Siunissat siumut aalajangeriigaava?

AJUNAARNERMI aniguisimaguit, ilinnut atugassarititaasunit asattuunneqarlutit misigissavit? Imaluunniit nalaatsornerinnakkut piffissami eqqortumi sumiiffimmi eqqortumiissimanerit qujamasuutigissaviuk?

Salomon silatooq oqarsimavoq: „Mannattaarlu nunarsuarmi matumani malugaara: Ullut ajortumeerfissat atugarliornartullu kikkunnulluunniit nalliussinnaapput. Taamaattumik oqilanerpaaq arpaliunnermi ajugaanngitsoorsinnaavoq sapiinnerpaarluunniit sorsunnermi ajugaanngitsoorsinnaalluni. Imaanngilaq ilisimassuseq nerisassamik pissarsissutissatut tamatigut naammattartoq. Silatussuseq pisuunnguutaanngitsoorsinnaavoq pikkorissullu ilaannikkut nersualaarneqanngitsoorsinnaallutik; taamaattarpormi suut tamarmik periarfissatigut nalaatsornertigullu pisarmata.“ (Nalunaajaasup oqaasii 9:11) Ilimaginngilluinnakkanik pisoqarajuttarpoq! Timersortartoq ajugaassangatilluinnagaq ajutoorsinnaavoq, allalu ajugaalluni. Tassanngaannartumik ajunaarnerup niuertoq peqqusersuitsoq aningaasarsiornerup tungaatigut ajunaartissinnaavaa, unammerlertaa peqquserluttoq iluanaarluartillugu. Salomon isumaqarpa atugassaatitaasunik aalajangeriikkanik tamakku pissuteqartut? Naagga, oqarpoq „periarfissatigut nalaatsornertigullu“ pisartut.

Jesus Kristus tamatumunnga assingusumik oqarpoq. Pisimasoq tusartimi akornanni naluneqanngitsoq uparuaatigalugu, oqarpoq: ’Isumaqarpisiluunniit arfersaneq-pingasut ikku qaqiffiliap Siloamimiittup nakkarfigigai toqullugillu inunnit Jerusalemimiittunit tamanit pillagassaanerummata?’ (Lúkarse 13:4) Jesus isumaqanngilaq pisartut alianartut taamaattut atugassarititaasumik nalunartumik Guutilluunnit piumasaanik pissuteqartut, isumaqanngilarlu eqqorneqartut allanit pillagassaanerusut. Ajunaarneq alianartoq tamanna piffissap nalaatsornerullu sunniuteqarnerannut takussutissaannaavoq.

Ataatsimilluunnit Biibilimi takussutissaqanngilaq ulloq toquffissarput Guutip siumut aalajangereersimagaa. Ilumooraluarpoq Nalunaajaasup oqaasii 3:1, 2-mi allassimasoq: „Qilaap ataani pisartut suut tamarmik aalajangersimasumik piffissaligaapput: Inunngorfissaqarpoq toquffissaqarlunilu, naatitassanik ikkussuiffissaqarpoq ikkussukkanillu nutsuiffissaqarluni.“ Uani Salomonip inuunerup ingerlanera toqulu inunnik naammalluinnangitsunik eqquisartoq eqqartuinnarpai. Inunngortarpugut, piffissarlu nalleraangat, nalinginnaasumik ukiut 70-it 80-illu akornanni inooreeraangatta, toqusarpugut. Toquffissaq eqqorluarlugu Guutimik aalajangerneqarneq ajorpoq, soorlu naasorissaasup qaqugorpiaq ’ikkussuinissani’ imaluunniit ’nutsuiffissani’ siumut aalajangerneq ajorai.

Salomonip takutippaa toqujaarpallaartoqarsinnaasoq: „Aammattaarli guutiitsuussuseq sianiitsuussuserlu ingasaanniassanngilatit; immaqa piffissat sioqqullugu toqujumagavit?“ (Nalunaajaasup oqaasii 7:17) Toquffissaq siumut aalajangeriigaasimappat allangortitassaananilu siunnersuut tamanna siunertaqassava? Taamaalilluni atugassarititaasut siumut aalajangeriigaanerannik eqqarsaat Biibilimi tapersersorneqanngilaq. Guutip Israelikkut tunussisut atugassarititaasut aalajangeriigaanerannik Guutimik nalusut ajoqersuutaannik tamatuminnga ilassinnittut eqqartuussassaatissimavai. Jesaja 65:11-imi allassimavoq: „Ilissiliuna Jehova qimakkissi, ilissi qaqqara illernartoq puiorissi, ilissi nerrivik iluanaarnerup guutianut piareersarissi ilissilu guutimut qanoq atugaqarnissamik aalajangiisartumut viinni akuugaq immitsissutigigissi.“ (NV)

Ila sianiitsorpallassusia ajunaarnerit pisartullu alianartut siumut aalajangeriigaanerat upperissallugu, ajornerusumilluunniit: Guuti pisuutissallugu! ’Guuti asassutaavoq,’ Biibilimi allassimavoq, inuillu ajunaarnerannut pisuutissallugu tunngaviusumut ilumoortumut tamatumunnga akerliulluinnarpoq. — 1 Juánase 4:8.

Guutip siunissamut siunertaa

Taavami annannissamik neriuut? Atugassavut aalajangeriigaanngimmata imaappa inuunerput aqunneqarnani piumasaminik ingerlasoq? Naagga, Guutip inuiaat ataatsimut isigalugit siunissaata qanoq ittuunissaa aalajangersimavaa. Biibilimi ’nunassamik nutaamik iluarsuseqarfissamik’ takkuttoqarnissaa eqqartorneqarpoq. — 2 Pîtruse 3:13.

Guuti inuit atugarisaannut toqqaannartumik akuliutissaaq. Immaqa sianiginagu tamanna qinnutigisarpat, qinnut una qinnutigigaangakku: ’Naalagaaffiit tikiulli; peqqusat qilammisut nunamissaaq pili.’ (Matîuse 6:10) Naalagaaffik tamanna naalakkersuineruvoq piviusoq qilammi pilersinneqareersoq. Tikiunnissaa qinnutigigaangakku, naalagaaffiup tamatuma maannakkut naalakkersuisut taarserlugit nunarsuarmi naalagaassuseqalernissaa qinnutigisarpat. — Daniel 2:44.

Siunissat nammineq qinersinnaavat

Pisussat ilungersunartut tamakku illit siunissannut qanoq sunniuteqarnissaannut atugassarititaasut imaluunniit periarfissat nalaatsornerillu pinnatik kisianni illit qanoq inuunissannik qinersinerit aalajangiisuussaaq. Siloamimi qaqiffiliami ajunaarneq eqqaamajuk. Jesusip ajoqersukkani ilinniartinniarlugit pisimasoq tamanna uparuarpaa. Qaqiffiliaq uppimmat inuit toqusut aniguisinnaasimanngillat. Tamatumunnga akerliusumik Jesusip tusarnaartai Guutimit iluarisaannginnerup kingunerisaanik ajunaarnermik aniguisinnaapput. Jesusip mianersoqquai: ’Allamik isumataanngikkussi tamassi taama nungutinneqarumaarpusi.’ (Lúkarse 13:4, 5) Erserpoq siunissartik namminneq qinersimagaat.

Ullumikkut periarfissarput aamma taamaappoq — annannissarput nammineq sulissutigisinnaavarput. (Filípimiut 2:12) Guutip kissaatigaa ’inuit tamarmik annannissaat sallusuissummillu ilisarsilernissaat’. (1 Timûtiuse 2:4) Tamattalu kingornussatsinnit tunuliaqutarisatsinnillu sunnerneqartaraluarluta, Guutip nammineq piumasamik iliorsinnaassutsimik tunisimavaatigut — nammineerluta aalajangersinnaanngorlugu inuunerput qanoq atussanerlugu. (Matîuse 7:13, 14) Eqqortuliorsinnaavugut eqqunngitsuliorsinnaallutaluunniit. Jehova Guutimut attaveqarlualersinnaavugut inuunermillu angusilluta tunussinnaallugulunniit toqullutalu.

Amerlasuut Guutimut attaveqarnatik inuuneq qinersimavaat. Inuunertik nunap piinik katersinermut, nuannaarniutinut tusaamasanngorniarnermulluunniit atortarpaat. Jesusili mianersoqqusivoq: ’Mianersoritsi piumatuuleqqunasi, peqangaaraluarluni pigisani inuup inuussutigisarinngimmagit.’ (Lúkarse 12:15) Sunami inuussutaasinnaagami? Juánasip agdlagai sujugdlît 2:15-17-mi Biibili nassuiaavoq: ’Silarsuarluunniit silarsuulluunniit pii asaqinasigik. . . . Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat, silarsuarmilli pipput. Silarsuarlu pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’

Inuuneq qineruk

Qanoq ilillutit Guutip peqqusaanik iliornerlutit qulakkeersinnaaviuk? Jesus nalunaarpoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit aallartitallu Jesus Kristus ilisaralugu.’ (Juánase 17:3) Eqqorluartumik ilisimasaqarnerup Biibilimeersup uppernissatsinnut pissutissaqartippaatigut. ’Uppersuseqarnani Guutimut iluaritinneq ajornaqaaq, Guutimut orniguttup upperisassarimmagu tassaasoq, ujarlersinilu akilerumaarai.’ (Eprîarit 11:6) Ilisimassut pisariaqartoq pigilissallugu ajornanngeqaaq. Jehovap nalunaajaasuisa inuit millionilikkuutaat aalajangersimasumik Biibilimik atuaqqissaaqatigisarnerisigut ilisimassummik tamatuminnga ilinniartillugit ikiorsimavaat.a

Guutimit iluarisaassaguvit allannguuteqartariaqarputit. Immaqa ileqqupiloqarputit kanngunartuliornermulluunniit kajumissuseqarputit ajugaaffigisariaqakkannik. Nakkaannaqinak, allannguuteqarnissaq ilinnut ajornavissutut isigeqinagu. Pissutsinik allanngortitsisinnaannginnermik eqqarsaat siunissap siumut aalajangeriigaaneranut ajoqersuummit eqqunngitsumeersuuvoq. Jehovap ikiuineragut inuit tamarmik ’isumamikkut nutaanngorsinnaapput’ aamma ’inuttaaq atisinnaavaat’. (Rûmamiut 12:2; Evfisumiut 4:22-24) Guutip malugissavaa taassumannga iluaritinniarlutit ilungersortutit, piumasaminillu iliortoq pilluaqqussavaa.

Biibilili ilikkarukku imaanngilaq ajornartorsiutitit tamarmik aaqqissasut. Guutimut kiffat ilumoortut inuttulli allatut ajunaarnernik alianangaartunillu nalaanneqartarput. Guutilli ilisimassummik tunisinnaavaatigut atugarliornerput anigorsinnaaqqullugu. (Jâko 1:5) Aammalu Guutimut attaveqarluarneq nuannersuuvoq. „Pilluarpoq [Jehovamik] tunaarinnittoq,“ Ussatit 16:20-mi allassimavoq.

Paratiisimi pilerseqqitami Guutip naalagaaffiata ataaniittumi periarfissat nalaatsornerillu pissutigalugit ajunaarnernik nalaanneqartarunnaassaagut. Inuit pilluarnissaannut killiliisut tamaasa Guutip piiassavai. ’Qulliillu tamaasa [isitsinnit] allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq,’ Biibili neriorsuivoq. (sarĸúmersitat 21:4) Ajunaarnerni toqutaasorpassuit makititaassapput. — Juánase 5:28, 29.

Siunissami nuanningaartumi tamatumani ilaassavit? Israelikkut nunamut neriorsuutigisaasumut isilermata Mosesip oqarfigisimavai: „Ilissinnut saqqummiuppakka inuussut toqulu, pilluaqqussut perloqqussullu. Inuussut qinerniarsiuk ilissi kinguaassasilu inuuginnaqqullusi! [Jehova] Guutersi asassavarsi naalassallugulu attavigittuinnarlugulu! Taava inuuginnassaasi sivisuumillu najugaqassallusi nunami.“ — 5 Moses 30:19, 20.

Aap, siunissamut aalajangeriikkamut naakkittaatsumut allanngorteriarfissaqanngitsumut ikkussaannaanngilatit. Siunissami pilluarnissat, aap naassaanngitsumik siunissat, illit assanniippoq. Inuunermik qinersinissannut kajumissaarpatsigit. (wD 15/10 91)

[Quppernerup ataani ilanngussaq]

[Qupp. 23-mi issuagaq]

Israelikkut tunussisut siunissap siumut aalajangeriigaaneranik Guutimik nalusut upperisaannik ilassinnittut Guutimit pillagassaatinneqarsimapput