Atorfissaqartitaq neqeroorutigiuk
1 Jehovap peqatigiissortaasa takusaasut atortussanik assigiinngitsunik amerlasuunik oqaluussinitsinni ajoqersuinitsinnilu iluaqutaasinnaasunik tunisimavaatigut. (Mat. 28:19, 20) Tamakku pingaartikkutsigik, kiffartuussinitsinni atorluarniassavavut.
2 Savat assersuutaasut inuunermut aqqummut sangutinniarnerini atuagaativut, atuagassiaativut atuagassiaaraativullu iluaqutigisaqaavut. Oqaloqatigiinnermi immaqa paasisarparput pulaarfigisap aalajangersimasoq immikkut soqutigigaa. Tamanna pillugu siornatigut allataasimasut ilisimalluarutsigik, saqqummiinnerput tamatumunnga naleqquttunngorsarsinnaavarput aammalu atuagaq, atuagassiaq atuagassiaararluunniit pulaarfigisap soqutigisaanik imaqartoq neqeroorutigalugu. Immaqa atuagaq atuagassiaararluunniit eqqarsaatigisarput nassarlugu pulaarfigeqqinnissaanik neqeroorfigisinnaavarput.
PISSUTSINUT SUNULLUUNNIIT PIAREERSIMASUUGIT
3 Oqaluussiffigisatsinni peqqissaartumik suligutta inuit Bibelimik peqqusersuillutik soqutigisallit tamatuminngalu ilinniarnerorusuttut naniumaarpavut. Naqitigaatitta ilaat sunaluunniit atuarunikku paasisaqarnerusinnaapput. Bibelimilli upperisaqanngitsoq, Bibelimik imminut akerliuneraasoq ilisimatoorpalaartuunnginneraasorluunniit, oqaloqatigigutsigu, atuagaq Bibelen — Guds ord eller menneskers? saqqummiutissallugu iluaqutaassaaq. Atuakkap tamatuma inuit Bibelimik isornartorsiuinerat annertuumik naqqissorpaa erseqqissumillu takutillugu sooq Bibeli Guutip oqaasiatut isigineqartariaqartoq. Immaqaluunniit atuagaq Menneskets søgen efter Gud saqqummiussinnaavarput kapitalillu 14-16-t innersuussutigalugit.
4 Naapitatta ilarpassui namminneq ajornartorsiuteqarput. Immaqa Bibelimi unnersuussutit tusaamavallaanngilaat imaluunniit atorneqarnissaat nalullugu. Ajornartorsiutiminnik aaqqiinissaannik ikiorniarlugit neqeroorutigisinnaavarput Ilaqutariilluni inuuneq pilluarnartoq qanoq anguneqarsinnaasoq, imaluunniit ’Lykkebogen’-imi kapitalit 5-8-t innersuussutigisinnaallugit. Allannguutit ingerlaannaq pinaviarunanngikkaluarput, takutissinnaavarpulli unnersuussutit Bibelimeersut atorluarsinnaasut.
5 Meeraqartut oqaloqatigigutsigik, atuakkat ingammik meeqqanut inuusuttunullu allagaasut neqeroorutigisinnaavavut. Immaqa Unge spørger — Svar der duer atorsinnaavarput. Oqaluussisartut amerlasuut angajoqqaat meeqqallu ikiorsimavaat bîbilimik oĸalugtuautíka imaluunniit Ajoĸersuissorssuaĸ tusarnârparput saqqummiullugit.
6 Naqitigaaqqat nassaruminartuupput, illumiillu illumut oqaluussigaangatta imaluunniit sukkulluunniit nalunaajaagaangatta oqaloqateqalernissamut iluaqutaapput. Asasatsinnut toqungasunut sumik neriuutissaqarpa? tassaavoq naqitigaaraq tuppallersaasoq pitsaasunik paasissutissalik. Tamatigut naqitigaaqqat assigiinngitsut arlallit nassartarpigit? Pissutsini suni atorsinnaaneritit tunniukkukkillu qanoq oqaaseqarsinnaanerit eqqarsaatigisimaviuk?
7 Allanut tusagassamik nuannersumik oqaluussinitsinni Bibelimik ilinniaqqissaarnermut atortussat amerlaqisut inussiap aalajaallunilu silatup naqitertitai atorluarumavavut. (Mat. 24:45-47, NV) Anersaakkut inuussutissat naammattorsuit tamakku Jehovap tukkussusianik inuiannullu tamanut isumaginninneranik takutitsipput.