Oqaluussinermi Bibeli atortaruk
1 Bibelimi oqaatsit isumassarsiarititaasut inunnik annertuumik sunniisinnaapput. Kristumiut siulliit tamanna ilisimavaat, taamaattumillu tusagassamik nunannersumik oqaluussigaangamik Allakkat atorluartarpaat. Paulusip ’Allakkat tunngavigalugit inuit eqqarsalersinniarlugit oqaloqatigisarsimavai’, tunngavilersuutini nassuiarlugit innersuussinermigullu uppernarsartarlugit. (ap. sul. 17:2, 3) Apollosip juutit ilaat oqaluussiffigigamigit, ’allakkatigut nalunaarluinnarpaa Jesus Messiasiusoq’. — ap. sul. 18:24-28.
2 Ullumikkut Jehovap nalunaajaasuisa taakkua maligassiaat malippaat. Soorlu Vagttårnet 1. marts 1986 qupperneq 26-mi allassimasoq: „Tamanut oqaluussigaangamik inuit paasitinniartarpaat tusarliussartik namminneq piliarinngikkitsik Guutilli oqaasianeersuusoq. Taamaattumik oqaluussigaangamik Bibeli nassartarpaat, sapinngisaminnillu tamatumannga allat atuffanniartarlugit.“ Illit oqaluussigaangavit Bibeli atorluartarpiuk?
SOOQ BIBELI SUNNIULLUARTARTOQ
3 Sooq Bibeli taama sunniulluartartigaa? Guutip oqaaserigamiuk ’uummatillu eqqarsartai isumaalu killisiorsinnaagamigit’. (Epr. 4:12) Sallusuissutip Bibelimeersup inuup pissusivia qulaartarpaa. Inuit peqqusersuitsut Bibeli kajungeraat. Assersuutigalugu, aappariit inuusuttut Jehovamik kiffartuussinermi siumukartut aperineqarsimapput suna pissutigalugu erniinnarluinnaq tusagassamik nuannersumik ilassinnissimanersut. Akipput: „Bibeli pissutaalluni.“ Oqaluussisartut taakkununnga pulaaqqaartut Bibeli innersuutigimmassuk, ’paarsisup ajunngitsup nipaa’ ilisarilerpaat. — Juá. 10:14; wGL79 1/9 qup. 10, 11.
4 Oqaluussinermi Bibeli atoraangakku ilaanikkut naammanngitsutut misigisimasarpit? Nammineerlutit ilinniaqqissaartarnermi pilersaarussiorluaruit aammalu ataatsimiinnernut tamanut piareersartarlutillu peqataasaruit, ’ajunngitsuliornernut tamanut piginnaanngorumaarputit’ imminullu ataqqinerulerlutit. (2 Tim. 3:16, 17) Eqqarleriit oqaluussisartullu oqaluusseqatigiittut oqaluussissutigisassaq sungiusaqatigiissutigisinnaavaat. Aallarniutissat amerlanersaanni ’Ræsonnerebogi’ quppernerni 9-15-imiittuni allassimaffeqarpoq oqaloqatigiinnerup aallaqqaataani atuffassissutigineqartussanik. Taakkua ilaannik sungiusarniarit. Taakkua ilaannik nuannarisannik oqaluussiffigisannilu inunnik soqutiginnilersitsinnaasorisannik qinersigit.
SIUNEQASSUSEQARIT
5 Ilaannikkut pitsaasarpoq pulaarfigisaq nammineq bibeliminit allassimaffimmik quppiisissallugu. Periarfissani tamakkunani siuneqassuseqarit. (Takuuk ’Ræsonnerebogi’, qupperneq 56, immikkoortoq 3, aamma qupperneq 264, immikkoortoq 4.) Naatsunnguaannarmik oqaaseqartariaqassagaangatta, immaqa allassimaffimmik ataasiinnarmik pulaarfigisaq atuffakkumassavarput. Nalunanngitsumillu ulapippat allassimaffik naleqqulluartoq issuaannarsinnaavarput nassuiarlugulu Bibelimi allassimasoq. Allakkat Hebræerisuut-nik oqaluussigaangamik nassarsinnaasaminnik Jesus apustiliilu namminneq peqarsimanngillat. Taamaattorli allassimaffippassuit issuartarpaat. Uaguttaaq allassimaffiit ilaasa oqaluussinermi atorsinnaasatta alanngaarnissaat ilinniartariaqarparput.
6 Paulusip Timoteus ’oqaatsimik sallusuissutip pianik tunioraalluarnissaanik’ kajumissaarsimavaa. (2 Tim. 2:15) Oqaaqqissaarut tamanna uatsinnuttaaq tunngavoq. Oqaluussinermi Bibeli atorluarlugu Jesus apustilillu malinniarpavut. Oqaluussinitsinni sapinngisatsinnik akulikitsunik atuffassissutigisartigu, pisariaqaraangallu eqqaamanninnerput naapertorlugu issuarnissaanut piareersimalluta. Taamaaliorutta erseqqissaaq Guutip kiffarigaatigut tusarliussarpullu taassuma oqaasianik tunngaveqartoq. (kmD 5/91 Brug Bibelen i forkyndelsen)