Jiisusip Guutip siunertaani inissisimaffia immikkorluinnaq ittoq pingaartiguk
“Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.” — JOHANNESI 14:6.
1, 2. Sooq Jiisusip Guutip siunertaani inissisimaffia immikkut ittoq soqutigisariaqarparput?
PIFFISSAP ingerlanerani inuppassuit immikkut ittunik allaassuteqarniarsarisimapput, ikittuinnaalli allaassuteqarniarnertik iluatsissimavaat. Suli ikinnerusut pissutissaqarluarlutik arlaatigut immikkorluinnaq ittutut imminut oqaatigisinnaapput. Jiisusili Kristusi, Guutip ernera, assigiinngitsorpassuartigut immikkorluinnaq ittuuvoq, imaluunniit asseqanngilluinnarpoq.
2 Sooq Jiisusip inissisimaffia immikkorluinnaq ittoq soqutigisariaqarparput? Tamanna Ataatatsinnut qilammiusumut, Jehovamut, attaveqarnitsinnut tunngassuteqarmat! Jiisusi ima oqarpoq: “Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.” (Johannesi 14:6; 17:3) Jiisusip immikkut ittuussutigisaasa ilaat misissoriartigit. Misissuinerput taassuma Guutip siunertaani inissisimaffianik paasinninnerulissutigissallugulu pingaartitsinerulissutigissavarput.
‘Ernituaq’
3, 4. (a) Sooq oqarsinnaavugut Jiisusi ernituatut immikkut ittumik inissisimaffeqartoq? (b) Jiisusip pinngortitsinermi inissisimaffia qanoq ililluni immikkut ittuua?
3 Jiisusi ‘Guutip erneraa’ nalinginnaanngitsoq. Saatanip Jiisusi usseramiuk ernertut nalinginnaasutut taavaa. (Matthæusi 4:3, 6) Jiisusilli ‘Guutip ernituanik’ taaneqartarnera naleqqulluarpoq. (Johannesi 3:16, 18) Grækerit oqaasiat ‘ernituaq’-mik nutserneqartoq ordbogini assigiinngitsuni “‘-tuaq’-tut, taama ittutuatut” imaluunniit “pituatut” imaluunniit “immikkut ittutut” nassuiarneqarsimavoq. Jehova hundrede millionilinnik anersaajusunik erneqarpoq. Taava Jiisusi qanoq ililluni ‘ernituaasinnaava’?
4 Jiisusi immikkorluinnaq ittuuvoq ima paasillugu Ataataata kisimiilluni, allanit ikiorneqarani, pinngortitarigaa. Angajulliliaavoq. Aap, “pinngortitaani tamani erniusut [siullersaraat]”. (Kolossemiut 1:15) ‘Guutip pinngortitaasa aallaqqaatigaat’. (Saqqummersitat 3:14, 1936) Ernituap pinngortitsinermi inissisimaffia aamma immikkut ittuuvoq. Pinngortitsisuunaniluunniit pinngortitanut pilerfiunngilaq, taannali aqqutigalugu Jehovap suut allat tamaasa pinngortippai. (Atuaruk Johannesi 1:3). Apustili Paulusi ima allappoq: “Uagut ataasiinnaq Guutigaarput, tassa Ataataq. Suut tamarmik taassumannga pipput, uagullu taassumunnga inuuvugut. Uagullu ataasiinnaq Naalagaraarput, tassa Jiisusi-Kristusi; suut tamarmik taassumuuna atapput — uaguttaaq.” — 1 Korinthimiut 8:6.
5. Jiisusip inissisimaffia asseqanngitsoq Biibilimi qanoq erseqqissarneqarpa?
5 Jiisusili aamma allarpassuartigut asseqanngilluinnartuuvoq. Taaguutit taassuma Guutip siunertaani immikkut ittumik inissisimaffeqarneranut erseqqissaataasut arlallit Biibilimi atorneqarput. Maanna Kristumiut Allagaataanni Grækerisuuni Jiisusimut taaguutigitinneqartut tallimat misissoriartigit.a
“Oqaaseq”
6. Sooq Jiisusip “Oqaaseq”-mik taaguuteqarnera naleqquppa?
6 Atuaruk Johannesi 1:14. Sooq Jiisusi “Oqaaseq”-mik, imaluunniit Logosimik, taaguuteqarpa? Taaguummi tamatumani erserpoq Jiisusi sianissusilinnik allanik pinngortitsisoqarmalli sulerisuusimanersoq. Jehovap ernini ernernut anersaajusunut allanut paasissutissiisoralugulu siunnersuisoraa, soorluttaaq tusarliussaminik inunnut nunarsuarmiittunut tusarliitittaraa. Jiisusip Oqaasiunera, imaluunniit Guutimut sinniisuunera, uppernarsarneqarpoq tusarnaartuminut juutinut nammineq ima oqarmat: “Ajoqersuutiga uanga nammineq piginngilara, aallartitsisimali pigaa. Taassuma piumasaa malillugu iliorumasup ilisimassavaa ajoqersuutiga Guutimit pisuunersoq uannilluunniit pisumik oqalunnersunga.” (Johannesi 7:16, 17) Jiisusip qilammi naalannassutsimut utereeraluarluni “Guutip Oqaasia” taaguutigiinnarpaa. — Saqqummersitat 19:11, 13, 16.
7. Jiisusip “Oqaaseq”-tut maniguunnera qanoq ilaarsinnaavarput?
7 Eqqarsaatigeriaruk taaguut taanna qanoq paasisariaqarnersoq. Jiisusi Jehovap pinngortitaasa tamarmik silatunerpaartaraat, taamaakkaluartorli nammineq ilisimassutsini tutsuiginngilaa. Oqaasii Ataataata ilinniartitsissutigisimasaanut naapertuupput. Imminut malugeqqunani Jehova malugeqqujuaannarpaa. (Johannesi 12:50) Uagutsinnut maligassaqqingaarami! Aamma ‘nalunaarummik nuannersumik aatsinermik’ immikkut pisinnaatitaaffilerneqarsimavugut! (Romamiut 10:15) Jiisusip maniguunnikkut maligassiaanik pingaartitsineq nammineq isummatsinnik saqqummiussinnginnissamut kajumississutigisariaqarparput. Tusarliussaq inuunartoq Biibilimeersoq tusarliukkaangatsigu ‘allassimasut qimmullugit isumaliorusuttanngilagut’. — 1 Korinthimiut 4:6, 1936.
“Amen”
8, 9. (a) Oqaaseq “amen” qanoq isumaqarpa, aamma sooq Jiisusi “Amen”-imik taaguuteqarpa? (b) Jiisusip “Amen”-itut inissisimaffini qanoq ililluni naammassivaa?
8 Atuaruk Saqqummersitat 3:14. Sooq Jiisusi “Amen”-imik taaguuteqarpa? Oqaaseq “amen”-imik nutserneqarsimasoq oqaatsimit hebræerisuumit “ilumut”-mik, “ilumuik”-mik “taamaalili”-millu isumaqartumit toqqaannartumik nutsigaavoq. Oqaatsimit hebræerisuumit “unneqqarissuseq”-mik imaluunniit “aalajaassuseq”-mik isumaqartumit naggueqarpoq. Jehovap unneqqarissusia oqaaseq taanna atorlugu allaatigineqarpoq. (5 Mosesi 7:9; Esaja 49:7) Jiisusi “Amen”-itut eqqartorneqaraangami sutigut immikkorluinnaq ittuusarami? Maluginiariaruk apeqqut tamanna 2 Korinthimiut 1:19, 20-mi qanoq akineqarnersoq: “Guutip ernera Jiisusi-Kristusi . . . ilissinni oqaluussissutigisarput tassaanngilaq angertarlunilu naaggaartarneq, angernerinnarli taassumaniippoq; Guutimmi neriorsuutai tamarmik taassumani angerneqarput. Taamaammat aamma taassumuuna aarmeertarpugut Guutip ataqqinaatissaanik.”
9 Jiisusi Guutip neriorsuutaanut tamanut “amen”-iuvoq. Inuttut kukkujuitsuulluni nunarsuarmi inuunera, aammattaaq pilliutitut toqunera, Jehovap Guutip neriorsuutaasa tamarmik eqquunnerannut uppernarsaataapput aamma taakkuninnga tamanik eqquussinnaanngortitsipput. Aamma Saatanip Guutimut kiffaasunik pissakilliulerunik, imaluunniit annikilliulerlutillu misilinneqarunik, Guutimik tunussissaneraanerata eqqunngitsuunera Jiisusip aalajaattuarnermigut uppernarsarpaa. (Jobi 1:6-12; 2:2-7) Guutip pinngortitaanit tamanit ernituaq taanna unnerluutiginnissummut tamatumunnga akerlilerneqarsinnaanngitsumik akisisinnaasutuaavoq. Aammattaaq Jehovap qilammut nunarsuarmullu eqqortumik kisimi oqartussaalluni naalakkersuinera pillugu akerleriissummi pingaarutilerujussuarmi Jiisusi Ataatani illersorlugu pitsaanerpaamik nalunaajaavoq.
10. Jiisusimik “Amen”-itut immikkut ittumik inissisimaffimminiittumik qanoq ililluta ilaarsisinnaavugut?
10 Jiisusimik “Amen”-itut immikkut ittumik inissisimaffimminiittumik qanoq ililluta ilaarsisinnaavugut? Jehovamut aalajaattuarnitsigut taassumalu qilammi nunarsuarmilu kisimi oqartussaaneranik tapersersuinitsigut. Taamaalilluta Ussatit 27:11-mi kajumissaarutigineqartoq una ajunngitsumik periarfigissavarput: “Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.”
‘Guutimut inunnullu akunnermiliuttoq’
11, 12. Jiisusip akunnermiliuttutut inissisimaffia qanoq ililluni immikkut ittuugami?
11 Atuaruk 1 Timotheusi 2:5, 6. Jiisusi ‘Guutimut inunnullu akunnermiliuttuuvoq’. ‘Akunnermiliuttuuvoq angerusisaamik pilersitsisoq’. (Hebræerit 9:15; 12:24) Aammali Mosesi eqqartorneqarpoq akunnermiliuttutut — Inatsisit tunngavigalugit angerutsimi akunnermiliuttutut. (Galatiamiut 3:19) Taava Jiisusip akunnermiliuttutut inissisimaffia qanoq ililluni immikkorluinnaq ittuugami?
12 Grækerit oqaasiat “akunnermiliuttoq”-mik nutserneqartartoq inatsisilerinermut tunngassuteqarpoq. Tamatumani pineqartoq tassaavoq Jiisusip angerusisaamut inuiaqatigiinnik nutaanik, ‘Israelimik Guutip pigisaanik’, pilersitsisinnaanngortitsisumut inatsisitigut akunnermiliuttuunera (imaluunniit “eqqartuussissuserisuunera”). (Galatiamiut 6:16) Inuiaqatigiit taakku tassaapput kristumiut anersaamik tanitaasut, qilammi ‘palaseqatigiiusut kunngikkormiut’. (1 Petrusi 2:9; 2 Mosesi 19:6) Inatsisit tunngavigalugit angeruseq, Mosesimik akunnermiliuttulik, inuiaqatigiinnik taama ittunik pilersitsisinnaasimanngilaq.
13. Jiisusip akunnermiliuttunngornera qanoq kinguneqarpa?
13 Jiisusip akunnermiliuttunngornera qanoq kinguneqarpa? Tassa Jehovap Jiisusip aavata nalinga angerusisaamut ilaasussat iluaqutissaannut atorpaa, taakku inatsisitigut naapertuilluartuutinneqarniassammata. (Romamiut 3:24; Hebræerit 9:15) Tamatuma kingorna Guutip taakku angerusisaamut ilaatilersinnaavai qilammilu kunngiunissamik palasiunissamillu neriuutissillugit! Jiisusip taakkununnga akunnermiliuttuugami Guutimut minguitsumik attaveqartuarnissaannut ikiussavai. — Hebræerit 2:16.
14. Sooq kristumiut tamarmik, qanorluunniit neriuuteqaraluarunik, Jiisusip akunnermiliuttutut inissisimaffianik pingaartitsingaartariaqarpat?
14 Angerusisaamummi ilaanngitsut, nunarsuarmi — qilammiunngitsoq — naassaanngitsumik inuunissamik neriugisallit? Taakku angerusisaami peqataanngillat, tamannali iluaqutigaat. Ajortiminnik isumakkeerfigineqartarput Guutimullu ikinngutaasutut naapertuilluartuutitaasarlutik. (Jaaku 2:23; 1 Johannesi 2:1, 2) Qilaliarnissamik nunarsuarmiluunniit inuunissamik neriugisaqaraluarutta tamatta immikkut Jiisusip angerusisaami akunnermiliuttutut inissisimaffianik pingaartitsinissamut pissutissaqarluarpugut.
‘Palasiuneq’
15. Jiisusip palasiunertut inissisimaffia palasiunerit allat tamarmik inissisimaffigisimasaannit qanoq allaanerua?
15 Itsaq anguterpassuit palasiunerusimapput, Jiisusilli palasiunertut inissisimaffia asseqanngilluinnarpoq. Qanoq ililluni? Paulusi ima nassuiaavoq: “Palasiunertut allatut nammineq ajortini peqqaarlugit taavalu inuiaqatimi ajortaat pillugit ullut tamaasa [pilliisariaqanngilaq], ataasiaammik taamaalioreersimagami imminik pilliutiginermigut. Inatsisit inuit qajannartut palasinngortittarpaat, kisianni oqaatsip uppernarsaatip inatsisinit nutaanerusup ivertippaa erneq anguniakkamut anngussimasoq ittuinnartussamik.” — Hebræerit 7:27, 28.b
16. Sooq Jiisusip pilliutaa immikkorluinnaq ippa?
16 Jiisusi inuusimavoq naammalluinnartoq, Adamip naligilluinnagaa, taanna ajortuliunngikkallarmat. (1 Korinthimiut 15:45) Taamaattumik inuuvoq pilliummik naammalluinnartumik — pilliutigineqaqattaartariaqanngitsumik — pilliuteqarsinnaasutuaq. Mosesip inatsisaasa atuunneranni ullut tamaasa pilliuteqartoqartarpoq. Pilliutilli taamaattut palasillu kiffartuutigisaat tamarmik Jiisusip naammassiumaagaasa tarraannaraat. (Hebræerit 8:5; 10:1) Taamaattumik Jiisusip palasiunertut inissisimaffia immikkorluinnaq ippoq, palasiunernit allanit naammassisaqarnerusinnaagami aamma palasiunerujuartussaagami.
17. Sooq Jiisusip uagutsinnut palasiunertut inissisimaffia qujamasuutigisariaqarparput, qujamasunnerpullu qanoq ililluta ersersissinnaavarput?
17 Jiisusip palasiunerunissaa pisariaqartipparput akuerisaasumik Guutimut attaveqarsinnaajumalluta. Uagutsinnullu palasiunerusoq nuanningaarami! Paulusi ima allappoq: “Palasiuneqanngilagut qajannassutsitsinni naakkiginnissinnaanngitsumik, kisianni tamatigut uagutsitut usserneqarsimasumik, ajorteqanngitsumilli.” (Hebræerit 4:15) Tamatuminnga qujamasuutiginninnerput ‘imminut pilluta inuujunnaarnissamut, uagutsinnilli toqqutiginnittoq pillugu’ inuunissamut kajumississutigisariaqarparput. — 2 Korinthimiut 5:14, 15; Lukasi 9:23.
“Kinguaassaq” siulittuutigineqartoq
18. Adamip ajortuliornerata kingorna suna siulittuutigineqarpa, kingusinnerusukkullu siulittuut taanna pillugu suna paasinarsisinneqarpa?
18 Taamani Edenimi inuiaat sunik tamanik — Guutimut minguitsumik attaveqarnermik, inuunermik naassaanngitsumik, pilluarnermik Paratiisimillu — annaasaqarsorinarsimmata Jehovap Guutip annaassisoqarnissaa siulittuutigaa. Annaassisussaq taanna ‘kinguaassatut’ eqqartorneqarpoq. (1 Mosesi 3:15, NV) Kinguaassaq kinaassusersineqanngitsoq taanna piffissap ingerlanerani siulittuutini Biibilimiittuni arlalinni pingaarnersaavoq. Aaperaamut, Iisaamut Jaakumullu kinguaajusussaasimavoq. Aamma kunngimut Daavimut kinguaajusussaasimavoq. — 1 Mosesi 21:12; 22:16-18; 28:14; 2 Samueli 7:12-16.
19, 20. (a) Kinguaassaq neriorsuutigisaq kinaava? (b) Sooq oqartoqarsinnaava kinguaassaq siulittuutigisaq Jiisusiinnaanngitsoq?
19 Kinguaassaq neriorsuutigisaq taanna kinaava? Apeqqummut tamatumunnga akissut Galatiamiunut allakkani 3:16-imiippoq. (Atuaruk). Kapitalimili matumani Paulusip nangilluni kristumiut tanitat ima allaffigai: “Kristusip pigimmasi Aaperaattaaq kinguaaraasi, kingornussisussanngortitaavusilu Guutip neriorsuutaa tunngavigalugu.” (Galatiamiut 3:29) Kristusip kinguaassatut neriorsuutigisaanera, aammali allat kinguaassaanerat, qanoq paasisariaqarami?
20 Inuit millionillit Aaperaamik siuaasaqarnerartarput, ilaallu allaat pruffiitiunerartarput. Upperisarsioqatigiit ilaasa pruffiititik aalajangersimalluinnarlutik Aaperaamik siuaasaqarnerartarpaat. Taakkuli tamarmik tassaappat kinguaassaq neriorsuutigisaq? Naagga. Soorlu apustilip Paulusip isumassarsisitaalluni nassuiaraa, Aaperaap kinguaavisa ilaannai eqqortumik oqarsinnaapput kinguaassaallutik neriorsuutigisaq. Aaperaap ernerisa allat kinguaavi inuiannik pilluaqqusinermut atorneqanngillat. Kinguaassaq pilluaqquneqaataasussaq taamaallaat Iisaaq aqqutigalugu tikiuttussaavoq. (Hebræerit 11:18) Pingaarnerpaamik inuk ataasiinnaq, Jiisusi Kristusi, kinguaassap siulittuutigineqartup pingaarnerusortaraa, taassumalu Aaperaamut kinguaajunera Biibilimi uppernarsarneqarpoq.c Aaperaap kinguaassaata pingaannginnerusortaanut kingusinnerusukkut ilaalersut tamarmik ilaalerput ‘Kristusip pigimmatik’. Aap, siulittuutip tamatuma eqquunnerani Jiisusip inissisimaffia ilumut asseqanngilluinnarpoq.
21. Jiisusip Jehovap siunertaani inissisimaffianut immikkorluinnaq ittumut tunngatillugu illit suna killinneqaatigaajuk?
21 Jiisusip Jehovap siunertaata naammassineqarnerani inissisimaffianik immikkorluinnaq ittumik misissuilaarnerput sumik ilinniarfigaarput? Aap, tassa Guutip ernitua pinngortinneqarnerminiilli immikkorluinnaq ittuuvoq, asseqanngilluinnarluni. Taamaakkaluartorli Guutimut ernerusoq asseqanngitsoq taanna Jiisusinngortoq Ataatami piumasaanut naapertuuttumik maniguulluni kiffartortuarpoq namminerlu ataqqineqarnissani noqqaassutigisarnagu. (Johannesi 5:41; 8:50) Tamanna ullumikkut uagutsinnut maligassaqqilluinnarpoq! Qanortoq uagut, Jiisusip pisimaneratut, ‘qanorluunniit ilioraangatta Guutip ataqqinaatissaanik taamaaliortarnissarput’ anguniagarisigu. — 1 Korinthimiut 10:31.
[Quppernerup ataani ilanngussat]
a Taaguutit taakkua ilaat allanneqarsimapput taannaasorsiummik grækerisuumik ilisarsiniutitalerlugit, tamatumanilu ersersinneqarpoq, Biibilimik ilisimatuup oqarneratut, taaguut “‘immikkut ittutut’ oqaatigineqarsinnaasoq”.
b Biibilimik misissueqqissaartartoq naapertorlugu oqaatsimi “ataasiaammik”-mik nutserneqarsimasumi ersersinneqarpoq oqariartaaseq Biibilimi atorneqartartoq pingaarutilik “Kristusip toqunerata naggataarutaaneranut immikkorluinnarlu issusianut eqqaanartoq”.
c Ukiuni hundredelinni siullerni juutit isumaqaraluarlutik Aaperaamut kinguaajusutut inuianngussallutik iluarisaasut, inuup ataasiinnaap Missiarsitut, imaluunniit Kristusitut, tikiunnissaa ilimagaat. — Johannesi 1:25; 7:41, 42; 8:39-41.
Eqqaamavigit?
• Jiisusip inissisimaffia immikkorluinnaq ittoq pillugu taassumunnga taaguutigitinneqartut sumik paasisaqarfigaagit? (Takuuk ungalusaq).
• Jehovap ernerata asseqanngilluinnartup maligassiaa illit qanoq malissinnaaviuk?
[Qupp. 23-mi ungalusaq/assiliartaq]
Taaguutit Jiisusip Guutip siunertaani immikkorluinnaq ittumik inissisimaffeqarneranut ersiutaasut ilaat
◼ Ernituaq. (Johannesi 1:3) Jiisusi Ataataata kisimiilluni, allanit ikiorneqarani, pinngortitatuaraa.
◼ Oqaaseq. (Johannesi 1:14) Jehovap ernini sinniisoraa, pinngortitanut allanut paasissutissanik siunnersuutinillu ingerlatitseqqittartoq.
◼ Amen. (Saqqummersitat 3:14) Jiisusip inuttut kukkujuitsutut nunarsuarmi inuunera, aammattaaq pilliutitut toqunera, Jehovap Guutip neriorsuutaasa eqquunnerannut uppernarsaataapput aamma taakkuninnga eqquussinnaanngortitsipput.
◼ Angerusisaamut akunnermiliuttoq. (1 Timotheusi 2:5, 6) Jiisusi inatsisitigut akunnermiliuttuugami inuiaqatigiinnik nutaanik, ‘Israelimik Guutip pigisaanik’, kristumiunik qilammi ‘palaseqatigiiusussanik kunngikkormiunik’, pilersitsisinnaanngortitsivoq. — Galatiamiut 6:16; 1 Petrusi 2:9.
◼ Palasiuneq. (Hebræerit 7:27, 28) Jiisusi kisiartaalluni pilliummik naammalluinnartumik pilliutigineqaqattaartariaqanngit- sumik pilliuteqarsinnaavoq. Ajortivut nungullugit minguiarsinnaavaatigut ajortillu kingunerinit toqussutaasinnaasunit aniguisissinnaalluta.
◼ Kinguaassaq neriorsuutigisaq. (1 Mosesi 3:15) Inuk ataasiinnaq, Jiisusi Kristusi, kinguaassap siulittuutigineqartup tamatuma pingaarnerusortaraa. Aaperaap kinguaassaata pingaannginnerusortaanut kingusinnerusukkut ilaalersut ‘Kristusimit pigineqarput’. — Galatiamiut 3:29.