisaqaqatigiittorujussuupput, amerlasuunillu quiagisaqaqatigiillutik. Mary misigaaq qatanngutip angutip aappaqanngitsup imminut oqaloqatiginnikkusussusia usorsisimaarutigalugu. Ikinngutigiinnerinnartut ikkaluartoq erniinnaq misigissutsikkut itisuumik tunniusimaqatigiiffinngorpoq. Ilagiittarnerat annertusiartuinnarpoq naggataatigullu kanngunartuliorlutik. „Navianaataa aallaqqaataaniilli nassuerutigisariaqarsimagaluarpara,“ Mary anersaaruluppoq. „Ikinngutigiinnerput sakkortusiartuaartillugu soorlumi tassa marrikkiartuinnartugut.“

Biibilip mianersoqqussutaa manna tusaanngitsuusaanngisaannartigu: „Uummat tamanit annerusumik tatigisassaanngitsuuvoq. Katsorsagassaanngilaq. Kiammi inuup uummammiugisai ilisimasinnaavai.“ (Jeremia 17:9) Uummatitta tatigisassaanngitsup kingunerluttussamik misigissutsikkut attaveqarfeqalersissinnaavaatigut — umiarsuaq ikkarluup tungaanut ingerlasoq assigingajallugu. Qanormi iliortoqarsinnaava? Katinnissannut kiffaanngissuseqanngikkuit ajuutiginartitannut misigissutsikkut nigorsimanissat ilumoorullugu sulissutigisariaqarpat. — Ussatit 10:23.

Navianartumit qimaagit

Taavami maannakkut anersaakkut navianartorsiorutta? Umiartortut sissamut qaarsuusumut anorimit sarfamillu tissukaatitinneqartut ilungersorsuataartarput imaannarmut avammukarniarsaralutik imaluunniit assumukaarniarsaralutik isumannanngitsumut pinissamik tungaanut. Aamma uagut isumannanngitsumut piniarluta ilungersortariaqarpugut. Biibilimi unnersuussutinik maleruaanitsigut, Jehovamut ilumoorluta ikioqqunitsigut qatanngutitsinnillu kristumiunik inersimalluartunik siunersiuisarnitsigut isumannaatsumut ingerlalersinnaavugut. — 1 Tásalûníkamiut 5:17.

Qanorluunniit atugaqaraluarutta ’silap pii’ ingalassimaniarutsigik silatusaassaagut. (Galâsiamiut 4:3) Lotitut iliornani Abrahamip Kana’animiut silamiut nigorlugit inuunissani qinersimavaa, naak taamaaliornermigut ukiorpassuarni tupermi najugaqartariaqaraluarluni. Immaqa pigisatigut atortorissaanngikkaluarpoq, pilimanngitsumilli inuunini anersaakkut illersuutigaa. Uppernermigut umiiarnissamut taarsiullugu ’uppertunut tamanut ataatanngorsimavoq’. — Rûmamiut 4:11.

Silarsuarmik nukatsitaasumik sunniinerujartuinnartumik „anersaalimmik“ avatangerneqarsimagatta Abrahamip maligassiaa malinniartariaqarparput. (Evfisumiut 2:2) Sutigut tamatigut Jehovap siulersuinera akuerigutsigu pilluaqqusinera misigissavarput asannittumik sernissuinera toqqaannartumik misigalugu. Daviditut ima misigissaagut: „Kingumut nakussatsittaraanga, ingerlatittaraanga aqqutaalluartut atuartillugit pissutigalugu aqqi. Tassami ajunngissutsip unneqqarissutsillu malittarissavaannga inuunera tamaat, illillu illunni ineqassaanga ullussani tamani.“ Navianartoq sanguffiginagu ’aqqutaalluartut ingerlavigisariaqarpavut’. — Tussiaat 23:3, 6. (wD 15/2 94)

[Quppernerup ataani ilanngussaq]

[Qupp. 24-mi assiliartaq]

Katinnissannut kiffaanngissuseqanngikkuit ajuutiginartitat misigissutsikkut nigorsimaniartariaqarpat