Naleqarpianngitsutut misiginermik akiugaqarpit?

INUUNERMI sivisunersaani Lena imminut ajortumik isigisimavoq. Ima oqaluttuarpoq: „Meeraaninni ukiorpassuarni kinguaassiuutitigut atornerlugaanerup kingunerisaanik imminut tatigivallaarunnaarnikuuvunga. Atorsinnaanngitsutut misigisimavunga.“ Aamma Simone inuusuttuunerminiit nuanniitsunik eqqaamasaqarpoq. Ima oqarpoq: „Qamuuna imaqanngivissutut naleqarpianngitsutullu misigivunga.“ Misigissutsit taamaattut pissutigalugit ullumikkut inuppassuit pilluanngillat. Oqarasuaatikkut inuusuttuaqqanut siunnersuisarfimmiit oqaatigineqarpoq sianertut affangajaat „naleqarpianngitsutut misigalutik“ oqartartut.

Immikkut ilisimasallit naapertorlugit taama imminut annikigineq pilersarpoq allat nikassaagaangata. Assersuutigalugu taamatut misigisoqalersinnaasarpoq naveerneqartuaannaraanni, isornartorsiorneqartuaannaraanni, nikassarneqartuaannaraanni sualuttumilluunniit atornerlunneqarsimagaanni. Pissutaasoq suugaluarpalluunniit ajoqutaasumik allaallu aserorsaataasumik kinguneqarsinnaavoq. Qanittukkut nakorsaatitigut ilisimatusarnikkut misissuisoqarmat paasineqarpoq inuit naleqanngitsutut misigisut imminut uppererpiarsinnaanatillu allanik tatiginnippiarsinnaanngitsuusut; taamaattumillu qanittumik attaveqarnernut ikinngutigiinnernullu sianiginagu ajoqutaatilersinnaavaat. „Taamaalillutillu pissutsinut siooraginerpaasaminnut nammineq aqqutissiuuttarput,“ nalunaarusiami allassimavoq.

Inuit taamatut misigisut Biibilimi allassimasutut nammineq ’eqqarsaatiminnit eqqissiviilliortinneqartarput’. (Tussiaat 94:19) Imminnut nikagipput. Arlaannik ajortoqaraangat imminut pisuutipallattarput. Iliuutsitik pillugit nersualaarneqaraluarlutilluunniit qamuuna misigisarput peqquserluttuullutik qaquguluunniit paasineqariaannaasut. Amerlasuut imminut aseruutissaasumik iliuuseqartarput isumaqavikkamik pillualernissamut qinngaqqunnartuullutik. Taamatullu misigineq allanngortissinnaaneq ajorpaat. Lena, siuliani taaneqartoq, imminut ataqqinnginnini pissutigalugu nerinerup tungaanut isiginnittaatsimigut ilungersunartumik nappaateqalerpoq. Ima oqarpoq: „Iliuuseqarfigisinnaanagu misigisimavunga.“

’Eqqarsaatinik eqqissiviilliortitsisunik’ taamaattunik akiugaqartut, inuunermik sinnera taamatut atugaqartuassappat? Misigissutsit nikallornartut taamaattut akiorniarlugit iliuuseqartoqarsinnaava? Biibilimi najoqqutassiaqarpoq siunnersuuteqarlunilu atoriaannaasunik amerlasuut akiuunnerminni iluaqutigisimasaannik. Najoqqutassiat suut pineqarpat, taamatullu atugaqarsimasut ilaasa inuunerup nuannaarutigilernissaanut qanoq iluaqutigisimavaat? Allaaserisami tulliuttumi tamanna sammineqassaaq.