Jehovap piumasaatut iliornermik ilinniartitaasut
„Ajoqersunnga illit piumasattut ilioqqullunga, Guutigigakkimmi illit. — TUSSIAAT 143:10.
1, 2. (a) Qaqugukkut ajoqersorneqartariaqarpugut, piviusorsiortumillu suna akuerisariaqarparput? (b) Sooq Jehovamit ajoqersorneqarneq taama pingaaruteqartigaa?
INUK uumatilluni iliuuseqarsinnaatillunilu pingaaruteqartunik ilinniarsinnaavoq. Illit taamaaliorsinnaavutit, allallu taamaaliorsinnaapput. Toquguttami? Toqugutta ilinniarsinnaajunnaassaagut. Biibilimi ersarissumik allassimavoq ’toqungasut sunnguamilluunniit ilisimasaqanngitsut’. Sheolimi, toqusut inaanni, ilisimasassaqanngivippoq. (Nalunaajaasup oqaasii 9:5, 10) Taava imaappa ilinniarneq, ilisimasassanik katersuineq, iluaqutaanngitsoq? Sumik ilinniartinneqarnersugut ilisimasavullu qanoq atornerivut apeqqutaavoq.
2 Silamiut ilisimassusianniinnaq ilinniartitaagutta ataavartumik siunissaqarsinnaanngilagut. Qujanartumilli inuit millionilikkuutaat inuiaqatigiinnit tamaneersut Guutip piumasaanik ilinniartinneqarput inuunissamik naassaanngitsumik kinguneqartussamik. Neriuummut tamatumunnga tunngavik tassaavoq Jehovamit, ilisarsinerup inuunartup Pilerfianit, ilinniartitaaneq. — Tussiaat 94:9-12.
3. (a) Sooq oqarsinnaavugut Jesus tassaasoq Guutip ajoqersugaa siulleq? (b) Suna tunngavigalugu qularisariaqanngilarput inuit Jehovamit ajoqersorneqarsinnaasut, qanorlu kinguneqartumik?
3 Guutip ernitua, taassuma ilinniartua siulleq, Ataatami piumasaanik ilinniartinneqarsimavoq. (Ussatit 8:22-30; Juánase 8:28) Kingusinnerusukkut Jesusip eqqaavaa inuppassuit Ataataminit ilinniartinneqarumaartut. Guutimit ilinniartinneqarutta sumik siunissaqarsinnaavugut? Jesus oqarsimavoq: ’Pruffiitit allagaanni allassimavoq: „Tamarmillu Guutimit ajoqersorneqarsimassapput.“ Kikkulluunniit Ataatamit tusarlutik ilinniartut nungullutik ornittarpaannga. . . . Ilumut, ilumut oqarfigaassi: Uannut uppertoq naassaanngitsumik inuussuteqarpoq.’ — Juánase 6:45-47.
4. Inuit millionilikkuutaat Guutimit ajoqersorneqarnerminnit qanoq sunnerneqarsimappat, sumillu siunissaqarsinnaallutik?
4 Jesusip Jesaja 54:13 issuarpaa, allassimaffimmilu tamatumani arnaq assersuutaasoq Guutip pia, Zion qilammiittoq pineqarpoq. Siulittuut tamanna ingammik arnap taassuma ernerinut, Jesus Kristusip ajoqersugaanut anersaamik tanitaasunut, eqquussimavoq. Anersaakkut ernerit taakkua ilaat suli sulipput, nunarsuaq tamakkerlugu ilinniartitsineq siulersorlugu. Tamatuma kingunerisaanik allat millionilikkuutaat ’amerlangaartut’ aamma Jehovamit ilinniartitaanertik iluaqutigaat. Taakku immikkut periarfissaqarumaarput toqunngisaannarlutik ilinniartuarnissaminnut. Qanoq ilillutik? ’Annikilliornartussaq angisooq’ qanilliartortoq anigorsinnaassavaat nunarsuarmilu paratiisiusumi naassaanngitsumik inuusinnaassallutik. — sarĸúmersitat 7:9, 10, 13-17.
Guutip piumasaatut iliorneq pingaarnerutinneqarpoq
5. (a) Ukiumut 1997-imut allassimaffik sunaava? (b) Kristumiut ataatsimiinnerinut najuuttarneq qanoq isumaqarfigisariaqarparput?
5 1997-ip ingerlanerani nunarsuaq tamakkerlugu ilagiinni 80.000-init amerlanerusuni Jehovap nalunaajaasuisa Tussiaat 143:10-mi oqaatsit siulliit eqqaamajuassavaat: „Ajoqersunnga illit piumasattut ilioqqullunga.“ Tamanna tassaassaaq ukiumut 1997-imut allassimaffik. Oqaatsit taakkua Naalagaaffilersaartarfinni allagartarineqartussat eqqaasissavaatigut ataatsimiinnerit Guutimit ajoqersorneqartuarnissatsinnut immikkut periarfissaalluartuusut. Qatanngutivut ilagalugit Ajoqersortitsinnit ajoqersorneqarniarluta ataatsimiigiartarutta tussiaasiortutut misigisinnaavugut, taanna ima oqarsimammat: „Nuannaatsaqaanga oqarfigineqarama: ’Piartorta Jehovap illuanut.’“ — Tussiaat 122:1; Jesaja 30:20.
6. Davidip oqaasii naapertorlugit suna akuerisariaqarparput?
6 Aap, assortuisitta Diaavulup piumasaa imaluunniit inuit naammalluinnanngitsut piumasaat pinnagit Guutip piumasaatut iliornissamik ajoqersorneqarusuppugut. Taamaattumik Daviditut Guuti pallorfigisarput kiffartorfigisarpullu akueraarput: „Guutigigakkimmi illit. Anersaarpit ajunngitsup ingerlatillinga nunamut manissumut ingerlavissalimmullu.“ (Tussiaat 143:10) Inuit peqquserluttut ilagiumanagit David Jehovamik pallorfiginnittut akornanniikkumanerusarpoq. (Tussiaat 26:4-6) Guutip anersaavanit siulersortilluni Davidip ’aqqutaalluartut’ ingerlavigisinnaasimavai. — Tussiaat 17:5; 23:3.
7. Guutip anersaava qanoq kristumiut ilagiissaannut sunniuteqartarpa?
7 Davidip annerup, Jesus Kristusip, apustilit neriorsoqqissaarsimavai anersaap illernartup sunik tamanik ajoqersussagai ajoqersuutiminillu tamanik eqqaasissallugit. (Juánase 14:26) Piinsip ullua aallarnerfigalugu Jehovap oqaatsimini allanneqarsimasumi ’Guutip itissusii’ saqqummersikkiartuaarsimavai. (1 Korintumiut 2:10-13) Taamaaliortarsimavoq tusarliivigisani takussaasoq Jesusip „inussiaq aalajaallunilu silatooq“-mik taasaa aqqutigalugu. ’Inussiaq’ taanna anersaakkut inuussutissaqartitsisarpoq nunarsuaq tamakkerlugu Guutip innuttaasa ilagiissaanni ajoqersuisarnikkut. — Matîuse 24:45-47, (NV).
Ataatsimiinnerni Jehovap piumasaanik ajoqersorneqarneq
8. Napasuliaq Alapernaarsuiffik-mik atuaqqissaaqatigiinnermut peqataasarneq sooq iluaqutaaqaa?
8 Napasuliaq Alapernaarsuiffik-mi ilanngutassiani sapaatit-akunneri tamaasa atuaqqissaaqatigiissutigineqartussani Biibilip najoqqutassiaanik maleruaaneq akuttunngitsumik sammineqartarpoq. Inuunermi isumakuluutit iliuuseqarfigisarneranni tamanna iluaqutaasorujussuuvoq. Ilumoortut anersaakkut ittut itisuut imaluunniit Biibilimi siulittuutit sammineqartarput. Taamatut atuaqqissaartarnitsinni ilikkagaqarsimaqaagut! Nunani amerlasuuni naalagaaffilersaartarfiit ataatsimiinnerni ulikkaartarput. Nunanili allani ataatsimiigiartartut ikilisimapput. Soormitaava? Imaassinnaanerpa ilaasa suliffitsik akornutigilersimagaat ataatsimiinnernut ’asanninnermut ajunngitsuliornermullu kajumissaaqatigiiffiusussaagaluartunut’? Imaluunniit aliikkusersoqatigiinniartarneq tv-millu isiginnaartarneq pissutigalugit ataatsimiinnerit tamaasa najuuffiginnissaat piffissaqarfigiunnaarsimavaat? Eqqaamajuk Eprîarit 10:23-25-mi peqqussut Guutimit isumassarsiarititaasoq. ’Ullussaq qanillilersoq malugileratsigu’ Guutimit ajoqersorneqarniarluta ataatsimiigiartarnerput pingaaruteqarnerujartuinnassannginnerpa?
9. (a) Kiffartornermut tunngasumik ataatsimiinneq aqqutigalugu qanoq kiffartornissatsinnut piginnaanngorsagaalluartarpugut? (b) Nalunaajaasarneq qanoq isumaqarfigisariaqarparput?
9 Akisussaaffitta pingaarnerpaartaasa ilaat tassaavoq Guutip kiffaatut kiffartorneq. Kiffartornermut tunngasumik ataatsimiinnerup siunertaraa sunniuteqarluartumik kiffartornerup ilikkarnissaa. Ilikkarsinnaavavut qanoq ililluta inuit saaffigisinnaallugit, ajunngitsumik qisuariartoqaraangat imaluunniit itigartinneqaraangatta qanoq iliortariaqarnersugut. (Lúkarse 10:1-11) Sapaatit-akunneri tamaasa ataatsimiinnermi tamatumani periaatsit sunniuteqarluartut sammineqartarmata inuit orninnissaannut piareersimanerusarpugut, illumiit illumut angalaaraangatta aammalu aqqusinerni, biilit uninngasarfiini, angallatini, mittarfinni, pisiniarfinni atuarfimmiluunniit oqaluussilluta. Qinnuterput naapertorlugu ’ajoqersunnga illit piumasattut ilioqqullunga,’ periarfissat tamaasa atorusuppavut Naalakkatta peqqussutaatut iliorumalluta: ’Taamattaaq qaamasorsi qaamali inunnut, . . . Ataatarsilu qilammiusoq unnersiutigeqqullugu.’ — Matiuse 5:16.
10. Inuit ’qinngaqqunnanngitsut’ qanoq ikiorsinnaavavut?
10 Ilagiit ataatsimiinnerini aamma ajoqersuganngortitsinermik ilinniartinneqartarpugut. Soqutiginnittoqaraangat atuagassianillu tigusisoqaraangaat pulaaqqiiniartarpugut Biibilimik atuaqqissaaqateqalernissaq siunertaralugu. Taamatuttaaq Jesusip ajoqersugai ’qinngaqqunnanngitsoqaraangat taassumaniittuartartussaasimapput’ ajoqersorniarlugit Jesusip peqqussutaanik tamanik maleruaanissaannik. (Matiuse 10:11; 28:19, 20) Pitsaasunik ikiuutissaqaratta, soorlu atuakkamik Ilisarsineq inuunermut naassaanngitsumut sammisoq-mik, kiffartornitta naammassinissaanut periarfissaqarluarpugut. (2 Timûtiuse 4:5) Sapaatit-akunneri tamaasa kiffartornermut tunngasumik ataatsimiinneq teokratiimillu atuarfik najuuffigigaangakkit siunnersuutit iluaqutaasut eqqaamaniartarniakkit atortarlugillu, taamaalillutimmi Guutimut kiffaasinnaavutit piginnaassusilik, taassuma piumasaatut iliorlutit. — 2 Korintumiut 3:3, 5; 4:1, 2.
11. Ilaasa qanoq takutissimavaat Matîuse 6:33-mi allassimasoq tatigilluinnarlugu?
11 Guutip piumasaraa ’naalagaaffia naapertuilluassuserlu taassuma pia salliutittuaannassagivut’. (Matîuse 6:33) Imminut ima apereriarit: ’Najoqqutassiaq tamanna qanoq ilillunga maleruarsinnaavara suliffiga [aapparmaluunniit suliffia] ataatsimiigiarnissatsinnut akornutaaleraluarpat?’ Anersaakkut inersimasut amerlasuut sulisitsisortik tamanna pillugu oqaloqatigiumassavaat. Pioneerit ilaata sulisitsisuni paasitissimavaa sapaatit-akunneri tamaasa ilagiit ataatsimiinnerinut najuunissaminut periarfissaqartariaqarluni. Sulisitsisup tamanna akuerisimavaa. Paaserusukkamiullu ataatsimiinnerni tamakkunani qanoq pisoqartarnersoq ilaarusussimavoq. Tassani tusarpaa ataatsimeersuarnissamik nalunaarut. Tamatuma kingunerisaanik sulisitsisup pilersaarutigilerpaa ulloq ataaseq ataatsimeersuarnissamut najuussinnaanissani. Tamanna sumik ilinniarfigaajuk?
Angajoqqaanit Guutimik mianerinnittunit Jehovap piumasaanik ajoqersorneqarneq
12. Angajoqqaat kristumiut qanoq iliortariaqarpat naammagittarlutik aalajaallutillu meeqqatik Jehovap piumasaanik ajoqersorniarlugit?
12 Ilagiit ataatsimiinnerisa ataatsimeersuarnerillu saniatigut Guutip piumasaatut iliornissaq aamma allatigut ilinniarneqarsinnaavoq. Angajoqqaat Guutimik mianerinnittut peqquneqarput meeqqatik Jehovamik unnersiutiginninnissaannut piumasaatullu iliornissaannut ajoqersorlugillu perorsassagaat. (Tussiaat 148:12, 13; Ussatit 22:6, 15) Taamaaliussagutta meeqqavut ataatsimiinnernut ilagisariaqarpavut ’tusarsinnaaqqullugit ilikkarsinnaaqqullugillu’, aammalu angerlarsimaffimmi allakkat illernartut tunngavigalugit ajoqersortariaqarpavut. (5 Moses 31:12; 2 Timûtiuse 3:15) Amerlasuut ilaqutariittut aalajangersimasumik Biibilimik atuaqqissaaqatigiittarsimagaluarput, erniinnarli atuaqqissaaqatigiittarnerat akuttunerulertarsimavoq taamaatinneqarluniluunniit. Illit tamanna misigisimaviuk? Isumaqarpit aalajangersimasumik atuaqqissaaqatigiittarnissamik kajumissaarutit naleqqutinngitsuusut imaluunniit ilaqutariittut atukkasi allaanerummata ilissi maleruarsinnaanagit? Qanorluunniit atugaqaraluarussi ilissi angajoqqaat kajumissaarniarpatsigit Vagttårnet-imi 1. aggusti 1995-imoortumi ilanngutassiat „Vor rige åndelige arv“ aamma „Belønningen for udholdenhed“ atuaqqeqqullugit.
13. Ilaqutariit qanoq ilillutik ullormut allassimaffiup misissortarnissaa iluaqutigisinnaavaat?
13 Ilaqutariit kajumissaarneqarput Ullut tamaasa Allakkat misissortakkit atorlugu ullormut allassimaffik sammisaqqullugu. Allassimaffik nassuiaatitaalu atuartassallugit iluaqutaassaaq, pitsaanerussaarli oqaloqatigiissutigigaanni maleruaraannilu. Assersuutigalugu, Evfisumiut 5:15-17-imi allassimasunut tunngatillugu ilaqutariit eqqarsaatigisinnaavaat qanoq ilillutik namminneq atuaqqissaarnissamut, tamakkiisumik kiffartornissamut teokratiimullu atatillugu suliassat allat isumagineqarnissaannut ’piffissarsisinnaanerlutik’. Aap, ullormut allassimaffik oqaloqatigiissutigisarunikku ilaqutariit ’Jehovap peqqusaa sunaasoq sianiginerusinnaassavaat’.
14. 5 Moses 6:6, 7 naapertorlugu angajoqqaat ajoqersuisutut qanoq ittuusariaqarpat, taamaaliussagunillu qanoq iliortariaqarpat?
14 Angajoqqaat eqiasuillutik meeqqatik ajoqersortariaqarpaat. (5 Moses 6:6, 7) Taamaaliussagaannili naveersisarneq peqqusisarnerlu kisimik naammanngillat. Ataataasut anaanaasullu tusarnaartariaqarputtaaq, taamaaliorunimmi aatsaat paasilissavaat suut nassuiartariaqarlugit, suut assersuutigisariaqarlugit imaluunniit uteqqittariaqarlugit. Ilaqutariit ilaanni angajoqqaat ammasumik attaveqatigiinneq siuarsartarpaat meeqqatik kajumissaartaramikkik paasisimanngisaannik isumakuluutigisaannilluunniit apeqquteqartaqqullugit. Taamaalillutik paasisinnaasimavaat ernermik inuusuttuaqqap Jehovap pilerfeqannginnera paasiuminaatsikkaa. Angajoqqaat Napasuliaq Alapernaarsuiffiup Peqatigiiffiata naqitigaani paasissutissat atorlugit takutissinnaasimavaat piffissaq avataarsualu killissaqanngitsutut isusissaanngitsutullu nalinginnaasumik isigineqartut. Tamanna paasisinnaanngisaminut assersuutaalluarmat ernerata akueraa. Taamaattumik meeqqassi apeqqutaasa ersarissumik Biibililu tunngavigalugu akinissaannut piffissaqarniartarniaritsi, taamaalillusi takutissinnaagassiuk Guutip piumasaatut iliornermik ilinniarneq nalerisimaarnartorujussuusinnaasoq. Aammali sunik allanik Guutip innuttai — inuusuttut utoqqaanerusullu — ullumikkut ilinniartinneqartarpat?
Asanninnermik akiuunnermillu ajoqersorneqarpugut
15. Qatanngutigiittut asanninnerput sukkut misilinneqarsinnaava?
15 Jesusip inassutaanut nutaamut naleqqulluartumik ’Guutimit ajoqersorneqarpugut asaqatigeeqqulluta’. (1 Tásalûníkamiut 4:9) Suut tamaasa ajunngitsumik ingerlagaangata misigisinnaavugut qatanngutivut tamaasa asallugit. Taavali isumaqatigiinngissuteqaleraangat imaluunniit kristumioqatitta ilaata oqaaserisaanit iliuuserisaanilluunniit ajuallatsinneqarutta? Tamatumani asanninnerput piviusuunersoq misilinneqassaaq. (Naleqqiuguk 2 Korintumiut 8:8.) Pissutsit taamaattut pillugit Biibilimi qanoq allassimasoqarpa? Ilaatigut allassimavoq sapinngisarput tamaat asanninnermik takutitsiniartaqqulluta. (1 Pîtruse 4:8) Nammineq soqutigisavut pivallaarnagit, kukkunerit pingaaruteqanngitsut ajuallaatigiumanagit eqqunngitsuliorfigisaanernillu naatsorsuutiginnittarnata asanninnitta ajorterpassuarnik matoorisinnaanissaa sulissutigisariaqarparput. (1 Korintumiut 13:5) Nalunngilarput Guutip tamanna piumasarigaa, oqaasiani tamanna ajoqersuutigineqarmat.
16. (a) Akiuunnermik qanoq ittumik kristumiut ajoqersorneqartarpat? (b) Taamaaliornissatsinnut sunik pilersorneqartarpugut?
16 Inuppassuit asanninneq akiuunnermut atassuteqartissagunanngikkaluarpaat, taamaattorli akiuunnermik immikkut ittumik ajoqersorneqartariaqarpugut. Davidip akuerisimavaa Jehovamit ajoqersorneqartariaqarluni ’akersuunnissaminik’, taamani Israelikkut akeraat eqqortumik oqaatigalugu sorsuffigineqartariaqalermata. (1 Samuel 17:45-51; 19:8; 1 Kunngit 5:3; Tussiaat 144:1) Uagummi ullumikkut akiuunnerput? Uagut uinngup piinik sakkoqanngilagut. (2 Korintumiut 10:4) Akiuunnerput anersaakkut ittuuvoq, taamaattumillu anersaakkut ittumik sakkoqartariaqarpugut. (Evfisumiut 6:10-13) Oqaatsini innuttanilu aqqutigalugit Jehovap ajoqersortarpaatigut anersaakkut akiuunnissatsinnut.
17. (a) Tammartinniarluta periaatsit suut Diaavulup atortarpai? (b) Silatuussagutta suut ingalassimasariaqarpavut?
17 Diaavulup salloqittaalluni silarsuarmi ussernartut, tunussisut sallusuissummullu akeraasut allat atortarpai allanut pingaaruteqannginnerusunut sangutinniarluta. (1 Timûtiuse 6:3-5, 11; Títuse 3:9-11) Nalugunanngilaa toqqaannartumik saassukkaluarunisigut tammartinneqarnissarput ilimanarpallaanngitsoq, taamaattumik naakkiutsinniartarpaatigut anersaakkut ittunut naammagittaalliuutissaqartinniartarluta apeqqutissaqartinniartarlutalu pingaaruteqanngitsunik. Sakkutuutut aalapernaarsuilluartutut navianartut taamaattut toqqaannartumik saassussinertulli eqqumaffigiuartariaqarpavut. — 1 Timûtiuse 1:3, 4.
18. Imminuinnaq eqqarsaatigaluni inuujunnaarneq qanoq paasisariaqarpa?
18 Inuit kissaatigisaannik inuiaqatigiillu piumasaannik iliorumanngilagut. Jesusip maligassiaa aqqutigalugu Jehovap ajoqersorsimavaatigut immitsinnut inooqqunata Jesus Kristusilli isumaa malillugu Guutip piumasaanut inooqqulluta. (2 Korintumiut 5:14, 15) Siornatigut immaqa killissaqanngitsumik ileqqorluttumillu inuusimavugut, piffissaq erlinnartoq asiutillugu. Festernerit, imerujooqatigiinnerit kanngunartuliornerillu silarsuup ajortup matuma ilisarnaatigai. Maanna Guutip piumasaatut iliornermik ajoqersorneqaratta qujamasunnginnerpugut silarsuarmit ajortunngorsimasumit immikkooratta? Taamaattumik anersaakkut akiuuttariaqarpugut silamiutut ileqqoqaleqqinnaveersaarluta. — 1 Pîtruse 4:1-3.
Nammineq iluaqutissatsinnut ajoqersorneqarpugut
19. Jehovap piumasaanik ajoqersorneqarlutalu maleruaagutta qanoq iluaqutigissavarput?
19 Paasisariaqarparput Jehovap piumasaatut iliornissaq ilinniassallugu iluaqutaasorujussuusoq. Soorunami sapinngisamik iliuuseqartariaqarpugut ilitsersuutit Taassuma ernera, oqaasia ilagiissaalu aqqutigalugit pisimasavut ilikkarniarlugit maleruarniarlugillu. (Jesaja 48:17, 18; Eprîarit 2:1) Taamaalilluta nakussatsinneqassaagut ulluni makkunani ajornakusoortuni aalajaassinnaanissatsinnut pissutsinillu annikilliornartunit piumaartussanit aniguisinnaanissatsinnut. (Matîuse 7:24-27) Maannakkut allaat Guutimut iluarisaassaagut piumasaatut ilioratta qulakkeersinnaallugulu qinnutivut tusarneqassasut. (Juánase 9:31; 1 Juánase 3:22) Piviusumillu pilluarneq misigissavarput. — Juánase 13:17.
20. 1997-ip ingerlanerani ukiumut allassimaffimmut tunngatillugu suna eqqarsaatigeqqissaartariaqarparput?
20 1997-ip ingerlanerani ukiumut allassimaffik Tussiaat 143:10-meersoq atuassallugu eqqarsaatigissallugulu periarfissaqartassaagut: „Ajoqersunnga illit piumasattut ilioqqullunga.“ Taamaaliortilluta aamma Guutip ajoqersorneqaqqulluta pilersuutai qulaani eqqartorneqartut eqqarsaatigisartigik. Tamakku eqqarsaatigitillugit killinneqartariaqarpugut qinnummut tamatumunnga naapertuuttumik iliornissatsinnut, nalunnginnatsigu ’Guutip peqqusaanik naammassinnittoq naassaanngitsumik atassasoq.’ — 1 Juánase 2:17. (wE 15/12 96)
Qanoq akissavigit?
□ Ullumikkut kikkut Jehovap piumasaatut iliornermik ajoqersorneqartarpat?
□ 1997-ip ingerlanerani Tussiaat 143:10-mit qanoq sunnerneqartariaqarpugut?
□ Qanoq ililluta Jehovap piumasaatut iliornermik ajoqersorneqartarpugut?
□ Angajoqqaat kristumiut meeqqatik ajoqersussagunikkik qanoq iliortariaqarpat?