Inuttut sanngiissuseq Jehovap pissaaneqassusianik ersarinnerulersitsivoq

„Kikkut tamarmik isumaqarput tassaasunga pioneeri nuannaartuaannartoq. Allammi ajornartorsiutaannik ikiortuaannarpakka. Tamannali ilutigalugu misigaanga ilukkut toqulerlunga. Eqqarsaatit aarleritsannartut ernumassutillu uannut sanngiillinartumik sunniuteqarput. Kisimiinniaannalerpunga. Angerlarsimallunga siniffinni innangaannarusunneruvunga. Qaammatini arlalinni Jehova ilungersorlunga qinnuigisarpara toquteqqullunga.“ — Vanessa.

SOORLU tamatuma takutikkaa Jehovap kiffaasa ’ulluni ajornartuni’ anigorniarneri ajornakusoortuni inuunerup sunniutai ilaannikkut misigisarpaat. (2 Timûtiuse 3:1) Immaqa ilaat nikallorluinnartarput. (Filípimiut 2:25-27) Sivisuumik nikallungassuteqarutta nukissaarussinnaavugut, Biibilimimi allassimavoq: ’Ullormi annikilliorfimmi nukillaangasutut iligavit, nukisit annikillipput.’ (ússatit 24:10) Aap, ernumassuteqaraangatta nukissatsinnik pisariaqartitsisarpugut — immaqa allaat apustilip Paulusip ’pissaanermik angingaartumik’ taasaanik, nukimmik nalinginnaanngitsumik. — 2 Korintumiut 4:7.

Jehova Guutimiippoq nukik killeqanngitsoq. Taassuma pinngortitarsua qimerlooraangatsigu tamanna ersarittarpoq. (Rûmamiut 1:20) Seqineq assersuutigeriartigu. Ukiup ataatsip ingerlanerani nunarsuaq Kwh-nik 1,6 trillionit missaanniittunik seqinermit pilersorneqartuartarpoq. Kisitsilli tamanna seqernup nukissiaata milliardtedeliata affaannaraa. Seqinerlu ulloriarsuarnut allanut naleqqiullugu anginngilaq. Ulloriarsuit tamakku ilagaat Rigel, ulloriarsuaq Orionimiittoq seqinitsinnit 50-eriaammik annerusoq, 150.000-eriaammillu annerusumik nukissiortoq.

Silaannarsuarmi ’nukissiorfissuarnik’ taama ittunik Pinngortitsisoq nammineq ’pissaaneqarsimassaqaaq’. (Jesaja 40:26; Tussiaat 8:4, 5) Pruffiiti Esajas allassimavoq Jehova ’qasussananilu nukillaarneq ajortoq’. Inuttullu sanngiissuseq pissutigalugu qasulersumut kimulluunniit nukissuarmi ilaanik tunisinissaminut Guuti piumassuseqarpoq. (Jesaja 40:28, 29) Tamanna kristumiup apustilip Paulusip misigisimavaa.

Misilinneqarnerit ajugaaffigineqartarput

Paulusip ajornartorsiummik akiukkaminik Korinthimiut oqaluttuussimavai. Tamanna ’qisummik uinimminut kapputtumik’ taavaa. (2 Korintumiut 12:7) ’Qisuk’ tamanna tassaasimasinnaavoq timikkut peqqiilliut, immaqa isigiarsunneq. (Galâsiamiut 4:15; 6:11) Imaassinnaavorluunniit Paulusip pigai apustilioqqusersut allallu apustiliunerminik suliaminillu qularinnittut. (2 Korintumiut 11:5, 6, 12-15; Galâsiamiut 1:6-9; 5:12) Kisianni tassa ’qisuk uinimminut kapputtoq’ taanna suugaluarnersoq Paulusip isumakuluutigisorujussuusimavaa, arlaleriaqalunilu peeqqullugu Guuti qinnuigisarsimallugu. — 2 Korintumiut 12:8.

Jehovalli Paulusip qinnutaa naammassinngilaa, imali oqarfigulu: ’Saammaannera naammagissavat.’ (2 Korintumiut 12:9) Jehovap taamatut oqarnermini suna pivaa? Paulus siornatigut kristumiunik qinuginnittuusimavoq, Jehovallu saammaanneranik ersersitsivigineqarsimanngitsuuguni taassumunnga qinunikkut attaveqalersimanavianngikkaluarpoq — ingammillu apustilitut kiffartulersimanavianngikkaluarluni!a (Naleqqiuguk Sakarja 2:8; sarĸúmersitat 16:5, 6.) Jehovap Paulus oqarfiginiarsimasinnaavaa ajoqersugaanermik immikkut pisinnaatitaaffeqarnini ’naammagissagaa’. Aap, ajornartorsiutit Paulusip inuunermini naapittagai Guutip tupinnartuliornikkut peerniarsimanngilai. Allaammi annerusumik immikkut pisinnaatitaaffeqalernerup kingunerisaanik ajornartorsiortoqalersinnaavoq. (2 Korintumiut 11:24-27; 2 Timûtiuse 3:12) Tassa ’qisuk uinimminut kapputtoq’ Paulusip sutigut tamatigut naammagalugu atuinnartariaqarsimavaa.

Jehovali misigittaatsuunngilaq Paulusilu imminiiginnarnagu. Imali oqarfigaa: ’Pissaanera sanngiitsuni naammatsittarpoq.’ (2 Korintumiut 12:9, NV) Aap, Jehovap asannilluni Paulus nakussatsikkumavaa pissutsit atukkani nikallujuilluni atorsinnaaqqullugit. Taamaattumik Paulusip ’uinimmigut qisummik kappusimasoqarnera’ isigisassiuinikkut ilinniartitsinertut atorneqarpoq. Nammineq pissaanini pinnagu Jehovap pissaaneranik tunaarinninnissani tassuunakkut ilikkarpaa. Paulusillu Jehovamik tunaarinninnissani ilikkarluinnarsimagunarpaa, ukiualuimmi qaangiuttut Filippimiunut ima allappoq: ’Qanoq atugaqaraangama naammagissallugu ilikkarpunga. . . . Tamaasa pissatsitsisikkut sapinngilakka.’ — Filípimiut 4:11, 13.

Illimmi? ’Qisummik uininnut kappusimasumik’ atugaqarpit, immaqa nappaammik imaluunniit inuunermi annertuumik isumakuluuteqarnermik? Taamaappat tuppallersaatissaqarputit. Immaqa ajornartorsiut Jehovap tupinnartuliornikkut peernavianngilaa, Guutilli naalagaaffiata soqutigisai inuuninni salliutittuaatigalugit ajornartorsiutip nikallujuillutit atornissaanut ilisimassuseqartillutillu nukissaqartissinnaavaatit. — Matîuse 6:33.

Nappaat imaluunniit utoqqalinerit pissutigalugu kristumiutut kiffartornermi kissaatigisaraluattut atsigisumik naammassisaqarsinnaajunnaaruit nikallussanngilatit. Atugarliuutivit Jehovamut kiffartorninni akornutitut isiginissaannut taarsiullugu taassuminnga tunaarinninnerulernissap ilinniarnissaanut periarfissatut isigisakkit. Eqqaamajuttaaq kristumiup naleqassusianut aalajangiisuusoq tassaanngimmat naammassisat annertussusiat, tassaallunili uppissusia asanninneratalu itissusia. (Naleqqiuguk Mákorse 12:41-44.) Tarnikkut iluunngarlutit Jehovamik asanninnerit isumaqarpoq sapinngisannik, illit piginnaanerit naapertorlugu — allap piginnaanera naapertornagu — taassumunnga kiffartornerit. — Matîuse 22:37; Galâsiamiut 6:4, 5.

’Qisuk uininnut kappusimasoq’ aliasuutigigukku, assersuutigalugu asasannik toqukkut annaasaqarsimaguit, taava Biibilimi kajumissaarut manna maliguk: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ (Tussiaat 55:23) Kristumiu arnaq Sylviamik atilik taamaaliorsimavoq. Ukiualuinnannguit ingerlaneranni uini ukiuni 50-ini aapparisimasani, kiisalu qanigisani allat qulingiluat, ilaatigut ernuttani mikisut marluk, toqukkut annaasimavai. Sylvia oqarpoq: „Jehovap ikiunngitsuuppanga aliasunnera aqussinnaanavianngikkaluarpara. Qinusarnikkulli tuppallersarneqartaqaanga. Jehovami oqaloqatigiuartarpara. Nalunngilara qaangiinissannut taassuma nakussatsissagaanga.“

Eqqissinaqaaq paasillugu ’Guutip tamanik tuppallersaasup’ aliasuttut nikallorluinnaqqunagit nakussatsissinnaagai! (2 Korintumiut 1:3; 1 Tásalûníkamiut 4:13) Tamanna qujamasuutigigaangatsigu Paulusip tamatumunnga atatillugu oqaasii kingulliit paasisinnaanerulersarpavut. Ima allassimagami: ’Tamanna pillugu sanngiitsaraangama, asissorneqaraangama, ajorsaraangama, qinugineqaraangama, Kristus pissutigalugu qussalasaraangama tuppallersaraanga; sanngiitsaraangamami pissatsittaraanga.’ — 2 Korintumiut 12:10.

Naammalluinnanngissutit naammagalugit atorneqarsinnaapput

Tamatta naammalluinnanngissuseq siuaasatsinnit siullernit kingornussimavarput. (Rûmamiut 5:12) Tamanna pissutigalugu uinitta sanngiitsup kajungerisaanut akiuuttariaqarpugut. Nikallornartaqaaq paasillugu pissuseq ’inutoqqameersoq’ ilimagisaraluatsinnit itinerusumik sorlaqartoq. (Evfisumiut 4:22-24) Pissutsini taama ittuni immaqa apustilitut Paulusitut misigisarpugut, taanna ima allassimagami: ’Guutimmi inatsisai inuutsikkut ilorlikkut nuannarigaluarpakka; kisianni inatsisit allat avatinniittut misigisaraakka eqqarsaatima inatsisaanut akerartortuusut, tigusatullu taakkua kiffartortippaannga ajortip inatsisaanut avatinniittunut.’ — Rûmamiut 7:22, 23.

Aammattaarli tamatumani nukissaq Jehovameersoq atortariaqarparput. Inuttut sanngiissummik ajugaaffiginninniarnitsinni Guutimut qinunikkut saaffiginnittarnerput unitsinngisaannartariaqarparput, ilumoorluta qinnuigalugu isumakkeerfigeqqulluta — qanorluunniit akulikitsigisumik ajornartorsiut aalajangersimasoq pillugu taassumunnga saaffiginnereersimagaluarutta. Jehovap, ’uummatinik misiliisartup’ ilumuussutsivillu itissusianik takunnissinnaasup, saammaannermini ilerasuuteqarunnaarsissavaatit. (Ussatit 21:2) Uinikkut sanngiissutinnut akiuutileqqissinnaaqqullutit Jehovap anersaani illernartoq ikiortigalugu pisariaqartumik nakussatsissinnaavaatit. — Lúkarse 11:13.

Aamma allat naammalluinnanngissutaannit attorneqaraangatta Jehovamit nakussatsinneqarnissarput pisariaqartittarparput. Assersuutigalugu, kristumioqat uagutsinnut ’eqqarsariaqqaarnani panatut kapisisunik oqaaseqarsinnaavoq’. (Ussatit 12:18) Tamanna assut ikilerneqaatigisinnaavarput, ingammik ilimaginngisaraluarput taamatut iliorpat. Assorsuaq tamanna eqqissiunnaarutigisinnaavarput. Ilaasa allaat taamatut ajuallatsinneqarnertik Jehovap peqatigiissortaanit qimagunnissaminnut pissutiginiarsimavaat — annerpaamik kukkullutik!

Oqimaaqatigiissumilli isumaqarutta allat sanngiissutaat eqqortumit isigisinnaassavavut. Inuit naammalluinnanngitsut naammalluinnartuunissaat naatsorsuutigisinnaanngilarput. „Inuit tamarmik ajortuliortarput,“ kunngip silatuup Salomonip taamatut eqqaasippaatigut. (1 Kunngit 8:46) Arthur, kristumiu tanitaq ukiuni 70-ingajanni aalajaalluni Jehovamut kiffartorsimasoq, ima oqarpoq: „Kristumioqatitta naammalluinnanngissutaasa Guutimut assuarnaassutsitta uppernarsarnissaanut periarfissittarpaatigut, taamaalilluni kristumiutut pissuserput misiligarneqartarmat. Inuup oqaasii iliuusiiluunniit Jehovamut kiffartornitsinnut akornutaatikkutsigik, taava inuit kiffartorfigisimassavavut. Naatsorsuutigisariaqarparput aamma qatanngutitta Jehova asagaat. Ajunngitsortaat isiginiarsarinerugutsigik erniinnaq paasissavarput ilimagisaraluatsitut ajortiginngitsut.“

Oqaluussinissamut pissatsinneqarneq

Jesus qilaliannginnermini ajoqersukkaminut ima oqarsimavoq: ’Anersaap illernartup ilissinnut piumaartup pissaanera pigilerumaarparsi, nalunaajaasigiumaarpassilu Jerusalemimi Judæamilu tamarsuarmi Samariamilu nunallu isuanut allaat.’ — apustilit suliait 1:8.

Jesusip oqaasii taakku naapertorlugit suliaq tamanna nunarsuarmi sumi tamaani nunani 233-ni Jehovap nalunaajaasuinit ingerlanneqarpoq. Nalunaaquttap-akunneri katillugit milliardimit ataatsimit amerlanerusut ukiumut atortarpaat inuit allat Jehovamik ilinniartillugit. Suliaq tamanna oqitsuinnaaneq ajorpoq. Nunat ilaanni oqaluussineq inerteqqutaavoq killilersuiffigineqarluniluunniit. Aammattaaq pitsaassaaq eqqarsaatigissallugu kikkut suliamik tamatuminnga ingerlatsisut — tassa inuit naammalluinnanngitsut qajannartut tamarmik akiortariaqakkaminnik ajornartorsiuteqarlutillu isumakuluutillit. Suliarli ingerlajuarsinnarpoq, inuillu millioninit ataatsinit amerlanerusut ukiut pingasut qaangiuttut ingerlaneranni Jehovamut tunniulluinnarsimanerannik tamannalu takutinniarlugu imermi kuisissimanerannik kinguneqarsimavoq. (Matîuse 28:18-20) Guutip pissaaneratigut aatsaat suliaq tamanna suliarineqarsinnaavoq. Pruffiiti Zakarias aqqutigalugu Jehova ima oqarsimavoq: „Inuit pissaaneratigut pinnani inuillu nakuussusiatigut pinnani uanga anersaakkut pissaaq.“ — Sakarja 4:6.

Nutaarsiassamik nuannersumik oqaluussissutiginnittartunut ilaaguit suliamut tamatumunnga annertuumut peqataasimassaatit — suliniutitit qanorluunniit annikippasitsigigaluarpata. Nikallujuillutit atortariaqakkannik ’qisummik uininnut kappusimasoqaraluartoq’ qularinngissinnaavat Jehovap ’sulinerit asanninnerillu aqqa pillugu ileqqorisat puiornavianngikkai’. (Eprîarit 6:10) Taamaattumik pissaanersuup angingaartup Pilerfia annertoqqutigiuaannaruk. Eqqaamajuk uagutsinnik nikallujuissinnaatitsisoq tassaammat nukik Jehovameersoq; taassuma pissaanera sanngiissutitsinni naammalluinnartunngortarpoq. (wE 1/6 97)

[Quppernerup ataani ilanngussaq]

[Qupp. 26-mi assiliartaq]

Oqaluussinermik suliaq Jehovap pissaanerata ikiuineratigut aatsaat ingerlanneqarsinnaavoq