Ataatsimeersuarnermut „Guutimik mianerinninneq“-mut tikilluaritsi!
AAP, Jehovap Nalunaajaasuisa 1994-imi ataatsimeersuaqattaarnissaannut piffissanngulerpoq. 1994-imi juunimiit 1995-imi januaari ilanngullugu ulluni pingasuni ataatsimeersuarnerit nunarsuaq tamakkerlugu illoqarfinni hundredelikkuutaani peqataaffigineqarsinnaassapput — siullermik Amerikami avannarlermi, taava Europap kitaani kangianilu, Asiami, Amerikami qiterlermi kujallermilu, Afrikami, Australiami qeqertanilu sumi tamaaniittuni.
Ataatsimeersuarnissat qulequtassaat eqqarsariaallannaqaaq — „Guutimik mianerinninneq“. Mianerinninneq tamanna tassaanngilaq inuunerminik navianartorsiortup siooranera, tassaallunili Guutimik mianerinninneq isumakkut eqqissinartoq nuannaarnartorlu. Biibilimi ussateqarpoq imaattumik: „Guutimik mianerinninerup qanilaarnerullu akissarsiarititai tassaapput pisuussutit, ataqqinaat inuunerlu.“ (Ussatit 22:4) Guutimik mianerinninneq qanoq ililluni ’pisuussutinik, ataqqinaammik inuunermillu’ kinguneqarsinnaagami? Ulluni pingasuni ataatsimeersuarnerit ingerlanerini oqalugiaatitigut, oqaloqatiginninnertigut, takutitsinertigut isiginnaagassiakkullu tamanna paasinarsitsinneqassaaq.
Apustili Paulus allassimavoq ’katisimasarfipput qimannaveertariaqaripput’. (Eprîarit 10:25) Jehovap nalunaajaasuisa tamanna ilumoorussassatut isigaat, taamaattumillu sapaatip-akunneranut pingasoriarlutik ilagiinnik ilinniartitsiniarlutik Guutimillu pallorfiginninniarlutik ataatsimiittarput. Ataatsimeersuarnerillu immikkut ittuupput. Jehovap nalunaajaasuisa ataatsimeersuartarnitik qilanaarisaqaat kingunerujussuanullu allaat oqallisigisarlugit. Ataatsimeerusarnissamut tikilluaqqungaarpatsigit, qanorluunniit upperisaqaraluaruit, ataatsimeerusarnerannut najuuteqqullutit kristumiullu ataatsimooqatiginnneranni anersaakkullu paasissutissinneqarneranni ilageqqullugit. Najukkanni Jehovap nalunaajaasuisa ilaata ataatsimeersuarnerup sumi qaqugulu pinissaanik oqaluttuukkumassavaatit.