Sooruna Jehovap nalunaajaasui pulaaqattaartuaannartut?
’AAMMA tassa takkuteqqeriikatapput! Sapaatit-akunnialuinnanngui matuma siorna aamma kasuttoramik!’ Jehovap nalunaajaasui matunnut kasuttoraangata taama eqqarsartarpit? Ullumikkut inuit millionilippassuit Jehovap nalunaajaasuinit akuttunngitsumik pulaarneqartarput. Immaqa aperiumassaatit sooq uffa inuit amerlanerit namminneq upperisaqartut imaluunniit soqutiginninngitsut pulaaqattaartuaannartut? Apeqqut tamanna akineqartariaqarpoq.
Guutimit akisussaatitaaneq
Jehovap nalunaajaasuisa Biibili tunngavigalugu paasisimavaat 1914-imi sorsunnersuaq siulleq aallartimmalli ullumikkut silarsuup aaqqissuussaasup naggatissaanut Guutillu naalagaaffiata nunarsuarmut naalakkersuilernissaanut atatillugu Biibilimi siulittuutit eqquussulersimasut. Ukiuni hundredengajalluinnarni nakuusernersuup, aammik kuisinersuup uumissuinersullu inuup politikkikkut aaqqiinissaa ungasilliartuinnartissimavaa. Sorsunnerit peqqarniisernerillu inuiannik atugarliortitsiuartut uppernarsarpaat inuit naalakkersuisui inuit uummataannik, isumaannik ileqquinillu allanngortitsisinnaasimanngitsut. Qangali pisimasunik kamaatiginnittuarneq naggueqatigiit upperisarsiortullu assigiinngitsut akornanni toqunartutut ililluni atuuppoq. Tamanna ilaatigut takuneqarsinnaavoq Afganistanimi, Afrikami kujallermi, Indiami, Irlandimi avannarlermi, Jugoslaviaasimasumi aammalu Kangiani Qiterlermi. Ataavartumik tamakkununnga aaqqiissutissaqarpa?
Nalunaajaasut sumit killinneqarpat?
Jehovap nalunaajaasuisa paasisimavaat Guutip aaqqiissutissaa — Naalagaaffik neriorsuutigisaa Jesus Kristusimik aquttoqartoq — kisimi aaqqiissutissaasoq atorsinnaasoq. Jesusip Naalagaaffik tamanna qinnutimini tusaamasaasumi qinnutigisimavaa: ’Taamaattumik ima qinussaasi: Ataatarput qilammiusutit, aqqit illernarsili; naalagaaffiit tikiulli; piumasat qilammisut nunamissaaq pili.’ Nalunaajaasut upperaat qinnut tamanna Guutip inuiaat akornanni pissutsinut akuliunnissaanik qinnutaasoq. — Matîuse 6:9, 10.
Taavami sooruna Jehovap nalunaajaasuisa tusarliussaq tamanna siaruarterniarlugu illumiit illumut angalaarnissartik pisariaqartutut taama isigitigigaat? Peqqussutit marluk Jesusip erseqqissaatigisimasai pissutigalugit: ’„Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ Tassa inassut siulleq annerusorlu. Aappaatalu taamaaqatigaa: „Tullit ilittut asassavat.“’ — Matîuse 22:37-39.
Nalunaajaasut Guutip pilluaqqussutaanik angusinissartik kissaatigaat, tullertillu asagamikku aamma pilluaqqusaanernik tamakkuninnga ilangeeqataanissaa kissaatigalugu. Taamaattumik misigisimapput Jesusip maligassiaa malillugu namminissarsioratik inuit allat tusarlerniarlugit pulaartariaqarlugit. Kissaatigaat ’Guutip pilluartup’ inuiannut naalattunut nunarsuarmi minguiarsimasumi neriorsuutigisimasaanik inuit ilisimannilersinnissaat. — 1 Timûtiuse 1:11; 2 Pîtruse 3:13.
Ajoqersuiartortitap kristumiup Paulusip Guutip neriorsuutai upperisimavai taamaattumillu ima allassinnaasimalluni: ’Paulus Guutip kiffaa Jesus Kristusillu apustiligisaa, Guutip qinigaasa uppernissaat pillugu sallusuissullu Guutimik mianerinninniutaasoq ilisareqqullugu, inuuneq naassaanngitsoq Guutip sallusuitsup killeqanngitsumit unnersuutigisaa neriuutigeqqullugu.’ Aap, Guutip ’sallusuitsup’ inuuneq naassaanngitsoq inunnut maniguuttunut imminik ujarlersunut kiffartuussisunullu neriorsuutigaa. — Títuse 1:1, 2; Sefanja 2:3.
Nalunaajaasut akissarsisarpat?
Inuit ilaat oqarniartarput Jehovap nalunaajaasui oqaluussinerminnut akissarsisartut. Tamannali ilumuunngilluinnarpoq! Paulusip Korinthimi ilagiinnut oqaasii Jehovap nalunaajaasuisa ilumooruppaat: ’Guutip oqaasianik iluanaarniuteqartorpassuit assiginngilavut, qaamasumiittutulli Guutimit pineqartutut Guutip kiinaata saani Kristusimi oqaluppugut.’
Upperisarsiornikkut pisortat ilaasa oqaluussisarnertik akissarsiutigaat, upperisarsiornikkut atorfimmikkut imaluunniit TV-kkut iluanaarniuteqarnermikkut. Upperisarsiortullu amerlanersaat akissarsialinnik palaseqarput. — 2 Korintumiut 2:17.
Jehovalli nalunaajaasui akissarsialinnik palaseqanngillat, atuagassiaatitillu ilumoorlutik sallusuissummik ujarlersunut amerlanertigut tunissutigisarpaat. Ilarpassui kajumissutsimik tunissutinik taarserneqartarput, tamakkuali nunarsuaq tamakkerlugu oqaluussinermi aningaasartuutinut matussutigineqartarput. Jesusip kajumissaarutaa una: ’Akeqartinnagu pigassiuk akeqartinnaguttaaq tunniussiuk,’ naapertorlugu nalunaajaasut pigisatik, ilaatigut piffissartik nukitillu, ukiut tamaasa nalunaaquttap-akunnerini millionilipppassuarni Guutimut kiffartornerminnut kajumissutsiminnik atortarpaat. Taamaalillutik illumiit illumut angalaarnermikkut angerlarsimaffinnilu Biibilimik atuaqqissaaqatiginninnikkut soqutiginnittunik ilinniartitsisarput. — Matîuse 10:8; 28:19, 20; apustilit suliait 20:19, 20.
Pissutsit piviusut uppernarsarpaat Jehovap naluanaajaasui ataasiakkaatut, ilagiittut imaluunniit Napasuliaq Alapernaarsuiffiup Peqatigiiffia ataatsimut aningaasannanniarnermik pissutigisaqanngitsut. Oqaluussisartut arlaannaalluunniit illumiit illumut angalaarnermut akissarsineq ajorpoq. Suliaalli qanoq ililluni aningaasalersorneqarpa? Inuit suliamik tamatuminnga pingaartitsisut qujamasuutiginnittullu nunarsuarmi sumi tamaaniittut kajumissutsiminnik tunissutaannit. Aningaasanik katersuisitsisoqarneq ajorpoq.
Nalunaajaanerata sunniutaa
Nalunaajaasut illumiit illumut angalaartarnerat sukkulluunniillu oqaluussisarnerat avataaneersunit malugineqarsimava? Aap, tusagassiuutitigut tutsiuttartut taamaannera uppernarsartarpaat. Aamma TV-kkut aallakaatitassiani filminilu matukkut kasuttortoqarnerani Jehovap nalunaajaasui eqqaaneqartarsimapput. Aamma ’aviiseeqqani’ nalunaajaasut eqqaaneqartarsimapput. Suliniarluarnerat ima ilisimaneqalersimatigaaq nunarsuarmi tamarmi quiasaarutinik titartaasartut Jehovap nalunaajaasuisa oqaasiinik issuagaqartarsimallutik. Tamakku ingasattajaartumik quiasaarniutaasaraluarput, amerlanertigulli piviusumik pitsaasumik tunngaveqartarput — tassa Jehovap nalunaajaasui illumiit illumut oqaluussiuartutut ilisimaneqartut. — apustilit suliait 20:20.
Titartakkani quiasaarusiani qanittukkut takuneqarsinnaavoq angut qaqqakkut majuartoq siulittuisartoq paasiniaaffigiartorlugu. Tikikkamiuk oqarfigaa: „Pisussanik tupinnartunik taaguiffiginnga!“ Siulittuisartoq qanoq akiva? „Atagu . . . Kaannersuaqartassaaq, nappaalanersuaqartassaaq nunalu sajuttassalluni. Seqineq taarsiumaarpoq qaammallu aanngorluni.“ Angut apereqqippoq: „Nuannersunik tusagassaqarpa?“ Siulittuisartoq akivoq: „Guutip qulliit tamaasa allarterumaarpai . . . toqu peqarunnaassaaq aliasuttoqarunnaarlunilu anniartoqarunnaassaaq!“ Taava pulaartoq apereqqippoq: „Tamakku tamaasa sumit nalunngiligit?“ Qanoq akineqarpa? „Jehovap nalunaajaasui sumut tamaanga pulasaramik!“ Quiasaarusianik titartaasartoq nammineq taama isumaqarsimassaaq!
Quiasaarusiami tassani allanilu assigisaani ersersinneqaannanngilaq Jehovap nalunaajaasui pulaaqattaartarnermikkut qanoq qasusuitsigisut, aammali qulaarneqarpoq tusarliussaata ataasiussusia. Titartaasartup taassuma oqaatsit ikittuinnannguit atorlugit allassimaffiit issuarpai nalunaajaasullu tusarliussaata pingaarnersai oqaluttuareqqillugit. — Naleqqiuguk Matîuse 24:7, 29; sarĸúmersitat 21:3, 4.
Inuit amerlanerit tusarliussaminnut tusaajumannginnerat nalunaajaasut nikallussutigineq ajorpaat imaluunniit suliniarnerminnut millissutaatissanagu. Apustili Peter ima mianersoqqusisimavoq: ’Manna pingaarlugu nalussanngilarsi, ullussani kingullerni tikiukkumaartut mittatilliillutik mitallersut illigutsannitik malillugit ingerlasut oqarlutillu ima: „Naammiuna tikiunnissamik unnersuut? Siuaasammi sinippaarmatali kingorna pinngortitat pileqqaarnerannit suut tamarmik taamaaginnarput.“’ Taamaakkaluartoq nalunaajaasut asanninnerminnit killinneqarlutik tullerminnut pulaartuartarput, taamaaliortuassallutilu Guutip pissutsit aaqqissuussaanerannik matuminnga ajortumik suujunnaarsitsinissaa tikivillugu. — 2 Pîtruse 3:3, 4.
Jesus oqarsimavoq ullussani kingullerni nutaarsiassaq nuannersoq oqaluussissutigineqaqqaassasoq. Sooq qanorlu ililluni nutaarsiassaq nuannersoq oqaluussissutigineqartoq paasisaqarfiginerujumagukku ilanngutassiat tulliuttut marluk atuariakkit. — Mákorse 13:10. (wD 15/8 94)
[Qupp. 9-mi assiliartat]
Jehovap Nalunaajaasui akissarsialinnik palasertaqanngillat — tamarmik kajumissutsiminnik kiffartortuupput