Nakkaannaqinak!
’Ajunngitsuliorta arajussinata [nakkaannarnata] nalliuppat katersuiumaarattattaaq qasunngikkutta.’ — GALÂSIAMIUT 6:9.
1, 2. (a) Liiveq qanoq piniarsaarinnittarpa? (b) Ingammik kikkut Diaavulup piniarsaarai?
LIIVEQ assigiinngitsunik periaaseqarluni piniarsaarinnittarpoq. Ilaanni itersap imillip eqqaani imaluunniit uumasut aqqusernisa sinaanni qamasarpoq. Atuakkami Portraits in the Wild-imi oqaatigineqarpoq liivip pinerit ilaanni ’pissutsit atorluaannartarai — soorlu siutituup nimeruaartup piaraa sinittoq naammattooruniuk’.
2 Uagut ’akerartorterput, Diaavulu’, apustili Peter allassimavoq, ’liivitut uiannisaartutut angalasarpoq iisassarsiorluni’. (1 Pîtruse 5:8) Satanip piffissakissutsi nalunnginnamiuk inuit Jehovamut kiffartuleqqunagit aatsaat taama annertutigisumik tatisimavai. ’Liivilli uiannisaartup’ taassuma ingammik Jehovap kiffai piniarsaarivai. (sarĸúmersitat 12:12, 17) Piniarsaarinneriaasii uumasut silarsuaanni assingata periaasiinut assingupput. Sukkut?
3, 4. (a) Satanip qanoq periaaseqarluni Jehovap kiffai piniarsaarisarpai? (b) Ullut atukkatta ’ajornartuunerat’ eqqarsaatigalugu qanoq aperisoqarsinnaava?
3 Satan ilaannikkut terlinganeeriniartarpoq — qinuginninneq akerlilersuinerlu atorlugit Jehovamut kiffartorunnaarsinniarluta assuarnaassuserput ajornanngippat aserorniarlugu. (2 Timûtiuse 3:12) Ilaannikkulli liivitut Diaavulup pissutsit atorluarniaannartarpai. Nikallulernissarput qasulernissarpullu utaqqisarpaa, isumakkullu nuanniilliornerput iluatsitaarniartarpaa nakkaannarnissarput anguniarlugu. Ajornannginaartinnaveertali!
4 Inuiaat oqaluttuarisaaneranni piffissami ajornakusoornerpaami inuuvugut. ’Ulluni ajornartuni’ makkunani ilaannikkooriarluta nikallungasinnaasarpugut nanertisimasinnaasarlutaluunniit. (2 Timûtiuse 3:1) Taava qanoq ililluta qasungaaratta Diaavulumut pisariuminarsisoornissarput pinngitsoorsinnaavarput? Aap, qanoq ililluta apustilip Paulusip unnersuussutaa isumassarsiarititaasoq manna maleruarsinnaavarput: ’Ajunngitsuliorta arajussinata [nakkaannarnata] nalliuppat katersuiumaarattattaaq qasunngikkutta’? — Galâsiamiut 6:9.
Allanit pakatsisinneqaraangatta
5. Suna pissutigalugu David qasulluinnalersimava, qanorli iliunngila?
5 Biibilip nalaani Jehovap kiffai allaat aalajaannerpaat ilaannikkut nanertisimasinnaasarsimapput. „Anersaarulunnermit qasuleqaanga,“ tussiaasiortoq David allassimavoq. „Unnuat tamaasa innangaffiga masappara qullinnik, nallaviga masammik pitartillugu. Isikka tappiillipput aliasussutsinnit.“ Sooruna David taamatut misigisoq? „Amerlaqimmata akeqqakka,“ nassuiaavoq. Allat iliuusii ajuallannartut pissutigalugit David aliasungaarami qiasariaqartarsimavoq. Inoqatimili imminut iliuusii pissutigiinnarlugit David Jehovamit avissaanngilaq. — Tussiaat 6:7-10.
6. (a) Allat oqaasiinit iliuusiinillu qanoq sunnerneqarsinnaavugut? (b) Ilaat qanoq ilillutik Diaavulumut pisariuminartunngorsimappat?
6 Taamatuttaaq uagut allat oqaasii iliuusiiluunniit pissutigalugit nikallungallutalu nanertisimasinnaavugut. „Eqqarsariaqqaarnani oqaaserisat panatut kapisisarput,“ Ussatit 12:18-imi allassimavoq. Ingammik eqqarsariaqqaarnani oqaaseqartoq tassaappat kristumiu qatanngut angut arnarluunniit, ’panamik kapitittutut’ misiginarsinnaavoq. Ajuallanneq puttarsisaqarnerlu inuup ileqqorigajuppaa, ingammik inussiarniitsumik naapertuilluanngitsumilluunniit pineqarsimaguni. Immaqa ajuallatsitsisoq oqaluukkusuppiarunnaartarparput; immaqa allaat qiviarnaveersaartarparput. Ilaat puttarsisaqarnertik nikallussutigalugu nakkaannarsimapput kristumiullu ataatsimiinnerinut orniguttarunnaarsimallutik. Ajoraluartumik taamaalillutik ’Diaavulu inissaqartilersimavaat’ taassumunnga pisariuminartinnermikkut. — Evfisumiut 4:27.
7. (a) Pakatsisinneqaraangatta ajuallatsinneqaraangattaluunniit Diaavulumit pisaritinnginnissarput qanoq ililluta pinngitsoorsinnaavarput? (b) Sooq ajuallassimanerput attatiinnartariaqanngilarput?
7 Allat pakatsisikkaangatigut ajuallatsikkaangatigulluunniit qanoq ililluta Diaavulup pilersaarutipiluata tapersernissaa pinngitsoorsinnaavarput? Puttarsisaqarnaveersaartariaqarpugut, tamatumunnga taarsiullugu sapinngisamik piaarnerpaamik eqqisseqatigiinnissaq pissutsillu aaqqinnissaat isumagisariaqarparput. (Evfisumiut 4:26) Kulorsamiut 3:13-imi ima oqaanneqarpugut: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi.’ Isumakkeerfiginninnissaq ingammik naleqquttarpoq ajuallatsitsisimasoq kukkunerminik nassuerutiginnilluni ilumoorluni utoqqatseraangat. (Naleqqiuguk Tussiaat 32:3-5; Ussatit 28:13.) Immaqa iluaqutaassaaq eqqaamagutsigu isumakkeerfiginninneq tassaanngimmat allat eqqunngitsuliaannik isiginninngitsuusaarneq imaluunniit suunngitsutut isiginninneq. Isumakkeerfiginninnermut ilaavoq ajuallassimanermik qaangiutititsineq. Puttarsisaqarneq oqimaatsuuvoq. Puttarsisaqarnerup eqqarsaatit tamaasa sunnersinnaavai, nuannaarnerput peerlugu. Allaat peqqissutsimut sunniuteqarsinnaavoq. Taamaattumik pissutissaqarpat isumakkeerfiginninneq immitsinnut iluaqutaassaaq. Daviditut iliorluta allat oqaasii iliuusiiluunniit pissutigalugit nakkaannanngisaannarta Jehovamillu qimagutinngisaannarluta!
Kukkuluttoraangatta
8. (a) Sooq ilaat ilaannikkut imminnut ajorisarpat? (b) Imminut ajorivallaalerneq nakkaannarnissamut qanoq navianaateqarpa?
8 ’Tamatta qassiinik naakkiuttarpugut,’ Jâko 3:2-mi allassimavoq. Naakkiukkaangatta, imaluunniit kukkugaangatta, ilerasuttarnerput pissusissamisuuginnarpoq. (Tussiaat 38:4-9) Ilerasunneq ingammik sakkortusinnaavoq timikkut sanngiissummik sorsugassaqarutta ilaannikkooriarlutalu nakkartoortarutta.a Kristumiu taamatut misigisaqarsimasoq ima oqaluttuarpoq: „Inoorusukkunnaarsimagaluarpunga, nalugakku isumakkeerfigineqarsinnaanngitsumik ajortuliorsimanerlunga imaluunniit naami. Misigaanga Jehovamut kiffartornissara pisariaaruttoq neriuutissaarutereerunaramami.“ Imminut pisuutinnersuarmit nakkaannaqqajaagutta Diaavulu periarfissaqalersissavarput — tamannalu atorniapallassavaa! (2 Korintumiut 2:5-7, 11) Pisariaqartinneqartoq tassaasinnaavoq imminut pisuutinnerup oqimaaqatigiissumik isiginissaa.
9. Sooq Guutip naakkinnissusia qularinngittariaqarparput?
9 Ajortulioraanni pisuusutut misigineq pissusissamisoorpoq. Ilaasa pisuusutut misiginerat sivisunaarsinnaasarpoq, misigalutik Guutimit naakkinniffigineqarsinnaajunnaarlutik. Biibilimili asannittumik ima neriorsoqqissaarneqarpugut: ’Ajortivut anngiiaatigigutsigik, taanna ilumoorlunilu iluartuuvoq, ajortitsinnik isumakkeerfigaluta iluaatsunillu sunik tamanik piiaaffigaluta.’ (1 Juánase 1:9) Pissutissaqarluarpa isumaqassalluni uagut Guutip taamatut pinavianngikkaatigut? Eqqaamajuk, oqaatsimini Jehova oqarmat ’isumakkeerfiginnittarluni.’. (Tussiaat 86:5; 130:3, 4) Sallusinnaannginnami oqaatsimini neriorsuisimanermisut iliussaaq, uummatikkut peqqissimilluta saaffigigutsinni. — Títuse 1:2.
10. Timikkut sanngiissummik sorsugassaqarneq pillugu Vagttårnet-imi qanganisami qanoq tuppallernartumik uppernarsaaffigineqarpugut?
10 Sanngiissummik akiugaqaruit nakkartoorlutillu taava qanoq iliussavit? Nakkaannaqinak! Nakkartooruit imaattariaqanngilaq siuariaatigereersimasatit tamarmik maangaannartut. Vagttårnet-ip normuani 15. februaari 1954-imoortumi ima asannittumik uppernarsaavigineqarpugut: „Kukkujaqaagut ileqqupilummullu, nalunngisatsinnit itineroqisumik inooriaaserisimasatsinni sorlaqartumut, nakkartoorsinnaasarpugut. . . . Isumatsaqinalli. Isumaqaqinak isumakkeerfigineqarsinnaanngitsumik ajortuliorsimallutit. Taamatorpiarmi Satanip isumaqaqquaatit. Aliasunnerit imminullu ajorinerit imminni uppernarsaataapput killeerussimannginninnut. Maniguuttumik ilungersortumillu Guutimut saaffiginnittarnerit qatsutinngisaannaruk, isumakkeerfigeqqullutit, minguiaqqullutit ikioqqullutillu. Meeqqatut ajornartorsiornermini ataataminut saaffiginnittutut Guuti saaffigisaruk, sanngiissut aalajangersimasoq pillugu qanorluunniit akulikitsigigaluartumik, Jehovallu saammaangaarluni ikiussavaatit ajunngissutsimini pisassarinngisaraluatsinni, ilumooruillu ilerasuutaarutsissavaatit.“
Misigigaangatta naammattumik iliuuseqarnata
11. (a) Naalagaaffimmik oqaluussissutiginninneq qanoq isigisariaqarparput? (b) Oqaluussinermut peqataaneq pillugu isuma suna kristumiut ilaasa ajorusuutigisarpaat?
11 Naalagaaffik pillugu oqaluussineq kristumiup inuuneranut ilaavoq pingaartoq nuannaarnermillu misigititsisartoq. (Tussiaat 40:9) Kristumiulli ilaat oqaluussinermut peqataanerusinnaannginnertik pissutigalugu imminnut ajorisutut misigisarput. Taamatut imminut ajorineq nuannaarnermik arsaarisinnaavoq uniinnartitsisinnaallunilu, isumaqarluni Jehovap suliniutivut naammaginngisaannarai. Misigissutsit akiorneqartut sammeriartigik.
„Piitsuuneq qanoq piffissamik atuinartigisoq nalunngilisiuk?“ qatanngut arnaq uinilu meeqqanik pingasunik pilersugassaqartoq allappoq. „Suna tamaat angullugu ileqqaarniartariaqarpunga. Piffissaq atornikuerniarfimmi atisanik ujarlernermut, akikilliliisunukarnermut namminerluunniit atisanik mersornermut atortariaqarpara. Aamma sapaatip-akunneranut nalunaaquttap-akunnera ataaseq marlulluunniit atorlugit aviisini neqeroorutinik imalinni toqqorlugillu atortakkanni varekuponinik piiaasarpunga. Ilaannikkut piffissama tamakkununngakujuppassuaq atortarnera ilerasuutigilertarpara, eqqarsarlunga piffissaq oqaluussinermut atortariaqaraluarlugu.“
„Isumaqarsimavunga Jehova naammattumik asanagu,“ qatanngut arnaq sisamanik meeralik uppinngitsumillu uilik allappoq. „Taamaattumik Jehovamut kiffartorninni tamaviaarsuataartarpunga, tamatigulli misigisarlunga naammanngitsoq. Tassami imminut naleqartutut ataasinnguamilluunniit misiginngilanga, takorloorsinnaasimanngilaralu Jehovap imminut kiffartorninni naammassisakka naammagilersinnaassagai.“
Kristumiu piffissaq tamaat kiffartortuujunnaartariaqarsimasoq oqarpoq: „Piffissaq tamaat atorlugu Jehovamut kiffartorsinnaajunnaarnerma eqqarsaatiginissaaluunniit sapingajassimavara. Takorloorsinnaanngilarsi qanoq pakatsitigisunga! Kingumut eqqarsaatigigaangakku qianngitsoorsinnaaneq ajorpunga.“
12. Sooq kristumiut ilaat oqaluussinermut peqataanerusinnaannginnertik pillugu imminnut ajorisarpat?
12 Sapinngisamik annertuumik Jehovap kiffartuunnissaanik kissaateqarneq pissusissamisoorluinnarpoq. (Tussiaat 86:12) Soorli ilaat annerusumik iliuuseqarsinnaannginnertik pissutigalugu ilerasuttarpat? Ilaat naleqanngitsutut misigineq, immaqa misigisimasamit nuanniitsumit aallaaveqartoq, pissutigalugu taamaattarput. Allalli Jehovap uagutsinnik ilimasuffiginninnera piviusorsiunngitsumik takorloortaramikku ingasattumik imminnut ajorisarput. „Misigisarsimavunga sapilerluinnalernissara tikillugu ilungersunngikkuma suliniutikka naammannavianngitsut,“ kristumiu arnaq oqaluttuarpoq. Tamatuma kingunerisaanik inornartorujussuarnik imminut piumaffigisarsimavoq — angusinnaanngikkaangamigillu suli imminut ajorinerulertarsimalluni.
13. Jehovap qanoq ilimasuffigaatigut?
13 Jehovap qanoq ilimasuffigaatigut? Naatsumik oqaatigalugu, uummatikkut iluunngarluta, pissutsit atukkavut naapertorlugit, kiffartuutissagitsinni Jehovap naatsorsuutigaa. (Kulorsamiut 3:23) Iliuusererusutavulli pissutsillu piviusut naapertorlugit iliuuserisinnaasavut annertuumik assigiinngissuteqarsinnaapput. Utoqqalineq, peqqiilliorneq, timikkut pissutsit imaluunniit ilaqutariinni pisussaaffeqarneq uagutsinnik killiliisinnaapput. Sapinngisarpulli tamaat iliuuseqarutta qularutigissanngilarput uummatikkut iluunngarluta Jehova kiffartuukkipput — peqqissutsiminnit pissutsinillu atukkaminnit piffissaq tamaat qujanartumik kiffartorsinnaatinneqartunit uummatikkut iluunngarnerunata iluunngannginnerunataluunniit. — Matîuse 13:18-23.
14. Pissutsit piviusut naapertorlugit imminut qanoq ilimasuffigisariaqarnerpit paasiniarnissaanut ikiorneqartariaqaruit qanoq iliorsinnaavit?
14 Qanorli ilillutit paasiniarsinnaaviuk pissutsit piviusut naapertorlugit qanoq imminut ilimasuffigisinnaanerlutit? Kristumioqatit inersimalluartoq tatigisat, immaqa utoqqaanertaq imaluunniit qatanngut arnaq misilittagaqarluartoq, piginnaaninnik, killissarisannik ilaqutariinnilu pisussaaffinnik ilisimannittoq, tamanna pillugu oqaloqatigisinnaavat. (Ussatit 15:22) Eqqaamassavat Guutip isaani inuttut naleqassutsit oqaluussinermi qanoq iliuuseqartiginerit tunngavigalugu nalilerneqarneq ajormat. Jehovap kiffai tamarmik taassumunnga erlinnartuupput. (Haggai 2:7; Malaki 3:16, 17) Oqaluussinermut peqataanerit allat peqataanerannit immaqa minneruvoq, sapinngisannilli naammassisarigukku Jehovap iluaraa, ilerasunnissannullu pissutissaqanngilatit. — Galâsiamiut 6:4.
Piumaffiginninneq angigaangat
15. Ilagiinni utoqqaanertat sutigut annermik piumaffigineqarpat?
15 ’Amerlasuunik tunineqartoq,’ Jesus oqarsimavoq, ’amerlasuunik piniarfigineqassavoq.’ (Lúkarse 12:48) Ilagiinni utoqqaanertatut kiffartortut ’amerlasuunik piniarfigineqarput’, tassa annerusumik piumaffigineqarput. Paulusitut iliorlutik ilagiinnut imminnut pilliutigisarput. (2 Korintumiut 12:15) Oqalugiaatissanik piareersagassaqartarput, paarsisutut pulaaqattaartarput, eqqartuussisutut suliassaqartarput — tamakku tamaasa suliarisarpaat ilaquttatik sumiginnanngikkaluarlugit. (1 Timûtiuse 3:4, 5) Utoqqaanertat ilaat aamma naalagaaffilersaarfiliornermi, napparsimmavimmut atassuteqarnermi ataatsimeersuarnernilu kajumissutsiminnit suleqataanerminni ulapputeqartarput. Angutit imminnut pilliutigalutik tunniusimasut taakku akisussaaffinnit tamakkunannga artorsinneqarlutik qasulertoornissartik qanoq ilillutik pinngitsoorniarsinnaavaat?
16. (a) Jetrop Moses qanoq ikiorsersimavaa? (b) Utoqqaanertaq qanoq pissuseqaruni akisussaaffinnik allanut agguaassiumassava?
16 Moses, angut pilimanianngitsoq maniguuttorlu, allat ajornartorsiutaannik isumaginninnermini imminut artorsimmat sakiata, Jetrop, aaqqiissutissamik siunnersuuteqarfigaa: akisussaaffiup ilaa angutinut piginnaassuseqartunut allanut agguaatissagaa. (2 Moses 18:17-26; 4 Moses 12:3) „Qanilaartut ilisimassut pigaat,“ Ussatit 11:2-mi allassimavoq. Qanilaassuseq, imalunniit pilimanianngissuseq, isumaqarpoq piginnaasat killeqarnerannik miserratiginninnginneq akuerinninnerlu. Pilimanianngitsoq allanik suliassiinissaminut tunuarsimaarneq ajorpoq, annilaanngatiginerlu ajorpaa suliassanik naleqquttunik angutinut piginnaassuseqartunut agguaassinermigut arlaatigut pissaanermik annaasaqarnissani.b (4 Moses 11:16, 17, 26-29) Akerlianilli, siumukarnissaannik ikiussallugit piumassuseqartarpoq. — 1 Timûtiuse 4:15.
17. (a) Ilagiinni ilaasortaasut qanoq iliorlutik utoqqaanertat nammagaannik oqilisaassinnaavaat? (b) Utoqqaanertat nuliaat qanoq pilliuteqartarpat, qanorlu ililluta takutissinnaavarput pilliutaat taamaattussaannartut isiginngikkivut?
17 Utoqqaanertat nammataat oqilisarniarlugit ilagiinnut ilaasortaasut iliuuseqarsinnaasorujussuupput. Utoqqaanertat isumagisassaminnik ilaqutaqarnerat paasillugu ingasattumik piffissaajarnissaat allat pinaveersaassavaat. Aammalu utoqqaanertat nuliaasa namminissarsioratik uimik piffissaanik ilagiinnik aveqateqartarnermikkut naammagittarlutik pilliutigisartagaannik taamaattussaannartut allat isiginninnaveersaartariaqarput. Anaanaq pingasunik meeralik utoqqaanertamillu uilik oqaluttuarpoq: „Uiga utoqqaanertatut kiffartorsinnaaqqullugu ilaqutariinni saniatigut nammagassaqarnera naammagittaalliutiginngisaannarpara. Nalunngilara uima utoqqaanertatut kiffartornera pissutigalugu Jehova ilaqutariinnik uagutsinnik annertuumik pilluaqqusisoq, piffissarlu nukiillu ilagiinnut atortagai ugguutiginngilakka. Ulapittarmallu ilaannikkooriarlunga naatsiivilerinerusariaqartarpunga meeqqatsinnillu perorsaaneq isumaginerusariaqartarlugu, suliarinerorusutakka tunullinngortillugit.“ Ajoraluartumilli qatanngut arnaq taanna immikkut nammagassaqarnini tamanna pillugu nersualaarneqarnani sooq pioneeriunnginnerminik nuanniitsumik tusangiasaarneqartarsimavoq. (Ussatit 12:18) Allat suliniutaat pillugit nersulaarnissaat iliuuserisinnaanngisaat pillugit isornartorsiornissaannit pitsaaneroqaaq! — Ussatit 16:24; 25:11.
Naggatissaq suli nalliutinngimmat
18, 19. (a) Inuuneq naassaanngitsoq akissarsiassaralugu arpannermi sooq massakkut uniinnarnissamut piffissaanngila? (b) Apustilip Paulusip Jerusalemimi kristumiut piffissaalluartukkut qanoq unnersuuppai?
18 Arpattartup sivisuumik arpareersimalluni nalunngikkaangamiuk apuutiliivilluni, uniinnarneq ajorpoq. Immaqa sapiliivikkaluarpoq — qasusorujussuulluni, kiaguttorujussuulluni imerusuttorujussuullunilu — apuuffissarli taama qanitsigilereerlugu uniinnartanngilaq. Taamatut uagut kristumiutut inuunermik akissarsiassaqarluta arpappugut, apuutiliivippugullu. Arpakkunnaarnissatsinnut massakkut piffissaanngilaq! — Naleqqiuguk Korintumiunut agdlagkat sujugdlît 9:24; Filípimiunut agdlagkat 2:16; 3:13, 14.
19 Ukiuni hundredelinni siullerni kristumiut aamma taamatut atugaqarsimapput. Ukiup 61-ip u.n.k. missaani apustili Paulus Jerusalemimi kristumiunut allassimavoq. Taamanikkut piffissaq sivikillisimavoq — kinguaariit ajortut, juutit tunussisimasut aaqqissuussaanerat, ’nungungajalerput’. Ingammik kristumiut Jerusalemimiittut eqqumasariaqarput aalajaattariaqarlutillu; illoqarfik sakkutoorpassuarnit unguneqartoq takugunikku illoqarfimmit qimaasariaqarput. (Lúkarse 21:20-24, 32) Taamaattumik piffissaalluartukkut Paulus isumassarsisitaalluni ima siunnersuuteqarpoq: ’Qasuleqinasi tarnissigullu nikalloqinasi.’ (Eprîarit 12:3) Apustilip Paulusip oqaatsit erseqqissut tassani atorpai: ’qasulerpoq’ (kamʹnō) aamma ’nikallorpoq’ (e·klyʹo·mai). Biibilimik ilisimasallit ilaat naapertussagaanni oqaatsit griikerisuut taakku „Arestotelesip atorsimavai arpattartunut apuuffissaminnut apuutereerlutik qasuersaartunut aqullaartunullu. [Paulusip allagaanik] atuartut suli arpaqataapput. Uniinnajaarpallaassanngillat. Nakkaannassanngillat qasunermillu aqullaaginnassanatik. Aamma tamatumani annikilliornermi qasusuinnissaq kajumissaarutigineqarpoq.“
20. Sooq Paulusip unnersuussutaa uagutsinnut naleqquppa?
20 Paulusip unnersuussutaa ullumikkut uagutsinnut naleqquteqaaq. Tatineqarnerput annertusiartuinnartillugu ilaannikkut arpattutut qasulluinnartutut aqullaaqqajaasutullu misigisinnaasarpugut. Apuuffissarli taama qanillereertigalugu uniinnanngisaannarta! (2 Israelikkut 29:11) Uniinnarnissarput akerartortitta, ’liivip uiannisaartup’, kissaatigaa. Qujanartumilli Jehovap ’qasusugut nakussatsinniarluta’ iluaqutissatsinnik pilersortarpaatigut. (Jesaja 40:29) Tamakku suunersut qanorlu ililluta atorluarsinnaagivut ilanngutassiap tulliani eqqartorneqassaaq. (wE 1/12 95)
[Quppernerup ataani ilanngussat]
a Assersuutigalugu ilaat pigiliulluinnarsimasaminnik pissuseqarsinnaapput, soorlu kamajalluinnarnermik, imaluunniit imminut inertittarnermik akiorniagaqarsinnaallutik. — Takukkit Vågn op!, 22. maaji 1988-imoortoq, quppernerit 19-21; Awake!, 8. novembari 1981-imoortoq, quppernerit 16-20; aamma Unge spørger — Svar der duer, quppernerit 198-211, Napasuliaq Alapernaarsuiffiup Peqatigiiffiata naqitigai.
b Takuuk ilanngutassiaq „I ældste — uddelegér opgaver!“ Vagttårnet-imi 15. oktobari 1992-imoortumi, quppernerit 20-23.
Qanoq akissavit?
□ Pakatsisinneqaraangatta ajuallatsinneqaraangattaluunniit nakkaannarnissarput qanoq pinngitsoorsinnaavarput?
□ Imminut ajorineq qanoq oqimaaqatigiissumik isigigutsigu nakkaannanngitsoorsinnaavugut?
□ Jehovap qanoq ilimasuffigaatigut?
□ Ilagiinni utoqqaanertat qanoq ilillutik pilimanianngissuseq qasulersuunnginnissaminnut iluaqutigisinnaavaat?
□ Sooq Eprîarit 12:3-mi Paulusip unnersuussutaa ullumikkumut naleqquppa?