Ilagiit atuakkamik atuaqqissaaqatigiittarnerannik aaqqissuussaq
Imm. 1: Atuaqqissaarnermik siulersuisup suliassaa akisussaaffialu
1 Ilagiit atuakkamik atuaqqissaaqatigiittarnerat Jehovap innuttaasa anersaakkut ineriartornerannut pingaaruteqartorujussuuvoq. Qaammatini aggersuni ilagiit atuakkamik atuaqqissaaqatigiittarnerata immikkoortortai assigiinngitsut sammissavavut, eqqarsaatigissallugulu aaqqissuussaq tamanna qanoq ililluta iluaqutigisinnaagipput. Maanna sammissavarput atuakkamik atuaqqissaaqatigiinnermik siulersuisup qanoq ililluni atuaqqissaarneq kajumissinartunngorlugulu uppernikkut nakussannartunngortissinnaagaa.
2 Atuaqqissaarnermik siulersuisoq sunniuteqarluartumik ilinniartitsissaguni piareersarluartariaqarpoq. Apeqqutit tamarmik akissutissaat ilisimasariaqarpai aammattaarlu sooq akissutit taamaannerat paasisimasariaqarlugu. Atuaqqissaaqataasullu tamaasa akissutit tunngaviinik paasinninnissaannik ikiornissaat ilungersuutigisariaqarpaa. (1 Pîtr. 3:15) Taamaaliorpat atuaqqissaaqataasut atuaqqissaaqatigiissutiminnik pingaartitsinerulissapput.
ATUAQQISSAARNERMIK SIULERSUISUP ANGUNIAGAA
3 Atuaqqissaarnermik siulersuisup anguniagaa tassaavoq atuaqqissaaqatigiissutigisaq atorlugu atuaqqissaaqataasut uppernerannik nakussatsitsiniaanissani Guutillu piumasaanik iliornerulernissamik kajumissuseqarnerulersitsiniaanissani. (Tuss. 110:3; 2 Tás. 1:3-5) Tamanna angussaguniuk atuaqqissaarnermik siulersuisoq naleqquttumik unillatsiartariaqartassaaq oqaluuserisat Jehovamik, taassuma oqaasianik peqatigiissortaanillu tatiginninnerulersitsisinnaasut itisilerneruniarlugit. (Gal. 6:6) Uppernikkut nakussatsissutaasinnaasut erseqqissarnerujumallugit piareersarluarsimasaminik apeqquteqartarsinnaavoq, piffissaqarnini naapertorlugu.
4 Anguniagaata aappaa tassaavoq atuaqqissaaqatigiissutigisap iliuuseqarnikkut qanoq ililluni atorneqarsinnaaneranik paasinninnissaanik atuaqqissaaqataasut tamaasa ikiornissaat. Qanoq ilillutik oqaluussinermi atorsinnaavaat? Qatanngutinik kajumissaanissamut? Ilaquttaminnik imminullu nakussassaanissamut? Atuaqqissaaqatigiinnermik siulersuisup piareersarnermini paasiniartariaqarpaa oqaluuserisat immikkut ittut qanoq iliuuseqarnikkut atorneqarsinnaasut.
5 Atuaqqissaaqatigiissutigisap ilaa qanigisanut uppinngitsunut, atuaqatinut suleqatinulluunniit atorneqarsinnaavoq. Ilaalu alla immaqa inoqutigiinni aveqqasuni najugalinnut imaluunniit ilaqutariinnut ataasiinnarmik pilersuisulinnut ikiuutaasinnaavoq. Atuaqqissaaqatigiinnermik siulersuisup immaqa atuaqqissaaqataasut qanoq ilillutik atuaqqissaaqatigiissutigisaminnik atuisinnaanerminnik eqqarsalersinniarnerisigut namminneernerullutik oqaaseqarnissaannik ikiorsinnaavai. Atuaqqissaaqatigiinnerup soqutiginartuunissaa ilungersuutigisariaqarpaa, apeqqutit-akissutillu kisimiunngitsoq sammineqarniassammata. — Naleqqiuguk Korintumiunut agdlagkat sujugdlît 14:9, 19.
INUTTUT SOQUTIGINNINNERMIK ERSERSITSIGIT
6 Atuaqqissaaqatigiinnermik siulersuisup atuaqqissaaqataasut tamaasa immikkut inuttut soqutiginninnermik ersersitsiviginerisigut tamarmik peqataanissaannik kajumissisissinnaavai. Ittoortut siusinnerusukkut qinnuigisinnaavai allassimaffimmik atuarnissaannik, imaluunniit apeqqummik akisassaminnik piareersarnissaannik. Atuaqqissaaqataasut tamarmik namminneq oqaatsiminnik akisalernissartik ilungersuutigisariaqarpaat. Atuaqqissaaqatigiinnermik siulersuisup akissutinik tusarnaarluartarnermigut nalilerniarsinnaavaa kikkut ikiorneqarnissaminnik pisariaqartitsinersut. Misilittagaqarnerusut ikiorneqartariaqartunik ikiuisissinnaavai.
7 Ilagiit atuakkamik atuaqqissaaqatigiittarneri uagutsinnut iluaqutissaapput. Ikittunnguakkuutaarluta naapeqatigiinnissatsinnik tamattalu immikkut ikiorneqarnissatsinnik periarfissippaatigut. Ataatsimiinnernit allanit pingaannginnerusutut isigilinngisaannassavavut. Jehovamut uppernerpit nakussatsinnissaa Guutillu anersaakkut tunissutaanik qujamasunnerulernissat atuakkamik atuaqqissaaqatigiinnermi siulersuisussi tamatigut suliassamisut isigisarpaa. (kmD 7/91 Menighedsbogstudieordningen — 1. del)