Ilaqutariittut atuaqqissaaqatigiinneq nuannaarnermik nassatalik

’Ilisarsineq atorlugu init ulikkaaleraraat pequtinik erlinnartunik alianaatsunillu tamalaanik,’ Biibilimi allassimavoq. (ússatit 24:4) ’Pequtit erlinnartut’ taakku tassaannaanngillat timikkut pigisat, aammali tassaallutik asanninneq ilumoortoq, Guutimik mianerinninneq uppernerlu nukittooq. Pissutsit tamakku ilaqutariit inuunerannik pisuunngortitseqataalluinnartarput. (Ussatit 15:16, 17; 1 Pîtruse 1:7) Tamakkuli pigilissagunikkik ilaqutariit Guutimik ilisarsinermik pigisaqalertariaqarput.

ILAQUTARIINNI ittuusup akisussaaffigaa ilaquttaminut Guuti pillugu ilisarsineq tamanna pigiliutitinniassallugu. (5 Moses 6:6, 7; Evfisumiut 5:25, 26; 6:4) Pitsaanerpaamik ilaatigut taamaaliorsinnaavoq ilaqutariit aalajangersimasumik atuaqqissaaqatigiisittarneratigut. Atuaqqissaarneq paasisaqarnartumik nuannisarnartumillu ingerlanneqaraangat peqataasunut tamanut iluarusuutaasaqaaq. Taamaattumik ilaqutariittut atuaqqissaarneq kinguneqarluassappat pingaaruteqartut ilaat sammeriartigik.a

Ilaqutariittut atuaqqissaarneq aalajangersimasumik pisartoq kinguneqarluarnerusarpoq. Nalaatsornerinnakkut imaluunniit piumallerlunilu aatsaat atuaqqissaarnissaq eqqaaneqartarpat qularnanngivissumik taamaatiinnarneqartassaaq imaluunniit sukkut tamaanaannaq ingerlanneqartassalluni. Taamaattumik atuaqqissaarnissamut ’piffissamik pisisariaqarpoq’. (Evfisumiut 5:15-17, NV) Piffissamik aalajangersimasumik tamanut iluarinartumik aalajangiiniarneq unamminiarnartuusinnaavoq. „Ilaqutariittut atuaqqissaartarnitta aalajangersimasumik pitinnissaa ajornakusoortissimavarput,“ ilaqutariinnut ittuusoq nassuerpoq. „Piffissani assigiinngitsuni misileraareerluta kiisami naggataatigut piffissamik tamatsinnut iluarinartumik nassaarpugut. Massakkut aalajangersimasumik ilaqutariittut atuaqqissaartarfeqarpugut.“

Piffissamik tamanut iluarinartumik nassaareeraanni akornutaasinnaasut mianersorfigisariaqarput. „Atuaqqissaartilluta pulaartoqaraangat ataatap atuaqqissaarnitta naammassinissaanut utaqqeqqusarpai. Oqarasuaatikkullu sianertoqaraangat oqarfigiinnartarpai kingusinnerusukkut sianerfigissallugit,“ Maria 33-nik ukiulik oqaluttuarpoq.b

Tamannali isumaqanngilaq eqaatsumik periaaseqarnissamut inissaqanngitsoq. Siumut naatsorsuutigisaanngitsunik pisoqarsinnaavoq, immaqalu atuaqqissaarnissap taamaatiinnarnissaa imaluunniit kinguartinnissaa pisariaqalersinnaalluni. (Nalunaajaasup oqaasii 9:11) Tamakkuali aalajangersimasumik atuaqqissaartarnermik kipititsisinnaveersaartariaqarput. — Filípimiut 3:16.

Atuaqqissaarneq qanoq sivisutigisariaqarpa? Robert, panimminik ernerminillu iluatsittumik perorsaasimasoq, ima oqaluttuarpoq: „Atuaqqissaartarnerput nalunaaquttap-akunneranik ataatsimik sivisussuseqarajuppoq. Meeqqat minnerugallarmata nalunaaquttap-akunnerata ingerlanerani allamut saaqqajaannginniassammata assigiinngitsut sammisarpavut, soorlu Napasuliaq Alapernaarsuiffik-mi allaaserisat atuaqqissaassutissat immikkoortui amerlanngitsut, Biibilip ilaanit atuagassianillu allanit tigulaakkat.“ Maria ima eqqaamasaqarpoq: „Angajukkalu marluk mikisuararsuugallaratta atuaqqissaartarnerput minuttit 20-t missaanni sapaatip-akunneranut marloriarluni pingasoriarluniluunniit pisarpoq. Allinerugatta sapaatip-akunneranut ilaqutariittut atuaqqissaartarnerput nalunaaquttap-akunnerata ataatsip missaanik sivisussuseqartarpoq.“

Suna atuaqqissaarneqassava?

Aatsaat atuaqqissaarniarluni katersuunnermi apeqqutip tamatuma aalajangiiffiginiartarnissaa paatsiveerunnermik piffissallu erlinnaqisup maangaannartinneqarneranik kinguneqaannarsinnaavoq. Taamaappat meeqqat atuaqqissaarnissamut aalajangersimasumik qilanaarisassaqarnavianngillat soqutigisaarutissallutillu. Taamaattumik Peqatigiiffiup atuagassiaatai sammisassat siumoortumik aalajangiiffigereerlugit pitsaanerussaaq.

„Inussiaq aalajaallunilu silatooq“ atuagassiarpassuarnik qinerneqarsinnaasunik pilersuisimavoq. (Matîuse 24:45-47, NV) Immaqa atuagaq ilaqutariit suli atuaqqissaarsimanngisaat atorneqarsinnaavoq. Aamma Hjælp til forståelse af Bibelen-imi imaluunniit Insight on the Scriptures-imi tigulaakkanik sammisaqassalluni nuannertarpoq. Assersuutigalugu, eqqaaniaanissap qanilliartornerani allaaserisaq Naalakkap unnukkorsiortitsineranut tunngasoq sammineqarsinnaavoq. Ilaqutariippassuit Napasuliaq Alapernaarsuiffik-mi allaaserisamik atuaqqissaassutissamik sapaatip-akunneranoortumik piareersartarnertik nuannaarutigisarpaat. Aammali atuagassiami tassani allaaserisat allat atuaqqissaaqatigiissutissaqqissuupput. Ilaqutariinni ittuusoq, ilaqutariit anersaakkut pisariaqartitaannik ilisimaarinnittoq, atuagassiat suut atuaqqissaaqatigiissutigineqarnissaannik toqqaasussaqqinnerpaavoq.

„Atuagassiamik siumut toqqarneqareersimasumik atuaqqissaartuaannarpugut,“ Mariap eqqaamavaa. „Atuarfimmulli atatillugu apeqqummik saqqummersoqaraangat arlaannilluunniit pisoqaraangat taava tassunga tunngasunik sammisaqartarpugut.“ Soorlu inuusuttut atuarfimmi ajornartorsiutaat, peeraqarniartarneq, aliikkutassat assigisaallu immikkut sammineqarsinnaapput. Allaaserisat atuagassialluunniit tamakkununnga tunngasut atorneqarsinnaapput. Napasuliaq Alapernaarsuiffik-up Iteritsi!-llu normuani kingullermi paasissutissanik ilaqutariinnut sammitikkusutanik naammattoorsigaanni nangaanani taamaaliortariaqarpoq. Soorunami ilaqutariit siumoorluni allannguinermik tamatuminnga ilisimatittariaqarput. Immikkulli pisariaqartitat sammineqareerpata ingerlaannaq pilersaarutit naapertorlugit atuaqqissaarneq ingerlateqqittariaqarpoq.

Qasukkarsimanartumik pigitsi

Pissutsini eqqissisimasuni ilikkagaqarnarnerusarpoq. (Jâko 3:18) Taamaattumik pissutsit qasukkarsimanartut, taamaattorli ataqqinnippaluttut, atuutitinniarneqartariaqarput. Ilaqutariinnut ittuusoq USA-meersoq ima oqarpoq: „Inimi aneerasaartarfimmiluunniit atuaqqissaaraangatta immitsinnut qaninnerulluta issiasarpugut, inimi angisuumiittuugutta immitsinnut ungasinnerussagaluarluta. Tamatuma immitsinnut qaninnerusumik pissuseqartittarpaatigut.“ Mariap suna nuannarinerpaasarsimallugu ima oqaluttuaraa: „Angajukkalu aalajangiisinnaatitaasarpugut angerlarsimaffitta suatungaani atuaqqissaassanerluta. Tamanna iluarisimaartaqaarput.“ Eqqaamasariaqarpoq naleqquttumik qaammaqquteqarneq, ilorrisimaarnartumik issiaveqarneq aammalu avatangiisit nuannaarpaluttut torersullu pissutsinik eqqissisimanartuutitseqataasarmata. Atuaqqissaareernerullu kingorna ilaqutariit sutoqatigiinnerat unnummik nuannersuutitseqataasarpoq.

Ilaqutariit ilaasa ilaannikkut ilaqutariit allat atuaqqissaarnerminnut ilaatittarpaat, taamaalillutik soqutiginartut akissutillu amerlisarmata. Soqutiginnittullu nutaat atuaqqissaaqatigiinnermut ilaatinneqaraangamik ilaqutariinnut ittuusup misilittagaqarluartup ilaqutariinnik atuaqqissaaqatigiisitsineranik isiginninnertik ilinniarfigisinnaavaat.

Biibili takorlooruminarsaruk

Atuaqqissaarneq meeqqanut uumassuseqarpalaartumik takorlooruminartumillu ingerlanneqartarpat meeqqat atuaqqissaarnissamut qilanaartassaqaat. Soorlu meeqqat mikisut kajumissaarneqarsinnaapput pisunik Biibilimi oqaluttuarineqartunik titartaaqqullugit. Ajornanngikkaangallu Biibilimi pisimasunik isiginnaartitsisinneqarsinnaapput. Meeraaqqat atuaqqissaaqatigineranni pisariaqanngilaq apeqqutit akissutillu sammeqqissaassallugit. Inuit Biibilimi eqqartorneqartut pillugit atuffanneqarnermikkut oqaluttuunneqarnermikkulluunniit Guutip najoqqutassiai pigiliulluarsinnaavaat. Robert, siusinnerusukkut eqqaaneqareersoq, ima oqarpoq: „Ilaannikkut Biibilip ilaanik tulleriiaarluta atuartarpugut, inuit eqqartorneqartut assigiinngitsut tamaasa immikkut ’nipilerlugit’.“ Meeqqat namminneq toqqaasinneqartarput atuakkatsinni inummut kimut ’nipaassanerlutik’.

Nunap immallu assingi ikiortigalugit oqaluttuarineqartut sumiiffii isikkuilu meeqqanut annerumaanut takorlooruminarsarneqarsinnaapput. Isumassarsiulaaginnarnikkummi ilaqutariit atuaqqissaarnerat uummaarissumik assigiiginnaanngitsumillu ingerlanneqarsinnaavoq, meeqqallu Guutip oqaasia kajungerileriartussavaat. — 1 Pîtruse 2:2, 3.

Tamarmik peqataanissaannik ikiorneqassapput

Atuaqqissaarneq meeqqanut nuannersuussappat ilaasutut misigitinneqartariaqarput. Meeqqalli assigiinngitsunik utoqqaassusillit peqataatinniarnissaat unamminiarnartuusinnaavoq. Biibilimili ima najoqqutassaqarpoq: ’Nakkutilliisoq ilungersorluni pigili.’ (Rûmamiut 12:8, NV) Atuaqqissaarnermi aqutsisoq angorniortuuppat iluaqutaasarpoq, angorniorneq tuniluuttarmat.

Ronaldip panini tallimanik ukiulik, Dina, atuaqqissaassutaasumi qulequtaaqqanik atuartittarneratigut assiliartaanillu oqaaseqarfiginnitsittarneratigut peqataatinniartarpaa. Siorna Kristusip toquneranik eqqaaniaanissaq qanilliartortillugu atuakkami Inuk inuit inuusimasut pingaarnerpaartaat-ni assilissat eqqartorneqartunut naleqquttut isiginnaartittarpai.c Ima oqarpoq: „Tamatuma ikiorpaa pisussap pingaaruteqassusianik paasinninnissaanik.“

Panini qulinik ukiulik, Misha, eqqarsaatigalugu Ronald suli allamik iliuuseqarpoq. „Misha siuarsimanerugami assiliartat suuneri kisiisaanngitsoq aammali qanoq isumaqarnerat paasisinnaavaa,“ Ronald oqarpoq. „Taamaattumik atuagaq Åbenbaringen — Det store klimaks er nær! atuaqqissaaratsigu assiliartaasa isumaat sammisarpavut, tamannalu Mishap iluaqutigaa.“

Meeqqat inuusuttuaranngorpata kajumissaarneqassapput atuaqqissaaqatigiissutigineqartumik qanoq ilillutik ulluinnarni iluaqutiginnissinnaanertik oqaluttuareqqullugu. Atuaqqissaarnerup ingerlanerani apeqqutinik pilersoqaraangat misissugassaannik suliassinneqarsinnaapput. Robert taamaaliorsimavoq ernini aqqaneq-marlunnik ukiulik, Paul, atuarfimmi klubbi nutaaq, pinnguaatinik Dungeons and Dragonsinik pinnguarfiusartoq, pillugu apeqquteqarmat. Paul ilaqutaalu Napasuliaq Alapernaarsuiffiup naqitigaataanik ujarliut ikiortigalugu paasissutissanik ujarlerput, tullianilu ilaqutariittut atuaqqissaaleramik sammillugit. Robert ima oqarpoq: „Tamatuma kingunerisaanik Paulip erniinnaq paasivaa pinnguaat taanna kristumiunut naleqqutinngitsoq.“

Robertip ilaquttani allanittaaq suliassittarpai. Nulia, Nancy, ima oqaluttuarpoq: „Jesusip apustilii sammileratsigik tamatta immikkut sapaatip-akunneranut apustili ataaseq pillugu misissugassinneqartarpugut. Meeqqat angornioqalutik paasisimasaminnik saqqummiussisut isigalugit nuannertaqaaq!“ Meeqqat namminneerlutik misissuisarunik paasisatillu ilaquttaminnut oqaluttuarisarunikkik ’Jehova najorlugu alliartussapput’. — 1 Samuel 2:20, 21.

Aperisarneq — isummanik paasiniaalluni apeqqutinilluunniit aqqutissiuisunik — meeqqat peqataatinnissaannut aamma iluaqutaasarpoq. Ajoqersuisorsuaq, Jesus, isummanik paasiniaalluni aperisarsimavoq: ’Qanoq isumaqarpit?’ (Matîuse 17:25) „Arlarput apeqquteqaraangat angajoqqaavut toqqaannartumik akinngisaannarput,“ Maria oqarpoq. „Tamatigut aqqutissiuisunik apersortarpaatigut, eqqarsalersinniarluta.“

Attaveqatigiinneq — avoqqaarinninnerunngitsoq

Ilaqutariit atuaqqissaarneranni nuannaarneq allisarpoq tamarmik illaruaatigineqarnissamik annilaanngateqaratik isummaminnik anitsisinnaagaangata. Kisianni „ilaqutariit atuaqqissaaqatigiinneranni attaveqatigiilluarneq pisinnaavoq aatsaat ulluinnarni attaveqatigiinneq pisarpat,“ ataataasoq oqarpoq. „Taamaallaat atuaqqissaaqatigiinnermi attaveqatigiittoqartariaqanngilaq.“ Aammalu oqaatsit ajuallannartut atornaveersaartariaqarput, soorlu imaattut: ’Tassa? Isumaqarlunga pingaartorujussuarmik oqaasissaqartutit’; ’Taamatut oqartoqarneq ajorpoq’; ’Ilumummi illit! Meeraannaavutimmi.’ (Ussatit 12:18) Meeqqannut misiginneqataasuugit naakkinnittuullutillu. (Tussiaat 103:13; Malaki 3:17) Nuannaarutigikkit, ilikkakkatillu malillugit iliuuseqarniarneranni tapersersukkit. — Ussatit 29:17.

Ilaqutariit atuaqqissaarneranni ’silaannaq’ meeqqap ilinniartikkuminarnissaanut ilasaataasariaqarpoq. „Meeqqat naveerlugit aallartikkaanni akeqqersimaarajuttarput,“ meeqqanik sisamanik iluatsittumik perorsaasimasoq nassuiaavoq. Pissutsit taamaanneranni qularnanngitsumik paasissutissat meeqqanit paasineqarnavianngillat. Taamaattumik atuaqqissaarnermi naveersineq pillaanerlu pinaveersaartittakkit. Naveerneqartariaqarpata pillarneqartariaqarpataluunniit kingusinnerusukkut kisimeeqatigalugit taamaaliortoqarsinnaavoq.

Imminut akilersinnaavoq

Ilaqutariinnik anersaakkut pisuunik ineriartortitsissagaanni piffissaq ilungersornerlu annertuut pisariaqarput. Tussiaasiortorli ima oqarsimavoq: „Ernerit tassaapput [Jehovap] tunissutai, arnap timaata iluani inerittoq tassaavoq taassuma akissarsiarititaa.“ (Tussiaat 127:3) Angajoqqaallu meeqqaminnik ’Jehovamit perorsaanissaminnik inerterisarnissaminnillu’ akisussaaffilerneqarsimapput. (Evfisumiut 6:4) Taamaattumik paasisaqarnartumik nuannersumillu ilaqutariinnik atuaqqissaaqatigiisitsinissamut pikkorissartariaqarpoq. Sapinngisaq tamaat ’immummik piviusumik oqaasiusumik’ angajoqqaat pilersuiniartariaqarput meeqqat ’annannissamut alliartoqqullugit’. — 1 Pîtruse 2:2; Juánase 17:3. (wE 1/8 97)

[Quppernerup ataani ilanngussat]