Maanna Jehovap ullussaa qanilliartortillugu inuit allat qanoq isigisariaqarpavut?
„[Jehovap] neriorsuutigisani paamaarutinngilaa, . . . ilissinnulli erinitsajuippoq kimilluunniit tammaqqusinnginnami, tamaasalu allamik isumataarnissamut periarfissikkumagamigit.“ — 2 PETRUSI 3:9.
1, 2. (a) Jehovap inuit ullumikkut qanoq isigai? (b) Imminut qanoq aperisinnaavugut?
JEHOVAP kiffai peqquneqarput ’inunnik inuiannit tamaneersunik ajoqersuganngortitseqqullugit’. (Matthæusi 28:19, NV) Suliassamik tamatuminnga suliaqartilluta ’Jehovallu ullussarsuanik’ utaqqitilluta, inunnut Jehovap isiginninneratut isiginninnissarput pingaaruteqarpoq. (Sefania 1:14) Apustili Petrusip oqaluttuaraa Jehovap inuit qanoq isiginerai: „[Jehovap] neriorsuutigisani paamaarutinngilaa, naak ilaat isumaqaraluartut paamaarussinerarlugu; ilissinnulli erinitsajuippoq kimilluunniit tammaqqusinnginnami, tamaasalu allamik isumataarnissamut periarfissikkumagamigit.“ (2 Petrusi 3:9) Guutip inuit tamaasa allamik isumataarsinnaasutut isigai. „Taassuma piumasaraa inuit tamarmik annaanneqassasut sallusuissummillu ilisarsissallutik.“ (1 Timotheusi 2:4) Aap, ’iluanngitsoq ileqqorisani ajortut tunullugit inuuginnaraangat’ Jehovap nuannaarutigisarpaa. — Ezekieli 33:11.
2 Inunnut Jehovap isiginnittaasiatut isiginnittaaseqarpugut? Inuit ataasiakkaat naggueqatigiinnit inuiaqatigiinnillu tamaneersut Guutip ’savaataanut’ ilaalersinnaasutut isigaavut? (Tussiaat 100:3; Apustilit Suliaat 10:34, 35) Assersuutit marluk Jehovap isiginnittaasiatut isiginnittaaseqarnissap qanoq pingaaruteqartigineranik ersersitsisut misissoriartigik. Assersuutini taakkunani aseruinissaq nalliutilerpoq, Jehovallu kiffai siumut ilisimatinneqarput. Maanna Jehovap ullussarsuanik utaqqinitsinni assersuutit taakku immikkut pingaaruteqarput.
Aaperaat inunnut Jehovap isiginnittaasiatut isiginnittaaseqarpoq
3. Jehovap Sodomamiut Gomorramiullu qanoq isigai?
3 Assersuummi siullermi ataataanerpaaq aalajaatsoq Aaperaat illoqarfiillu guutiitsuusut Sodoma Gomorralu pineqarput. Jehovap ’Sodomamit Gomorramillu nipitoqisumik nilliasoqarnera’ tusaramiuk, illoqarfiit inuilu tamaasa ingerlaannaq suujunnaarsinngilai. Pissutsit misissoqqaarpai. (1 Mosesi 18:20, 21) Inngilit marluk Sodomamut aallartinneqarput, Lotimilu iluartumi illusimmavissarsillutik. Unnuk taanna inngilit takkummata ’illoqarfiup angutitaasa . . . inuusuttut utoqqaallu tamakkerluinnarlutik, illu avatangerpaat’, inngilit anguteqatiminooqatiginiarlugit. Illoqarfiup nungutinneqartariaqarneranut inuisa taama nikanarsisimatiginerat takussutissaavoq. Taamaattorli inngilit Loti oqarfigaat: „Tamaani allanik inoquteqaruit, ningaannik erninnilluunniit paninnilluunniit, illoqarfimmiluunniit inoqutitit allat tassannga qimarngutikkit.“ Jehovap illoqarfiup inuisa ilaat annaanneqarnissaannut periarfissikkaluarpai, naggataatigulli Loti paniilu marluk kisimik aseruinermit aniguipput. — 1 Mosesi 19:4, 5, 12, 16, 23-26.
4, 5. Sooq Aaperaap Sodomamiut qinnuppai, inunnullu isiginnittaasia Jehovap isiginnittaasianut naapertuuppa?
4 Maanna Jehovap illoqarfinnik Sodomamik Gomorramillu misissuiniarluni eqqartuinera uterfigeriartigu. Taamani Aaperaap Jehova ima qinnuigaa: „Immaqa iluartunik 50-inik illoqarfimmi tassaniittoqarpoq. Ilumut nungutinniarpigit illoqarfillu taanna isumakkeerfigiumanagu uffa 50-inik iluartortaqartoq? Qanoq ilillutit iluartut iluaatsunut ilanngullugit toqorarsinnaavigit iluartut iluaatsullu atugarisaat assigiissillugit? Taamaaliorneq ajornaqaaq! Nunarsuarmik tamarmik eqqartuussisuusoq eqqortuliussannginnerpa?“ Aaperaat oqarpoq: „Taamaaliorneq ajornaqaaq!“ Misigisaminit nalunngilaa Jehovap iluartut guutiitsunut ilanngullugit nungutissanngikkai. Jehova oqarmat illoqarfimmi ’50-inik iluartoqarpat’ Sodoma nungutinniarnagu, Aaperaap appartikkiartuaarpai quliinnanngornissaasa tungaanut. — 1 Mosesi 18:22-33.
5 Jehovap Aaperaap qamannga pisumik qinnutai tusarnaarsimassagaluarpai nammineq isiginnittaatsiminut akerliusimasuuppata? Soorunami naamik. Aaperaalli Jehovamut ’ikinngutaasutut’ inunnut Jehovap isiginnittaasiatut isiginnittaaseqartoq erseqqippoq. (Jaaku 2:23) Sodomamik Gomorramillu soqutiginninnerulerami Jehovap Aaperaap qinnutaa tusarnaarusuppaa. Sooq? Ataatarput qilammiusoq „kimilluunniit tammaqqusinnginnami, tamaasalu allamik isumataarnissamut periarfissikkumagamigit“. — 2 Petrusi 3:9.
Jonap inunnut isiginnittaasia — allaanerulluinnartoq
6. Ninevemiut Jonap oqaluussinera qanoq qisuariarfigaat?
6 Maanna assersuutip aappaa sammeriartigu, tassa pruffiiti Jona. Tamatumani illoqarfik Nineve aserorneqartussaavoq. Jona illoqarfimmiunut nalunaaqquneqarpoq ’ajussusiat Jehovap arajutsisimanngikkaa’. (Jona 1:2) Nineve illoqarfiit avataatungaaniittut ilanngullugit illoqarferujussuuvoq — „pisuinnarluni ulluni pingasuni ingerlavigisariaq“. Jona kiisami Guuti naalallugu Ninevemut pigami ima oqaluussiuarpoq: „’Ullut 40-t qaangiuppata Nineve piuneerunneqassaaq!’ Ninevemiut Guutip oqaasia upperigamikku iisinnginniarfissaq torlulaatigaat, . . . puunillu atisipput.“ Allaat Ninevep kunngia peqqissimivoq. — Jona 3:1-6.
7. Jehovap Ninevemiut allamik isumataarnerat qanoq isigaa?
7 Sodomamiunit ila allaanerulluinnassusiat! Jehovap Ninevemiut peqqissimisut qanoq isigai? Jona 3:10-mi allassimavoq ’Guutip aalajangigarigaluani allanngortikkaa perluk sioorasaarutigigaluani nalliutinngitsoortillugu’. Jehovap ’aalajangigarigaluani allanngortippaa’ Ninevemiullu allatut isumaqarfigilerlugit allamik isumataarmata. Guutip najoqqutassiai allanngunngillat, Jehovalli aalajangigarigaluani allanngortippaa takugamigit Ninevemiut peqqissimisut. — Malaki 3:6.
8. Sooq Jona narrutsappa?
8 Jona qanoq piva paasileramiuk Nineve aserorneqassanngitsoq? Pissutsit Jehovap isiginnittaasiatut isigai? Naamik, allassimavormi: „Tamanna Jonap narrutsaatigaa kamaatigalugulu.“ Jona aamma qanoq iliorpa? Jehova qinnuigaa oqarluni: „Ila [Jehova], nunanniitillungali taama oqareeraluarpunga! Tamannaana pissutigalugu Tarshishimut qimaaniaraluartunga, nalunnginnakku Guutiusutit saammaasoq naakkittartorlu, kamajaatsoq ilumoorsusermillu peqangaartoq, perlussamillu sioorasaarinerit allanngortittarit.“ (Jona 4:1, 2) Jonap Jehovap pissusii nalunngilai. Maannali pruffiiti narrutsappoq Ninevemiunullu peqqissimisunut Guutip isiginnittaasiatut isiginnittaaseqarnani.
9, 10. (a) Jehovap qanoq Jona isigisassiuinikkut ilinniartippaa? (b) Sooq isumaqarsinnaavugut Jona naggataatigut Ninevemiunut Jehovap isiginnittaaseqarneratut isiginnittaaseqalersoq?
9 Jona Ninevemit anivoq, orpikkanik tupiusaliorluni ataanullu alanngilluni „takuniarlugu illoqarfik qanoq pineqassanersoq“. Jehovap naasoq orpigaasaq naalersippaa Jona alanngiffissaqaqqullugu, aqaguanili toquliulerpoq. Jonap tamanna kamaatigilermagu, Jehovap oqarfigaa: „[Naasoq orpigaasaq] naakkigaat . . . Uanga taava Nineve naakkigissannginnerpara illoqarfissuaq 120.000-it sinnerlugit inoqartoq talerpimmik saamimmillu paatsiveqartitsinngitsunik, amerlasoorsuarnillu nersutaateqarfiusoq?“ (Jona 4:5-11) Jonap tamanna Jehovap inunnut isiginnittaasia pillugu ilinniarfigingaarsinnaavaa!
10 Allassimasoqanngilaq Guutip Ninevemiut naakkigineqarnissaat pillugu oqaasiinut Jona qanoq qisuariarnersoq. Pruffiitilli Ninevemiunut peqqissimisunut isiginnittaatsini allanngortissimassavaa, Jehovammi oqaluttuamik isumassarsiarititaasumik tamatuminnga allatsippaa.
Illit qanoq isiginnittaaseqarpit?
11. Inuit ullumikkut inuusut Aaperaap qanormita isigisimassagaluarpai?
11 Ullumikkut aamma suujunnaarsitsinissaq nalliutilerpoq — Jehovap ullussarsuani pissutsit aaqqissuussaanerata ajortup maanna atuuttup suujunnaarsinneqarnissaa. (Lukasi 17:26-30; Galatiamiut 1:4; 2 Petrusi 3:10) Inuit silarsuarmi matumani qanittukkut suujunnaarsinneqartussami inuusut Aaperaap qanormita isigisimassagaluarpai? Qularnanngitsumik ’Guutip naalagaaffianik nutaarsiassamik nuannersumik’ suli tusarsimanngitsut isumakuluutigisimassagaluarpai. (Matthæusi 24:14) Aaperaap Guuti qinnuigeqattaarpaa iluartunik Sodomamiittoqassagaluarpat asattuuteqqullugit. Inuit allamik isumataarnissamut Guutimullu kiffartornissamut periarfissinneqaraluarunik Saatanip silarsuaanik qimatsiniartut uagut inuttut soqutiginerpavut? — 1 Johannesi 5:19; Saqqummersitat 18:2-4.
12. Sooq Jonatut isumaqaleriaannaasinnaavugut, taamaappallu qanoq iliorsinnaavugut?
12 Ajortut piiarneqarnissaannik qilanaarinninneq pissusissamisoorluinnarpoq. (Habakkuki 1:2, 3) Jonatulli isumaqaleriaannaasinnaavugut inuillu allamik isumataarusulersinnaasut isumakuluutiginagit. Ingammik taamaalisoqarsinnaavoq inunnik soqutigisaqanngitsunik, akeqqersimaartunik allaalluunniit uagutsinnik saassusseqqajaasunik naapitsiuarutta Guutip naalagaaffianik tusarliussamik oqaluussiffigiartortillugit. Puigoriaannaasinnaavarput Jehovap silarsuarmi aaqqissuussaanermit ajortumit matumannga annaakkusutaanik suli inoqartoq. (Romamiut 2:4) Ilumoorullugu imminut misissorluta paasilerutsigu Jonap Ninevemiunik isiginninneratut isiginnittaaseqalaaginnarlutaluunniit, Jehovamut ikioqqusinnaavugut taassumatut inunnik isiginnileqqulluta.
13. Sooq oqarsinnaavugut Jehovap ullumikkut inuit soqutigigai?
13 Jehova imminut suli kiffanngorsimanngitsunik soqutiginnippoq, kiffamilu tunniulluinnarsimasut qinnutaat tusarnaartarpai. (Matthæusi 10:11) Assersuutigalugu qinnutaannut akissutitut ’naapertuilluartumik pineqartissavai’. (Lukasi 18:7, 8) Aammattaaq Jehovap neriorsuutini tamaasa eqquutitissavai siunertanilu naammassissallugu piffissanngorpat. (Habakkuki 2:3) Ilaatigut nunarsuaq minguiassavaa ajussuseerullugu Ninevemik aseruisimanermisut illoqarfimmiut ajortunngoqqimmata. — Nahumi 3:5-7.
14. Jehovap ullussarsua utaqqitillugu suna ulapputigisariaqarparput?
14 Naammagittarluta utaqqissaagut Guutillu piumasaa ulapputigalugu Jehovap ullussarsuani pissutsit aaqqissuussaanerata ajortup matuma peerneqarnissaata tungaanut? Jehovap ulluata nalliutsinnginnerani qanoq oqaluussisoqartigissanersoq sukumiisumik suli ilisimanngilarput, nalunngilarpulli naggatissaq nalliutsinnagu Guutip naalagaaffianik nutaarsiassaq nuannersoq nunarsuarmi inuit najugarisaanni tamarsuarmi oqaluussissutigineqassasoq Guutip piumasaanut naapertuuttumik. ’Erlinnartuutit’ suli katersorneqarsimanngitsut katersornissaat ulapputigisariaqarparput, Jehovammi illuni alutornarsartuarpaa. — Haggaji 2:7.
Isiginnittaaserput iliuutsitsinni takuneqarsinnaavoq
15. Suna iluaqutigalugu paasisinnaavarput oqaluussineq qanoq pingaaruteqartiginersoq?
15 Immaqa najukkatsinni oqaluussinerput soqutigineqarpallaanngilaq, immaqalu oqaluussisartunik pisariaqartitsiffiunerusumut nuunnissatsinnut periarfissaqanngilagut. Takorlooriarulli naggatissaq nalliutsinnagu oqaluussiffigisartakkatsinni suli qulinik soqutiginnittoqartoq. Qulit taakku ujarnissaat pingaarutilittut isigaarput? Jiisusip inuit nalligingaarpai „paarinerlugaallutillu naakkinarsisimangaarmata savatut paarsisoqanngitsutut“. (Matthæusi 9:36) Biibilimik atuaqqissaarnikkut aamma Napasuliaq Alapernaarsuiffik-mi Iteritsi!-milu allaaserisanik peqqissaartumik atuartarnikkut silarsuarmi pissutsinik paasisimasaqarnerulersinnaavugut. Taamaalilluta paasinerussavarput nutaarsiassamik nuannersumik oqaluussisarnerput qanoq pisariaqartiginersoq. Biibililersaarutit „kiffaq ilumoortoq silatoorlu“ aqqutigalugu pisavut pingaartikkutsigik, atorluartarutsigillu, aamma angalaarfigisartakkani oqaluussiffigineqakulasuni oqaloqateqarnissamut pikkorinnerulersinnaavugut. — Matthæusi 24:45-47; 2 Timotheusi 3:14-17.
16. Qanoq oqaluussinitsinni naammassisaqarnerusinnaavugut?
16 Tusarliussamik inuunartumik Biibilimeersumik suli ilassinninngitsunik isumassuigatta oqaluussigaangatta naleqqussartarpugut — piffissaq periaaserpullu eqqarsaatigalugit. Angalaaraangatta angerlarsimanngitsorpassuaqartarpa? Taamaappat immaqa naammassisaqarnerusinnaavugut sumiiffinni piffissanilu allani oqaluussisalerutta. Aalisartut pisaqarnissartik ilimagigaangamikku aallartarput. Anersaakkut aalisarnitsinni tamatumunnga assingusumik iliuuseqarsinnaavugut? (Markusi 1:16-18) Soormi unnukkut inerteqqutaanngippallu telefonikkut oqaluussineq misilikkutsigu? Ilaat misigisimapput biilit unittarfii, umiarsualiviit, tankeqarfiit pisiniarfiillu ’aalisarfissatsialaasut’. Torrutiinnarlugu oqaluussinermut periarfissavut atorluartarutsigik Aaperaap inunnut isiginnittaaseqarneratut isiginnittaaseqarnitsinnut ersiutaavoq.
17. Ajoqersuiartortitat allallu nunani allani kiffartortut qanoq kajumissaarsinnaavavut?
17 Millionilippassuit Guutip naalagaaffianik tusarliussaq suli tusanngilaat. Toqqaannartumik oqaluussinitta saniatigut aamma allatigut taakku soqutigisinnaavavut — allaat angerlarsimaannarluta? Aap, immaqa nunani allani ajoqersuiartortitanik piffissarluunniit tamaat kiffartortunik ilisarisimasaqarpugut. Taamaappat immaqa pitsaassaaq taakkua allaffiginissaat oqaluttuullugillu suliaannik pingaartitsisugut. Taamaaliorneq inunnik tamanik isumassuinermut qanoq ersiutaasinnaagami? Kajumissaarilluta nersualaarillutalu allakkutta ajoqersuiartortitat nakussatsissutigisinnaavaat kiffartortuarnissaminnut, tamatumalu kingunerisaanik suli amerlanerusut sallusuissummik ilisimasaqalersinnaapput. (Eqqartuussisut 11:40) Aamma ajoqersuiartortitat inuillu nunani allaniittut sallusuissummut kaattut qinnussinnaavavut. (Efesosimiut 6:18-20) Tamatuma saniatigut soqutiginninnerput takutissinnaavarput Jehovap Nalunaajaasuisa silarsuaq tamakkerlugu sulinerannik aningaasatigut tapersersuisarnikkut. — 2 Korinthimiut 8:13, 14; 9:6, 7.
Nuussinnaassavit?
18. Kristumiut ilaat qanoq iliorsimappat nunaminni Guutip naalagaaffiata soqutigisai siuarsarniarlugit?
18 Oqaluussisartut pisariaqartitsiffiunerusunut nuussimasut imminnut pilliutigeriaannaallutik sulinertik pissutigalugu pilluaqquneqartarput. Jehovap Nalunaajaasui allat nunagisaminniiginnartut oqaatsinik allanik ilinniarsimapput nunasisut qimaasullu anersaakkut ikiorsinnaajumallugit. Ilungersornerat pilluaqquneqangaarpoq. Assersuutigalugu USA-mi Texasimi illoqarfiit ilaanni Jehovap Nalunaajaasuisa arfineq-marluk Kinamiut ikiortarpaat, 2001-imilu eqqaaniaalluni nalliuttorsiornermi inuit 114-it tikilluaqqusinnaasimavaat. Inunnik taamaattunik ikiuisartut misigisimapput narsaatitik katersuiffigeriaannanngortut. — Matthæusi 9:37, 38.
19. Guutip naalagaaffianik oqaluussineq siuarsarniarlugu nunamut allamut nuunnissaq eqqarsaatigigaanni qanoq iliortariaqarpa?
19 Immaqa illit ilaquttatillu Guutip naalagaaffianik oqaluussisartunik pisariaqartitsiffiunerusumut nuussinnaavusi. Iliuuserineqaqqaartussaq soorunami tassaavoq ’ingilluni aningaasartuutissanik naatsorsuinissaq’. (Lukasi 14:28) Ingammik tamanna pingaaruteqarpoq nunamut allamut nuukkumalleraanni. Periarfissamik tamatuminnga eqqarsaatiginnittut tamarmik imminnut ima aperisariaqarput: ’Ilaquttakka pilersorsinnaassavakka? Nunami tassaniinnissannut kinaassutsimik allagartamik pisinnaavunga? Tassanimiutut oqalussinnaavunga, ilinniarnissaannulluunniit piumassuseqarpunga? Silaannaa kulturiallu eqqarsaatigaakka? Tassani uppeqatinnut ’tuppalliutaassanerpunga’ nanertuutaassannginnerlungalu? (Kolossemiut 4:10, 11) Nunami nuuffigerusussinnaasanni qanoq pisariaqartitsisoqartiginersoq paasiniarlugu, pitsaassaaq immikkoortortaqarfimmut nunami tassani oqaluussinermik nakkutilliiffiusumut allannissaq.a
20. Kristumiu inuusuttoq uppeqatimi allallu nunami allamiittut iluaqutissaannut qanoq imminut pilliutigeriaannarsimava?
20 Kristumiup Japanimi naalagaaffilersaarfinnik sanaartoqataasimasup paasivaa Paraguayimi naalagaaffilersaarfiliornissamut suleqataasussanik pikkorissunik pisariaqartitsisoqartoq. Oqaluussisartoq aappaqanngilaq, inuusuttuulluni uummaarissuullunilu, taamaattumik Paraguayimut nuuppoq qaammatinilu arfineq-pingasuni suleqataalluni, kisimi ulloq tamaat sulisutut. Tassaniitilluni Spaniamiusut ilinniarpoq arlalinnillu Biibilimik atuaqqissaaqateqarluni, aamma paasilerpaa tassani oqaluussisartunik pisariaqartitsisoqangaartoq. Japaniliallatsiariarluni Paraguayimut uterpoq inuit naalagaaffilersaarfimmut nammineq sanaqataaffigisaminut qaaqquniarlugit.
21. Suna aallunnerpaasariaqarparput, Jehovallu ullussarsua utaqqitillugu qanoq isiginnittaaseqartariaqarpugut?
21 Guutip isumagissavaa oqaluussinerup naammassineqarluinnarnissaa, piumasani naapertorlugu. Ullumikkut inaarutaasumik katersuineq siuarsarpaa. (Esaja 60:22) Jehovap ullussaa utaqqitillugu katersuinermi aallussilluarniarta, inuillu Guutitta asannittup isiginninneratut isiginiartigik. (wE 7/15 03)
[Quppernerup ataani ilanngussaq]
a Nunap oqaluussinermik inerteqqutiginniffiusup killilersuiffiusulluunniit nuuffiginera iluaqutaajuaannartanngilaq. Allaat tassani mianersorlutik oqaluussisartunut ajoqutaasinnaavoq.
Uteqqiinermi apeqqutit
• Jehovap ullussaa utaqqitillugu inuit qanoq isigisariaqarpavut?
• Iluartut Sodomamiissinnaasut Aaperaap qanoq isigai?
• Jonap Ninevemiut peqqissimisut qanoq isigai?
• Nutaarsiassamik nuannersumik suli tusarsimanngitsunut Jehovap isiginnittaasiatut isiginnilluta qanoq takutissinnaavarput?
[Qupp. 26-mi assiliartaq]
Aaperaat inunnut Jehovap isiginninneratut isiginnippoq
[Qupp. 27-mi assiliartaq]
Jona naggataatigut Ninevemiunut peqqissimisunut Jehovap isiginnittaasiatut isiginnittaaseqalerpoq
[Qupp. 28-mi assiliartat]
Inuit soqutigigatsigik nutaarsiassaq nuannersoq periaatsit piffissallu assigiinngitsut atorlugit oqaluussissutigaarput