Angajoqqaanik utoqqalisunik ataqqinninnerup nuannaarnartui

GUUTIMIK pallorfiginnittut ilumoortut angajoqqaaminnik utoqqalisunik asanninnertik pissutigalugu taakkuninnga ataqqinnittuullutillu isumassuiumasuupput. Tamanna guutisiornerannut ilaavoq. Biibilimi ima allassimavoq: ’[Qitornaasut ernutaasulluunniit] ilinniaqqaarallarlit inoqutiminnut Guutimik mianerinnittutut iliussallutik angajoqqaatillu akiniarluassallugit, tamannami Guutimi iluarisaammat.’ (1 Timûtiuse 5:4) Inuusuttuugaluarutta utoqqaagaluaruttaluunniit angajoqqaatsinnik angajoqqaattaluunniit angajoqqaavinik ’akiniaalluarnissarput’ pissusissamisuuginnarpoq. Taamaalilluta takutissavarput ukiut ingerlaneranni ilungersorlutik sulisimanerat kiisalu asanninneq isumassuinerlu uagutsinnut ersersissimasaat qujamasuutigigivut. Aap, tassami angajoqqaavut inuunermik akiitsugaqarfigaavut!

Malugiuk angajoqqaanik taakkualu angajoqqaavinik akiniaalluarneq ’Guutimi iluarisaasoq’. Tamanna ’Guutimik mianerinninnermut’ atassuserneqarpoq. Unnersuussut tamanna malikkaangatsigu akissarsisinneqartarpugut, tassami Guutip iluarisaanik ilioratta. Tamatuma nuannaalersittarpaatigut.

Tunisineq pilluarnartuuvoq, ingammik uagutsinnut tukkorfiginnissimasunut. (apustilit suliait 20:35) Taamaattumik Biibilimi najoqqutassiap matuma malinneratigut annertuumik nuannaarutissarsisarpugut: „Ataatannut anaanannullu nuannaarutaaniarit, ilinnik erniarinnittoq qiimmattaatissiguk.“ — Ussatit 23:25.

Angajoqqaatsinnut taakkualu angajoqqaavinut qanoq ililluta ’akiniaalluarsinnaavugut’? Pingasutigut taamaaliorsinnaavugut: timip piisigut, misigissutsikkut anersaakkullu. Tamakkua pingasut tamarmik pilluaqqusaanarput.

Timip piisigut ikiuineq

Guutimik pallorfiginnittut nalunngilaat ilaquttanik qaniginerpaanik timip piisigut isumaginninnissaq pingaartuusoq. Apustili Paulus ima oqaassisimavoq: ’Kialuunniit ilani annerusumillu inoqutini isumaginngikkunigit, taassuma upperneq soraarussimavaa uppinngitsumit ajornerulluni.’ — 1 Timûtiuse 5:8.

Tunji Joyilu Afrikap kitaani najugaqarput. Aningaasassaaleqigaluaqalutik Joyip angajoqqaavi imminni najugaqarsinnaanerannik neqeroorfigisimavaat. Ataataa napparsimavoq, kingunerileraalu toquvoq. Tunji ima oqaluttuarpoq: „Sakiga toqummat nuliara anaanaata eqitaarlugu oqarfigaa: ’Inuup iliuuserisinnaasai tamaasa iliuuserisimavatit. Ataatavit toquneranut imminut pisuutinngilluinnassaatit.’ Maqaaseqaarput, aammali nalunngilarput nakorsaatinik pitsaanerpaanik pitsittarsimallugu sapinngisatsinnillu misigitinniartarsimallugu ungagigipput pingaartikkippullu. Akisussaaffipput Guutimit pisoq sapinngisarput tamaat eqqortinniarsimavarput, tamannalu eqqarsaatigalugu nalerisimaarnartuuvoq.“

Soorunami kikkut tamarmik timip piisigut allanik ikiuinissaminnut periarfissaqanngillat. Angut Nigeriami najugalik ima oqarpoq: „Imminut pilersorsinnaanngikkaanni taava qanoq ililluni allanik pilersuisoqarsinnaava?“ Nunat ilarpassuini pissutsit ukiuni aggersuni suli ajorneruleriaannaapput. FN-ip missiliuussinera naapertussagaanni Afrikami inuit Saharap kujataa’tungaaniittut ungasinngitsukkut piitsuusorujussuanngoriaannaapput.

Aningaasatigut ajornartorsioruit uillarnermik piitsumik oqaluttuaq piviusoq immaqa tuppalliutigisinnaavat. Jesusip nunarsuarmiikkallarami takusimavaa uillarneq naalaffimmi tunissutinut nakkaatitsivimmut aningaasamininnguanik ikisisoq. ’Quppakuninngooq marlunnik’ nalikitsuararsuarnik ikisivoq. Pissutsilli atugai nalunnginnamigit Jesus ima oqarpoq: ’Ilumut oqarfigaassi: uillarneq una piitsoq tamanit annermik ilisivoq. Taakku tamarmik sinnerutitamik ilaannik tunissutinut ilisimmata, uumali ajorsartuulluni inuutissarsiutissaraluani pigisani tamaasa ilivai.’ — Lúkarse 21:1-4.

Taamatuttaaq angajoqqaavut taakkualu angajoqqaavi timip piisigut pilersorniarlugit ilungersornivut — qanorluunniit annikitsigigaluartut — Jehovap arajutsineq ajorpai pingaartillugillu. Sapikkavut qaangerlugit tunisinissarput taassuma naatsorsuutiginngilaa. Angajoqqaattaaq taakkualu angajoqqaavi qularnanngitsumik taamatut misigissapput.

Misigissutsikkut annertoqqusersuineq

Angajoqqaanik taakkualu angajoqqaavinik isumassuineq timikkut pisariaqartitaannik matussutissiinerinnaanngilaq. Tamatta misigissutsikkut pisariaqartitaqarpugut. Tamatta, aamma utoqqaat, asaneqarluta pingaartinneqarlutalu misiginissarput ilaqutariinnullu ilaasutut ungagisaasutut misiginissarput pisariaqartipparput.

Maryp, Kenyami najugallip, uimi anaanaa utoqqalisoq ukiuni pingasuni paaqqutarisimavaa. Taanna ima oqarpoq: „Timip piisigut pisariaqartitaasa matussutissittarnerata saniatigut oqaloqatigisarparput. Illumi suliassanik ikiuuppiarsinnaanngilaq, oqaloqatigiittarpugulli immitsinnullu qaninnerulerluta. Guuti pillugu imaluunniit qanga ikinngutit pillugit oqaloqatigiittarpugut. 90-it sinnerlugit ukioqaraluarluni eqqaamallaqqeqaaq. 1914-ip siorna niviarsiarannguunermini pisimasut eqqaamavai oqaluttuarisarlugillu.“

Mary nangippoq: „Utoqqarmik paaqqutarinninneq oqitsuunngilaq, uagutsinnili najugaqarnera amerlasuutigut pilluaqquneqaatigisimavarput. Ilaqutariinni eqqisseqatigiinneq ataqatigiinnerlu atuupput. Taassumunnga tunisiumasutut pissuseqarfiginninnera ilaquttannut tuniluussimavoq. Uiga uannut ataqqinninnerulersimavoq. Sakimalu sukannersumik oqaluffigineqartunga tusaraangamiuk illersorniapallattarpaanga. Taanna najuutsillugu kialuunniit uannik oqalorujuffiginninniarnissani qunugaa!“

Anersaakkut ikiuineq

Timip piisigut misigissutsikkullu tapersersuineq tunisisumut pilluaqqusaanermik nassataqartarpoq, aamma anersaakkut ikiuineq taamaappoq. Apustili Paulus Romami ilagiit kristumiut ima allaffigisimavai: ’Kajungeqaanga takujumallusi saammaannermit tunissummik anersaap pianik ilangiisikkumallusi nakussatseqqullusi, tassa ilissinni kajumissaaqatigeeqqulluta uppeqatigiissutsitsigut, ilissilu uangalu pigisatsigut.’ — Rûmamiut 1:11, 12.

Utoqqaat Guutimut kiffartortut anersaakkut annertoqqusersoraangatsigik tamatta qiimmassarneqartarpugut. Osondu Nigeriami najugalik ima oqaluttuarpoq: „Aataakkunnik pingaartitsissutiginerpaasama ilaat tassaavoq qanga pissutsit qanoq issimanerannik oqaluttuussinnaasarmannga. Aataap 50-ikkunni 60-ikkunnilu pioneeriugallarami oqaluussiartortarfigisarsimasani angornioqaluni oqaluttuarisarpaa. Ullumikkut ilagiit aaqqissuussaanerat nammineq Jehovamut nalunaajaasunngornermi nalaani atuuttumut sanilliuttarpaa. Paasisakka tamakku pioneeritut kiffartorninni iluaqutigisarpakka.“

Allattaaq ilagiinni kristumiuniittut utoqqarnik ikiuisinnaapput. Tunjip, eqqartorneqareersup, ilagiinni ilaaffigisamini qanoq pisoqartarsimanera ima oqaluttuaraa: „Qatanngut angut inuusuttoq pioneeri tamanut ammasumik oqalugiartussanngoriarami oqalugiaatissaminut najoqqutassani nassarlugu sakinnukarsimavoq marluullutik suliariniassagamikku. Aamma Napasuliaq Alapernaarsuiffik-mik atuaqqissaarnermik aqutsisartup saaffigisimavaa oqarfigalugulu: ’Illit misilittagaqarputit. Qanoq pitsaanerusumik aqutsisinnaanersunga siunnersorsinnaavinga?’ Qatanngut angut utoqqaanertaq sakima arlalinnik pitsaasunik siunnersuuteqarfigisimavaa. Qatanngutit angutit ilagiinni qinunerminni sakiga eqqaagajuppaat. Tamakku tamarmik pingaartinneqartutut misigilersippaat.“

Pissuserissaarnerup inuit Guutimut kajungilersittarpaat

Kristumiut angajoqqaaminnik aataakkuminnillu ataqqinnillutillu asanninnerat inuit Guutimut kajungilernerannik ilaannikkut kinguneqartarpoq. Apustili Peter ima allassimavoq: ’Iluartumik saqigitsi Guutimik nalusuni, taakku pinerluttuunerarlusi oqaatissuaatigigaluatik pillugit ajunngitsuliasi takullugit ullussami takusarneqarfissami Guutimik unnersiutiginneqqullugit.’ — 1 Pîtruse 2:12.

Andrew, Afrikap kitaani utoqqaanertaq, sapaatip-akunneranut marloriarluni kilometerisut 95-isut isorartutigisumi angalasarpoq ataatani nalunaajaasuunngitsoq napparsimasoq isumagiartorlugu. Ima oqarpoq: „Ataataga Jehovamut nalunaajaasunngorninnut akerliusorujussuusimavoq. Napparsimanerminili isumassuinera takoreerlugu qatanngutikka nukarliit ilungersorluni ima kajumissaartarpai: ’Qatanngutissi upperisaanut ilanngunniaritsi!’ Tamanna kajumississutigaat, maannalu ataatama meerai qulingiluat tamarmik Jehovamut nalunaajaasuupput.“

Angajoqqaanik utoqqalisunik ataqqinninniarneq isumassuiniarnerlu unamminiarnartuusinnaavoq, ingammik aningaasatigut ajornartorsiorfimmi. Kristumiulli taamaaliorniarlutik ilungersortut pilluaqqusaangaartarput. Pingaarnerpaamik nuannaarneq tunisinerup nassatarisaa misigisarpaat, kiisalu nalerisimaarneq misigisarpaat nalunnginnamikku Jehova Guuti, ’tamarmik Ataatagisaat’, nuannaartillugu. — Evfisumiut 4:6. (wE 1/9 97)

[Qupp. 6-imi ungalusaq]

Isumagineqartunut isumaginnittunullu siunnersuutit Biibilimeersut

Qiimmassaasarit: ’Nungulluta inoqatitta nuannarisassaannik iliorniarta iluaqutaassasumik ineriartuutaassasumik.’ — Rûmamiut 15:2.

Nikallujuigit: ’Ajunngitsuliorta arajussinata nalliuppat katersuiumaarattattaaq qasunngikkutta.’ — Galâsiamiut 6:9.

Maniguugit: ’Saqitsaagajunnermit piunngitsumillu ataqqineqarumanermit pinnasi, kisianni qanilaarlusi ilasi immissinnit annerutinniarsigik.’ — Filípimiut 2:3.

Allanut ajunngitsuliorit: ’Namminissaminik piniartoqanngikkili, aapparmili iluaqutissaanik.’ — 1 Korintumiut 10:24.

Piumasaqarpallaarnaveersaarit: ’Qanilaarsusersi inunnut tamanut malunnarsili.’ — Filípimiut 4:5.

Misiginneqataasuugit: ’Ajunngitsumik iliorfigeqatigiigitsi isumassuigajullusilu isumakkeerfigeqatigiillusilu.’ — Evfisumiut 4:32.

[Qupp. 7-imi assiliartaq]

Utoqqaanertat inuusunnerumaat utoqqaanertat utoqqaat misilittagaat iluaqutigisinnaavaat