Jehovamit ajoqersorneqartut — ulloq manna tikillugu
„Guutip [Jehovaasup] tunivaanga ajoqersukkap oqaanik.“ — JESAJA 50:4.
1, 2. (a) Jehovap ajoqersugannaani sumut piareersartissimavaa, tamannalu qanoq kinguneqarpa? (b) Jesusip ajoqersuutini suminngaanneernerarpaa?
JEHOVA GUUTI Ataatanngoramili Ajoqersuisuulersimavoq. Qitornami ilaat pikitsitsereersullu ajoqersugannaani, angajulliliani, nunarsuarmi kiffartuuteqarnissaanut piareersartilerpaa. (Ussatit 8:30) Jesaja, kapitali 50-imi, ajoqersugaa taanna ima oqarporlusooq: „Guutip [Jehovaasup] tunivaanga ajoqersukkap oqaanik nikallortut nakussatsissinnaaqqullugit oqaatsinnik.“ (Jesaja 50:4) Ataatami imminut ilinniartitsissutigisimasai Jesusip nunarsuarmiinnermini atorpai, taamaalillunilu ’erloqisut nanertugaasullu qasuerserlugit’. — Matîuse 11:28-30.
2 Jesus tupinnartorpassuarnik suliaqartarsimavoq. Tappiitsut isaat tappissisittarsimavai allaallu toqusut makitittarsimallugit, taamaakkaluartorli nalimini inuusunit ingammik ajoqersuisutut isigineqarsimavoq. Akerlilersortaasa ajoqersugaasalu tamarmik assigiimmik taamatut isigisimavaat. (Matîuse 8:19; 9:11; 12:38; 19:16; Juánase 3:2) Jesusip ajoqersuinini imminut ataqqinaatissanngortinnianngisaannarsimavaa, maniguullunili ima nassuerluni: ’Ajoqersuutiga uanga piginngilara, aallartitsisimali pigaa.’ ’Soorlu Ataatama ajoqersoraanga taama oqaluppunga.’ — Juánase 7:16; 8:28; 12:49.
Ilinniartitsisup ilinniartullu attaveqatigiinnerat
3. Esajasip siulittuutaani qanoq ililluni erserpa Jehova ajoqersukkaminik soqutiginnittuusoq?
3 Ilinniartitsisuulluartoq peqqissaarluinnartuuvoq ilinniartitanilu inuttut soqutiginninnermik ersersitsivigisarlugit. Jesaja, kapitali 50-imi, erserpoq Jehova Guuti ajoqersukkaminut soqutiginninnermik taama ittumik ersersitsisartoq. Ima allassimavoq: „Ullaat tamaasa siutiga itersartarpaa ajoqersukkat pisarnerattut tusarnaaqqullunga.“ (Jesaja 50:4) Oqaatsit taakku eqqaasitsipput ilinniartitsisumik ilinniartitaminik ullaaralaannguaq itersaasumik, ilinniartikkumallugit. Siulittuutip tamatuma qanoq paasisariaqarnera pillugu Biibilimik paasiniaasartoq ima oqarsimavoq: „Eqqarsaat tassaavoq Utertitsisoq . . . tassaajumaartoq Guutimi atuartoq, allanillu ilinniartitsinermut piginnaassuseqartoq. . . . Messias Guutimit ajoqersorneqarsimagami inuiannik ajoqersuinissaminut immikkut ittumik piginnaassuseqarsimassaaq.“
4. Jesusip Ataatami ajoqersuinera qanoq qisuariarfigisimavaa?
4 Pissutsit pitsaasut atuunneranni atuartut ilinniartitsisup ilinniartitsissutaanik puiuikkiussisinnaanerusarput. Jesus Ataatami ajoqersuussutaanut qanoq qisuariarsimava? Jesaja 50:5-imi allassimasutut: „Guutip [Jehovaasup] siutiga ammarpaa. Pinaasinngilanga tunuarnangalu.“ Jesus ilikkagaqarusuttorujussuusimavoq. Naalaaqqissaartarsimavoq. Aammalu Ataatami piumasaanik tamanik iliornissaminut kajumissuseqarluarsimavoq. Naalasseriitsuunngilaq, imali oqarsimalluni: ’Uanga peqqusara pinnani illit peqqusat pili.’ — Lúkarse 22:42.
5. (a) Sukkut takuneqarsinnaava Jesusip nunarsuarmi misilinneqarnissani ilisimareersimagai? (b) Siulittuut Jesaja 50:6-imiittoq qanoq ililluni eqquuppa?
5 Siulittuut naapertussagaanni Erneq Guutip piumasaanik iliornermi kinguneriumaagassaanik ilisimatinneqarsimannguatsiarpoq. Ajoqersorneqartup oqaasiisigut tamanna erserpoq: „Qatigaga manivara anaalerisumut, uminnillu nutsuisut ilaginnaannarpakka, kiinara assinngilara asissuisumut qitseraasumullu.“ (Jesaja 50:6) Soorlu siulittuummi ersertoq Jesus nunarsuarmiinnermini peqqarniitsumik pineqartarsimavoq. ’Kiinaagut qitserarpaat,’ apustili Mattæus allassimavoq. ’Tilluppaat.’ (Matîuse 26:67) Taamatut pisoqarsimavoq poorskip unnuaani ukiumi 33-mi, pinerliisullu tassaapput upperisarsiornikkut siuttut. Aqaguanilu qatiggani anaalerisunut manivaa, Romamiut sakkutuuisa toqunniarluni qisummut nivinngannginnerminni naakkittaaqisumik iperartormanni. — Juánase 19:1-3, 16-23.
6. Sukkut paasinarpa Jesusip Ajoqersuisini tatigiunnaanngisaannarsimagaa, tatiginninnerminullu tamatumunnga qanoq akissarsisinneqarpa?
6 Ernerulli ajoqersorneqarluarsimasup Ajoqersuisini tatigiunnaanngisaannarpaa. Tamanna erserpoq siulittuut naapertorlugu oqaasiisigut ukunatigut: „Guutip [Jehovaasup] ikiormanga kanngusutsitaanngilanga.“ (Jesaja 50:7) Jesusip Ajoqersuisumi ikiuinissaa tatigaa, tatiginninnerminullu tamatumunnga akissarsisinneqarpoq. Ataataminit qutsissisinneqarpoq pilluaqqusaallunilu Guutip kiffaasa akornanni qutsinnerpaamik inissinneqarnermigut. (Filípimiut 2:5-11) Aamma uagut naalalluta Jehovap ajoqersuutaa maleruarutsigu ’tunuanngikkuttalu’ pilluaqqusaangaassaagut. Massakkut misissoriartigu ilinniartitsineq tamanna qanoq ililluni ulloq manna tikillugu atuussimasoq.
Ilinniartitsinersuaq
7. Jehovap nunarsuarmi ajoqersuinini qanoq ililluni ingerlassimavaa?
7 Soorlu eqqaaneqareersoq Jehova nunarsuarmut aallartitani, Jesus Kristus, atorlugu ukiuni hundredelinni siullerni ajoqersuisimavoq. (Juánase 16:27, 28) Jesusip ajoqersuinermini Guutip oqaasii pingaarnerpaatut atortuaannarsimavai, taamaalillunilu ajoqersukkaminut maligassiuilluni. (Matîuse 4:4, 7, 10; 21:13; 26:24, 31) Kingorna Jehovamit ajoqersorneqarneq ajoqersorneqarsimasut allanut oqaluussineratigut ingerlanneqalerpoq. Taakku Jesusip ima peqqusimavai: ’Taamaattumik aallaritsi, inuiaqatigiillu tamaasa ajoqersuganngortissigik . . . ajoqersorsigillu ilissinnut peqqusakka tamaasa maleruaqqullugit.’ (Matîuse 28:19, 20) Ajoqersuganngortut ’Guutip illuanut . . . Guutip uumasup ilagiissaanut’ ilaalertarsimapput. (1 Timûtiuse 3:15) Aamma ilagiinnut ataasiakkaanut katersorneqartarsimapput tassanilu Jehovamit ajoqersorneqartarlutik. (apustilit suliait 14:23; 15:41; 16:5; 1 Korintumiut 11:16) Guutimit ajoqersorneqarneq ulloq manna tikillugu allanngorsimanngila? Aap!
8. Jesusip oqarneratut naggatissap nalliutinnginnerani nunarsuarmi oqaluussineq qanoq siulersorneqartussaasimava?
8 Toqunissani ullunik pingasunik sioqqullugu Jesus siulittuivoq pissutsit aaqqissuussaanerata matuma naggaserneqannginnerani oqaluussilluni suliaq annertooq suliarineqarumaartoq, ima oqarluni: ’Naalagaaffimmik iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ Taava nunarsuaq tamakkerlugu oqaluussilluni ajoqersuillunilu sulineq tamanna qanoq siulersorneqarumaartoq nassuiarpaa. Eqqaavaa „inussiaq aalajaallunilu silatooq“, kiffaminut anersaakkut inuussutissalersuinermi atortuusussaq. (Matîuse 24:14, 45-47, NV) Nunarsuaq tamakkerlugu naalagaaffiup soqutigisaanik nakkutiginninnermi Jehova Guutip „inussiaq“ taanna atorsimavaa.
9. Kikkut tassaappat inussiaq aalajaallunilu silatooq?
9 „Inussiaq aalajaallunilu silatooq“ ullumikkut tassaavoq Naalagaaffimmik kingornussisussat sinneri ataatsimut isigalugit. Tassaapput kristumiut tanitaasut, 144.000-inut ’Kristusip pigisaanut’ ilaasunut nunarsuarmi sinneruttut, ’Abrahamillu kinguaavisa’ ilaat. (Galâsiamiut 3:16, 29; sarĸúmersitat 14:1-3) „Inussiaq aalajaallunilu silatooq“ qanoq ililluni ilisarineqarsinnaava? Ingammik suliaatigut Guutillu oqaasianik, Biibilimik, malinneqqissaarneratigut.
10. Jehovamit ajoqersorneqarneq siuarsarniarlugu inussiaqatigiit sunik atortoqarpat?
10 Ullumikkut Jehovap inunnik ajoqersuinermini „inussiaq“ taanna atorpaa. Inussiaqatigiit taakku 1931-imi Jehovap Nalunaajaasuinik taaguuteqalerput. Taamanimiilli millionilikkuutaat taakkununnga ilanngussuussimapput, taakkunatut taaguuteqalerlutik Guutillu naalagaaffianik oqaluussissutiginninnermi ikiuutilerlutik. Atuagassiaq manna, Napasuliaq Alapernaarsuiffik — Jehovap naalagaaffianik tusarliisoq, ’inussiap’ ajoqersuilluni sulinermini atortuisa pingaarnersaraat. Atuagassialli allat aamma atorneqarput, ilaatigut atuakkat, atuagassiaaqqat atuagassiarlu Iteritsi!
11. Atuarfiit suut ’inussiap’ pilersissimavai, sunillu siunertaqarpat?
11 Aamma ’inussiaq’ atuarfinnik assigiinngitsunik pilersitsisimavoq. Taasinnaavavut Napasuliaq Alapernaarsuiffiup Biibilimik Atuarfia Gilead, oqaluussisartut inuusuttut nunani allani ajoqersuiartortussatut qaammatini tallimani pikkorissarfigisartagaat, aammalu Kiffartortunut Toqqakkanut Atuarfik, utoqqaanertat ilagiinnilu kiffartortut aappaqanngitsut qaammatini marlunni pikkorissarfigisartagaat suliassanik immikkut ittunik teokratiimut tunngasunik tigusinissaq siunertaralugu. Naalagaaffimmik Kiffartuuteqarnermik Atuarfimmi kristumiut utoqqaanertat ilagiinnilu kiffartortut ilagiinni suliassaminnut pikkorissartinneqartarput. Kiisalu Pioneerit Atuarfianni piffissaq tamaat oqaluussisartut oqaluussilluni suliamut pikkorissartinneqartarput.
12. Ilinniartitsineq suna sapaatit-akunneri tamaasa pisarpa?
12 Illinniartitsinerup immikkoortortaa alla sapaatip-akunneranut tallimariarluni ataatsimiittarnerni, Jehovap innuttaasa ilagiivini 75.500-nit amerlanerusuni nunarsuarmi sumi tamaaniittuni, ingerlanneqartarpoq. Ataatsimiinnerit tamakku sapinngisamik annerpaamik pissarsiffigisarpigit? Ilinniartitsinermut malinnaaqqissaarnikkut takutittarpiuk Guutimi ’atuartuullutit’? Anersaakkut siumukarnerpit nalunaatsumik allanut takutippaa ’ajoqersukkatut oqaqartutit’? — Jesaja 50:4; 1 Timûtiuse 4:15, 16.
Ilagiit ataatsimiinnerini ajoqersorneqarneq
13. (a) Ullumikkut Jehovap innuttaminik ajoqersueriaasianik pingaartumik taasaqarit? (b) Napasuliaq Alapernaarsuiffik-mik pingaartitsinerput qanoq ililluta ersersissinnaavarput?
13 Jehovap innuttani ajoqersorpai ingammik Napasuliaq Alapernaarsuiffik ikiortigalugu sapaatip-akunneranoortumik Biibilimik atuaqqissaarneq aqqutigalugu. Ataatsimiinneq tamanna Jehovamit ajoqersorneqarnissamut periarfissatut isigaajuk? Jesaja 50:4 tassaavoq siulittuut ingammik Jesusimut tunngatitaasoq, ’ajoqersukkalli oqaanik’ pigisaqalertoqarsinnaaqqullugu Guutip aaqqissuussaanik atorluaasunut tamanut aamma tunngatinneqarsinnaavoq. Napasuliaq Alapernaarsuiffik-mik pingaartitsinermik ersersitsissutaasinnaasunut ilaavoq atuagassiamik tiguniariarlugu atuarneq. Taava Napasuliaq Alapernaarsuiffik ilagiinni atuaqqissaarneqalerpat pingaartitsineq Jehovamut takutinneqarsinnaavoq najuunnikkut, aammalu neriugisaq tamanut nassuerutigisinnaajumallugu piareersarsimanikkut. — Eprîarit 10:23.
14. (a) Sooq ataatsimiinnerni akisarneq pingaartuua? (b) Meeqqat akissutaat qanoq ittut qiimmassaataanerusarpat?
14 Ataatsimiinnerni oqaaseqarnikkut Jehovap ilinniartitsinersuanut peqataasinnaanerit misiutiginngiliuk? Qularutissaanngilluinnarpoq ataatsimiinnerni oqaaseqartarneq ’asanninnermut ajunngitsuliornermullu kajumissaaqatigiinnissatsinnut’ pingaaruteqartorujussuusoq. (Eprîarit 10:24, 25) Ilinniartitsinermut tamatumunnga aamma meeqqat peqataasinnaappat? Aap. Meeqqat ilumoorullugu oqaasii inersimasunut qiimmassaataasarput. Ilaatigut meeqqat oqaaseqarneri nutaat siullermeerlutik ataatsimiinnitsinnut najuuttut sallusuissummik Biibilimeersumik soqutiginninnerulissutigisarpaat. Ilaannikkut meeqqat atuaannarlutik imaluunniit inersimasumit isussuunneqareerlutik akisarput. Meeqqalli piareersarluarsimallutik akissutaat qiimmassaataanerusarput. Akissutit taamaattut Ajoqersuisorsuatsinnut ajoqersuinermullu qutsissisitamut taassuma pilersitaanut ataqqinaatissaapput. — Jesaja 30:20, 21.
15. Meeqqat pitsaanerusumik oqaaseqarsinnaalernissaannik ikiorniarlugit angajoqqaat qanoq iliorsinnaappat?
15 Nuannertaqaaq meeqqat Guutimik unnersiutiginninnermut peqataaniarlutik kajaalluinnaraangata. Aamma meeqqat unnersiutiginninnerannik pingaartitsinini Jesusip ersersissimavaa. (Matîuse 21:15, 16) Kristumiu utoqqaanertaq ima oqaluttuarsimavoq: „Meeraagallarama ’Napasuliamik’ atuaqqissaarnermi akerusuttarpunga. Ataatama oqaasissannik piareersartikkaangaminga piumasarisarpaa minnerpaamik arfineq-marloriarlunga oqaatiginissaa sungiusassagiga.“ Immaqa ilissi angajoqqaat ilaqutariittut atuaqqissaaqatigiinnissinni Napasuliaq Alapernaarsuiffik-mi immikkoortumi aalajangersimasumi meeqqat akisassaannik piareersartittarsinnaavasi, namminnerlu oqaatsiminnik oqaatiginissaanik ikiorlugit. Ikiorsigik paaseqqullugu Jehovap ilinniartitsineranut peqataasinnaaneq tassaasoq immikkut pisinnaatitaaffik angisooq.
16. Teokratiimik atuarfik inuppassuarnut qanoq iluaqutaasimava, kikkullu atuarfimmut tassunga ilaasinnaappat?
16 Kristumiut ataatsimiinnerini allani ilinniartitsineq aamma pingaaruteqartorujussuuvoq. Paasissutissanik saqqummiisussat ilinniartitsinermullu tusarnaartut tamarmik assigiimmik tamanna eqqumaffigisussaavaat. Ukiuni 50-init amerlanerusuni Jehovap teokratiimik atuarfik sapaatip-akunnerunoortoq angutinik arnanillu millionilikkuutaanik ilinniartitsinermut atorsimavaa, Naalagaaffiup tusarliussaanik pitsaasumik saqqummiussisinnaaleqqullugit. Iliuuseqarlutik ilagiinnut atasut atuarfimmut ilaasinnaapput, aamma qanittukkut aatsaat ataatsimiigiartalersimasut kristumiunut najoqqutassat naapertorlugit inuulersimagunik atuarfimmut ilanngussinnaapput.
17. (a) Suna immikkut ittoq siunertaralugu tamanut ammasumik ataatsimiititsisoqartalersimava? (b) Tamanut oqalugiartut suna eqqaamasariaqarpaat?
17 Aamma ataatsimiinnerit tamanut ammasut ilinniartitsinermut ukiorpassuarni ilaasimapput. Soorlu taaguutaani ersertoq ataatsimiinnerit tamakku pilersinneqarsimapput inuit Jehovamut nalunaajaasuunngitsut Biibilimi ajoqersuutinik tunngaviusunik ilisimasaqalersinniarlugit. Taamaattumik oqalugiartup oqalugiaatini tusarliussamik aatsaat siullermeerlutik tusartunut paasiuminartumik saqqummiuttariaqarpaa. Tassa oqariaatsit Jehovamut nalunaajaasuunngitsunut paasiuminaatsut, soorlu ’savat allat’, ’qatanngutit’ aamma ’sinneruttut’, nassuiartariaqarpai. Inuit tamanut ammasumik oqalugiaammik tusarnaartut ilaat Biibilimut naapertuutinngitsumik, ullumikkulli inuiaqatigiinni akuerisaalluinnartumik, paasinnittaaseqarsinnaammata imaluunniit inooriaaseqarsinnaammata, oqalugiartoq pissuserissumik periaaseqartariaqarpoq paasinnittaatsimillu inooriaatsimilluunniit taama ittumik ikasaatiginninnaveersaaqqissaartariaqarluni. — Naleqqiuguk 1 Korintumiut 9:19-23.
18. Aamma sunik sapaatip-akunneranoortunik ataatsimiinneqartarpa, qanorlu siunertaqarpat?
18 Ilagiit atuakkamik atuaqqissaaqatigiinnerat sapaatip-akunneranoortuuvoq, atuagassiat inussiap aalajaallunilu silatuup siulersuineratigut suliarineqarsimasut ikiortigalugit Biibilimik atuaqqissaarfiusoq. Maannakkut nunani amerlasuuni atuagaq Åbenbaringen — Det store klimaks er nær! atuaqqissaaqatigiissutigineqarpoq. Kiffartorneq pillugu ataatsimiinneq aaqqissuussaavoq Jehovap innuttai Naalagaaffik pillugu nutaarsiassamik nuannersumik oqaluussissutiginninnermut ajoqersuganngortitsiortornermullu tamakkiisumik peqataanissaannik ikiorniarlugit. — Matîuse 28:19, 20; Mákorse 13:10.
Katersuunnerni annerusuni ajoqersorneqarneq
19. Katerisimaarnersuit suut ukiut tamaasa ’inussiamit’ aaqqissuunneqartarpat?
19 Ukiunit hundredenit amerlanerusuni ’inussiaq aalajaatsoq’ kristumiut ilumoortut ajoqersorniarlugit qiimmassarniarlugillu ataatsimeersuaararnernik ataatsimeersuarnernillu aaqqissuussisarsimavoq. Ukiut tamaasa pingasoriarluni taamatut ilusilinnik annertunerusunik ataatsimiinneqartarpoq, ilaatigut ullormi ataatsimi ataatsimeersuarneq ilagiit eqimattakkuutaat peqataaffigisaat. Ukiup ingerlanerani ilagiit eqimattakkuutaat tamarmik immikkut ulluni marlunni ataatsimeersuartarput ataatsimeersuaararnermik taasartakkatsinnik. Taavalu ataatsimeersuarneqartarpoq ilagiit eqimattakkuutaat suli amerlanerusut peqataaffigisaannik. Aamma ukiualuit qaangiunneranni ataatsimeersuarneqartarpoq nunanit tamalaanit peqataaffigineqartunik. Ataatsimeersuarnerit tamakku, Jehovap nalunaajaasuinit nunanit assigiinngitsorpassuarneersunit najuuffigineqartartut, Jehovap innuttaanut uppernikkut nakussatsinnartaqaat. — Naleqqiuguk 5 Moses 16:16.
20. Jehovap Nalunaajaasuisa ataatsimeersuarnerini suna pingaartutut erseqqissarneqartarpa?
20 1922-mi inuit 10.000-it missingi Cedar Pointimi, Ohiomi, USA-miittumi, katersuunneranni peqataasut assut kajumissisinneqarsimapput oqalugiartoq ima oqarmat: „Silarsuarmi piffissami pingaarnerpaami inuuvugut. Takusiuk! Kunngi aqutsivoq! Ilissi taassuma tusarliussisoraasi. Taamaattumik Kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik.“ Oqaluussilluni suliap pingaaruteqarluinnarnera ataatsimeersuarnerni tamakkunani oqalugiaatini erseqqissarneqartarpoq. Assersuutigalugu New Yorkimi 1953-imi ataatsimeersuarnermi nunanit tamalaanit peqataaffigineqartumi nalunaarutigineqarpoq ilagiinni tamani illumiit illumut oqaluussinermik ilinniartitsineq atuutilersinneqassasoq. Tamanna nunat ilarpassuini Naalagaaffimmik oqaluussissutiginninnermut sunniuteqarluarsimaqaaq.
Ajoqersuinissamut Guutimit ajoqersorneqartut
21. Immikkut pisinnaatitaaffik suna peqataaffigerusupparput, sunalu puiussanngilarput?
21 Ajoqersuineq ilumut annertulluinnartoq ullumikkut Jehovap nunarsuarmi suliaraa! Tamatuminnga iluaqutiginnittut tamarmik Guutimit ajoqersorneqarsinnaapput, aap, „ajoqersukkap oqaanik“ pigisaqalersunut ilaasinnaapput. Guutimi ’atuartuusinnaanerput’ immikkut pisinnaatitaaffissuuvoq. Ajoqersorneqarnermilli tamatuminnga siunertaasoq puiunngisaannartigu. Jehovap Jesus ajoqersorsimavaa allanik ajoqersuisinnaaleqqullugu, Jesusillu ajoqersukkani ajoqersorsimavai nammineq suliaminik nangitsisinnaaqqullugit, namminerli suliaminit annertunerujussuarmik. Aamma uagut Jehovap ajoqersuinera annertooq ikiortigalugu ajoqersorneqarpugut allanik ajoqersuinissarput siunertaralugu. — Juánase 6:45; 14:12; 2 Korintumiut 5:20, 21; 6:1; 2 Timûtiuse 2:2.
22. (a) Moses Jeremiasilu sumik ajornartorsiuteqarsimappat, qanorlu aaqqinneqarpa? (b) Sooq qularutiginngissinnaavarput oqaluusilluni suliap naammassineqarnissaa Guutip isumagiumaaraa?
22 Immaqali Mosesitut oqarputit: „Uanga oqallorissuusimanngisaannarpunga,“ imaluunniit Jeremiasitut: „Oqalunnissannut sapiuppunga.“ Taakkuninngali ikiuisimanermisut Jehovap ikiussavaatit. „Uanga qarnit najorumaarpara,“ Mosesimut taama oqarsimavoq. Jeremiasimullu ima oqarsimavoq: „Ersissanngilatit uanga najorakkit.“ (2 Moses 4:10-12; Jeremia 1:6-8) Upperisarsiornikkut siuttut ajoqersukkaminik nipangertitsiniaammata Jesusip ima oqarfigisimavai: ’Uku nipangeraluarpata ujaqqat nillissapput.’ (Lúkarse 19:40) Ujaqqalli nilliasariaqanngillalluunniit, ullumikkummi aamma nillianngillat, Jehovammi Naalagaaffimmik oqaluussissutiginninnermi ajoqersukkat oqai atorpai. (wE 1/8 95)
Akisinnaaviuk?
□ Ilinniartitsisup ilinniartitaatalu attaveqatigiilluarnerat suna Esajas, kapitali 50-imi, eqqartorneqarpa?
□ Ilinniartitsilluni suliaq annertooq suna Jehovap suliaritissimavaa?
□ Jehovamit ajoqersorneqarneq qanoq ingerlanneqarpa?
□ Jehovap ajoqersuineranut peqataaneq sooq immikkut pisinnaatitaaffissuua?
[Qupp. 16-mi assiliartaq]
Meeqqat akissutaat ilumoorussaasut inersimasunut qiimmassaataagajupput