Jehovap piumasaatut iliorput
Angajoqqaat uppernerat akilerneqarpoq
ISRAELIKKUNNUT nukappiaqqap inunngornera nuannaarutaangaartarpoq. Kinguaariit ingerlaannarsinnaasarput nunalu kingornuttagaq ilaqutariit pigiinnarsinnaasarpaat. Ukiulli 1593 u.n.s.-ta missaani ernertaarneq perloqqussutitut pilluaqqussutaanngitsutut isikkoqarneruvoq. Sooq? Egyptenimiut Faraoata juutit naalagaaffimminiittut amerliartuinnartut sioorassutigilerlugit nukappiaqqat inunngortut tamarmik toqunneqartassasut naalakkiimmat. — 2 Moses 1:12, 15-22.
Inuiannik toqoraaniarnerup amiilaarnartup tamatuma nalaani Amram Jokebedilu, aappariit Israelikkuusut, inequnartumik ernertaarput. Faraop naalakkiutaa eqqaagaangamikku nuannaarnerat qanoq milliallattarsimassasoq takorlooruminarpoq. Taamaakkaluartoq Amram Jokebedillu ernertik isigisartillugu aalajangiulluinnarpaat qanorluunniit pisoqassagaluarpat sumiginnarumanagu. — 2 Moses 2:1, 2; 6:20.
Uppernikkut iliuuseqarneq
Qaammatini pingasuni Amramip Jokebedillu naalungiarsuutertik isertorpaat. (2 Moses 2:2) Hebræerit Egyptinimiullu najugaqarfii imminnut qanimmata aarlerinartorsiorput. Faraop naalakkiutaanik unioqqutitsisut tamarmik toqumik pillarneqartarput — naalungiarsullu aamma toqutaasarpoq. Angajoqqaalli tunniusimalluartut taakku ernertik imminnullu annaanniarlutik qanoq iliorsinnaappat?
Jokebedip papyrusip naarlaavanik katersivoq. Papyrus tassaavoq ivissuaq ninngusooq, bambusimut assingusoq, kanaartaalu pingasunik saneraqarpoq assap inuaatut silitsigisumik. 6 meteritut portutigilersinnaavoq. Naasoq taanna Egyptenimiut makkununnga sanaarisarpaat: pappiaqqat, allungiartorfiit, tingerlaatit, ateraasat umiatsiallu oqitsut.
Jokebedip kanaartat illerfiusaliarai naalungiarsuutiminut naammattunngorlugu. Taava illerfiusaq qajannaallisarniarlugu ussissarniarlugulu usserummik tanippaa. Jokebedip naalungiarsuk illerfiusamut ikeriarlugu kuup Nilenip sinaani ivissuit akornannut ilivaa. — 2 Moses 2:3.
Naalungiarsuk nassaarineqarpoq
Jokebedip pania, Miriam, eqqaanut pilluni qanoq pisoqarnissaa alapernaarsulerpaa. Faraop pania uffariartorluni Nileniliarpoq.a Jokebedip immaqa nalusimanngilaa kunngip pania Nilenip eqqaanut tamaanngakulasoq piaaralunilu illerfiusaq nassaariuminartunngortillugu inissillugu. Qanorluunniit ittoqaraluarpat Faraop paniata illerfiusaq ivissuit akornanniittoq takujaarpaa kiffaminullu aatillugu. Meeraq iluaniittoq qiasoq takugamiuk nallittuissusia attorneqarpoq. Paasivaa Hebræerit qitornarigaat. Qanorli ililluni meeraq taama inequnartigisoq toqutaatissinnaavaa? Inuttut ajunngissusiata saniatigut Faraop pania Egyptenimiut nalinginnaasumik upperisaannik inuunermi ajunngitsuliorsimanerit qilaliasinnaanermut aalajangiisuunerannik sunneqqatissimasinnaavoq.b — 2 Moses 2:5, 6.
Miriamip, ungasianit alapernaarsuisimasup, Faraop pania saaffigaa. „Hebræerit arnartaasa ilaannik illit meeqqamut milutsitsisussannik aalliullakki-taat?“ aperivoq. Kunngillu pania akivoq: „Qaa, taamaaliorniarit.“ Miriamip arni aavaa. Sivitsunngitsoq Jokebed Faraop paniata saanut pivoq. „Naalungiarsuk una angerlaallugu milutsitariniaruk,“ kunngip paniata oqarfigaa, „akilerumaarpakkit.“ Imaalluarsinnaavoq taamaalinerani Faraop paniata Jokebed naalungiarsuup anaanarigaa paasisimagaa. — 2 Moses 2:7-9.
Jokebedip meeqqap miluernissaata tungaanut tigummivaa.c Tamatuma Guuti ilumoortoq, Jehova, pillugu ajoqersornissaanut pingaartumik periarfissippaa. Taava Jokebedip meeraq Faraop panianukaappaa, taassuma nukappiaraq Mosesimik, isumaqartoq „imermit annaataq“, atserpaa. — 2 Moses 2:10.
Qanoq ilinniarfigisinnaagipput
Amramip Jokebedillu ernertik minguitsumik pallorfiginninnermi najoqqutassianik ilinniartinnissaannut periarfissartik atorluarpaat. Ullumikkut angajoqqaat aamma taamaaliortariaqarput. Ilami taamaaliornissaat pisariaqarpoq. Satan Diaavulu ’liiuvertut uiannisaartutut angalasarmat iisassarsiorluni’. (1 Pîtruse 5:8) Pingaartumik inuusuttut — nukappiaqqat niviarsiaqqallu — Jehovamut kiffaalluartunngorsinnaasut pisariniarsarai. Inuusunneri misiginneqataaffiginngilai. Tassannga isigalugu angajoqqaat silatuut meeqqatit inersimanngitsut Guutimut ilumoortumut, Jehovamut, mianerinnittuunissaannik ilinniartissavaat. — Ussatit 22:6; 2 Timûtiuse 3:14, 15.
Eprîarit 11:23-mi allassimavoq Amram Jokebedillu naalungiarsuutimik inuunerani qaammatit pingasut siulliit isertorniarlugu ilungersuuteqarnerat uppernikkut iliuuseqarnerusoq. Angajoqqaat Guutimik mianerinnittut taakku marluullutik qitornaminnik sumiginnaajumannginnermikkut Jehovap annaassisinnaanera tatigaat tamatumanilu pilluaqquneqarput. Uaguttaaq Jehovap inatsisaanut najoqqutassiaanullu ilumoorluinnaqqissaartariaqarpugut, qanorluunniit nalaataqarnissarput Jehovap akuerigallassagaluarpagu naggataatigut naassaanngitsumik pillualerumaartugut tatigalugu. — Rûmamiut 8:28. (wE 1/5 97)
[Quppernerup ataani ilanngussat]
a Egyptenimiut Nilen kinguaassiorsinnaanerup guutiattut pallorfigisimavaat. Upperisimavaat erngata kinguaassiorsinnaanermik allaallu sivisunerusumik inuusinnaanermik tunisinnaagaatik.
b Egyptenimiut upperisimavaat inuup toqungasup anersaava Osirisimut nalunaajaasariaqartoq soorlu imaattunik: „Kinaluunniit erloqisissimanngilara“, „Meeraq immummik erliguussimanngilara“, „Kaattoq iffiamik tunisimavara imerusuttorlu imermik tunisimallugu“.
c Ullumikkut nalinginnaasumit sivisunerujussuarmik itsaq meeqqat miluttuusarput. Assersuutigalugu Samuel minnerpaamik pingasunik ukioqarluni aatsaat miluersimavoq Isakilu tallimat missaanni ukioqarluni.