Jehova — Guuti ajoqersuisartoq
’Tamarmik Guutimit ajoqersorneqarsimassapput.’ — JUÁNASE 6:45.
1. Sumi Jesus tupinnartuliorsimava, maannakkullu tamaani sua?
JESUS KRISTUS aatsaannguummat tupinnartuliorsimavoq maannalu naalaffissuarmi Kapernaumimiittumi, Galiliiap tasersuata ungasinngitsuaniittumi, ajoqersuilluni. (Juánase 6:1-21, 59) Inuppassuit upperinngilaat ima oqarmat: ’Qilammit aqqarpunga.’ Ima qatimalupput: ’Tassaannginnerpa Jesus Josefip ernera, angutaa arnaalu ilisimannginnerpavut? Qanormi taava oqarsinnaava: „Qilammit aqqarpunga.“?’ (Juánase 6:38, 42) Jesusilli appisaluuppai oqarluni: ’Uannut pisinnaasoqanngilaq Ataatap aallartitsisima kajungersinngippani; taavalu ullut naggatissaanni makitikkumaarpara.’ — Juánase 6:44.
2. Jesusip toqusunik makititsinissamik neriorsuutaata upperinissaanut sumik tunngavissaqarpa?
2 Neriorsuut nuanningaarami — ullut naggatissaanni Guutip naalagaaffiata aqutsinerani inuunermut makititaaneq! Neriorsuut tamanna upperisinnaavarput Ataatap, Jehova Guutip, tamatuma piviusunngornissaa uppernarsarmagu. (Job 14:13-15; Jesaja 26:19) Jehova, makinnissamik neriuummik uagutsinnik ilinniartitsisimasoq, ’tamanut ajoqersuisut annersaraat’. (Job 36:22, Today’s English Version) Ataatap ilinniartitsinera eqqarsaatigalugu Jesus tulliutillugu ima oqarpoq: ’Pruffiitit allagaanni allassimavoq: „Tamarmillu Guutimit ajoqersorneqarsimassapput.“’ — Juánase 6:45.
3. Apeqqutit suut sukumiinerusumik misissussavavut?
3 Ilumut immikkut pisinnaatitaaffissuuvoq pruffiitip Esajasip eqqartugaanut ukununnga ilaaneq: „Qitornatit tamarmik uannit, [Jehovamit], ajoqersorneqassapput.“ (Jesaja 54:13) Uagut taakkununnga ilaasinnaavugut? Kikkut taassuma qitornaasut ajoqersorneqarsimappat? Ajoqersuutit pingaartut suut paasilugillu maleruartariaqarpavut Jehovamit pilluaqqusaassagutta? Jehovap itsaq innuttani qanoq ajoqersorsimavai, ullumikkullu uagut taakku ajoqersorneqarsimanerattut ittumik ajoqersorneqarpugut? Apeqqutit taakku misissulaariartigik.
Jehova Ataatatut, Ajoqersuisututut Uitullu
4. Jehovap ernerini kina siullersaalluni taassumannga ajoqersorneqarsimava?
4 Jehovap ernituani, Jesus, inuttut inunngunngikkallarmat anersaatut pinngortikkamiuk Ataatanngorlunilu Ajoqersuisunngorpoq. Jesus taaneqarpoq „Oqaaseq“-mik Jehovap oqaaseqartitarimmagu annerpaaq. (Juánase 1:1, 14; 3:16) Oqaaseq ’Ataatamini sulillaqqissuutitaasimavoq’, Ataatamilu ajoqersuineratigut sorpassuarnik ilikkagaqarsimalluni. (Ussatit 8:22, 30) Allanik tamanik, ilaatigut pinngortitanik anersaajusunik ’Gutip ernerinik’ taaneqartunik, pinngortitsinermi ikiortaavoq. Aamma Guutip ernerinut Jehovamit ajoqersorneqarneq assut nuannersuusimassaaq. (Job 1:6; 2:1; 38:7; Kulorsamiut 1:15-17) Kingorna inuk siulleq, Adam, pinngortinneqarpoq. Aamma taanna tassaasimavoq ’Guutip ernera’, Biibilimilu oqaluttuarineqarpoq aamma Jehovamit ajoqersorneqarsimasoq. — Lúkarse 3:38; 1 Moses 2:7, 16, 17.
5. Immikkut pisinnaatitaaffissuaq suna Adamip annaasimava; taamaakkaluartorli kikkut Jehovap ajoqersorpai, sooq?
5 Adamip naalanngitsuliornissani qineramiuk Guutimut ernerujuaannarnissamik immikkut pisinnaatitaaffini alianaraluartumik annaavaa. Taamaattumik kinguaavi inunnguuseralugu Guutimut ernerusutut imminnut taasinnaajunnaarput. Taamaakkaluartorli inuit naammalluinnanngitsut imminit unnersuunneqarusuttut Jehovap ajoqersorpai. Assersuutigalugu Noa ’angutaasimavoq iluartoq Guutip saavani inuusoq’, taamaattumillu Jehovamit ajoqersorneqarluni. (1 Moses 6:9, 13–1 Moses 6:13–7:5) Abrahamip naalannermigut ersersissimavaa tassaalluni „Jehovap ikinngutaa“, taamaattumillu aamma Jehovamit ajoqersorneqarluni. — Jâko 2:23, NV; 1 Moses 12:1-4; 15:1-8; 22:1, 2.
6. Kikkut Jehovap ’ernermisut’ isigai, takkununngalu ajoqersuisutut qanoq pissuseqarpa?
6 Kingunerujussuatigut, tassa Mosesip nalaani, Jehova inuiannut Israelikkunut angeruseq tunngavigalugu attaveqalerpoq. Tamatuma kingunerisaanik Israelikkut tassaalerput Guutip innuttai qinigaasut taassumalu erneratut isigineqalerlutik, Guuti ima oqarmat: „Israel tassa ernera.“ (2 Moses 4:22, 23; 19:3-6; 5 Moses 14:1, 2) Angeruseq tunngavigalugu attaveqarnerup tamatuma kingunerisaanik Israelikkut pruffiitip Esajasip allagaani atuarsinnaasatsitut ima oqarsinnaalersimapput: „Illit ataatagaatsigit, [Jehova].“ (Jesaja 63:16) Jehovap ataatatut akisussaaffini naammassillugu qitornani, Israelikkut, asannilluni ilinniartippai. (Tussiaat 71:17; Jesaja 48:17, 18) Ilumuunngitsuliorfigimmanni naakkinnilluni ilungersorluni ima qinnuigai: „Saanniaritsi ilissi qitornat tunussisimasusi.“ — Jeremia 3:14.
7. Israel Jehovamut qanoq attaveqarsimava?
7 Israelimut angeruseqarfiginninnermi kingunerisaanik Jehova aamma inuiannut taakkununnga uitut ippoq, Israelilu tassaalerluni taassuma assersuutaasumik nulia. Pruffiiti Esajas ima allassimavoq: „Pinngortitsisivit nuliarilerpaatit, aqqa tassa katersaarsuit [Jehovaat].“ (Jesaja 54:5; Jeremia 31:32) Naak Jehovap uiusutut akisussaaffini ataqqinartumik naammassigaluaraa inuiaat Israelikkut taassumunnga nuliaasutut ilumuunngitsuliorput. „Soorlu arnap allanut atortittarnermigut uini ilumuunngitsuliorfigisaraa, taamatut ilissi uannut ilumuunngitsuliorpusi, Israelikkunaa,“ Jehova taama oqarpoq. (Jeremia 3:20) Jehova nuliami ilumuunngitsuliortup ernerinik kajumissaariuarsinnarpoq; taakkununnga ’ajoqersortaajuarsinnarpoq’. — Jesaja 30:20; 2 Israelikkut 36:15.
8. Israel inuiattut ajattorneqarmat kikkut tassaalerpat Jehovap assersuutaasumik nulia anersaakkut ittoq?
8 Israelikkut ernini, Jesus Kristus, ilassiumanngimmassuk toqullugulu Guutip innuttani kiisami ajattorpai. Taava inuiaat juutit Guutip assersuutaasumik nuliariunnarpai, inuiaallu ernerinut naalasseriitsunut Ataataajunnaarlunilu Ajoqersuisuujunnaarpoq. (Matîuse 23:37, 38) Israelili tassaannaasimavoq assersuutaasumik nuliaq. Ilaanni apustilip Paulusip Jesaja 54:1 issuarsimavaa. Tassani eqqartorneqarpoq ’arnaq ernisuitsoq’, tassaanngitsoq ’uilik’, uinikkut Israel. Paulus nassuiaalluni oqarpoq kristumiut tanitaasut tassaasut ’ernisuitsuugallartup’ aamma ’Jerusalemimik tappinngamik’ taasami, qitornai. Assersuutaasumik arnaq anersaakkut ittoq taanna tassaavoq Guutip qilammi peqatigiissortai anersaajusut. — Galâsiamiut 4:26, 27.
9. (a) Jesusip kikkut eqqarsaatigai ima oqarami: ’Qitornatit Guutimit ajoqersorneqarsimassapput’? (b) Suna tunngavigalugu inuit tassaasinnaalerpat Guutip anersaakkut qitornai?
9 Jesusip naalaffimmi Kapernaumimiittumi Esajasip siulittuutaa manna issuaramiuk: „Qitornatit tamarmik uannit, [Jehovamit], ajoqersorneqassapput,“ ’Jerusalemimut tappassumunnga’, Guutip qilammi peqatigiissortaanut taassuma nuliaatut ittumut, ’qitornaalerumaartussat’ pivai. Guutip qilammit aallartitaa, Jesus Kristus, aqqutigalugu ajoqersuineq ilassigunikku juutit tusarnaartut arnamut Guutip pianut qilammiumut, tamanna tikillugu suli ernisuitsuusumut, qitornanngorsinnaapput. ’Inuiannut iluartunut’, ’Israelimut Guutip pigisaanut’ anersaakkut ittumut ilaalersinnaassapput. (1 Pîtruse 2:9, 10; Galâsiamiut 6:16) Jesusip qanoq ililluni inuit ilaasa anersaanngorlutik Guutimut qitornanngorsinnaalernissaannik ajornarunnaarsitsinera Johannesip ima allaatigaa: ’Pigisaminut pigaluarpoq, pigisaasali ilassinngilaat. Ilassisinili tamaasa Guutimut qitornarisinnaanngortippai, tassa aterminut uppertut.’ — Juánase 1:11, 12.
Pingaartut Jehovap uagutsinnut ajoqersuutigisai
10. Edenimi pikitsitsineqarsimatsiaannartoq Jehovap „kinguaassaq“ pillugu suna saqqummiuppaa, kinalu paasinarsiva tassaasoq kinguaassaq taanna?
10 Jehovap Ataatatut asannittutut siunertaminik qitornani oqaluttuuttarpai. Inngilip pikitsitsiumatuup inuit siulliit naalanngitsuliortimmagit ingerlaannaq Jehova nalunaarpoq siunertani naammassiniarlugu nunarsuarlu paratiisinngortinniarlugu qanoq iliussamaarluni. Oqarpoq „pulateriaarsutoqaq“, tassaasoq Satan Diaavulu, „arnarlu“ akerariissikkumaarlugit. Taava nassuiaavoq arnap ’kinguaassaata’ Satanip niaqua aserorterumaaraa, taamaalillugulu suujunnaarsillugu. (1 Moses 3:1-6, 15; sarĸúmersitat 12:9; 20:9, 10) Soorlu paasereeripput arnaq — kingorna ’Jerusalemitut tappinngatut’ eqqaaneqartoq — tassaavoq Guutip qilammi peqatigiissortai pinngortitat anersaajusut. Taassumali „kinguaassaa“ kinaava? Tassaavoq Guutip ernera, Jesus Kristus, qilammit aallartitaasoq Satanimillu suujunnaarsitsisussaq. — Galâsiamiut 4:4; Eprîarit 2:14; 1 Juánase 3:8.
11, 12. Jehovap „kinguaassaq“ pillugu ajoqersuutini pingaartoq qanoq itisilerpaa?
11 ’Kinguaassaq’ pillugu ajoqersuut tamanna Jehovap itisilerpaa Abraham ima neriorsoramiuk: „Kinguaassatit qilaap ulloriaasut sioqqatullu sissamiittutut amerlatigilersissavakka . . . Illillu kinguaassakkut nunarsuarmi inuiaqatigiit tamarmik pilluaqqunarsissapput.“ (1 Moses 22:17, 18) Jehovap apustili Paulus aqqutigalugu nassuiarpaa Jesus Kristus tassaasoq Abrahamip kinguaassaa neriorsuutigisaasoq, aammali allat ’kinguaassamut’ tamatumunnga ilaalerumaartut. Paulus ima allappoq: ’Kristusip pigippasi Abrahamip kinguaaraasi, kingornussisussaavusilu unnersuut naapertorlugu.’ — Galâsiamiut 3:16, 29.
12 Jehova aamma paasititsivoq Kristus, kinguaassaq, kunnginut kinguaariinnut Judakkunnut kinguaajussasoq aammalu ’inuiaat naalassagaat’. (1 Moses 49:10) Jehovap kunngi David Judakkut kinguaavat ima neriorsorsimavaa: „Kunngiusussanik kinguaaqartuassaq, issiavissaarsua atajumaarpoq qilak piutillugu. Kunngiusussanik kinguaaqartuassaaq, issiavissaarsua seqinertut atassaaq.“ (Tussiaat 89:4, 5, 30, 37) Inngilip Gabrielip Jesusip inunngornera nalunaajaatigigamiuk nalunaarpoq meeraq tassaasoq Guutip naalakkatut qinigaa, Davidip kinguaava. ’Taanna angissavoq qutsinnerussaartullu erneranik taaneqassavoq,’ Gabriel oqarpoq, ’Guutillu Jehovap tuniumaarpaa siuaasaata Davidip issiavissaarsuanik; . . . naalagaaffialu soraarfeqassanngilaq.’ — Lúkarse 1:32, 33; Jesaja 9:6, 7; Daniel 7:13, 14.
13. Jehovamit pilluaqqusaassagutta taassuma ajoqersuutaanut qanoq qisuariartariaqarpugut?
13 Jehovap pilluaqqusinera misigisinnaajumallugu Guutip naalagaaffia pillugu ajoqersuut pingaartoq tamanna ilisimasariaqarparput tamannalu naapertorlugu iliuuseqarluta. Upperisariaqarparput Jesus qilammit aqqarsimasoq, tassaasoq Kunngi Guutip qinigaa — tassaasoq kinguaassaq kunngiusoq Paratiisip nunarsuarmi pilerseqqinneqarnissaanik isumaginnittussaq — toqusunillu makititsiumaartoq. (Lúkarse 23:42, 43; Juánase 18:33-37) Jesusip toqusunik makititsinissani Kapernaumimi oqaluuserimmagu juutit qularutiginngittariaqaraluarpaat sallusuissut oqaluutigigaa. Sapaatimmi akunnialuinnanngui tamanna sioqqullugu, immaqa Kapernaumerpiami, naalaffimmik nakkutilliisup pania aqqaneq-marlunnik ukiulik toqusunit makitissimavaa! (Lúkarse 8:49-56) Aamma uagut Naalagaaffik pillugu Jehovap ajoqersuutaata, ajoqersuutip neriuuteqalersitsisup, upperinissaanut tamannalu naapertorlugu iliuuseqarnissatsinnut pissutissaqaqaagut.
14, 15. (a) Jehovap naalagaaffia Jesusip qanoq pingaartitsigaa? (b) Jehovap naalagaaffia pillugu suna paasisariaqarparput nassuiarsinnaasariaqarlugulu?
14 Jesusip nunarsuarmi inuunini Jehovap naalagaaffia pillugu inunnik allanut ilinniartitsinissaminut tunniulluinnarsimavaa. Naalagaaffik tamanna oqaluussinermini qitiutippaa, ajoqersukkanilu Naalagaaffiup tamatuma tikiunnissaanik qinnutiginninnissaannik ilinniartillugit. (Matîuse 6:9, 10; Lúkarse 4:43) Uinikkut juutit ’naalagaaffimmi qitornanngornissaminnut’ periarfissaqarsimagaluarput, amerlanerpaalli uppissuseqannginnertik pissutigalugu immikkut pisinnaatitaaffik tamanna annaavaat. (Matîuse 8:12; 21:43) Jesusip erseqqissaatigaa ’savarpannguit’ kisimik ’naalagaaffimmi qitornanngornissamik’ immikkut pisinnaatitaaffik tamanna pissagaat. ’Qitornat’ taakku Kristusip qilammi naalagaaffiani kingornusseqataassapput. — Lúkarse 12:32; Matîuse 13:38; Rûmamiut 8:14-17; Jâko 2:5.
15 Qassit qilaliartinneqassappat Kristus peqatigalugu nunarsuarmut naalakkersuissallutik? Biibili naapertorlugu 144.000-iinnaat. (Juánase 14:2, 3; 2 Timûtiuse 2:12; sarĸúmersitat 5:10; 14:1-3; 20:4) Jesusili aamma oqarpoq aamma ’allanik savaateqarluni’, taakkulu naalagaaffiup tamatuma nunarsuarmi innuttarissavai. Tamaani peqqilluinnassueq nunarsuarmilu paratiisiusumi eqqissineq naassaanngitsoq nuannaarutigisinnaassavaat. (Juánase 10:16; Tussiaat 37:29; sarĸúmersitat 21:3, 4) Naalagaaffik pillugu Jehovap ajoqersuutaata paasinissaa nassuiarsinnaanissaalu pisariaqarput.
16. Jehovap ajoqersuutaata ilaa pingaartoq suna paasisariaqarlugulu iliuuserisariaqarparput?
16 Ajoqersuut pingaartoq Jehovameersoq alla apustilip Paulusip tikkuarpaa, ima oqarluni: ’Guutimit ajoqersorneqarpusi asaqatigeeqqullusi.’ (1 Tásalûníkamiut 4:9) Jehovamit iluarisaassagutta asanninnermik taama ittumik ersersitsisariaqarpugut. ’Guuti asassutaavoq,’ Biibilimi allassimavoq, asanninnermillu ersersitsinikkut maligassiaa ilaartariaqarparput. (1 Juánase 4:8; Evfisumiut 5:1, 2) Ajoraluartumilli inuit amerlanersaat Guutip ajoqersuineratut inoqatiminnik asannittuunngillat. Uagummi? Ajoqersuut Jehovameersoq tamanna maleruarparput?
17. Kia isumaa ilaartariaqarparput?
17 Jehovap ajoqersuutaanik tamanik ilassinnianissarput pingaartorujussuuvoq. Tussiaasiortoq ima allattoq isumaqatiginiartigu: „Ingerlavigeqqusannik ilinniartinnga, [Jehova], aqqutigeqqusannik ajoqersuunnga.“ „Ileqqoreqqusannik ajoqersunnga. Siuneqassusermik ilisimassusermillu tuninnga . . . inassutigisannillu ilinniartinnga.“ (Tussiaat 25:4, 5; 119:12, 66, 108) Tussiaasiortutut misigiguit amerlangaartunut Jehovamit ajoqersorneqartunut ilaalersinnaavutit.
Amerlangaartut ajoqersorneqarput
18. Nalerput pillugu pruffiiti Esajas qanoq siulittuisimava?
18 Pruffiitip Esajasip nalitsinni susoqarnissaa siulittuutigisimavaa: „Ullussani kingullerni qaqqaq [Jehovap] illuata inigisaa aalajaalluni qaqqanit allanit portunerulerumaarpoq . . . inuiaqatigiippassuillu tassunga ingerlaartut oqassapput: ’Qaa, majuarta [Jehovap] qaqqaanut, Jaakup Guutiata illuanukarta; aqqutigeqqusaminik ajoqersussavaatigut.’“ (Jesaja 2:2, 3; Mika 4:2) Kikkunuku Jehovamit ajoqersorneqartut?
19. Jehovamit ajoqersorneqartunut kikkut ullumikkut ilaappat?
19 Qilammi Kristusimut naalakkersueqataasussat kisimik pineqanngillat. Soorlu siusinnerusukkut paasereeripput Jesus oqarpoq ’savarpannguit’ saniatigut aamma ’allanik savaateqarluni’ — Naalagaaffiup nunarsuarmi innuttassaanik. (Juánase 10:16; Lúkarse 12:32) ’Amerlangaartut annikilliornartumi angisuumi’ annattussat savanut allanut taakkununnga ilaapput, Jesusillu aavanut kuisamut uppernermik kingunerisaanik Jehovamut iluarisaasumik attaveqarput. (sarĸúmersitat 7:9, 14) Naak savat allat ’qitornanut’ Jesaja 54:13-imi eqqartorneqartunut ilaanngikkaluarlutik Jehovamit ajoqersorneqarnermik immikkut pisinnaatitaaffik pigaat. Eqqortumik pillutik Guuti ’Ataatamittut’ taasinnaavaat ’naassaanngitsumik Ataataasoq’, Jesus Kristus, aqqutigalugu inuunermik tunimmatik. — Matîuse 6:9; Jesaja 9:6.
Jehova qanoq iliorluni ilinniartitsisartoq
20. Jehova qanoq iliorluni ilinniartitsisarpa?
20 Jehova assigiinngitsorpassuarnik periaaseqarluni ilinniartitsisarpoq. Ilaatigut taamaaliortarpoq pinngortitarsuani, piunerminik ilisimatungaarnerminillu takutitsisoq, aqqutigalugu. (Job 12:7-9; Tussiaat 19:2, 3; Rûmamiut 1:20) Aamma toqqaannartumik ilinniartitsisarpoq, soorlu taamani Jesus inuttut inunngunngikkallarmat anersaajusoq ajoqersoramiuk. Kiisalu pingasoriarluni qilammit toqqaannartumik inunnut nunarsuarmiittunut oqalussimavoq. — Matîuse 3:17; 17:5; Juánase 12:28.
21. Inngili kina ingammik Jehovap oqaaseqartitarisimavaa, qanorlu ililluta nalunngilarput aamma allat oqaaseqartitarisimagai?
21 Jehova aamma qilammit oqaaseqartitani, ilaatigut angajulliliani, ’Oqaaseq’, ikiortigalugu ilinniartitsisimavoq. (Juánase 1:1-3) Jehovap ernini inuk naammalluinnartoq, Adam, Edenip naatsiivianiittoq toqqaannartumik oqaluussinnaasimagaluarpaa, qularnanngitsumilli Jesus inuttut inunngunngikkallarami anersaajusoq aqqutigalugu oqaluffigaa. (1 Moses 2:16, 17) Qularnanngitsumik aamma Jesusiuvoq ’Guutip inngiliatut ingerlaaqatigiit Israelikkut siornatigut’ saqqummersimasoq, taannalu pillugu Jehova ima peqqusisimavoq: ’Taanna naalassavarsi.’ (2 Moses 14:19; 23:20, 21) Aamma ’inngilinut Jehovap katersaarsuinut naalagaatitaq’ Josua nakussatsinniarlugu saqqummersoq qularnanngitsumik tassaavoq Jesus inuttut inunngunngikkallarami anersaajusoq. (Josva 5:14, 15) Jehovap aamma inngilit allat ilinniartitsinermini atortarsimavai, soorlu taamani Inatsisit Mosesimut tunniukkamigit. — 2 Moses 20:1; Galâsiamiut 3:19; Eprîarit 2:2, 3.
22. (a) Kikkut atorlugit Jehova nunarsuarmi ilinniartitsisimava? (b) Ullumikkut ingammik qanoq iliorluni Jehova ajoqersuisarpa?
22 Aammattaaq Jehova Guuti nunarsuarmi sinniisorisani aqqutigalugit ilinniartitsisarpoq. Israelimi angajoqqaat meeqqaminnik ilinniartitsisussaasimapput; pruffiitit, palasit, naalagarsuit, Levikkullu Jehovap inatsisaanik inunnik ilinniartitsisussaasimapput. (5 Moses 11:18-21; 1 Samuel 12:20-25; 2 Israelikkut 17:7-9) Jesus tassaasimavoq Guutip nunarsuarmi oqaaseqartitaa annerpaaq. (Eprîarit 1:1, 2) Jesus akuttunngitsumik oqartarsimavoq Ataataminit ilinniartinneqarsimanermisorluinnaq inuit ilinniartittarlugit, taamaattumillu oqartoqarsinnaasoq tusarnaartini Jehovamit ilinniartinneqartut. (Juánase 7:16; 8:28; 12:49; 14:9, 10) Jehovap oqaatsini allanneqartissimavai, nalitsinnilu annerusutigut allakkat isumassarsiarititani taakku aqqutigalugit ilinniartitsisarpoq. — Rûmamiut 15:4; 2 Timûtiuse 3:16.
23. Apeqqutit suut ilanngutassiap tulliani sammineqassappat?
23 Piffissami pingaaruteqartumi inuuvugut, Biibilimimi neriorsorneqarpugut ’ullussani kingullerni [ullumikkut inuuffigisatsinni] Jehovap aqqutigeqqusaminik ajoqersussagaatigut’. (Jesaja 2:2, 3) Ajoqersuineq tamanna qanoq ingerlanneqarpa? Jehovap ullumikkut ilinniartitsinersuanik iluaqutiginnissinnnaajumalluta, peqataasinnaajumallutalu, qanoq iliortariaqarpugut? Apeqqutit taakku ilanngutassiap tulliani akineqassapput. (wE 1/8 95)
Apeqqutit uteqqiissutissat
□ Jehova qanoq ililluni tassaalersimava Ataataq, Ajoqersuisoq aamma Ui?
□ „Kinguaassaq“ pillugu Jehova qanoq ajoqersuuteqarpa?
□ Ajoqersuut Guutimeersoq pingaartoq suna maleruartariaqarparput?
□ Jehova qanoq iliorluni ajoqersuisarpa?
[Qupp. 10-mi assiliartaq]
Jairusip pania Jesusip toqusunit makitippaa taamaalillunilu makititsinissamik neriorsuutiminut uppernissamut tunngavissiilluni