Ullumikkut suli tupinnartuliornikkut ajorunnaartoqartarpa?
„JESUS ilassiuk ajorunnaarlutillu!“ Oqariaatsit taamaattut pissutigalugit Alexandre, ilagiinnut iivangkilistinut ilaasortaasoq, isumaqalersimavoq napparsimalluni nakorsaatitorneq uppernermik amigaateqarnermut ersiutaasoq. Upperivippaa upperuni tupinnartuliornikkut ajorunnaarsinnaalluni. Benedita katuuliulluartoq assut killitsippoq Brasiliap ilaani São Paulomi illernartuummi Aparecida do Nortemi tupinnartuliornikkut ajorunnaarsitsisarnerit tusaramigit. Oqaatsit angakkuarnermut tunngasut ajaminit ilikkakkani atorlugit Beneditap niviarsiaq Maria Aparecidamiu, Antonius ’iluartuutitallu’ allat qinnuigisarpai ajorunnaarsitsisinnaalerumalluni.
Ersarippoq, allaat maanna ukiut 1900-kkut naalerneranni, inuppassuit tupinnartuliornikkut ajorunnaartoqartarnera upperigaat — kisianni sooq? Qularnanngilaq ilaat pakatsisarput asasamik, pingaartumik meeqqamik, nappaataannik, anniaataannik naalliuutaannillu nakorsat iluarsisitsisinnaanngikkaangata. Katsorsarneqarsinnaanngitsumik nappaatillit isumaqarsinnaapput nakorsaatit akisoqimmata tupinnartuliornikkut ajorunnaarniarsarigunik annaasaqarsinnaanatik. Ilaasa tv-mi takusarpaat oqaluffiit upperisarsiortullu ataasiakkaat AIDS-imik, isumatsangaarsimanermik, kræftimik, tarnikkut napparsimanermik, aap naqitsineqarpallaarneranik nappaatinillu amerlasuunik allanik ajorunnaarsitsinissamik neqeroorfiginnittartut. Upperigunikkik upperinngikkaluarunikkilluunniit periarfissatut kingullertut isigalugit misilittarpaat. Allat nappaatertik anersaapilunnik pissuteqarsoralugu isumaqarsinnaapput nakorsaatit nalinginnaat iluaqutigisinnaanagit.
Akerlianik inuit allat akueriumanngilluinnarpaat, allaallu assuaralugu, ’iluartuutitat’ toqusimasut imaluunniit inuusut tupinnartuliornikkut ajorunnaarsitsisinnaanerannik isuma. Atuagassiaq Jornal da Tarde naapertorlugu immunologi (timip nappaatinut akiuussutissaanik ilisimatooq) Dráusio Varella isumaqarpoq „taama upperisaqarnerup inuit isumaatsut aliasuttullu pakatsisittarai“. Ima nangippoq: „Tupinnartuliornissat neriuutigalugit inuppassuit nakorsaatitigut katsorsariaatsit pitsaasut itigartissinnaavaat salloqittaasut taakku pissutigalugit.“ The New Encyclopædia Britannica-mi nassuiarneqarpoq: „Ajorunnaartarnerit ilisimatuussutsimut tunnganngitsut siornatigut sumiiffinnut illernartuutitanut upperisarsiornikkullu ileqqulersuutinut atassuteqartinneqartarput, nakorsaatitigullu ilisimatuut isumaqarajuttarput ajorunnaarsitsinerit taamaattut inuup tarnaanik sunniiniarnerup pissutsini tulluartuni iluatsittutut isikkoqartartup kingunerigai nalinginnaasut.“ Taamaattorli inuppassuit isumaqartarput tupinnartuliornikkut ajorunnaarsimallutik.
Biibilimik atuartartut nalunngilaat Jesus Kristusip arlaleriarluni napparsimasut ’Guutip angingaassusia’ ikiortigalugu ajorunnaarsissimagai. (Lúkarse 9:42, 43) Taamaattumik ima eqqarsartarput: ’Guutip pissaanera suli taama sunniuteqartarpa ullumikkullu tupinnartuliornikkut ajorunnaarsitsisarluni?’ Taamaappat sooq ajorunnaarsitsiniarnerit ilaannikkut iluatsittanngillat? Napparsimasoq naammattumik uppersuseqanngimmat imaluunniit naammattumik tunissuteqarsimanngimmat? Kristumiup naalliunnartumik immaqalu katsorsarneqarsinnaanngitsumik nappaateqaruni tupinnartuliornikkut ajorunnaarsinneqarnissani ujartorsinnaavaa? Aamma tupinnartuliornikkut ajorunnaarsitsinerit Jesusip suliarisimasaatut ittut atuutileqqissappat? Apeqqutit tamakkua pingaaruteqartut akineqarneri allaaserisami tulliuttumi atuarsinnaavatit.