Siunissap siumut aalajangeriigaaneranut upperisaqarneq Biibilimi taperserneqarpa?

MAMARLIINERIT! Nikanarsaaneq! Inuiaqatigiinni inuttaasoq isumaqaruni ataqqisaanini tusaamasaaniniluunniit eqqunngitsumik oqallisaanikkut aserorneqartoq, atini minguiartariaqarlugu misigissaaq. Akisussaasullu immaqa eqqartuussisunut tunniukkumassavai.

Fatalisme Guutimik ajugaqanngitsumik nikanarsaataavoq, ajunaarnernummi ajutoornernullu inuannik eqquisunut tamanut Guuti akisussaatinniarneqarpoq. Siunissap siumut aalajangeriigaasumik upperisaqaraanni, takorloortariaqarpoq silarsuarmi kisimi oqartussaasoq ullormut ima ittumik pilersaaruteqassasoq: ’Ullumikkut John aportilluni aqqunarneqassaaq, Fatou malariaqalissaaq, Mamadousip illua silapilummi aserorneqassaaq’! Guuti taamaattoq kiffartuutissallugu kajuminnassava?

’Ajunaarnerit nalaattakkavut Guutip pisuussutiginngippagit, kiap pisuussutigai?’ siunissap siumut aalajangeriigaaneranik upperisaqartut aperisarput. Ousmane, ilanngutassiami siuliani eqqaaneqartoq, aamma taama aperivoq. Akissutaa eqqoriaannartariaqanngilaa ilumoortorluunniit eqqarsaannarnikkut nassaarisariaqanngilaa. Guutip oqaasiani isumassarsiarititaasumi, Biibilimi, ajoqersuut ikiortigalugu, Ousmanep ilinniarpaa Guuti mamarlerneqarnermik tamatuminnga minguiarsimasoq. (2 Timûtiuse 3:16) Biibili qanoq oqaaseqarnersoq takoriartigu.

Kina pisuuva?

Ajunaarnersuarnut soorlu qassutsinernut, anorersuarnut nunallu sajunnerinut Guuti pisuutinniarneqartarpoq. Biibilili naapertorlugu pinngortitami ajunaarnersuarnut taamaattunut Guuti pisuunngilaq. Assersuuteqariarta. Ukiut hundredellit arlallit matuma siorna Kangiani qiterlermi ajunaarnersuaqarsimavoq. Biibilimi oqaluttuarineqarpoq ajunaarnermi tassani annattutuaq ima nalunaaruteqartoq: „Guutip innerata [hebriiarit oqaasiat kallernermik nutserneqarsinnaasoq] qilammit nakkarluni savat paarsisuilu tuffigai ikuallatsillugillu.“ — Job 1:16.

Annattoq taanna annilaarsimaqisoq immaqa isumaqarsimavoq ajunaarnermut Guuti akisussaasoq, taamaannginnerali Biibilip uppernarsarpaa. Job 1:7-12-p atuarneratigut paasineqarsinnaavoq kallerneranut Guuti pisuunngitsoq, akerartortaali, Satan Diaavulu. Naak taanna ajunaarnernut tamanut toqqartumik pisuunngikkaluartoq, ersarippoq Guuti tamakkununnga pisuutissallugu pissutissaqanngitsoq.

Pissutsit ajortumik ingerlaleraangata inuit namminneq pisuugajupput. Atuarfimmi, suliffimmi inuilluunniit atugarisaasigut ingerlanerliortoqaraangat suliakippallaarneq ilinniartitaanikippallaarnerlu, immaqalu allanik soqutigisaqannginneq pisuusinnaapput. Taamatuttaaq nappaatit, ajunaarnerit toqunerillu pikataavallaarnerup kingunerisinnaavai. Assersuutigalugu angallannermi ajutoornermi toqutaanissap aarlerinarnera millerujussuartarpoq qitequt atorneqaraangat. Isumannaallisaaneq tamanna soqutaassanngikkaluarpoq siunissaq siumut aalajangeriigaasaraluarpat. Nakorsartinnerli eqqortoq peqqinnissamullu isumannaallisaatit pitsaasut atorlugit toqujaarpallaartarnerit aamma ikiliserujussuarneqarsinnaapput. Ajunaarnersuit nalinginnaasumik Guutimut pisuutitsissutigineqartartut, inuit Nunarsuarmik paarsinerlunnerisa kinguneranik inuit pisuussutigisarpaat. — Naleqqiuguk sarĸúmersitat 11:18.

’Piffissat nalaatsornerillu’

Ajutoornerit alianartut nassuiarneqarsinnaasumik pissuteqartuaannanngillat. Malugiulli Biibili Nalunaajaasup oqaasii 9:11-mi qanoq oqartoq: „Mannattaarlu nunarsuarmi matumani malugaara: Ullut ajortumeerfissat atugarliornartullu kikkunnulluunniit nalliussinnaapput. Taamaattumik oqilanerpaaq arpaliunnermi ajugaanngitsoorsinnaavoq sapiinnerpaarluunniit sorsunnermi ajugaanngitsoorsinnaalluni. Imaanngilaq ilisimassuseq nerisassamik pissarsissutissatut tamatigut naammattartoq. Silatussuseq pisuunnguutaanngitsoorsinnaavoq pikkorissullu ilaannikkut nersualaarneqanngitsoorsinnaallutik; [piffissarmi nalaatsornikkullu pisut taakkuninnga tamanik attuisarput, NV].“ Pinngortitsisoq ajunaarnernut pisuutissallugu eqqugaasulluunniit arlaatigut pillarniarai upperissallugu pissutissaqanngilaq.

Jesus Kristusip siunissap siumut aalajangeriigaaneranik eqqarsartaaseq eqqunngitsuunerarpaa. Pisimasoq tusarnaartimi nalunngilluagaat uparuariarlugu oqarpoq: ’Isumaqarpisiluunniit arfersaneq-pingasut ikku qaqiffiliap Siloamiitup nakkarfigigai toqullugillu inunnit Jerusalemimiittumut tamanit pillagassaanerummata? Ila naagga.’ (Lúkarse 13:4, 5) Ersarippoq Jesusip nassuiaatiginngikkaa pisut alianartut taamaattut Guutip akuliunneratigut pisut, piffissalli nalaatsornerillu pisuusut.

Naammalluinnanngitsuunerup ajoqutaangaarnera

Nappaatit toqulu pillugit qutsinnerusumik nassuiaatissaqarpa? Aap. Biibilip inuit atugaat ima allaatigaa: ’Adamimi tamarmik toqupput.’ (1 Korintumiut 15:22) Siuaasarput Adam naalanngitsuliormat inuiaat toqup ataaniilerput. Soorlu Guutip Adam ilimasaarsimagaa, kinguaavisa toqu kingornuppaat. (1 Moses 2:17; Rûmamiut 5:12) Tamaattumik nappaatit tamarmik tamatta siuaasatsinnut Adamimut tutsinneqarsinnaapput. Pakatsisarnerit artorsarnerillu inuunitsinni nalaatakkavut, sanngiissutitsinninnut kingornutatsinnut attuumassuteqarput. — Tussiaat 51:7.

Assersuutigalugu, piitsorpassuit siunissap siumut aalajangeriigaaneranik upperisallit atugarliornitik naammagiinnartarpaat. ’Tassa uagutsinnut atugassarititaasut,’ oqartarput. Biibililli takutippaa inuit naammalluinnanngitsuunerat pisuusoq, atugassarititaasut pinnatik. Ilaat piitsunngortarput eqiasunnikkut pigisaminnilluunniit paarinerluinikkut ’siaruartikkatik naapertorlugit katersuileraangamik’. (Galâsiamiut 6:7; Ussatit 6:10, 11) Millionilippassuit piitsuupput inuit piumatuujusut pissaaneqarnerat pissutaalluni. (Naleqqiuguk Jâko 2:6.) ’Inuit ilaat inoqatiminnut ajoqutaasumik pissaaneqarpallaarput,’ Biibilimi allassimavoq. (Nalunaajaasup oqaasii 8:9) Guutip atugassarititaasulluunniit piitsuunermut pisuunersut takussutissaqanngilaq.

Siunissap siumut aalajangeriigaaneranik upperisaqarnerup ajoqutaanera

Siunissap siumut aalajangeriigaaneranik upperisaqannginnisamut pissutissaq alla tassa uppertunut sunniuteqarsinnaanera. Jesus Kristus oqarsimavoq: ’Orpik ajunngitsoq nungullugit ajunngitsunik inerititaqartarpoq, orpilli ajortoq ajortunik inerititaqartarpoq.’ (Matîuse 7:17) Siunissap siumut aalajangeriigaaneranik upperisaqarnerup tamatuma ’inerititaasa’ ilaat qimerlooriartigik, tassa inuit akisussaassuseqarnermik misiginerannut sunniutaa.

Peqqinnartumik akisussaassuseqarnermik misigineq pingaaruteqarpoq. Angajoqqaat qitornamik isumassornissaannut, sulisut suliassaminnik peqqissaartumik sulinissaannut suliffissuillu pitsaasunik sanaartornissaannut kajumissutaasa ilagaat. Siunissalli siumut aalajangeriigaaneranik upperisaqarnerup akisussaasutut misigineq millisissinnaavaa. Assersuutigalugu, eqqarsaatigeriartigu angut biililik aquutaanik ajoqutilimmik. Akisussaassuseqaruni, nammineq ilaasumilu inuunerat pillugu iluarsartissavaa. Siunissalli siumut aalajangeriigaaneranik upperisaliup isumaqartup „Guutip piumasarippagu“ aatsaat ajutoortoqassasoq ulorianarnera soqutigissanngilaa.

Aap, siunissap siumut aalajangeriigaaneranik upperisaqarnerup pissutsit ajortorpassuit siuarsartarpai soorlu makku: pikataaneq, eqiasunneq iliuutsinillu akisussaajumannginneq.

Siunissap siumut aalajangeriigaaneranik upperisaqarneq Guutimut attaveqarniarnermut ajoqutaava?

Siunissap siumut aalajangeriigaaneranik upperisaqarnerup ajoqutiginerpaavaa inuit Guutimut akisussaassuseqanngitsutut misiginissaannik akornusersinnaammagit. (Nalunaajaasup oqaasii 12:13) Tussiaasiortup tamatta ima kajumissaarpaatigut: „Misigisiuk takusiullu [Jehova] avaaginnittuusoq.“ (Tussiaat 34:9) Ajunngissusia ’misigissagutsigu’ Guuti maleruagassaqartitsivoq. — Tussiaat 15:1-5.

Maleruagassat tamakkua ilagaat allamik isumataarneq. (apustilit suliait 3:19; 17:30) Tamanna isumaqarpoq kukkussutivut nassuerutigissagivut pisariaqartunillu allannguilluta. Inuttut naammalluinnanngitsutut isumakkeerfigineqaqqussutigisinnaasavut amerlaqaat. Inuulli upperiguniuk ikiorneqarsinnaanani siunissap siumut aalajangeriigaaneranik eqqugaalluni, allamik isumataarnissaminut kukkussutiminillu akisussaaffimmik tigusinissaminut pisariaqartitsinavianngilaq.

Tussiaasiortoq Guuti pillugu oqarpoq: ’Ilumoorsutsit iluatinnarneruvoq inuunermit.’ (Tussiaat 63:4) Siunissalli siumut aalajangeriigaaneranik ajoqersuutip inuit millionilippassuit isumaqalersissimavai naalliuutit Guutimit pisut. Soorunami amerlasuut taamaattumik Guuti narrujuummerfigisimavaat Pinngortitsisumullu qanittumik attaveqarnaveersaartissimallugit. Ajornartorsiutinut misilinneqarnernullu pisuutinneqartoq qanoq illillugu asaneqarsinnaava? Siunissap siumut aalajangeriigaaneranik upperisaqarneq Guutip inuillu akornanni assiaqutaalersimavoq.

Siunissap siumut aalajangeriigaaneranik upperisaqarnermit qunutitaajunnaarneq

Ousmane, siuliani taaneqartoq, siunissap siumut aalajangeriigaaneranik upperisaqartuusimavoq. Jehovalli nalunaajaasuisa Ousmane ikiorpaat ajoqersuut tamanna Biibili tunuliaqutaralugu misissoqqullugu, siunissallu siumut aalajangeriigaaneranik upperisaqarneq qimassimavaa. Oqiliallassimaqaaq, nutaamillu isumalluarnarnerusumillu inuuneqalersimavoq. Pingaarnerusumilli Jehova Guutitut ’nallittuisutut, saammaasutut, kamajasuunngitsutut, isumassuingaartutut unneqqaringaartutullu’ ilisarilersimavaa. — 2 Moses 34:6.

Ousmanep aamma ilinniarpaa Guuti siunissamut pilersaaruteqartoq — inuunerput aqunngikkaluarlugu.a Pîtrusip agdlagaisa áipait 3:13-imi allassimavoq: ’Unnersuutaali naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’ Jehovap nalunaajaasuisa millionilippassuit ’nunami nutaami’ neriorsuutigisaasumi tassani naassanngitsumik inuunissamik neriugisaqalersissimavaat.

Biibilimik ilisarsineruartortillutit, paasilissavat siunissat tassaanngitsoq siumut alajangeriigaasoq sunniuteqarfigisinnaanngisat. Tamanna Mosesip itsaq Israelikkunnut oqaasiani aamma erserpoq: „Ilissinnut saqqummiuppakka inuussut toqulu, pilluaqqussut perloqqussullu, Inuussut qinerniarsiuk ilissi kinguaassasilu inuuginnaqqullusi! [Jehova] Guutersi asassavarsi naalassallugulu attavigittuinnarlugulu!“ (5 Moses 30:19, 20) Siunissat nammineq qinersinnaavat. Siumut aalajangeriigaanngilaq. (wE 1/9 96)

[Quppernerup ataani ilanngussaq]

[Qupp. 30, 31-mi assiliartat]

Ajunaarnersuit uku Guutip pisuussutiginngilai

[Suminngaanneernerat]

WHO

U.S. Coast Guard photo

UN PHOTO 186208 /M. Grafman