Ilaqutariittut atuaqqissaaqatigiittarnersi pissarsiffiulluartarpa?
1 Angajoqqaat naammassisariaqagaasa pingaarnerpaat ilaat tassa meeqqaminnik sallusuissummik ilinniartitsinissaat. Jehovap allaat tamatuminnga pisussaaffeqartippai. (5 Mos. 6:6, 7) Silarsuarmi guutiitsumi assuarnaallutik inuusinnaassappata meeqqat ikiorneqarnissaq unnersuunneqarnissarlu pisariaqartippaat. Jehovamik sallusuissummillu asanninnissartik ilinniartariaqarpaat, kristumiuujuarnissartillu aalajangiusimasariaqarlugu. Napasuliaq Alapernaarsuiffik-imi 1. maji 1989, qupperneq 9-mi allassimavoq: „Pisussaaffisi ajornartorsiutisilu qanoq ittuugaluarpataluunniit, qitornassi piffissaqarfiginissaat salliutittariaqarparsi. Piffissami meeqqassinnik ataatsimooqatiginniffinni periarfissaqartassaasi anersaap piinik eriaginartunik, uummataannut illersuutaasunik eqqortumillu ingerlavissiisunik, puiutsaaliniarnissaannut.“
2 Ilaqutariit unnersuussut Guutip oqaasianeersoq maleruassagunikku, ilaqutariittut atuaqqissaarnermut aalajangersimasumik akuttunngitsumik piffissaqartariaqarput. Ilaqutariinni ittuusoq aaqqissuisariaqarpoq ilaqutariit anersaakkut peqqissusiata salliutinneqarnissaannik. Ilaqutariit maannakkut anersaakkut pisariaqartitaat angajoqqaat eqqumaffiginngippatigik, qularnanngitsumik kingusinnerusukkut ajornartorsiutit ilungersornartut takkuttussat isumagisariaqassavaat.
ATUAQQISSAARNERMI ATORTUSSAT ATUAQQISSAARIAATSILLU
3 Suut atuaqqissaarneqartariaqarpat? Ilaqutariinni ittuusup pisariaqartitat suuneri ilisimalluarneruai, soorunamili ilaquttami isumaat tusarnaartariaqarpaa kissaatigisaallu soqutigalugit. Sumulluunniit piareersimasuuguni ilaqutariinni atuaqqissaarneq ineriartuutaallunilu kajumissinartuussaaq. Ilaqutariit amerlasuut Napasuliaq Alapernaarsuiffik-mik atuaqqissaaqatigiinnermut sapaatip-akunneranoortumut ataatsimoorlutik piareersartarput, ilaannikkulli ajornartorsiutit aalajangersimasut inuusuttut atuarfimmi naapittagaat oqaloqatigiissutigineqartariaqarput. Peerariinneq, atuanngiffimmi sammisassat, timersorneq kanngunartuliorniartarnerlu pillugit paasissutissat nakussatsinnartumik pitsaasumillu oqaloqatigiissutigineqarsinnaapput. Ataataasup tamatigut soqutigisariaqarpaa paasissutissat suut ilaqutariit pisariaqartikkaat qanorlu ililluni ajoqersuiguni pitsaanerpaamik meeqqat uummataat killissinnaallugit. Takuuk Vagttårnet 15. juli 1971, quppernerit 331-34.
4 Atuaqqissaarneq qanoq aqunneqartariaqarpa? Ilumoorsaarpallaanngitsumik ataqqinnittumilli atuaqqissaarneq ingerlanniartarsiuk. Eqarpallaanngitsumik sukanganarpallaanngitsumillu atuaqqissaarneq eqqarsaatissarsinaqqullugu tamarmillu peqataaqqullugit apeqqutit ikiuutaasut assilissallu atorniakkit. Paasissutissat paasiuminarnerutinniaraanni atuagassallu pissanganarnerutinniarlugit assilissat nunallu assingi iluaqutaasinnaaqaat. Meeqqat ukiutik piginaassusertillu naapertorlugit suliassaqartinneqarsinnaapput paasissutissanik amerlanerusut ujarlersillugit ujarliutit qinerlerfissiallu ikiortigalugit, soorlu Index, Hjælp til forståelse af Bibelen, Insight on the Scriptures, il. il. Meeqqat minnerit pisinnaaliinnartut oqaloqatigiinnermut peqataalersinniakkit. Apeqquteqarfigineqarsinnaapput paasiuminartunik oqaatsinik ikittunik akineqarsinnaasunik. Ilaqutariit atuaqqissaaqqatigiinnerat meeqqanik naveersivissatut atoqinagu. Akerlianik nersualaartakkit, ilungersornerannik pingaartitsinerit oqaatigisaruk, ilissilu nammineq anersaakkut ittunut qiimasuutiginninnersi malugittarsiuk.
5 Angajoqqaat qanoq ilillutik qulakkeersinnaavaat ajoqersuinertik meeqqamik uummataannik killiinersoq? Meeqqat namminneq oqaatsitik atorlugit akisarnissaannik kajumissaarnerisigut. Apeqquteqarfigisarlugit paasiniarlugu meeqqat qamanerpiaq isumaat. Periaaserissumilli taamaaliorniaritsi. Ima aperisinnaavusi: „Atuaqativit tamanna qanoq isumaqarfigaat? Illit nammineq qanoq isumaqarpit? Eqqarsaatigisimaviuk tamatumunnga uagut isumaqarfiginninnerput eqqortuunersoq? Nassuiarsinnaaviuk sooq uagut taamatut isumaqartugut?“ Akineqaraangassi sualuppallaartumik qisuariartariaqanngilasi, taamaaliorussimi meeqqat immaqa isumavimminnik oqaatiginninnissartik kisigilissavaat. Oqaasissaat naallugit oqalutsinniakkit nassuiaanissaannullu piffissaqartillugit. Meeqqat paasigunikku namminneq ajornartorsiutitillu soqutigigisi, ajoqersuinissarsi ajornannginnerussaqaaq. — Takuuk Vagttårnet 1. november 1986, quppernerit 23-25.
6 Eqqumaffigisariaqarparsi ilaqutariittut atuaqqissaaqatigiinnissi siunertaata pingaarnersaa tassaasoq meeqqat Jehovap eqqarsartaasianik eqqarsartaaseqalernissaat, tassaannaanngitsorlu ataatsimiinnerni akisarnissaat. (Evf. 3:17-19) Taamaattumik ajoqersuinissinni uummataat angusariaqarpasi. Meeqqat suna pillugu Jehovap piumasaanik iliorumasariaqarnerannut, sunalu pillugu inooriaatsip tamatuma pitsaanerpaaneranut pissutaasut erseqqissartarsiuk.
7 Aalajangersimasumik akuttunngitsumik atuaqqissaaqatigiittarneq ilaqutariit anersaakkut nakussatsinnissaannut tungaviuvoq. Tamanna tungavigalugu meeqqat inuunermi ajornartorsiutissat anigorsinnaassavaat. Ilissi angajoqqaasusi pitsaanerpaasumik meeqqasi ikiorsinnaavasi. Taamaattumik Guutimit tamatumunnga akisussaaffeqartuutinniaritsi. Qularissanngilarsi Jehovap ilaqutariittut pissarsiffiulluarnartumik atuaqqissaaqatigiinnermik ilungersuutiginninnersi pilluaqqussagaa.