Inuarannguit nukilerujussuit

QANOQ issasoraajuk Guutip naalagaaffia pillugu takornartat oqaloqatiginiarlugit angalaarluni 76 centimeterisut taamaallaat angissuseqaruni? Tamanna Laurap nalunngilaa. 33-nik ukioqarpoq, kisiannili 76 centimeteriinnarnik angissuseqarluni. Taanna qatanngutaalu, María, 24-nik ukiulik 86 centimeterisullu angissusilik, Ecuadorimi Quitomi najugaqarput. Taakku oqaluttuartinniarpavut kristumiutut kiffartornerminni ajornartorsiutit naapitagaat pillugit.

„Oqaluussiffigisartakkatsinnukarniarluta kristumiullu ataatsimiinnerinukarniarluta bussinukaraangatta kilometerip affaa pisuttarpugut. Niuffigisartakkatsinniit kilometerip affaa bussinut allanukaqqittarpugut. Ajoraluartumik aqqutaani kiisortunik tallimanik qimmeqarpoq. Qimmit ersigeqaavut, uagutsinnut hestitut angitigimmata. Tamatumani immitsinnut illersorniarluta ajaappiaq nassartarparput, bussinullu ikinnginnitsinni aalajangersimasumut toqqortarparput, angerlalerutta atoqqinniassagatsigu.

Eqqortumik oqaatigissagaanni bussinut ikiniarnerput siuariarnerujussuuvoq. Portunersannguaasami bussit unittarfiata eqqaani nikorfasarpugut ikiniarneq ajornannginnerusarmat. Ingerlatitsisut ilaat tassunga unittarput, ilaali taamaaliortanngillat. Taava ikiniarnitsinni anginerup mikineq ikiortariaqarpaa. Bussinut allanukarniarluta aqqusinersuaq angallaffioqisoq ikaaqqaartarparput — naatsunik nioqarluni tamanna ilungersunartuuvoq. Mikivallaarnerput pissutaalluni atuagaasivipput oqimaatsoq artorsaatigisaqaarput. Atuagaasivipput oqinneruniassammat Biibili kaasarfimmiortagaq atortarparput atuakkallu nassatassavut killilersimaarniartarlugit.

Meeragallarattali marluulluta nipaarluusimavugut. Eqqaamiutta nalunngilaat takornartanik oqaloqateqarnissarput annilaangagiuaannaripput. Taamaattumik amerlasuut tupaallaatigaat tupigusuutigalugulu oqaluussiartoraangatta tusarnaarusuttarluta. Kisianni inuit ilisarisimarpianngikkaangamitigut, mikisunnguunerput kisiat isigigajuttarpaat; taamaattumik tusagassaraluartik tusarnaartuaannanngilaat. Jehovalli asanninnerata malugilluartakkatta, oqaluussiuarnissatsinnut nukimik pisariaqartitatsinnik tunisarpaatigut. Aammattaaq Ussatit 3:5, 6 eqqarsaatigalugu uagutsinnut nakussatsinnarpoq.“

Laurap Maríallu maligassiuinerisa takutippaat timikkut akornuteqaraluarluni qasusuikkaanni Guutimut ataqqinaataasoq. Apustili Paulusip qinnutigisimavaa ’qisuk uinimminut kappusimasoq’, immaqa timikkut nappaat, peeqqullugu. Guutilli akivaa: ’Saammaannera naammagissavat pissaaneq sanngiitsuni naammatsittarmat.’ Aap, Guuti kiffartorfiginiaraanni timikkut innarluutip peerneqarnissaa pisariaqanngilaq. Guutimut tatiginnilluinnarnerup ikiorsinnaavaatigut pitsaanerpaamik atugaqarnissatsinnut. Tamannarpiaq pissutigalugu Paulusip ’qisuk uinimminut kappusimasoq’ taamatut isigigamiuk oqarsinnaasimavoq: ’Sanngiittaraangamami pissatsittaraanga.’ (2 Korintumiut 12:7, 9, 10) Ukiualuit qaangiummata Paulus allassimavoq: ’Tamaasa pissatitsisikkut sapinngilakka.’ — Filípimiut 4:13.

Ullutsinni Guuti angutit, arnat meeqqallu imminut tunniulluinnarsimasut ikiortigalugit suliarujussumik naammassisaqarpoq. Amerlasuut arlaatigut timimikkut pisinnaasamikkut killeqarput. Tamarmilli Guutip naalagaaffiani ajorunnaarsitaanissartik upperigaluarlugu Guutimut kiffartulinnginnerminni ajornartorsiutiminnik Guutip piiaanissaa utaqqinngilaat.

Illit nappaateqarpit imaluunniit timikkut innarluuteqarpit? Taava isumalluarit! Uppernikkut Paulusitut, Lauratut Maríatullu ilersinnaavutit. Soorlu qanga angutit arnallu aalajaatsut pillugit oqartoqarsimasoq, aamma taakku pillugit taamatut oqartoqarsinnaavoq: ’Sanngiikkaluaramik nakussatsipput.’ — Eprîarit 11:34. (wE 15/2 2000)

[Qupp. 8-mi assiliartaq]

María

Laura

[Qupp. 9-mi assiliartaq]

Maríap Laura bussinut ikiniarnerani ikiorpaa

[Qupp. 9-mi assiliartat]

„Qimmit ersigeqaavut, uagutsinnut hestitut angitigimmata“

Ataatungaani: Laura Maríalu Biibilimik imminnik atuaqqissaaqatiginnissimasut ilagalugit