Naalliuutit sooq taama amerlatigaat?
„SOOQ inuit ataasiakkaat tamarmillu naalliuutaat taama amiilaarnartigisut atuutitinneqarpat . . .? Inuunerup siunertaqarnera tamaat Guutimut pigitinniarneqartarput taamaakkaluartorli silarsuarmi paasiuminaatsoqaqaaq, naalliuuterpassuit paasiuminaatsut ajortuliornerillu isumaqanngitsut. Taanna Guutiua Nietzschep unnerluutigisaatut ittoq: kisermaassilluni naalagaasoq, sallutooq, peqquserluttoq toqutsisartorlu?“ — On Being a Christian Hans Küngimit
Upperisarsiornermik ilisimasimatuup katuuliusup Hans Küngip apeqqut amerlasuut eqqarsaatigisarsimasaat uani saqqummiuppaa: Sooq Guuti ajugaqanngitsoq asannittorlu naalliuuterpassuarnik atuutititsiva? Taama aperisoqartoq tusarsimaviuk? „Aammik kuisinertut, kiakkernertut qullilinertullu, anniarnertut, aliasunnertut siooranertullu, kiserliornertut toqumillu killeqanngitsutut“ Küngip allaatigisai misiginneqataassuseqarsinnaasut aliatsaatigisarpaat. Oqaluttuarisaanerup ingerlanerani amiilaarnartorpassuit annikilliornartorpassuillu millionilippassuit inuunerannik aserorsaasimapput. — Job 14:1.
’Erloqinartut piunngitsullu’
Sorsunnerup kingunerisaanik naalliunnerit toqqaannartumik eqqugaasut kisimik anniaatigineq ajorpaat, aammali qimagaasut aliasuttut, assersuutigalugu meeqqat eqqugaasut allallu peqqarniiffigineqarsimasut angajoqqaavi ilaqutaalu naalliuuteqarput. „Ukiut qulit kingulliit ingerlaneranni“ røde kors qanittukkut nalunaarpoq, „meeqqat 1,5 millionit sakkulersorluni akiuuttuni toqutaasimapput.“ 1994-imi Rwandami røde kors nalunaarpoq „angutit, arnat meeqqallu hundredetusindilikkuutaat peqqarniitsumik aaqqissuussaasumillu toqorarneqarsimasut.“
Aamma qarsupiinnassanngilagut anniaatit meeqqanik kinguaassiuutitigut atornerluisut pilersitaat. Anaanaq aliasuttoq ernerminik meeqqanik paaqqinnittarfimmi ikiortaasumik atornerlunneqareerluni imminorneraasoq oqaluttuarpoq: „Angutip erninnik atornerluisimasup . . . ernera nukappiaqqallu arlallit aaqqissuulluagaanerpaamik kanngunarnerpaamillu inuunerat aserorsimavai.“ Naakkittaatsumimmi toqutsisup arlalinnilluunniit toqutsisartup, soorlu tuluit nunaanni „ukiuni 25-ni pillarneqaratik tiguaasarsimasut, pinngitsaaliisarsimasut toqutsisarsimasullu“ eqqortagaasa naalliunnerat eqqarsaatigeriaruk. Oqaluttuarisaanermi angutit arnallu imminnut anniartitsisimanerat naalliutsitsisimanerallu killeqarsimanngilaq. — Nalunaajaasup oqaasii 4:1-3.
Tamakkununnga ilanngunneqarsinnaavoq naalliuutit misigissutsikkut timikkullu nappaateqarnermik pissuteqartut asasallu toqujaarpallaarnerat pillugu aliasungaarnermik ilaqutat eqqugaasarnerat. Aammattaaq kaannersuarmik ajunaarnersuarmilluunniit pinngortitamit pissuteqartumik taaneqartunit eqqugaasut naalliunneri ilanngunneqarsinnaapput. Ukiuvut 70-it 80-illuunniit ’ erloqinartutut piunngitsutullu ’ Mosesip taasai ikittuinnaat akerlilerusussagunarpaat. — tugsiaut 90:10.
Guutip siunertaanut ilaava?
Naalliunnerit kipiffeqanngitsut ilaasa oqarnerattut Guutip siunertaanut paasissaanngitsumut ilaappat? Maannakkut naalliuttariaqarpugut ’ inuunermi tullermi ’ inuuneq pingaartissagutsigu? Franskit filosofiata Teilhard de Chardinip upperisaraa, „inuk inuussappat anersaallu piinik pingaartitsissappat naalliunnerit toqutsisut aserorsaasullu inummut pisariaqartut“ ilumoorpa? (La Pensée religieuse du Pére Teilhard de Chardin; uagutsinit uingasunnqortinneqartoq) Naaggaluunniit!
Pinngortitsisoq nallittuisoq piaaraluni avatangiisinik toqunartunik pinngortitsissava kingunerisaanillu inuit annaakkaangamigit misiginneqataanerarluni? Ilimananngilaq! Guuti asannittoq sooq taamaaliussava? Soormi taava naalliuutit atuutitippai? Naalliunnerit atuuttuassappat? Apeqqutit tamakkua ilanngutassiami tullermi sammineqassapput.
[Qupp. 3-mi suminngaanneernera]
WHO-p assiutaa P. Almasymit