Sooq Guutip naalagaaffia soqutigissaviuk?

Silarsuarmi inuit millionilikkuutaat Guutip naalagaaffia neriuffigaat. Jiisusip ajoqersukkaminut qinunermut najoqqutassiaa malillugu taakku ima qinusarput: “Naalagaaffiit tikiulli, piumasat qilammisut nunamissaaq pili.” — Matthæusi 6:10.

Inuppassuit Guutip naalagaaffianik soqutiginningaaraluartut upperisarsiornerni amerlanerni Guutip naalagaaffia malunnartinneqarpianngilaq. Oqaluttuarisaanermik ilisimatooq H. G. Wells allappoq malunnartoq Jiisusip “Qilammiup naalagaaffianik taasaminik ajoqersuinini qanoq pingaartitsigigaa” aamma “ilagiit kristumiuunerartut amerlanersaasa ... qanoq pingaartinngitsigigaat”.

Ilagiinnit taakkunannga allaanerullutik Jehovap Nalunaajaasuisa Guutip naalagaaffia pingaartingaarpaat. Una eqqarsaatigiuk: Atuagassiaaterput pingaarneq, maannakkut atuakkat, oqaatsini 220-ni saqqummersinneqartarpoq. Normui tamarmik 46 millionit pallillugit naqiterneqartarmata silarsuarmi atuagassiat siammarsimanerpaartaraat. Atuagassiallu tamatuma pingaarnertut suna tusarliuttarpaat? Taaguutaa tamaat malugiuk: Napasuliaq Alapernaarsuiffik Jehovap naalagaaffianik tusarliussisoq.a

Sooq Jehovap Nalunaajaasui Guutip naalagaaffia tusarliunniarlugu taama iliuuseqartigippat? Ilaatigut upperigatsigu silarsuarmi atuakkat pingaarnerpaartaanni, tassa Biibilimi, Guutip naalagaaffia tusarliussat pingaarnersarigaat. Aammami upperilluinnarparput Guutip naalagaaffia ullumikkut inuit ajornartorsiutaannut aaqqiissutissatuaasoq.

Jehovap Nalunaajaasuisa Guutip naalagaaffianik soqutiginnilersitsiniarlutik Jiisusip maligassiaa sapinngisaminnik malippaat. Jiisusi nunamiikkallarami inuunermini oqaluussinerminilu Guutip naalagaaffia pingaarnerpaatippaa. (Lukasi 4:43) Sooq Guutip naalagaaffia Jiisusip taama pingaartitsigaa? Ilinnullu qanoq iluaqutaasinnaava? Apeqqutit taakku allaaserisani tulliuttuni Biibili tunngavigalugu akissutissarsikkit.